Pekan Penatalayanen GBKP Tahun 2020

PEKAN PENATALAYANEN GBKP TGL. 19 - 25 JANUARI 2020

Tema Umum : SEH KU TINGKAT KEDEWASAAN KRISTUS (bdk. Epesus 4:13)

WARI I (MINGGU 19 JANUARI 2020)

Pdt. Larena br. Sinuhadji

Invocatio : “Erkinitken ertina tek nandangi kai si iarapken kita, tek kerna si la idah” (Heber 11:1)

Ogen : Markus 5:25-34

Khotbah : Kuan-kuanen 4:20-27

Tema : Teridah Min Sinalsal Kinibujeren Ukurndu (Spiritualitas Pribadi : Dalam Rangka Jubilium GBKP)

Salah sada tandana kalak si erkiniteken e me nggeluh i bas kebujuren entah pe berintegritas subuk i bas perukuren, pengerana ras perbahanen. Dingen labo mesukah nggeluh i bas kebujuren, maka memang arus ibenaken i bas si kitik nari ras i bas kitik-kitik nari gelah dungna enggo menjadi karakter geluhta. Umpamana, ampar siban dompetta. Perban lit sura-sura anakta nukur main-mainen, minter buatna senta tanpa ia ngata banta. Banci jadi awalna bagi si mbiar sabab ibayangi perbahanenna si la mehuli. Tapi adi la tereteh pagi kedun enda enggo terusina nangko, benaken sen kitik seh ku sen galang. Tapi adi siajari anakta gelah bujur termasuk i bas ngerana, ula muat barang entah pe sen si labo sikerajangenna. Adi butuh madin ngata, adi enggo ngelakoken si la payo madin terus-terang ula erbual, rsd. Hal-hal si bage adi sibiasaken man anakta dingen kita jadi contoh. Sitotoken gelah tetap ia nggeluh i bas kebujuren.

Bahan khotbahta ngerana kerna pedah gelah nggeluh i bas kebujuren. Lit piga-piga hal penting rikutken perikopta si perlu jadi perhatinta :

1. Nggit megiken kata ajar. Kata penting si isuratken kuan-kuanen : “Megermet guna ndengkehken (megiken) pengajaren”. Banci jadi turah perasaan sepele, jagon siakap kita asangken kalak si ngerana banta, piah dungna lit penolaken i bas kita iajari entah ibereken nasehat. Masuk kuping kanak keluar kuping kiri, masuk kuping kanan keluar kuping kanan. Sebalikna i jenda si arus lit bas kita sikap meteruk ukur, megermet (tuhu-tuhu menyimak, fokus) megiken kata ajar.

2. Labo hanya ibegiken tapi iinget katawari pe ras ibuniken i bas pusuh. Ertina gelah pengajaren e la silupakan, arus sipakeken, maka katawari paksa pe tetap siinget.

3. Ulih pengajaren sidatken kegeluhen ras kejuah-juahen. Arah pengajaren si ialoken kita mabai kita meteh kai si arus sidalanken, kai tujunna kita nggeluh. Alu bage mabai kita nggeluh i bas kejuah-juahen amin sekali mbue perbeben si man alanken.

4. Manjar-anjar rukur, sabab perukuren si mabai dalan kegeluhen. Ukurkenlah mbages-mbages sope sidalanken maka kai pe si ilakoken kita tuhu mehuli jadina. Ertina, kai pe si ilakoken manusia i bas geluhna ibenaken i bas perukurenna nari. Maka adi bas perukuren nari pe enggo la payo enggo pasti i bas pelaksanaanna pe bage. Maka arus manjar-anjar rukur, kai dampakna, kai positif ras negatifna. Perukurenta arus si mehuli, arus iterangi alu Kata Dibata.

5. Belasken kata si tuhu. Ola penyebar gosip, berita bohong (hoax).

6. Arah tatapen matata pe teridah sinalsal kebujuren. Sabab biasana adi kalak erbual la pang ia natap alu tenang.

Kiniteken si paguh pe icidahken sekalak diberu si enggo 12 tahun bluding asum ate Jesus mpepalem anak Jairus. Enggo enterem dokter si nambarisa tapi reh kelekna pinakitna. Si luar biasa la lit sikap putus asa bas ia. Sabab asum ibegina Jesus mentas minter turah bas ukurna guna ndadap uis Jesus. Lit keyakinen bas ukurna, “UisNa saja ku dadap pasti malem pinakitku”. Ras memang payo paksa si e malem minter pinakit diberu ndai. Bas Jesus pe tergejap maka lit kuasa ndarat bas IA nari, emaka itulihkenna ku pudi ku jelma si nterem nungkun ise si njemak uis Jesus. Walau pe ajar-ajarNa ngatakenca bage teremna jelma maka enggo pasti siasak-asaken ndeheri Jesus, tetap ipepayo Jesus sekelewetNa ndarami kalak si enggo ndadapsa IA ndai. Emaka alu mbiar janah nggirgir idahi diberu ndai Jesus, isembahna terus ku naheNa ras iturikenna kai si enggo jadi. Siidah, walau pe mbiar tapi tetap terus-terang diberu si sakit ndai nuriken kai si enggo ilakokeken. Diberu e tek maka i bas Jesus lit kuasa si banci mereken kesembuhen alu erbage cara. Ertina, pengarapen si bage nge si arus sipegeluh bas kita kalak si erkiniteken, amin kai si terjadi bulat ukurta ernalem man Tuhan, la putus asa, la erleja-leja erusaha guna si mehuli si banci sidatken kita.

