SUPLEMEN PEKAN KEBAKTIN PENATALAYANEN GBKP 2024
TGL. 21 - 27 JANUARI 2024
Pdt. Larena br. Sinuhadji (Nd. ReyRapha Tarigan)
LITURGI SILAHKAN KLIK :
Tema Umum :
ERDALAN I BAS TERANG SI IBEREKEN TUHAN (Jesaya 2:5)
Wari Pemena, Minggu 21 Januari 2024
Invocatio : Mazmur 105:39
Ogen : Johanes 8:12-20
Khotbah : Jesaya 2:1-5
Tema : Erdalan I Bas Terang Si Ibereken Tuhan
Penaruh
I bas kemajun jaman gundari, enggo lanai mesera guna ndarami sada ingan entah pe alamat ingan tertentu. Tading pindo saja share location (shareloc) i bas Whatsapp (WA)-ta, iterusken ku GoogleMap, enggo mis siteh jalur si harus ibentasi, piga ndekah perdalanen, bage pe enggo siteh dalan si macet. Tapi rusur ka terjadi, ibabana kita ku dalan si papak, la banci masuk kendaraan ku je. Ibabana kita ku dalan si sempit, piah dungna enggo terhambat perdalanenta, banci ka la kita seh ku tujuan. Bage ka si rusur terjadi i bas geluh kinitekenta. Adi kebeluhenta sijadiken pedoman, rusur ibabana kita ku dalan si papak.
Mpebagei Kata Dibata
Yesaya 2:1-5 si jadi bahan khotbahta sendah e me nubuaten si isehken Dibata man nabi Yesaya kerna Juda ras Jerusalem. Jerusalem inubuatken enggo jadi pusat ingan ersembah ras erlajar kerna Kata Dibata. Jerusalem enggo jadi pusat rekonsiliasi ras perdamen doni. Kerina bangsa-bangsa redemuyung reh ku Jerusalem guna ndatken pelajaren si mehuli bage pe nggejapken dame si rehna i bas Dibata nari. Tuhu-tuhu sada keadaan si mehuli si inubuatken Yesaya si bakal terjadi i tengah-tengah Juda ras Jerusalem.
Nubuaten enda tentuna sangat bertolak belakang ras karakteristik bangsa Israel si “tegar tengkuk,” egois, mesera man ajaren, rsd. Tempa-tempa nubuaten enda bagi si mustahil terjadi i tengah-tengah bangsa Israel, apai ka adi sinen kondisi Israel paksa sendah si sangana erperang. Mungkin nubuaten enda lenga terwujud i tengah-tengah bangas Israel seh asa gundari, bagi nina ay. 2, “I bas wari-wari si arah pudi pagin,” ertina mungkin enggo ndeher kiamat pagi maka nubuaten enda banci terwujud. Atau mungkin enda merupaken sada persinget saja, adi ateta nggejapken dame sejahtera i bas dirinta bage pe sekelewetta, maka nina ay. 5 si jadi penutup perikop enda, “Emaka kesusuren kerina Jakup, marilah erdalan kita i bas terang si ibereken TUHAN man banta.” I bas terj. TB-LAI, “Hai kaum keturunan Yakub, mari kita berjalan di dalam terang TUHAN!”
Erdalan i bas terang Tuhan, rikutken perikopta sendah, ertina, nggit kita erlajar kerna Kata Dibata, nggit kita erdalan arah dalan si ipilih Dibata (ay. 3), nggit kita erdame ras kalak si deban (ay. 4), ras patuh nandangi kerina perentah-perentah Dibata (ay. 5). Adi kita sekalu kalak si tek man Dibata i bas Yesus Kristus, tek kita maka nubuaten enda mengacu ku bas kerehen Tuhanta Yesus Kristus si peduakaliken, i ja IA pagi jadi hakim nandangi doni enda.
Pengkenaina
Wari sendah e me wari si pemena Kebaktin Pekan Penatalayanen GBKP tahun 2024, alu tema, “Erdalan i bas terang si ibereken Tuhan.” Kebaktin Pekan Penatalayanen GBKP tahun 2024 enda i bas rangka menyambut sasaran pelayanan GBKP 2024 e me, “Berkarya dan berguna untuk orang lain.” Tek kita maka terang si ibereken Tuhan man banta e me Yesus Kristus. Adi bage jadikenlah Yesus Kristus terang entah pe jadi pedoman i bas geluhta gelah ula sempat kita papak. Secara konkrit, bagi bahan khotbahta sendah, nggit kita erlajar kerna kerina si iajarken Yesus, janah nggit kita ngelakokenca i bas geluhta si tep-tep wari. Nggit kita erdame ras kalak si deban, bahkan nggit kita jadi juru dame man sekelewetta. Meteruk ukur ras patuh nandangi perentah-perentah Dibata i bas Yesus Kristus. Em akap kami palas i bas kita berkarya dan berguna untuk orang lain.
Ogenta sendah nuriken kerna tantangen si ihadapi Yesus i bas kalak Parisi nari sanga IA meritaken Berita Si Meriah. Ertina, i bas kita ersaksi, berkarya dan berguna bagi orang lain, enggo pasti melala tantangen si man hadapen. I bas si e, teklah kita, bagi invocatiota sendah si mereken pergegeh man banta. Maka Dibata pasti ngarak-ngarak kita i bas kita ersaksi, berkarya dan berguna untuk orang lain. Teklah kita maka bagi bangsa Israel si sangana erdalan mulih ku Kanaan, pasti iarak-arak Dibata geluhta janah icukupken Dibata kerina si ibutuhken kita (Mzm. 105:39-41).
