PJJ GBKP Tgl. 14 - 20 Februari 2021

PJJ GBKP Tgl. 14 - 20 Februari 2021

Tema : TUHAN MEREKEN KEPENTAREN MAN MANUSIA (Kuan-kuanen 2:1-8)

(Konfesi GBKP : MANUSIA)

Pdt. Larena br. Sinuhadji (Nd. ReyRapha Tarigan)

 

Konfesi GBKP Bab IV : Manusia

Bahan PJJ si lepas ngerana kerna Manusia. Bagian 1 : Manusia e me tinepa Dibata si segambar ras Dibata, dilaki ras diberu si seri hakna. Manusia iperlengkapi Dibata alu pemeteh ras kepentaren bage pe imahkotai alu kemulian ras kuasa.

 

Uga carana maka lit kepentaren i bas manusia?

Si pemena. Jelas maka manusia iperlengkapi Dibata alu pemeteh ras kepentaren. Kepentaren, pemeteh rehna i bas Dibata nari arah manusia erkemalangen man Dibata. Kuan-kuan 1:7, “Bena-bena kepentaren e me erkemalangen man Tuhan Dibata”. Yakobus 1:5, “Tapi adi lit i bas kam si kurang kepentarenna, ertotolah ia man Dibata si mereken kepentaren man bandu”. Kepentaren e labo idatken secara otomatis, tapi tetap sipindo man Tuhan, dingen nggeluh i bas erkemalangen man baNa.

Si peduaken. Lit proses si arus sibentasi. La banci instan. I bas sepanjang geluhta tetap tekun erlajar. Piga-piga proses rikutken teks ogenta sendah : 1) Keikhlasan untuk menerima pengajaran, nasehat. 2) Iulih-ulihi gelah ula lupa. 3) Megermet ras berusaha ngantusisa kai si enggo ipelajari. Ertina, arah kerina situasi si terjadi i bas geluhta subuk suka duka banci jadi sada pelajaren si meherga banta. Lit lalap makna i bas kerina peristiwa si terjadi i bas geluhta. Lit pesan moral si isehken Dibata, si banci jadi sada kepentaren man manusia. Megati situasi, perbeben geluh erbahansa manusia reh pentarna bas geluhna. Bahkan i bas peristiwa si la bagi ukur, banci tetap mendewasaken kita, erbahanca kita naik kelas.

Si peteluken. Kepentaren arus iupayaken, iperjuangken, iusahaken desken ndarami emas ras erta si terbuni. Ertina, kepentaren arus jadi hal si penting i bas geluhta, si mehergana i bas geluhta. Erkiteken arah litna kepentaren, sieteh mbedaken apai si mehuli, api si jahat dingen sidalanken si mehuli, sebab palas kepentaren e me erkemalangen man Tuhan.

 

Kai bedana kepentaren doni ras kepentaren Dibata?

Kepentaren doni : iandalkenna gegehna ras guna kepentingenna sendiri janah banci ipakeken guna tujun si la mehuli.

Kepentaren Dibata palasna erkemalangen man Dibata, mabai kalak tetap meteruk ukur, ras kai si idalankenna guna kemulian gelar Dibata ras guna kiniulin kalak si deban.

 

Kepentaren pe arus nggeluh i bas anak-anakta.

Kepentaren pe arus lit bas anak-anakta (generesi muda). Anak-anakta ngasup alu mehuli ndalani geluh enda, erguna ras jadi pasu-pasu (berkat) man keluarga ras kalak si deban. Terlebih i bas pemaken IT, la ikendaliken IT, tapi IT jadi alat ersaksi kerna Berita Si Meriah, memotivasi  ras membangun kalak si deban.