Tema i bas wari I Pekan Penatalayanenta “Teridah min sinalsal kinibujuren ukurndu” (Spiritualitas pribadi : dalam rangka Jubilium GBKP). Bulan April enda kita mperingeti 130 tahun Jubilium GBKP. Ertina secara umur enggo seh dewasana kel Gerejanta. Tapi lenga sada jaminen umur tambah-tambah ka kedewasaanta, sabab dewasa e pilihen. Alu bage i bas tema wari pemena enda ilumbaken gelah teridah min kedewasan erkiniteken i bas anggota GBKP. Jesus Kristus ngenca siban jadi Tuhanta, la lit si deban. Man baNa ngenca kita ernalem alu bulat ukur. Kiniteken si berurat i bas Tuhan mabai kita ambah warina reh dewasa si teridah arah pengkebet geluhta, perukuren, pengerana ras perbahanenta si bujur, si mehuli si ngena ate Dibata. Kiniteken si dewasa mabai kita ngasup ngalaken erbage tantangen alu tetap ernalem baNa. Piah dungna la kita putus asa entah pe ndarami dalan pulah si deban si la ngena ate Dibata. Kalak si dewasa kinitekenna maka geluhna arus jadi pasu-pasu (berkat) man kalak si deban.

WARI II (SENIN 20 JANUARI 2020)

Pdt. Larena br. Sinuhadji

Invocatio : “Ngaloi rasul-rasul nina : “Teklah man Tuhan Jesus gelah kam terkelin, e me kam ras isi jabundu” (Perbahanen Rasul 16:31)

Ogen : Job 1:1-5

Khotbah : 1 Timotius 5:1-8

Tema : Mediate E Me Biak Jabu Si Erkiniten (Spiritualitas Jabu : Dalam Rangka Jubilium GBKP)

Jabu e me lembaga si terkecil si ibentuk Dibata guna kita banci nehi sura-suraNa, guna banci bersekutu, banci nehken kekelengen, kiniulin, rsd. Ertina kerina arus ibenaken i bas jabu nari maka enggo banci ku darat, ku sekelewetta.

I bas Invocationta e me turi-turin kerna Paulus ras Silas si bebas i bas penjara nari erkiteken pertolongen Tuhan. Kepala penjara paksa si e bunuh diri atena sabab iakapna Paulus ras Silas ras kalak tahanen kerina enggo kiam, padahal je denga. Erkiteken takjubna maka isungkunna Paulus kai si arus ilakokenna. Emaka nina Paulus “Teklah man Tuhan Jesus gelah kam terkelin, e me kam ras isi jabundu”. Ertina si ilumbaken Paulus labo hanya kepala keluarga secara pribadi tapi rikut ras isi jabu tek man Jesus. Sabab adi hanya sembelah ngenca tek man Jesus enggo pasti melala tantangenna. Kurang kiniersadan arih ras ukur.

I bas bahan Ogenta, Job sebage kalak perbapan si tuhu-tuhu erkemalangen man Dibata ras mehuli, dingen tuhu-tuhu mediate man keluarga, khususna man anak-anakna. Anakna lit sepuluh kalak, pitu dilaki ras telu diberu. Anak-anak Job si dilaki semal erbahan pesta man-man alu ergiliren, janah anak-anakna si deban pe ikut reh ku pesta e. Turangna si telu pe tetap itenahkenna ikut pulung. Ertina, Job selaku bapa lebe banci ngajari ras mimpin anak-anakna guna tetap membangun kiniersadan. Dingen si luar biasa, kenca pesta enggo dung lampas erpagi-pagi keke Job je nari ipersembahkenna persembahen tutungen guna pebadiaken anakna e sekalak-sekalak. Ras e tiap pesta enggo dung ilakokenna. Dingen si e ilakokenna sabab rukur Job entah banci jadi anakna e enggo erbahan dosa si la teridah erkiteken ceda ukur Dibata alu la iarapna. Enda sada hal si seh kel luar biasana, ilakoken Job selaku bapa, imam jabu, sabab lit kebiaren bas ia, anak-anakna enggo ngeliami Dibata. Sabab enggo pasti la ia banci mperdiateken anakna 24 jam. Alu cara si deban tetap iperdiatekenna anakna, lebe geluh kinitekenna man Dibata. Kai si ilakoken Job enggo pasti mabai anak-anakna tetap njagai lagu langkah sabab bapa lebe enggo mereken contoh si mehuli.