Wari Peduaken, Senin 22 Januari 2024
Invocatio : 1 Timotius 5:8
Ogen : Mazmur 133:1-3
Khotbah : Epesus 6:1-4
Tema : Ndalanken Peraten Tuhan
Penaruh
Labo gampang ndalanken peraten Dibata. Mekatep si memiliki sikap pragmatis. Sipilih-pilihi. Sipilihi firman Tuhan si apai sitaati ras silewati. Apai firman Tuhan si ianggap realistis, si apai yang terlalu idealis ras la mungkin sidalanken. Firman Tuhan arus sitaati, arus kita setia ndalanken peraten Dibata. Janah e benaken i bas dirinta, i jabunta nari. I bas kita enggo ndalanken peraten Tuhan, labo mungkin mulus-mulus saja si terjadi bas geluhta, enggo pasti tetap lit tantangen. Tapi si pasti kalak si tetap ndalanken peraten Dibata datna kemalemen ate, geluhna berintegritas ras banci jadi teladan man sekelewetna. Tapi adi kebalikenna sidalanken, la kita patuh ndalanken peraten Dibata, bersikap pragmatis, si merugiken banta la sidalanken enggo pasti gagal kita jadi usihen. Aminna labo gampang ndalanken peraten Dibata, tapi tetap lit semangatta ndalanken peraten Dibata.
Mpebagesi Kata Dibata
I bas perikopta, Epesus 6:1-4, Paulus nehken pedah kerna kegeluhen i bas jabu. Rasul Paulus mpersingeti perpulungen i Epesus kerna tanggung jawab si arus idalanken orang tua bage pe anak-anak i tengah jabu gelah jabu e tetap paguh ras harmonis. Anak-anak arus ngikutken ajar orang tua, rikutken si ngena ate Tuhan. Ras orang tua arus ngkelengi anakna, ola pesega-sega anakna si erbahanca ia merawa (terj. TB-LAI : “jangan bangkitkan amarah di dalam hati anakmu”). Adina lit penungkunen, ise lebe ndalanken tanggung jawab, orang tua nandangi anak entah sebalikna, anak nandangi orangtua? Enggo pasti orang tua. Sebab orang tua e me kap wakil Dibata i ja anak e ititipken Dibata man banta. Maka tanggung jawab si pemena lebe arus idalanken orang tua, uga makana orang tua banci ngepkep, engkelengi ras mabai anak geluh erkemalangen man Tuhan. Sebab mekatep orang tua lalai i bas tanggung jawabna si mbelin e.
Paulus mpersingeti kerna kewajiben anak e me patuh man orang tua (ay. 1). Patuh ngikutken ajar orang tua, sue ras peraten Tuhan. Anak-anak banci patuh asum orang tua tuhu-tuhu jadi usihen si mehuli man anakna. Sebab mbue orang tua beluh ngajarken si mehuli (kejujuran, mengampuni, taat, rsd.) tapi ia sendiri la ndalankenca. Enggo pasti membal i bas cuping anak-anakta nari kerina si mehuli si iajarken kita ndai. Bahkan anak-anak sulit guna makekenca perban kita pe orang tua la ndalankenca. Emaka lit istilah ngatakenca “children do what they see” (anak-anak melakukan apa yang mereka lihat dari orang tuanya); “Satu perbuatan lebih berharga dari pada seribu kata-kata.” Ertina, ipindoken man orang tua i jenda gelah leben jadi usihen si mehuli man anakna, alu bage anak-anak e patuh ngikutken kai si iajarken orang tua, sebab palasna kai si iajarken Tuhan. Ay. 2, mpehaga nande ras bapa. Enda bagin i bas 10 Perentah Tuhan si ibereken Dibata man Musa i Deleng Sinai, e me perentah si pelimaken. Anak-anak mpehaga orang tua sebab tanggung jawab si mehuli si enggo ilakoken orang tua, labo hanya dalam rangka anak ngataken bujur man orang tua, ras erbahanca orat geluh anak e mehuli, tapi pe lit ulih si idatken anak e, e me kap geluh mejuah-juah ras ndekah nggeluh i doni enda (panjang umur).
Tanggung jawab orang tua e me kap ngkelengi ras mpebelin anak-anak, bagi si ngena ate Tuhan. Ertina, si ibereken kita man anak e sumberna e me kap Kata Dibata gelah si ngena ateNa silakoken kita i bas nehi tanggung jawab. Sebab banci jadi labo sura-sura Tuhan si ipelebeken tapi sura-suranta orang tua. Lit orang tua memaksaken kehendak gelah anak menjadi “number one” tapi la ietehken kemampuan ras sura-sura anak. Si penting lit kebanggaan tersendiri asum anak e tampil berprestasi. Enda labo salah, asal sura-sura anak ras “passion” anak siikutken (idampingi) labo keinginenta. Orang tua arus ngelitken waktu si utama guna anak i bas membangun kedekaten ras komunikasi si mehuli man anak. Ula sempat la sieteh kai kebiasanna, biakna, teman-temanna, hobina, rsd. erkiteken kurang sibangun kedekatenta ras anakta.
Arah ogenta Masmur 133:1-3, Pemasmur ngajarken ras ngingetken pentingna kiniersadan ersenina (erturang). Seh kal ulina ras senangna kalak si ersenina (jabu) ersada perarih. Jabu si ersada perarih me jadi si ipasu-pasu Tuhan. Pasu-pasu Tuhan e desken minak wangi si meherga bagepe embun. Syarat jabu ndatken pasu-pasu Tuhan e me adi jabu ersada perarih i bas si ngena ate Tuhan. I ja jabu sada perarih, i je me Tuhan erpadan mereken pasu-pasuNa e me kegeluhen si la erkeri-kerin. Je nari arah invocatio, icidahken uga lagu langkah anak-anak Tuhan. Si ndalanken peraten Tuhan e me jabu si mperdiateken kade-kadena, terlebih keluargana. Kalak si la mperdiaten ras mpekena-kena keluargana nggo ipersokenna kap kinitekenna. Kalak si la mperdiateken keluargana kalak jahat kap. Jahaten kalak si bage asangken kalak si la tek man Yesus Kristus (1 Timotius 5:8).
