SUPLEMEN PA MORIA GBKP TGL. 26 JAN. - 1 PEB. 2025

Pdt. Larena Sinuhadji (Nd. ReyRapha Tarigan)

Si Man Ogen : Galati 6:6-10

Tema : SI ISUAN MANUSIA, E KA IPERANINA

Tujun : Gelah Moria :

- Niksiki ulih peranin i bas perukuren manusia ras i bas perukuren Kesah Si Badia

- Nuratken bentuk perbahanen si mehuli si encidahken kita enggo jadi pasu-pasu sue ras sasaran pelayanen 2024

Metode : Nuratken ras ngogeken

Penaruh

Hukum sebab akibat akap kami enggo radu ras siteh. Kai pe si ilakoken kita pasti lit akibatna, baik si mehuli entah pe sebalikna si la mehuli. Umpamana, erkiteken la kita man minem pepagi nari seh berngi, mesui beltek ras takalta. I bas kiniteken kalak Kristen lit istilah “hukum tabur tuai” si antusenna kira-kira seri tas hukum sebab akibat. I bas PA-ta si pemena i bas tahun 2025, radu ras kita erlajar kerna hukum tabur tuai erpalasken si man ogenta sendah.

Mpebagesi Si Man Ogen

Perpulungen-perpulungen i Galati e me Rasul Paulus si mantekisa amin pe la lit informasi si jelas ndigan tepatna ia manteki piga-piga perpulungen i wilayah Galati e. Kemungkinen sanga Paulus ras Barnabas reh ku Likaonia (Perb. Rasul 14:6-7) je ipantekina perpulungen i wilayah Galati, sebab Likaonia e me sada kuta si lit i bas wilayah Galati (Alkitab LAI Edisi Studi, 2010, hlm. 1806). Tapi si pentingna, perpulungen Galati ipanteki Paulus sope sidang i Jerusalem (Perb. Rasul 15), sebab i bas sidang e nge kerasulen ras pelayanen Paulus iakui rasul-rasul si deban.

Tujun surat Paulus man Perp. Galati e me gelah perpulungen kalak si tek paksa si e la terbaba ajaren-ajaren si papak si iajarken guru Jahudi si mewajibken sunat sebage syarat keselamaten. Janah i bas surat enda imotivasi Paulus gelah reh paguhna perpulungen kalak si tek paksa si e geluh erkiniteken man Dibata i bas Yesus Kristus. 

Judul i bas perikop si man ogenta sendah e me “Sisampat-sampatenlah i bas maba baban nggeluh enda” (Alkitab TB-LAI, “Saling membantulah kamu”), e me bagin pendungi surat si isina pedah-pedah praktis si harus ilakoken perpulungen i bas kegeluhen si tep-tep wari. 
Secara khusus si jadi fokus i bas PA-ta sendah, ay. 6-10, imotivasi Paulus perpulungen, gelah ula erleja-leja erbahan si mehuli, sabab kai si isuan manusia e ka nge si iperanina. Adi merdang kita i bas juma perukuren secara manusia (si nggesuh, rubati, mecimberu, perampus, dll., nehen bindu 5:19), maka hasilna pe si la mehuli sialoken kita. Tapi adi nuan kita i bas juma Kesah Si Badia maka hasilna pe si mehuli, e me kegeluhen si rasa lalap i bas Kesah Si Badia e nari. Emaka i bas tep-tep kesempaten, sibahanlah si mehuli man kerina manusia, terlebih-lebih man teman-temanta si sada kiniteken.

I bas kita ngangkai kalimat, “Si isuan manusia e ka nge iperanina” (bhs. Ind.: “Apa yang ditanam, itulah yang dituai”), akap kami harus siangkai secara rohani, amin pe mungkin saja hukum tabur tuai enda terjadi i bas kegeluhen si nyata. Sebab i bas kinatana, kai si mehuli si ilakoken kita lenga bo pasti si mehuli si iperani kita. Melala turi-turin i bas Pustaka Si Badia si nuriken kerna kegeluhen kalak si tek si hasilna justru kiniseran, perbeben si mberat, bahkan kematen, bagi si ialami Yesus Kristus. Tapi kedungenna datken kegeluhen si rasa lalap, dame sejahtera, sukacita si la erkeri-kerin i surga. Emaka i bas si e, hukum tabur tuai enda harus siantusi secara rohani, i ja Dibata mereken ganjaran si setimpal man kalak si ngelakoken kerina si jadi peraten Dibata, bage pe man kalak si tek si ngelakoken kejahaten. 

Pengkenaina

PA-ta sendah i bas rangka evaluasi pelaksanaan sasaran pelayanen GBKP tahun si lepas, “Berkarya dan berguna untuk orang lain.” I bas tujun si peduaken bage pe i bas metode PA-ta sendah, ibereken kesempaten man banta Moria gelah nginget ras nuratken bentuk-bentuk perbahanen si mehuli si encidahken kita enggo jadi pasu-pasu sue ras sasaran pelayanen 2024. Mungkin lit kesan-kesan khusus, entah pe lit kendala-kendala si erbahanca kita la maksimal i bas kita jadi pasu-pasu man kalak si deban, banci je isuratken kita. Mbera, memang tuhu-tuhu kita enggo berkarya dan berguna untuk orang lain. Adi lenga maksimal, marilah tetap sipegeluh semangat berkarya dan berguna untuk orang lain e lit i bas dirinta, amin pe sasaran pelayanan i bas tahun enda enggo berganti.

Hal si peduaken si akap kami penting e me pengangkanta kerna hukum tabur tuai erpalasken kinitekenta bage pe ogenta sendah. Si pemena si harus isadari kita e me perbahanen si mehuli si ilakoken kita lenga tentu berbuah seri ras perbahanenta. Umpamana, keleng ateta temanta, temanta ndai lenga bo tentu keleng man banta. Sisampati temanta si lit i bas kesusahen, temanta ndai lenga bo tentu peduli man banta sanga kita lit i bas kiniseran. Bage pe i bas dampar si deban, lenga tentu iperani kita penghargaan erkiteken enggo sisuan entah pe siperjuangken si benar i bas kegeluhenta. Bahkan mungkin si idatken kita perbeben ras kiniseran erkiteken enggo siperjuangken kita si benar sue ras peraten Dibata. Ertina, ula erpengarapen man doni enda, erpengarapenlah man Dibata, sebab Dibata ngenca si pasti mereken si mehuli man banta si ngelakoken si mehuli sue ras peratenNa. Si pasti, kai pe resikona i bas kita ngelakoken si benar sue ras peraten Dibata i doni enda, Dibata pasti mereken dame sejahtera, sukacita, pengapul, bage pe jalan keluar man banta. Emaka i bas si e marilah kita ertoto, sipindo gegeh ras kengasupen i bas Dibata nari, i bas kita nuan si mehuli sue ras peraten Dibata i japa pe kita ringan.