Bahan khotbah e me kerna hal-hal si mehuli si isehken Paulus man Timotius si arus ilakokenna selaku kalak si erkiniteken alu judul “Lagu langkah kalak Kristen”. Ertina pedah enda labo hanya man Timotius tapi pe man banta. Piga-piga hal si patut silakoken :

- Mehuli man ise pe. Man kalak si umurna tuan asangken kita, beluh kita muat ukurna, ula sirawai sabab enggo pasti kitik kel ukurna. Bahan ia tempa-tempa bagi bapa, sedangken si nguda denga bahanlah bagi agi. Bage pe diberu si enggo metua bahanlah bagi nandendu, janah man diberu si nguda denga arus bersih lagu langkahnta, bahan bagi turangta.

- Mehamat man diberu si enggo mbalu si la lit sima-simana. Tapi adi lit denga orang terdekat umpamana anakna, entah kempuna maka kalak enda lebe nehken tanggung jawab i bas ia ersemulih man orang tuana entah ninina. Sabab enda me perbahanen si ngena ate Dibata. Nasehat enda muncul banci jadi erkiteken lit anak entah kempu si la nari peduli man orang tuana entah si biak keluargana alu erbage alasen (bdk. Mat. 15:5-6).

- Adi lit diberu si enggo mbalu si nggeluh guna pesenangen dirina saja ngenca, ia ianggap enggo mate aminna pe ia nggeluh denga. Ertina, diberu si enggo mbalu tetap min njagai lagu-langkahna, ula sempat curna gelar Dibata arah pengkebet geluhna.

Tema i bas wari sendah “Mediate e me biak jabu si erkiniteken”. Salah sada ciri kalak si erkiniteken selain nggeluh i bas kebujuren e me mediate (peduli). Janah mediate enda ibenaken i bas jabu, antara bapa ku nande (sebalikna), orang tua ku anak (sebalikna), maka ku keluarga besar alu la erdobahen ras ku sekelewetta. La mungkin sikap perbahanenta man kalak si deban tapi keluarganta sendiri terlantar entah kurang kita peduli, e gelarna pencitraan. Melala hal si banci silakoken i bas jabunta : kerja sama ndahiken dahin i bas jabu (la lit si merasa arus ia ilayani lalap), saling melayani, saling ngkelengi. Adi sakit bapa, nande ras anak-anak merawat bapa, bage pe adi sakit nande, bapa ras anak-anak merawat nande. Mehuli kel adi contoh si enggo ilakoken Job ilakoken bapa ras nande selaku orang tua man anak-anaknna alu cara si berbeda, ertina ngendesken geluh kiniteken anak e man Tuhan. Muat beraktivitas pagi orang tua ertoto man anak-anak. Muat tunduh orang tua mulihi ertoto man Tuhan mindo pengalemi dosa entah lit anak-anak si ngeliami gelar Dibata. Orang tua peduli guna geluh kiniteken anak-anakna labo hanya kebutuhen jasmanina.

Perlu sitengeti, maka IT (HP alu media sosialna : IG, WA, Fb, Line, rsd.) erbahanca kurang kita peduli man jabunta, alu istilah “yang jauh menjadi  dekat, yang dekat semakin jauh”. Entah pe media sosial erbahanca kurang sosialta, kepedulianta seolah-olah cukup adi enggo sikataken bas status Fb temanta si erceda ate, padahal lit waktu ras kesempatenta guna ndahisa.

WARI III (SELASA 21 JANUARI 2020)

Pdt. Larena br. Sinuhadji

Invocatio : “O kalak bujur merialah atendu i bas Tuhan. Suraklah alu meriah, o si ngkikutken IA” (Masmur 32:11).

Ogen : Perbahanen Rasul-rasul 9:26-31

Kotbah : Masmur 98:1-9

Tema : Endekenlah Ende-enden Si Mbaru

Adi ngerana kita kerna rende, maka i bas liturginta rende ndatken porsi si cukup mbue. I bas Kebaktin Minggu saja banci enam seh pitu kali kita rende. Bas Ibadah PJJ ras PA Kategorial pe cukup mbue ka kita rende. Arah rende banci kita mengekspresiken perasaanta, subuk suka-duka, senang-susah, sehat-sakit, rsd. Arah rende banci erbahanca paguh kinitekenta.