Pengkenaina
- Jabu e me gereja si kitik. Alu bage, jabu e tetap ibabai gelah tetap ngasup ndalankken fungsina alu mehuli. Tapi mekatep si terjadi la bage. Si enda teridah arah bapa la engkelengi ndehara ras anak. Perbulangen la jadi imam si payo dingen mehuli bas keluarga. Nande pe la jadi usihen bas keluarga sabab nggeluh la patuh man perbulangen, nggeluh hura-hura, nggeluh konsumtif ras konsumerisme. Orang tua la jadi jadi usihen si mehuli. La iajarina ras ididikna anakna sue pengajaren Pustaka. Emaka mari bapa-bapa, jadilah bapa si ndalanken peraten Tuhan arah engkelengi anak jabuna dingen jadi imam i tengah jabu. O kam pernanden jadilah nande si ndalanken peraten Tuhan bas jabu arah patuh man perbulangen dingen jadi ingan tertande, ingan ndatken dame ras malem ate. Anak-anak pe setia ndalanken peraten Tuhan alu ngikutken ajar dingen mehamat man orang tua.
- Jabu si ersada perarih e me jabu si jadi terang bas sekelewetna. Bapa, nande ras anak nggeluh sada perarih. Orang tua sada arihna bas ngajari ras ndidik anak-anakna. Seri ras sada perayaken ras tujun orang tua (bapa ras nande) bas ngajari ras ndidik anakna. Emaka totoken, usahaken ras latih terus keluaganta gelah nggeluh ersada perarih i bas Tuhan. Baba ras bahanlah jabuta jadi keluarga Dibata e me keluarga si ngelai ras mpermuliaken Dibata. Bahanlah ras didiklah keluargata erdiate, kepate ras erkeleng ate sada ras si debanna. Ola sempat kita ras anak jabuta la erdiate ras mperdiateken keluargana.
Wari Peteluken, Selasa 23 Januari 2024
Invocatio : 2 Timotius 1:8
Ogen : Josua 24:14-15
Khotbah : Perb. Rasul 2:43-47
Tema : Erkemalangen Man Dibata
Kata Penaruh
Geluh erkemalangen man Tuhan (takut akan Tuhan) arus tetap lit i bas kita selaku anak-anakNa. Arah kita erkemalangen man Tuhan mabai kita ngasup dalanken geluh enda amin sekali la bagi ukurta. Arah kita malang man Tuhan sidat kepentaren (Kuan 1:7), i ja beluh kita mbedaken apai si mehuli ras si la mehuli ras sidalanken si mehuli. Emaka penting kel gelah tetap kita nggeluh erkemalangen man Tuhan. Kinatana i bas perdalanen geluhta, mekatep kita song-song erkemalengen man Tuhan (wari-warin). ‘Di kenca la bagi ukurta si jadi, enggo ka situndalken Tuhan. Alu bage, tetaplah sipelihara, sijaga relasinta ras Tuhan. Sipelihara tetap geluh pertendinta. Adi nina Rasul Paulus, “Latihen gerak badan lit piga-piga gunana, tapi latihen pertendin erguna i bas kai pe, sabap latihen pertendin e njamin geluhta subuk si genduari bage pe si pagin” (1 Tim. 4:9-8). Mari ras-ras kita erlajar uga kin situhuna kalak si erkemalangen man Dibata rikutken Kata Dibata sendah.
Mpebagesi Kata Dibata
Nats Khotbah - Perb. Rasul 2.43-47. Latar belakang perikop enda e me kenca peristiwa nusurna Kesah Si Badia si erbahanca enterem kalak tek man Yesus Kristus i bas megiken Petrus erkhotbah. Kurang lebih lit 3.000 kalak tambah ku bas perpulungen e (Perb. 2:41). Janah perpulungen e tutus megiken pengajaren i bas rasul-rasul ras nggeluh sikeleng-kelengen. Janah rikutken perikopta, maka melala tanda-tanda sengget ras kejadin-kejadin si mejin (mengadakan banyak mujizat dan tanda).
Bukti kalak enda erkemalangen man Dibata:
- Lit ketedehen ate guna pulung ras saling peduli (kai si lit bas ia, ipakena ras-ras). Adi i bas Alkitab Terjemahan Baru Edisi ke-2, nina, “Semua orang percaya tetap bersatu, dan semua milik mereka adalah milik bersama.” Lit ketedehen ate guna pulung, saling berbagi, saling menguatkan sada ras si debanna. Subuk bas rumah bage pe bas rumah pertoton rusur ia kerina pulung. Janah perpulungen i bas persadanna lit i bas keriahen ukur, janah ipujina pe Dibata. Si luar biasa, idayakenna taneh entah ertana, je nari iberekenna man rasul-rasul gelah banci ibagiken man kalak sue ras keperlun sekalak-sekalak.
- Alu ersada ukur (dengan bertekun dan sehati), tep-tep wari ia pulung i bas rumah pertoton. Memecahkan roti di rumah masing-masing secara bergiliran, alu meriah ras ukur si meteruk. Ertina, lit kesehatian (ras-ras bersukacita i bas keriahen ukur teman, bage pe ras-ras bergumul, erceda ate i bas kesusahen si ialami teman). La istilah senang liat orang susah atau susah liat orang senang. Tapi riah ukurndu, riah ukurku teman, bage pe sebalikna, ceda atendu ceda ateku teman.
Nats Ogen - Josua 24.14-15. I bas umur Josua enggo metua ipepulungna kerina kalak Israel i Sikem janah ioratina kerina kalak Israel entah lit denga kin kai si nipadanken Dibata man nini-nini kalak Israel si langa igenepi Tuhan. Janah kerina kalak Israel ngaloi maka Dibata enggo nehi kerina janjiNa man kalak Israel. Jos. 24:14, “Dage genduari”, nina Josua ngumputi rananna, “pehagalah TUHAN janah sembahlah IA alu tutus ate ras patuh. Pedauhlah dibata si nai isembah nini-ninindu i Mesopotami ras i Mesir, janah man TUHAN sajalah kam ersembah.”
Jos. 24:15, “Adi la iakapndu mehuli ersembah man TUHAN, pilihlah sendah ise atendu isembahndu, dibata si isembah nini-ninindu i Mesopotami, entah dibata kalak Amori si inganindu tanehna genduari. Ipepilihken Josua man kalak Israel apakah ersembah man Tuhan entah man dibata-dibata si deban, “tapi adi aku ras isi jabungku, TUHAN saja ngenca isembah kami.” Josua mereken usihen si paguh maka ia ras isi jabuna Tuhan ngenca isembahna. Josua sebage bapa, sekaligus sebage pemimpin bangsa Israel tanpa ragu-ragu, alu komitmen ras kesungguhen maka ia ras kerina isi jabuna Tuhan saja isembahna. Pengakuan si e turah erkiteken enggo igejapken Josua uga kuasa ras keleng ate Tuhan numpak-numpak kegeluhenna, jabuna ras bangsana.
