SUPLEMEN PJJ GBKP TGL. 2 - 8 PEBRUARI 2025

Pdt. Larena Sinuhadji (Nd. ReyRapha Tarigan)

IETEH RAS ISURATKEN MIN - Nehemia 7:63-73

(Evaluasi Sasaran Pelayanan GBKP tahun 2024: transparansi keuangan, pembinaan keuangan)

Penaruh

Lupa e me salah sada sifat manusia. I bas AI nari ikataken maka lit piga-piga faktor si erbahanca manusia rusur lupa, e me: gaya hidup si la mehuli, konsumsi obat-obatan si mberat, kondisi kesehatan si terganggu erkiteken piga-piga pinakit, kekurangen nutrisi, ras interferensi (beberapa ingatan bersaing dan mengganggu ingatan lainnya). I bas si e tentu si harus ilakoken gelah ula rusur lupa e me ngelakoken gaya hidup si mehuli, menjaga kesehatan fisik bage pe psikis. Si menarik kerna lupa enda, lit piga-piga kasus si berkaiten ras hutang entah pe pertanggungjawaban keuangan, pihak bersangkuten mendadak amnesia entah pe lupa, apai ka adi hutang entah pe soal keuangen ndai la lit catatenna. E maka i bas si e sada cara si banci nampati kita gelah ula lupa, e me erbahan cataten, surat entah pe rekamen.

PJJ-ta sendah i bas rangka evaluasi kerna transparansi keuangan, bage pe pembinaan keuangan erpalasken ogenta sendah. Enda ianggap penting mungkin erkiteken soal keuangan e me topik percakapen si sensitif i tengah-tengah gerejanta. Melala kasus pemutihan keuangan erkiteken la lit catatenna. 

Versi Audio silahkan klik : https://youtu.be/skdHv2Q4AIY

Mpebagesi Ogen

Ogenta sendah lit i teruh judul perikop “Gelar-gelar kalak si mulih i pembuangen nari.” Konteks perikop ogenta sendah e me pembangunen tembok Jerusalem si ipimpin Nehemia, proses kemulihen bangsa Israel i pembuangen nari, bage pe proses ngaturken mulihi kerina si enggo ceda entah pe hancur, umpamana: mpehuliken sistem keamanan, mpekena rumah-rumah, bage pe mpekena Rumah Pertoton. I bas kerina proses enda, lit si ilakoken Nehemia e me mendata ulang kerina kalak si mulih pembuangen nari. I bas ay. 5 lit je ituriken kerna pemeriksaan surat terombo, entah pe daftar silsilah.

Adi sidarami kata “terombo” i bas Pustaka Si Badia, lit 17 kali itulisken, kerinana igunaken i bas konteks nuriken daftar gelar, entah pe daftar gelar kesusuren. Engkai maka daftar gelar kesusuren enda penting itulisken i bas Pustaka Si Badia? Penjelasen i bas Kamus Alkitab Herbert Haag nari, nina, “Di dalam masyarakat Israel, hak-hak maupun kewajibannya sebagian besar ditentukan oleh keluarga, keturunan atau sukunya. Oleh karena itu besar sekali perhatian mereka pada asal-usulnya. Sesudah zaman pembuangan ada ketentuan, bahwa barang siapa tidak dapat membuktikan asal-usul keturunan Israelnya, maka ia tidak diakui sebagai sebagai anggota bangsa. Bagi para imam harus bisa dibuktikan keanggotanya dari silsilah keturunan tertentu.” I bas ay. 63 ituriken kepeken lit terpuk imam-imam si la lit surat terombona. Ertina terpuk imam-imam enda la banci membuktiken keabsahen keimamenna erkiteken la lit catatenna. Emaka untuk sementara, terpuk imam-imam ndai la iakui sebage imam, janah la idatkenna hak-hakna sebage keluarga imam, seh kari lit imam si deban si banci membuktiken maka terpuk enda ndai memang tuhu kesusuren imam. 

I bas ay. 66 ituriken maka si tercatat mulih i bas pembuangen nari lit 42.360 kalak buena. I bas si mulih e lit ka ibabana suruh-suruhenna, buena 7.337 kalak. Lit ka si belum main musik buena 245 kalak. Erkiteken seh kel lengkapna cataten e, asuh-asuhen pe tercatat je asa kai buena. I bas ay. 70-73 icatat ka je kalak si enggo muat bagin i bas mpekena Rumah Pertoton, ibenaken i bas Gubernur nari: 8 kg emas, 50 mangkuk, 530 jubah imam. Kepala-kepala Terpuk: 168 kg emas, 1.250 kg pirak. Ras i bas umat nari: 168 kg emas, 140 kg pir ras 67 jubah imam. I bas cataten e banci siidah, ibenaken i bas pemimpin nari, seh ku rayat biasa, kerinana ikut muat bagin i bas proses pembangunen kerajan Israel si paksa si e sangana hancur.

Pengkenaina

Arah ogenta sendah radu ras kita erlajar arah bangsa Israel nari kerna pentingna cataten si berkaiten ras kesusuren, entah pe terombo. I bas Padan Si Mbaru pe lit terombo Yesus si encidahken maka Yesus e me kesusuren Abraham ras Daud (Mat. 1:1-25; Luk. 3:23-38). I bas si e banci sibahan daftar gelar nini bulangta seh ku jabuta sekalak-sekalak gelah generasi muda pe itehna ise nini bulangna amin pe la itandaina.

Selain terombo, i bas ogenta sendah pe lit cataten si lengkap kerna ise saja si mulih pembuangen nari, bahkan sangat detail icatat seh ku asuh-asuhenna. Labo terjeng je saja, asa kai buena persembahen si isehken bangsa e pe icatat alu mehuli. I bas si e radu ras kita erlajar maka erbahan cataten-cataten, khususna si berkaiten ras peristiwa-peristiwa penting, harus ilakoken gelah banci rusur siinget kuasa Tuhan si mbelin i tengah-tengah kegeluhenta. I bas jaman modern gundari enda, enggo melala media-media sosial si banci jadi media i bas kita mencatat peristiwa-peristiwa penting i bas kegeluhenta. Umpamana i bas aplikasi Facebook, i bas paksa tertentu, rusur isingetkenna kita kerna peristiwa si terjadi piga-piga tahun si lepas.

Sue ras tema PJJ-ta sendah, iajuk kita gelah semakin meningkatkan kualitas transparansi keuangen alu erbahan cataten si lengkap janah ilaporken secara periodik. I bas si e tentu kerina kita serayan (bendahara) bage pe bendahara-bendahara PJJ ras Kategorial, enggo idatken kita pelatihan-pelatihan kerna pengelolaan keuangan si mehuli. Janah i bas Tata Gereja GBKP pe enggo lit aturen-aturen kerna pengelolaan keuangan si mehuli. I bas PJJ sendah mulihi kita isingetken kerna pengelolaan keuangan si mehuli, gelah perdalanen pelayanen i bas gerejanta banci erdalan alu mehuli, janah kerina kita pe ergiah-giah muat bagin i bas nehken persembahen si mehulina guna kemulian gelar Dibata.