I bas khotbahta ilumbaken Pemasmur gelah perpulungen ngendeken ende-enden si mbaru man Tuhan. Ertina, labo lalap ganti lagu e, tapi penggejapen ras pengataken bujur si tetap mbaru man Tuhan arah ende-enden. Kai alasen si banci siidah arah perikop enda maka perpulungen arus ngendeken ende-enden si mbaru :

- Perbahanen Tuhan si mejin (bhs. Ind., “Perbuatan-perbuatan yang ajaib yang sudah dilakuan Tuhan”), subuk i bas ndaratna bangsa Israel i bas Mesir nari, perdalanen 40 tahun i gurun pasir seh ku Kanaan. Alu kuasa dingen gegehNa si badia, IA enggo menang. I bas setiap pertempuren, adi perhitungen manusia enggo pasti talu nari bangsa Israel melawan bangsa-bangsa si deban tapi erkiteken Tuhan arah lebena maka Tuhan nge si mereken kemenangen.

- Itepati Tuhan PadanNa man bangsa Israel, sabab IA tetap Dibata si setia. Dibata si perkeleng la pernah mobah kerna padanNa. Hal enda ncidahken maka Dibata la pernah lupa nandangi padanNa si enggo ibelaskenNa. Subuk kerna Tanah Kanaan ingan tading bangsa Israel, IA Dibata si tetap masu-masu bangsaNa, rsd.

- Dibata merentah alu dem kebujuren ras rembang tengah.

Bentuk-bentuk ende-enden si banci ipeseh :

- Doni ras isina kerina : Ersurak man Tuhan ras rende perban riahna.

- Rende muji Tuhan alu kulcapi.

- Embus tanduk ras terompet.

- Lawit ras kerina isina : Ergeruhguhlah.

- Lau mbelin : Ertepuklah, deleng-deleng : rende ras-ras meriah i adepen Tuhan.

Adi siperdiateken bentuk-bentuk ungkapen rende rikut ras unsurna maka labo arah bibir (babah) saja ende-nden e ipenangkih, tapi ikut ras kerina alat musik termasuk pe doni enda ras kerina isina ikut rende muji Tuhan.

I bas pengogen si pemena teridah semangat bersaksi i bas diri Saul si ndube ngayaki ras niksa pengikut Jesus Kristus. Tapi kenca enggo itangkap Tuhan i bas perdalanenna ku Damaskus, terjadi perubahen si luar biasa. Alu la biar-biaren ia naksiken kerna kuasa ras keleng ate Tuhan Jesus Kristus.

Tema si seh man banta e me “Endekelah ende-enden si mbaru”. I bas bahan khotbahta jelas, maka Pemasmur ras bangsa Israel tuhu-tuhu igejapkenna pengalamen geluhna ras Tuhan, maka Tuhan tetap ngkelengi bangsaNa alu kuasaNa si mbelin, itepati Tuhan padanNa, IA merentah alu dem kebujuren rsd. Pengalamen suka ras duka si enggo ibentasi bangsa enda maka Tuhan tetap masu-masu kegeluhen bangsa enda.

Uga nge penggejapen kegeluhenta ras Tuhan? Enggo pasti adi sigejapken Tuhan tetap si nemani, masu-masu geluhta, i bas kelasetianta pe IA tetap setia maka mahan bana tetap kita ersura guna ngataken bujur ras rende muji IA i bas segedang geluhta. Erbage bentuk si banci sicidahken kita :

- Rende muji Tuhan alu dem keriahen ukur, sungguh-sungguh labo asal-asalen. Labo soal sora si mejile tapi alu pusuh si dem pengataken bujur.

- Arah talenta si lit bas kita; bermain musik, singers, ikut team VG, paduan suara kita muji Tuhan.

- Arah kerina pengkebet geluhta si mehuli, si ngena ateNa bersaksi kita kerna kiniulin Tuhan.

WARI IV (RABU 22 JANUARI 2020)

Pdt. Larena br. Sinuhadji

Invocatio : “Manusia erdahin guna man ngenca, tapi la pernah bias” (Pengerana 6:7)

Ogen : Kuan-kuanen 10:2-7

Khotbah : Kolose 3:23-24

Tema : Erdahin Alu Tutus

Adi suruh pilih, apai pangen erdahin asangken la erdahin? Enggo pasti ninta pangen erdahin. Sabab ‘di kenca la lit dahinta minter suntuk siakap, latih rukur, “rebo”: rempet bodoh, rsd. Emaka banci denga kita erdahin, subuk domestik (di rumah tangga) entah i darat rumah sada anugerah kel banta. Maka Pdt. Dr. Andar Ismael ngatakenca erdahin e me kap sada kesempaten, anugerah, panggilan, bahkan ibadah man banta.