Pengkenaina - Refleksi
Rikutken bahanta i bas Pekan Penatalayanen berngi pe-3-ken, maka pesan firman Tuhan :
- Tetap setia ernalem man Tuhan. Sekalak jelma gelarna M. Gonzales, dirikenna tendana, erkemah ia telu minggu dekahna guna banci ndatken HP Apple 7. Si e ilakokenna erkiteken merhat kel ia sebage orang pertama ndatken HP Apple 7 ndai i bas tahun 2016. Uga ketedehen ateta jumpa ras Tuhan, mencari wajah Tuhan, ernalem man Tuhan? Terkadang, kurang ketutusenta i bas ernalem man Tuhan. Bagi perpulungen mula-mula tedeh atena rusur pulung ras megiken pengajaren rasul-rasul. Persoalen kesibuken, dahin, sada ras si debanna la siperiahen, erbahanca la nari pernah pulung beribadah ras muji Tuhan. Kurang ketutusenna megiken Kata Dibata (siban kesibukenta si deban asum firman Tuhan ielaken), la lit saat teduhta secara pribadi, kurang lit waktuna ertoto, rsd. Bagi pengakun Josua, kita ngakuken, “Adi aku ras isi jabungku Tuhan saja si isembah kami!”
- Erkemalangen man Tuhan labo hanya icidahken secara pribadi antara kita ras Tuhan, tapi pe sesama manusia. Ersada arihna, sehati sepikir. Labo mesukah i bas kita banci ersada arih, sabab mbue perbedaanta sada ras si debanna. Tapi selaku kalak si erkemalangen man Tuhan enggo lit biak kiniteruken ukur, lembah lembut, sabar, la egois (la hanya dirinta ngenca siukurken kita tapi pe kepentingen kalak si deban), menghargai ras menerima kalak si deban subuk kelebihan ras kekurangenna, ras lit biak saling memaafkan, sabab labo lit kita si serta. Enda si mekatep terjadi bas sada sektor, sada perpulungen, rubat, la siperiahen, la sicakapen. Si parahna bertahan lama (dipelihara, nahuni). Uga banci kita berdampak positif, menjadi daya tarik man kalak si deban, adi si lit i bas e pe la banci jadi contoh. Sabab arah kita ersada arih e me maka banci kita nggeluh sikeleng-kelengen, saling peduli. Subuk ku bas bage pe ku darat banci kita nampati, nehken kekelengen man kalak si membutuhken.
- Nggeluh erkemalangen man Tuhan, geluh jadi pasu-pasu (berkat) arah kesaksin geluhta subuk pengerana ras perbahanen labo jaminen la lit pergumulen, la lit kiniseran si nderpa kita. Tapi bagi invocatio, “Tapi buat baginndu i bas kiniseran guna Berita Si Meriah bagi ibereken Dibata man bandu gegeh guna si e” (2 Tim. 1:8). Ertina, i bas dahin ersaksi e banci jadi lit kiniseran man hadapen, tapi Dibata jine si mereken gegeh guna ngasup kita ngalakenca.
Wari Peempatken, Rabu 24 Januari 2024
Invocatio : Lukas 16:10
Ogen : Lukas 21:1-4
Khotbah : Kuan-kuanen 3:5-10
Tema : Mehamat Man Tuhan
Penaruh
Mehamat (Kamus Karo - Ind.: bersifat hormat, berlaku memuliakan, berlaku menghargai, tidak kasar, halus, sopan). Mehamat man Tuhan berarti berlaku hormat, memuliakan Tuhan erkiteken IA si mada geluhta ras enggo berekenNa kerina si mehuli ku bas geluhta, termasuk keselamatenta. Mehamat man Tuhan merupaken kata kerja, si arus icidahken kita anak-anakNa secara totalitas, pengerana, sikap geluhta, arah penyembahenta, rende muji IA, termasuk arah kita nehken persembahen. Mekatep si terjadi la bage. Penyembahenta luar biasa man Tuhan, adi rende muji Tuhan soranta erbolo-bolo, pengerananta pe sikap, tapi tiba i bas hal si berkaiten ras persembahen (nehken persembahen man Tuhan, secara materi), kurang bahkan sama sekali la kita mereken si terbaik. Alasen si rusur siban kita, si penting enggo ku bereken geluh ku sebage persembahen man Tuhan (bdk. Roma 12:1). I bas bahan Pekanta wari pe-4-ken ibabai kita guna tetap mehamat man i bas kerina dampar geluhta.
Mpebagesi Kata Dibata
Judul perikop i bas Kuan-kuanen 3 e me “Ajar man anak perana” (Terj. TB - Edisi ke-2 “Berkat dari hikmat”). Nehken piga-piga nasehat (kata ajar) erkiteken nggeluh erpalasken kepentaren Tuhan.
Secara khusus si jadi bahan renungenta i bas ay. 5-10:
Sada lebe, ernalem man Tuhan alu bulat ukur, ndigan pe ola ernalem man pemetehndu jine (terj. TB-2, “Percayalah dengan Tuhan dengan segenap hatimu, jangan bersandar kepada pengertianmu sendiri”). Ernalem man Tuhan alu sungguh-sungguh, la banci setengah hati, gelem enteguh kinitekenta man Tuhan ula ernalem man pemetehta jine. Sabab uga pe hebat ras jagona kita, pemetehta terbatas. Tapi Tuhan si isembah kita la terbatas (bdk. Adi sicikep batang sayat-sayat/ilalang, tapi setengah-setengah kita nggelemsa pasti sayatna/lukaina telapak tanta). Bage me i bas kita ernalem man Dibata la banci setengah-setengah. Sabab adi setengah ukur ku japa pe la seh dingen la maba kemalemen ate man banta. Bulat ukur pe mengandung arti, lit i je kesadaren i bas diri sendiri, la lit nari unsur keterpaksaan.