Bahan khotbahta ngerana kerna tanggung jawab kalak si tek lebe i tengah jabu; subuk perbulangen ku ndehara, orang tua-anak ras sebalikna. Ras pe hubungen tuan ras suruh-suruhenna i ja i bas jaman Paulus lit denga budak belian. Inti i bas surat Paulus enda e me arah kai pe si idahikan kita arus tutus, si idahiken kita labo guna manusia tapi guna Tuhan. Termasuk suruh-suruhen man tuanna, arus patuh man tuan labo saja tupung je tuan maka semangat erdahin tapi la pe je tuan tetap bulat ukur erdahin sabab labo pujin manusia si idarami tapi erkiteken kemalangenta man Tuhan. Sabab adi tolok ukurta manusia i bas kita erdahin banci erbahanca kita erayo-ayo. Adi siman jumpan kalak lit tutus dingen sikap kel perbahanenta tapi adi si biasa-biasa labo sikap pelayanenta. Si debanna, adi manusia si man nehenen, i je bos (tuanna) maka kita tutus, semangat erdahin tapi adi la ia je kebalikenna. Adi Tuhan palasta erdahin, tetap semangat ras nutus ate kita erdahin, i je entah la i je tuan (bosta), sabab siimani idahNa kai pe si iban kita, sialoken upahta si enggo isikapken Tuhan man anak-anakNa. Sabab Kristus nge tuanta si tuhu-tuhu i ja enggo ialamiNa dosa-dosanta.

I bas bahan pengogenta si pemena, e me kerna pertenget raja Salomo gelah tetap nggeluh i bas kepentaren. Piga-piga hal si isingetkenna :

- Kebayaken. Kerina kita merhat bayak secara materi, dingen sura-sura si e wajar kel. Tapi kebayaken si idatken kita arus alu cara si benar, si bujur. Sabab kebayaken ulih kejahaten labo lit untungna man banta. Siakap utung tapi banci maba celaka man banta, labo maba dame sejahtera.

- Kebujuren. Nggeluh i bas kebujuren penting kel bas kita. Firman Tuhan sendiri ngatakenca, “kalak bujur la ipelepas Tuhan kelihen”. Ertina, geluhna tetap ipeliharaken Tuhan wari lepas wari. Kalak bujur ndatken pasu-pasu i bas Dibata nari, aminna pe sitik ngenca si idatkenna tapi arah pasu-pasu Dibata nari erbahanca cukup kerina. Bandingken, ras mbue je, kai pe lit tapi kurang denga siakap, la pernah siakap bias, bahkan ujung-ujungna nadingken mbue utang. Maka lit istilah “uang setan dimakan hantu”. Kalak bujur la nggeluh i bas kebiaren, sedangken penipu uga pe hebatna sada paksa waktu pasti ketunduken.

- Kemalasen (kisat). Biak si enda si arus sibeneken i bas dirinta, la perlu asuhi, sabab labo lit ulih si banci ialokenna seyakaten kemusilen, kesengsaraan. Biasana kalak sangana rani je tambah semangatna erdahin, berbeda asum benaken nuan ras ngurus sinuan-sinuan si memang iperluken ketutusen ras tenaga. Tapi kalak mekisat asum rani je ka ia tunduh. Tuhu-tuhu enggo tingkat tinggi skala kemalasenna.

Tema i bas wari peempatken enda “Erdahin alu tutus”. Engkai maka kita erdahin? Sabab Dibata si isembah kita pe Dibata si erdahin, benaken i bas IA nepa doni enda ras terus IA erdahin seh ngayak genduari i bas IA tetap mengatur alam semesta enda (bdk. Kej. 1, Joh. 5:17, “Bapangku erdahin kap lalap, maka Aku pe arus erdahin”). Janah i bas Dibata erdahin labo asal-asalen (menggo) idahikenNa mehuli dem ketutusen. Alu bage, selaku kita anak-anakNa pe siusih Dibatanta. Kai pe dahin si ibereken Tuhan banta merupaken anugerah si arus ngasup kita ngataken bujur alu nutus kita ndahiken dahin e.

Kai ukuren tutus? Rikutken bahanta sekali enda enggo jelas. Tetap mehuli ras sikap sidahiken dahinta walau pe la lit je pemimpinta sabab pertanggungjawabenta labo hanya man manusia tapi lebih ku Tuhan. Emaka arah dahin sidahiken kita labo hanya guna kecukupen geluhta tapi tetap Tuhan ipermuliaken. Ula min erkiteken ngayak-ngayak kebayaken sicurnaken kinitekenta. Tetaplah kita nggeluh i bas kebujuren.

Jaman semakin hari semakin berkembang reh majuna, alu bage kita pe arus tetap meng-up-grade dirinta, erlajar nambahi wawasen, keterampilen. Long life education. Gelah alu bage kita pe tetap banci berkarya i bas jaman si semakin maju enda.

WARI V (KAMIS 23 JANUARI 2020)

Pdt. Larena br. Sinuhadji

Invocatio : “Ngaloi Maria, “kuendesken diringku man Tuhan, janah jadiah i bas aku bagi si enggo ikatakenndu e” (Lukas 1:38).

Ogen : 2 Korinti 8:10-12

Khotbah : Ulangen 31:7-8

Tema : Tetapken Ukur Dingen Tek

Guna menai sada dahin entah tugas si mbaru mekatep lit keraguan, kebiaren ngasup entah lang ndahiken tugas e alu mehuli sue ras amanah si ibereken. Janah e sada kewajaren si erbahanca tetap kita tutus ras metenget. Maka adi siperdiateken tokoh-tokoh bas Pustaka Si Badia, benaken Abraham, Musa, Josua, Jeremia rsd., reh Kata Dibata guna mpetetap ukurna (bdk. Kel. 4:14-17; Josua 1:7-9; Jeremia 1:8). Ertina, Tuhan selalu mperlengkapi ras nemani.

I bas bahan khotbahta, Musa sangana ngerana ras pemimpin-pemimpin bangsa Israel. Umurna enggo 120 tahun, emaka la nai bo ia ngasup guna jadi pemimpin bangsa Israel. Tambah si e Tuhan sendiri enggo ngatakenca maka la banci ikeparina Lau Jordan. Amin bage gia, la ceda ukurna i bas gegehna si kurang tapi ipetetapna ukur bangsa Israel alu ngataken Tuhan Dibata jine erdalan arah lebe bangsa e, ras ngkernepken bangsa-bangsa si tading i taneh Kanaan. Janah Josua me si jadi pemimpin gancih Musa sue bagi si ikataken Tuhan. Janah Musa pe mereken pengendesen dahin man Josua dingen mpetetap ukurna alu ngataken “Tetapkenlah ukurndu janah teklah; kam me si mabai bangsa enda guna ndatken negeri si ipadanken Tuhan man nini-ninina”. Tuhan si mabai ras nemani Josua. La juru ibahanNa dingen la itadingkenNa. Si penting ula bene ukurna ras ula mbiar.

Invocatio konteksna e me kerna perkataan Malekat Tuhan Gabriel man Maria sebage nande Tuhan Jesus. Mbiar Maria sabab si nguda-nguda denga ia. Tapi erkiteken ipetetap Malekat Tuhan ukurna, maka anak si bas bertinna jadi erkiteken Kesah Si Badia. Maka alu taat Maria ngatakenca, “kuendesken diringku man Tuhan. Jadilah i bas aku bagi si enggo katakenndu e”. Arah bahan enda, jelas maka Tuhan petetap ukur Maria i bas ngaloken pendilo Tuhan bana si erbahanca Maria taat.

I bas bahan ogen Paulus ncidahken kekelengen si luar biasa i bas perpulungen Makedonia si secara finansial labo megegeh dingen paksa si e ngenanami kiniseran si mesangat tapi labo jadi alasen man perpulungen enda guna la ergiah-giah mere alu melumbar nampati perbeben si ialami perpulungen Judea. Alu ukur si meseksek ipindoken perpulungen Makedonia man Paulus guna banci nampati bahkan lebih asa ngasupna ipala-palaina. Arah contoh si mehuli i bas perpulungen Makedonia enda me Paulus mulihi mpersingeti Perpulungen Korinti si simpar i bas kai pe, i bas kiniteken, i bas ngerana, i bas pemeteh, i bas ketutusen i bas kai-kai pe, bage pe i bas keleng ate Perpulungen Korinti nandangi Paulus ras timna. Emaka ipindoken Paulus gelah sampur ka lah min perpulungen enda i bas dahin keleng ate. Memang ndube enggo ibenaken perpulungen enda guna nehken kekelengen tapi ngadi i tengah dalan erkiteken erbage-bage hal, la nari iteruskenna, la idungina. Genduari ipindoken Paulus gelah iterusken perpulungen Korinti enda dahin nampati e. Ergiah-giahlah ukur perpulugen e ndungisa, bagi ergiah-giah nai ukur perpulungen menakenca.

Tema i bas wari pelimaken e me “Tetapkenlah ukur ras teklah”. Tema enda ilitken dalam rangka mereken semangat ras mpetetap ukur man kerina Serayan Tuhan i bas masa periodisasi subuk BPMR (Oktober 2019), BPMK ras Moderamen GBKP. Sada lebe Gereja enggo pasti berbeda ras pemilihen i bas organisasi doni si mbue intrik, lobi ras politik kepentingen. Maka i bas periodisasi i bas Gereja enda tetaplah sura-sura Tuhan sipelebeken, si ngena ate Tuhan si erdalan, ula min lit permainen si la sehat. Si peduaken, ise pe kari si terpilih, dahiken tugas alu mehuli, terus-menerus erlajar mengikuti perkembangen jaman gelah Gerejanta pe banci reh majuna dingen banci jadi pasu-pasu (berkat) man doni enda. Perasaan kuatir, mbiar pasti lit, tapi perkataan bas firman Tuhan sekali enda mpetetap ukurta si terpilih, maka Dibata tetap nemani ras masu-masu si paling penting tek dingen tetap ukur. Ertina, ula menyimpang ku kawes ku kemuhen, tetap ernalem man Tuhan ras ndalanken si mehuli. Janah asum enggo kita berkecimpung bas dahin pelayanen e, arus idungi la banci ngadi i tengah dalan amin mbue tantangen si man hadapen.