Si peduaken, inget Dibata i bas kerina si idahiken kita maka Tuhan si nuduhken dalen si payo man banta. Ertina, i bas kai pe si ilakoken kita tetap sipindo Tuhan campur tan, Tuhan berkuasa (berotoritas). La malem ateta adi la kita erpengendes man baNa. Janah i bas kita ersukuten man baNa, maka ituduhkenNa dalan si payo man dalanenta. Umpamana lit pe ndai rencana entah hal si la mehuli si ateta silakoken, eluken Dibata jadi dalan si payo sidalanken kita (terj. TB-2, “maka IA akan meluruskan jalanmu”).
Si peteluken, ula iakapndu pentar kam lebih asa patutna. Seri ras persinget Salomo i datas ula ernalem man pemetehta jine. Erkemalangen man Dibata ras la nggit kita ngelakoken kejahaten.
Adi enda silakoken, kepeken ibereken Tuhan ulihna man banta, perbahanenta e desken tambar si pepalem pinakit ras si mesuinta (memulihkan tubuhmu dan menyegarkan tulang-tulangmu). Hidup tetap takut akan Tuhan, ernalem man Tuhan membuat kita hidup dalam damai sejahtera. Sabab asum kebalikenna silakoken, maka icerawisi (ibayang-bayangi) dosa (kejahatenta), hidup penuh kekuatiran, was-was, cemas piah dungna erbahanca sakit secara jasmani.
Ras i bas ay. 9-10 Salomo mpersingeti anak perana guna mehamat man Tuhan alu mpersembahken ulih juma si mehulina kel man Tuhan (“muliakanlah Tuhan dengan hartamu dan dengan buah sulung dari hasil tanahmu”). Buah sulung mengingatkan akan perintah Tuhan kepada bangsa Israel untuk memberikan persembahan untuk pertama-utama. Bdk. Kel. 23:19, “yang terbaik dari buah bungaran hasil tanahmu haruslah kau bawa ke dalam rumah Tuhan, Allahmu.” Ertina perentah enda ibereken alu tujun gelah bangsa Israel mengutamakan Tuhan. Tek kita maka Dibata ulu kerina sinasa lit, geluhta termasuk erta-ertata ibereken Tuhan man banta. Janah kita ibereken Tuhan sebage pengelola entah si menatalayanken kai si enggo ibereken Tuhan e banta. Labo kita pemilik tetap Tuhan janah ititipkenNa banta guna banci sipake (sikelola). Ate Tuhan gelah banci simuliaken Tuhan arah kita nehken persemabahen si mehulina man baNa.
Ogenta si ibere judul “Persembahen diberu si enggo mbalu.” Asum i bas Rumah Pertoton, idah Yesus piga-piga kalak bayak namaken duit persembahen ku bas ingan persembahan (gazaphulakion : tempat perbendaharaan - peti-peti persembahan, si biasana itamaken i bas bagian halaman Bait Allah si hanya banci imasuki kalak Israel, ras i bas bagin belakang guna diberu). Ras idahna sekalak diberu si enggo mbalu si musil kal (seorang janda miskin) namaken dua peser (dua uang tembaga). Lepta adalah mata uang tembaga yang terkecil di Palestina. Emaka ipujiken Tuhan Yesus kai si enggo ibahan diberu mbalu-mbalu musil ndai, maka mbuen persembahen diberu si enggo mbalu si musil asangken kerina persembahan kalak si deban, e me kalak bayak. Sabab kalak si deban mere alu labo kurang i bas ia (memberi dari kelimpahannya). Tapi diberu e seh kel musilna, tapi amin bage pe iberekenna kerina si lit i bas ia. Ertina, subuk secara kualitas ras kuantitas galangen diberu mbalu si musil e, sabab ia mere arah kekurangen (kemusilenna). Hal si banci ipelajari arah diberu mbalu si musil, maka tek ia nandangi pemeliharaan Tuhan i bas geluhna. Si peduaken, situasi (kondisi) geluhna labo jadi alasen guna ia mere persembahen man Tuhan. Sabab mekatep e si menjadi alasen enterem perpulungen, maka kondisi sulit si erbahnca la banci nehken persembahen. Diberu mbalu-mbalu si musil e tuhu-tuhu mehamat kel man Tuhan.
Aplikasi
Tema i bas Pekan wari pe-4-ken, “Mehamat man Tuhan.” Mehamat man Tuhan ertina hormat, memuliaken Tuhan ras mposisiken Tuhan i bas posisi tertinggi (terutama) i bas geluhna, ras e icidahkenna i bas kerina dampar geluhna, i japa pe. Labo hanya terbatas bas Rumah Pertoton, asum kita beribadah, entah pe ngelakoken PJJ, PA, entah ibadah-ibadah si deban. Tapi i ja pe ras i bas situasi kai pe.
Latih dirinta ras keluarganta guna tetap mehamat man Tuhan benaken i bas hal-hal si kitik (bdk. Invocatio, “ise si tutus i bas si kitik, tentu tutus pe i bas si mbelin; ise si la tutus i bas si kitik, tentu pe la ia bujur i bas si mbelin” - Luk. 16:10). Belajar dan latihlah diri kita sungguh-sungguh memuliakan Tuhan dengan segenap hati. Mulai i bas gereja asum kita ibadah, pusuh ukurta nembah Tuhan. La ku jah ku je. Sangana ibadah la kita ngeranai, la mbuka-mbuka HP. Adi bas gereja pe enggo kita la tutus apai ka i bas hal si deban. I bas kegiaten persekutuan, pelayanen sidalanken alu pusuh ersuruh labo erkiteken paksaan. I bas dahinta kita berintegritas. I bas erbage pergumulen sialami kita, tetap Tuhan ingan penalemen. La banci ndarami ras ernalem man kuasa si deban. Bage pe i bas kita nehken persembahen man Tuhan. Tetap man Tuhan siingetlah maka kerina si lit bas kita rehna i bas Dibata nari. Mari muliaken Tuhan arah persembahenta. Bereken persembahenta, latih dirinta guna nehken persembahen pengataken bujur (pertambahan usia, sehat i bas sakit, sukses i bas pendahin). Ula jadiken situasi kemusilen, kekurangen jadi alasen la kita nehken pengataken bujur man Tuhan. Janah si parah enggo ka bayak secara materi tapi tetap rangap, kurang-kurangen man bana, bahkan pelit guna nehken persembahen man Tuhan. Janji Tuhan kalak si setia mereken si mehulina, maka geluhta pe tetap ipasu-pasu ras ipeliharaken Tuhan (ay. 10, “dem lumbungndu alu gandum dingen lau anggurndu sampur, seh maka la nai siat ingan munikenca pe”). Tuhan nampati kita guna tetap setia ernalem man Tuhan.