WARI VI (JUMAT 24 JANUARI 2020)

Pdt. Jepri A. Keliat

Invocatio : “Man kalak si erpemeteh, terang kap e kerina, maka kalak pentar seh kap tangkasna” (Kuan-kuanen 8:9)

Ogen : Keluaren 35:30-35

Khotbah : Roma 10:14-17

Tema : Meritaken Berita Si Meriah

Erberita e me kap salah sada dahin kalak si erkiniteken. Bicara mulih kita ku bas Amanat Agung maka salah sada dahin si ipedahken Tuhan Jesus e me kap meritaken Berita Si Meriah. Dahin meritaken Berita Si Meriah enda melekat kel hubungenna ras erkiniteken. Duana la banci ipisahken. Kalak si erkiniteken ugapa pe ia erberita kerna Berita Si Meriah. Emaka labo banci kalak si la erkiniteken erberita, sebab uga banci ia erberita adi labo denga tangkas man bana isi berita e.

Bahanta Roma 10:14, perlebe nuriken kerna syarat per-Berita Si Meriah. Per-Berita Si Meriah e me kap kalak si enggo erkiniteken man Dibata. Ciri kiniteken enda teridah arah enggo ia nggit erlebuh man Dibata ras arah pengalamen geluhna idatna tampukna maka adi mindo man Dibata datkenna kemalemen ate. Intina maka sekalak per-Berita Si Meriah e me kap kalak si enggo datken nanam ngeluh er-Dibata. Lit pengalamen kinitekenNa. Tanpa sada pengalamen kiniteken maka labo banci sekalak er-Berita Si Meriah. Pengalamen enda labo harus sada hal si hebat (la biasa). Tapi arah pasu-pasu Tuhan si tep-tep wari si banci igejapken e sada pemere Dibata e enggo jadi bukti pengalamen iman.

I bas bahan pengogen si pemena, e me kerna pemilihen tukang si beluh erbahan Kemah Si Badia sekaligus perkakasna. Janah Dibata milih Besalel, anak Uri kempu Hur i bas suku Juda nari ras Oholiap anak Ahisamah i bas suku Dan nari. I bas Dibata enggo milih pasti Dibata mperlengkapi e me alu kepentaren, kengasupen ras pengertin erbahan kerina barang-barang si mejilena, ngerencanaken potongen barang si mejile, je nari erbahanca i bas emas, pirak ras tembaga nari. Erbahan permata-permata ras namakenca i bas bingkena; erban ukir-ukiren kayu ras erbage dahin si deban. Labo hanya kengasupen erbahanca tapi pe kengasupen ngajarken kebeluhenna ertukang man kalak si deban.

Tema “Meritaken Berita Si Meriah”. Tanggung jawab meritaken Berita Si Meriah man banta kerina kalak si tek, labo hanya Serayan Tuhan. Palasna kita semangat meritaken Berita Si Meriah sabab enggo leben sigejapken senangna, meriahna nggeluh i bas Kata Dibata. Malem ateta subuk i bas senang ras susah. Pengalamen iman enda me si jadi palas sekalak erkiniteken guna banci erberita. Tanpa pengalamen iman si payo maka banci ikataken maka kerina si ibelasken kita e me kap berita si HOAX (la benar). Yesus kristus e me kap kebenaren si tuhu-tuhu. Maka Yesus ras kerina perbahanenNa e me si jadi palas kalak Kristen si erberita. Asal berita e la nai kerna Yesus Kristus maka berita si ituriken kita e pe la nai bo mengandung berita kebenaren.

Salah sada konteks kegeluhenta genduari maka kalak la nai ngasup guna banci megi-megi. Enggo riahen akap kalak nonton TV asa megi radio. Kalak riahen akapna ngenen asa megi-megi. Rikutken konteks enda, erberita pe berubah. Mpeseh Berita Si Meriah la nai bo harus alu tedis i pinggir kota dingen ngerana erpagi-pagi seh bergi. Cara si paling ampuh e me kap keteladanen. Erlajar kita arah Jesus maka situhuna Jesus pe mbuen nge ncidahken keteladanen nggeluh asangken khotbah. Seh maka IA mate i datas kayu persilang e pe salah sada bukti nyata kerna keteladanen. Cara paling mehuli e me kap jadilah teladan. Kalak erkiniteken jadi teladan bas kerina dampar kegeluhenna termasuk er-teknologi informasi. Terlebih i bas tahun enda tema tahunen si iusung GBKP e me “Meningkatkan kemampuan warga GBKP dalam pengelolaan informasi dan keterampilan dalam penggunaan Tehnologi Informasi”.