Wari Pelimaken, Kamis 25 Januari 2024
Invocatio : Roma 1:17
Ogen : Jesaya 61:1-4
Khotbah : Matius 5:13-16
Tema : Terang Perlu I Bas Gelap
Penaruh
Terang ras gelap rusur jadi lambang kebaikan dan keburukan. Kebaikan biasana ilambangken alu terang ras warna mbentar (putih), sedangken keburukan entah pe kejahatan rusur ilambangken alu warna hitam (mbiring) ras gelap. Amin bage gia, terang ras gelap iciptaken Dibata alu tujun si mehuli. Umpamana, suasana terang i bas suari erbahanca kita banci erdahin alu senang sebab banci siidah alu jelas kai siidahiken kita. Suasana gelap i bas berngi wari erbahanca kita banci istirahat alu tenang. Melala denga kiniulin si deban i bas terang bage pe gelap. I bas kesempaten enda radu ras kita merenung kerna tugas tanggung jawabta selaku kalak si enggo ngaloken keselamaten i bas Yesus Kristus si ilambangken alu terang si ersinalsal i tengah-tengah kegelapen doni enda.
Mpebagesi Kata Dibata
Perikop i bas bahan khotbahta sendah ngerana kerna “sira ras terang,” si termasuk i bas bagin khotbah Yesus i datas uruk. Khotbah Yesus i datas uruk labo terjeng nehken pengajaren kerna nggeluh erkiniteken man Dibata tapi lebih asa si e, khotbah enda mereken pergegeh ras motivasi man enterem kalak si megikenca paksa si e. Pergegeh penting sebab paksa si e masyarakat Yahudi lit i bas tekanen arah darat nari, e me penjajahen bangsa si deban. Arah bas nari, lit tekanen arah pemuka-pemuka agama si mewajibken ngelakoken aturen-aturen agama secara ketat. Motivasi penting gelah masyarakat Yahudi tetap megenggeng, optimis, dem alu semangat ndalani kegeluhen alu palas kiniteken si paguh ras bermakna man Dibata.
Sira ras terang akap kami labo benda si asing i bas geluhta si tep-tep wari. E kap makana Yesus mereken gambaren si biasa gelah iangka kita pesan kai si ate Yesus isehkenNa man ajar-ajarNa. Melala manfaat sira i bas geluhta si tep-tep wari. Sira bermanfaat guna mereken nanam si ntabeh man pangan-pangan, banci jadi bahan pengawet guna pangan-pangan gelah ula pedas macik, banci igunaken sebage bahan guna mensterilkan pangan-pangan i bas unsur-unsur si berbahaya nari, banci ka jadi tambar, ras melala denga fungsi sira si bermanfaat. I bas bahan khotbahta jelas ikataken i bas ay. 13, “Bagi sira si seh kel perluna guna pangan, bage pe kam nandangi kerina manusia.” Ertina selaku ajar-ajar, bage pe kalak si tek man Dibata i bas Yesus Kristus, iajuk kita gelah geluhta ernanam mehuli man sekelewetta.
Bage ka pe terang, melala manfaat terang i bas geluhta si tep-tep wari. Terang si ihasilken matawari erbahanca teridah kerina si lit i sekelewetta. Terang matawari erbahanca sehat geluh rubia-rubia, sinuan-sinuan, bage pe kita manusia. I teruh terang matawari kerina dahin banci idahiken alu mehuli. I bas bahan khotbahta, terang e igambarken alu lampu kitik si nerangi kerina si lit i bas rumah. Ertina, amin pe kitik, terang e seh kel perluna i tengah-tengah kegelapen. Selaku ajar-ajar entah pe kalak si tek, iajuk kita gelah teridah mehuli man sekelewetta alu ngelakoken kerina perbahanen si sue ras peraten Dibata. Tujunna labo gelah gelarta terpuji, tapi gelah ise pe si ngidah ras ngenanami kehadirenta si mehuli, ipujina Dibata, Bapanta si i surga.
Pengkenaina
Tema si seh man banta i bas wari pe-5-ken Pekan Penatalayanen sendah ngajuk kita gelah tetap jadi terang i tengah-tengah kegelapen doni enda. Mungkin sedekah enda enggo nge kita ncidahken geluh erkemalangen man Dibata i bas kerina dampar geluhta. I tengah-tengah keluarganta, i tengah-tengah pendahinta, i tengah-tengah gerejanta, i tengah-tengah pergaulenta i japa pe kita ringan. Tapi i bas kesempaten enda, mulihi kita imotivasi gelah semakin meningkatken kualitas ras kuantitas kesaksin geluhta.
Jadi terang i tengah-tengah kegelapen rikutken penjelasen kerna Sasaran Pelayanan GBKP Tahun 2024, “Berkarya & Berguna Untuk Orang Lain” i bas buku Garis Besar Pelayanan (GBP) GBKP Tahun Pelayanan 2021 - 2025, hlm.85 ikataken bagenda nina, “Untuk dapat membawa kebaikan kepada masyarakat, gereja perlu peka memerhatikan dan menggumuli persoalan-persoalan sosial maupun humanistik, yang terjadi di tengah-tengah bangsa dan negara. Oleh sebab itu, gereja juga perlu diperlengkapi sehingga memiliki kemampuan untuk melakukan analisis sosial, budaya, ekonomi, politik serta hukum. Dengan memiliki kemampuan tersebut, gereja akan memiliki instrumen-instrumen yang efektif untuk ikut aktif dalam menyelesaikan persoalan-persoalan yang terjadi di tengah-tengah masyarakat, bangsa dan negara.” Ertina, i bas penjelasen enda, lit hal-hal si harus ilakoken gelah terang e tepat sasaran.
Tentu labo hal si murah i bas kita jadi terang, enggo pasti melala tantangen i bas kita semakin meningkatken kualitas ras kuantitas kesaksinta. Tantangen i bas keluarganta sendiri, tantangen i bas pendahinta, tantangen i bas gereja, tantangen i bas pergaulenta. Tapi tek kita maka Berita Si Mehuli si isehken kita erkuasa mpegegehi kita janah Kesah Si Badia mpengasup kita guna megenggeng ngelakoken kerina si jadi peraten Dibata i bas geluhta. Invocatio mereken pergegeh man banta maka nina, Berita Si Mehuli e mereken kegeluhen si tuhu-tuhu, ertina Berita Si Mehuli e erkuasa mpelimbarui geluhta. Bage pe i bas ogenta, mulihi kita isingetken maka Kesah Si Badia lit i bas kita. Kesah Dibata e seharusna erdolat i bas dirinta guna ngelakoken kerina si mehuli sue ras peraten Dibata man sekelewetta. Ertina, kuasa Kesah Si Badia mpegegehi kita ras mpengasup kita jadi alat Dibata guna kemulian gelarNa, alu syarat nggit kita ikendaliken Kesah Si Badia.
Marilah kita tetap jadi terang man sekelewetta alu kai pe si banci silakoken kita. Manfaatkenlah media sosial i bas Hp-ta guna er-Berita Si Meriah alu kata-kata motivasi i bas status media sosialta, perbahanen-perbahanen si mehuli ras bermanfaat i bas video-videota, rsd.-na.
Wari Peenemken, Jumat 26 Januari 2024
Invocatio : Roma 12:10
Ogen : 1 Johanes 2:7-10
Khotbah : 2 Samuel 9:1-13
Tema : Keleng Ateku Kam
Penaruh
Keleng ate adi la isehken entah pe la iwujudnyataken maka keleng e labo lit ertina. Bagi kuan-kuan kalak barat nina, “Love isn’t love until you give it away.” I bas bhs. Ind. keleng ate iterjemahken alu kata “cinta” ras “kasih.” Janah i bas kita ngatakenca “bereken” salah sada kata si igunaken i bas bhs. Ind. e me “kasihkan.” Enda akap kami sada kata si pas kel, sebab memang mengasihi harus iwujudnyataken alu perbahanenta man kalak si deban. I bas kesempaten enda mulihi kita merenung kerna keleng ate.
Mpebagesi Kata Dibata
Bahan khotbahta sendah nuriken kerna realisasi janji Daud man sahabatna Yonatan sope Yonatan mate. I bas 1 Sam. 31 ituriken maka Saul ras anak-anakna, termasuk je Yonatan, mate i bas peperangan. Janah sope si e, i bas 1 Sam. 20:15-17, ituriken kerna pemindon Yonatan man Daud gelah erpadan Daud ncidahken keleng atena nandangi keluargana entah pe kesusurenna. I bas bahan khotbahta sendah, khususna ay. 1 ras 3 ikataken Daud maka ilakokenna nge sue ras padanna man Yonatan bage pe man Dibata nandangi kesusuren Saul ras Yonatan. Kenca enggo idarami Daud kesusuren Saul ras Yonatan, idat Daud informasi arah Ziba nari sekalak pelayan keluarga Saul, lit denga sekalak nari anak Yonatan si tergelar Mefiboset tading i rumah Makhir anak Amiel i Lodebar.
Mefiboset sekalak si berkebutuhan khusus (cempang dua nahena - 2 Sam. 4:4). Tapi amin bage gia, tetap icidahken Daud keleng atena man Mefiboset. Ilakoken Daud kai si jadi padanna man Yonatan i lebe-lebe Dibata. Ikelengi Daud Mefiboset uga litna bagi man anakna sendiri. Ibereken Daud kerina tading-tadingen sikerajangen Saul man Mefiboset. Ijadiken Daud Mefiboset tamu kehormaten i bas istanana, i ja Mefiboset ras keluargana banci radu ras man ras Daud.
Pengkenaina
Tema i bas Pekan Penatalayanen wari si pe-6-ken sendah e me, “Keleng ateku kam,” i bas bhs. Ind., “Aku mengasihimu,” mulihi ngingetken kita kerna keleng ate Dibata si la terbatas ras tanpa syarat si enggo ialoken kita. Perentah Yesus si mbelinna i bas Mat. 22:37-40 e me kelengi Dibata asa ukur, asa tendi, dingen asa gegehta lit. Bage pe kelengi temanta manusia bagi kita ngkelengi diri sendiri. Ertina, selaku kalak si tek, kai pe si ilakoken kita i bas geluhta harus ipalasi keleng ate man Dibata bage pe man manusia, sebab enggo leben ialoken kita keleng ate Dibata i bas kegeluhenta.
Bahan khotbahta sendah mereken teladan man banta kerna keleng ate si sue ras peraten Dibata arah pengalamen Daud. Adi siinget turi-turin kegeluhen Daud, enggo leben sigejapken Daud keleng ate Dibata man bana. Keleng ate Dibata e iwujudnyataken i bas engkelengi sahabatna Yonatan. Amin pe la senang Saul man Daud, bahkan piga-piga kali ate Saul ibunuhna Daud, tapi Daud la dendam. Amin pe Yonatan enggo mate, tapi keleng ate Daud tetap icidahkenna man kesusuren Yonatan. Ikelengi Daud Mefiboset uga litna bagi man anakna sendiri.
Ogenta sendah ngingetken kita maka perentah Dibata guna engkelengi Dibata bage pe engkelengi temanta manusia harus terus-menerus ipelimbarui. Emaka pedah Rasul Yohanes pe itujuken man banta kalak si tek i bas jaman gundari enda. Sebab rusur terjadi degradasi i bas kita engkelengi Dibata bage pe engkelengi manusia erkiteken godaan doni enda. Emaka i bas si e marilah sipelimbarui keleng ateta alu mindo pergegeh i bas Dibata nari gelah ipengasupNa kita engkelengi alu tutus sue ras peratenNa. Terakhir bagi si enggo isingetken i bas invocationta, marilah kita proaktif i bas kita sikeleng-kelengen, ula sitimai leben kalak keleng man banta, tapi sileben-lebenlah kita engkelengi ras mpehaga teman. Sibenaken i bas jabuta masing-masing, terus ku perpulungen, ras siperluas ku masyarakat sekelewetta.