Ibas keriahen ia banci jadi teladan berteknologi alu la jadi kalak si nggit pamer. Sebab biak pamer labo biak anak Dibata. Bas si la bagi ukurna pe la ka ia jadi kalak si ngeluami bas sosial media. Sebab kalak erkiniteken nuriken kerna isi pusuhna man Dibata ngenca. La ka nggit ia meritaken berita provokasi sebab kalak si erberita tujunna e me kap ku bas kemalemen ate, labo gelah guntar. Kalak si erkiniteken makeken sosial media jadi sarana si mehuli guna meritaken Berita Si Meriah. Mulai kin nggit ia nenahken temanna guna hadir bas kebaktin-kebaktin, bage pe nggitna ia mbagiken renungen-renungen guna erbahanca kalak nambah kiniteken.

WARI VII (SABTU 25 JANUARI 2020)

Pdt. Jepri A. Keliat

Invocatio : “Asum anak-anak denga aku, pengeranangku, perukurku, ras pengertinku bali ras anak-anak. Tapi kenca aku dewasa, kutadingken kerina biak anak-anak e” (1 Korinti 13:11)

Ogen : Mazmur 18:30-36

Khotbah : Epesus 4:13-16

Tema : Seh Ku Bas Tingkat Kedewasaan Kristus

Lit sada ungkapen ngatakenca maka tua itu pasti, dewasa itu pilihan. Ungkapen lawas enda payo. Maka kerina kalak pasti bas waktuna jadi metua. Maka syaratna jadi metua hanya sekedar gedang min umurta. Tapi lenga ka bo pasti min gia enggo metua banci jadi kalak si dewasa. Dewasa e pilihen. Hanya kalak si nggit erlajar dingen robah banci jadi kalak si dewasa.

Efesus 4 nuriken kata dewasa e me kap aner. I bas bahasa Yunani aner enda banci iertiken sekalak Dilaki si enggo ietehna orat nggeluh, ras enggo banci empo. Adi bas kalak Yahudi ciri si enda biasana e me kap umurna harus lewat 30 tahun, enggo dungina ngoge Pustaka ras enggo iangkana maknana. Bas kalak Karo enggo banci dewasa man sekalak dilaki enggo ka ikut ia i bas aron ras kalak ngalang, enggo beluh erban cangkul, ras si debanna. Ertina arah si idatas maka kedewasaan e banci seh adi enggo banci i lakokenna piga-piga dahina.

Efesus mereken piga-piga syarat ikataken kalak si enggo dewasa erkiniteken. Si pemena e me kap la nai ia jadi kalak si melukah terpengaruh (14). La ia bagi anak-anak, si gampang kel berubah. Entisik tawa entisik ngandung. Tentu doni enda banci mereken melala pengaruh man banta. Subuk si mehuli bage pe si la mehuli. Kalak si enggo erkiniteken la nai melukah terpengaruh. Harusna sebalikna kalak si enggo dewasa erkiniteken ia banci maba perubahen man sekelewatna. Reh kenca ia ibabana pengaruh si mehuli ku sekelewatna.

Kalak si dewasa bas kiniteken pe nuriken si tuhu. Melala gendauri berita si la tuhu. Meriah kel kap kalak zaman genduari nuriken si la tuhu. Engkai maka bage? Sebab doni enda riahen akapna guna nggeluh bas kepalsuan asangken kebenaren. Maka manusiana pe riahen akapna ncakapken si la tuhu. Kalak si dewasa la bage. Iturikenna kerina hal si tuhu sebab e kin ngenca lit bas ia. Si la tuhu la ia ngasup nurikenca sebab la kin iangkana nurikenca. Melala manusia genduari rikutken sosial media, meriah akapna nuriken si la benar. Si la angkana kin pe pang ia nurikenca. Kalak si dewasa erkiniteken la bage biakna.

Si peteluken kalak si dewasa erkiniteken la melala ngerana, si ilakokenna e me kap kelang ate. Ukuren kedewasaa sekalak labo bas umur, tapi seh asa kai ngasup ia ncidahken keleng ate. Erdewasana kalak maka erngasupna ia ngusih Yesus. Yesus dem keleng ate bas IA. Keleng ate Yesus teridah arah nggitna IA mate bas kayu persilang. Salah sada ciri kalak dewasa enggo nggit berkorban. Bas konteksta genduari tentu la harus korban nyawa, minimal waktu guna Gereja, sen guna engkelengi perhatian guna keluarga ras si debanna kerina.

Guna banci seh ku jadi kalak dewasa si ituriken i datas la banci lang harus lit kiniersadaan ras Dibata. Kerembaken ras Dibata mbabai kita jadi kalak si dewasa. Tanpa kiniersadaan ras Dibata labo banci kita banci seh ku bas kedewasaan.