Wari Pepituken, Sabtu 27 Januari 2024
Invocatio : Jeremia 20:9
Ogen : Mikha 3:1-12
Khotbah : Galatia 2:4-7
Tema : Tetap Meritaken Kebenaren Berita Si Meriah
Penaruh
Mungkin pernah sibegi sada istilah “oportunis.” Sekalak si oportunis biasana si iukurkenna hanya keuntungen dirina saja. Nina i bas sada artikel, “Orang yang oportunis biasanya tidak berpegang teguh pada prinsip tertentu. Asalkan menguntungkan dirinya sendiri, maka ia rela melakukan apapun untuk mendapatkan sesuatu yang diinginkan. Sekalak si oportunis biasana cari aman ras nyaman. I ja akapna aman nyaman, ku je ia, amin pe si la benar si erbahanca aman nyaman ndai. Per-Berita Si Meriah la banci sekalak si oportunis sebab lit i bas Berita Si Meriah kebenaren Kata Dibata si ndauh i bas kenyamanen doni enda nari apai ka guna keuntungen diri sendiri.
Mpebagesi Kata Dibata
Bahan khotbahta sendah nuriken kerna pengalamen Rasul Paulus i bas ia er-Berita Si Meriah man bangsa-bangsa si deban si labo Yahudi. Melala tantangen si ihadapi Paulus i bas ia er-Berita Si Meriah. Si pemena lebe erkaiten ras jabatenna sebage rasul i tengah-tengah perpulungen. Melala pihak si mempertanyakan jabaten kerasulan Paulus (1 Kor. 9:2) sebab memang ia labo termasuk ku bas 12 ajar-ajar Yesus. I bas bahan khotbahta sendah pe teridah secara tersirat maka lit proses si labo murah i bas Paulus datken pengakun arah rasul-rasul si deban nari (ay. 2, 7-9). Si peduaken, Rasul Paulus datken tantangen arah pihak-pihak si atena nirangken kiniersadaan kalak si tek ras Kristus alu ngelakoken aturen-aturen Taurat Musa sebage syarat datken keselamaten.
Tapi amin melala tantangen si man hadapen i bas er-Berita Si Mehuli, gegeh Paulus labo urak sebab Dibata si mpengasup Paulus ngalaken kerina kiniseran, tantangen, bage pe perbeben i bas meritaken kebenaren erpalasken Kata Dibata. Nina Paulus i bas ay. 5, “Tapi sitik pe kami la surut, gelah kebenaren Berita Si Mehuli e banci ijaga kami guna kam.” Pang Paulus meninggalkan zona nyaman, labo nggit ia jadi sekalak si oportunis, hanya cari aman, nyaman, ras keuntungen guna dirina sendiri. Pang ia berjuang demi kebenaran Kata Dibata, sebab Paulus maka Dibata i bas Yesus Kristus si mereken gegeh man bana guna ngalaken kerina resiko i bas meritaken kebenaren Berita Si Meriah.
Pengkenaina
Tema i bas wari pe-7-ken Pekan Penatalayanen sendah “Tetap meritaken kebenaren Berita Si Meriah.” Enda akap kami sada tekad man banta kerina i bas kita tetap setia meritaken kebenaren Berita Si Meriah, amin kai pe resikona. Ogenta ngingetken kita maka enggo terjadi i bas jaman Padan Si Ndekah nari, melala kalak si labo ngasup mempertahanken kebenaren Kata Dibata. Melala utusen-utusen Dibata si awalna alu semangat meritaken Kata Dibata, i bas pertengahen ras pendungina jadi nabi-nabi palsu, entah pe jadi kalak si oportunis, erkiteken lanai tahan menghadapi tantangen-tantangen si harus ihadapi erkiteken meritaken kebenaren Berita Si Meriah. Nabi Mikha mereken teladan man banta i bas ia pang ngataken si benar man nabi-nabi penebu-nebu bage pe man penguasa-penguasa Israel si ernembeh ate kempak kebujuren dingen nalihken si benar jadi salah. Invocatio ngingetken kita maka lit kuasa Dibata si nampati kita i bas kita meritaken kebenaren Berita Si Meriah. Emaka ula kita mbiar, teruslah meritaken kebenaren Berita Si Meriah alu erbage-bage cara si banci ilakoken kita.
Tahun enda bengket kita ku bas sasaran pelayanan GBKP e me “Berkarya dan berguna untuk orang lain.” Sasaren tahun enda ngajuk kita gelah jadi usihen, jadi teladan man sekelewetta. Salah sada hal si banci icidahken kita e me pang menyuarakan suara kebenaran rikutken Kata Dibata i japa pe kita. I bas buku Garis Besar Pelayanan (GBP) GBKP Tahun Pelayanan 2021 - 2025, hlm. 86, ikataken bagenda nina, “Dalam memperdengarkan suara kenabian gereja perlu menyadari bahwa suaranya bisa berbeda dengan suara kebanyakan orang dalam masyarakat, bangsa, dan negara. Sepanjang suara kenabian bersumber pada kebenaran firman Tuhan, gereja perlu teguh memperdengarkannya sekalipun tidak disukai dan berhadapan dengan resiko yang besar. Itulah salib yang harus dipikul gereja dalam meneladani Kristus yang mati demi keselamatan dunia. Kita meyakini bahwa sekalipun dimusuhi dunia, pada akhirnya suara dan perjuangan kita akan membawa kebaikan bagi dunia, sehingga pada saatnya Tuhan sendiri yang akan diangkat melalui penderitaanNya (bdk. Fil. 1:8-11). Pada akhirnya yang benar pasti akan terbukti benar.” Emaka ula kita mbiar, pindolah gegeh i bas Dibata nari gelah ipengasupNa kita meritaken kebenaren Berita Si Meriah i bas kegeluhenta si tep-tep wari.
Tidak ada komentar:
Posting Komentar