PJJ GBKP Tgl. 26 Januari - 1 Pebruari 2020

PJJ GBKP TGL. 26 JANUARI - 1 PEBRUARI 2020

Pdt. Larena br. Sinuhadji (Nd. Rey Rapha Tarigan)

Tema : DIBATA SI PERLEBE RAS PENDUNGI (Ketangkasen 1:4-8)

Konfesi GBKP : ALLAH

Kitab Ketangkasen isuratken tupung kalak Kristen igasgasi erkiteken kinitekenna man Jesus Kristus. Janah enda terjadi asum Domitianus jadi Kaisar i Roma. Kaisar enda me si ndilo dirina sebage “dominus et deus” (tuhan dan allah). Ipaksana kalak termasuk kalak Kristen guna memuja, nembah ia sebage dewa (tuhan). Ise si menolak ianggap pemberontak, janah ianiaya, isiksa seh mate. Enda me situasi asum surat enda ibereken man perpulungen kalak Kristen si iwakili pitu perpulungen i Propinsi Asia. Janah surat enda ibereken gelah kerina si ngogesa (7 perpulungen) megenggeng i bas ngalaken kiniseran dingen tetap erpengarapen man Tuhan Dibata.

Janah i bas ogenta sendah, si ibere judul “Salam man Perpulungen si pitu” (Bhs. Indonesia “Salam kepada Tujuh Jemaat”), Johanes mereken salam pembuka dingen i bas si e mpetadaken ise kin Dibata si patut isembah. Piga-piga poin penting i bas salam enda :

- Simpar man perpulungen keleng ate ras dame si rehna i bas Dibata nari. E me Dibata si kekal, Dibata si nai nari lit seh asa genduari dingen si lit seh rasa lalap. Bage pe keleng ate ras dame e reh i bas kesah si pitu, e me Kesah Si Badia jine. Pitu ertina sempurna, jadi keleng ate ras dame i bas Kesah Si Badia e me sempurna ras la terbatas. Bage perkuah ate ras dame si rehna i bas Jesus Kristus nari, saksi si tutus, si mate dingen si enggo ipekeke Dibata i bas si mate nari, si erkuasa nandangi kerina raja-raja doni. Jadi Dibata si ipetandaken Johanes i jenda e me Dibata Tritunggal, si mereken keleng ate ras dame man perpulungen.

- Igejapi perpulungenlah maka tuhu mbelin kel kekelengen Jesus Kristus. Arah kematenNa maka ipulahiNa kita i bas dosa-dosa nari, iakuiNa kita jadi sikerajangenNa, gelah alu bage ipakeNa kita jadi perpanjangen tanNa, jadi imam-imam (wakil Dibata man umat), guna ndahiken dahin Dibata Bapa. Iakuilah kemulian ras kuasaNa seh rasa lalap. Amin!

- Dibata si itandai i bas Jesus Kristus reh denga ka pagi mulihken, IA reh ras embun (bdk. Mar. 14:62, “Erjabab Jesus nina, “Aku me, janah pagin idahndu Anak Manusia si ipadanken Dibata kundul arah kemuhen si Mada Kuasa janah reh me ras embun i langit nari!”).

- Emaka si perpudina ipetandaken Johanes maka Dibata e, e me si perlebe ras si pendungina, Dibata si mada kuasa nai-nai nari, genduari seh rasa lalap.

Arah Johanes mpetandaken ise Dibata e man perpulungen, gelah payo penandai perpulungen kerna Dibata si mabai perpulungen reh tekna man Tuhan dingen tetap erpengarapen man baNa amin mbue kiniseran si ialami perpulungen.

Secara khusus si jadi bahan perenungenta i bas PJJ si pemena enda e me Dibata si perlebe dingen pendungi (alfa ras omega, enda huruf pemena ras pendungi i bas abjad Yunani). Ras enda merupakan poin pemena adi ngerana kita kerna Dibata i bas Konfesi GBKP. I jenda isuratken kami kerna Konfesi GBKP BAB II kerna Allah.

Kami percaya, bahwa :

1. Allah adalah yang awal dan akhir, yang ada dan yang sudah ada dan yang akan datang, Yang Maha kuasa (Why. 1:8). Dialah yang berdaulat : kebenaranNya yang mutlak dan keputusanNya yang adil dalam menghukum dosa dan mengasihi orang berdosa (Yoh. 3:17-18).

2. Allah Tritunggal : Allah Bapa, Allah Anak dan Allah Roh Kudus (1 Yoh. 5:7; Yoh. 10:30; 2 Kor. 13:14, Mat. 3:16-17).

3. Allah Bapa adalah Allah yang menciptakan langit dan bumi dan segala isinya yang memelihara sampai akhir jaman (Kej. 1:1-31).

4. Allah Anak adalah Yesus Kristus; Anak Allah yang tunggal (Yoh. 1:14) yang menyatakan pekerjaan dan kehendak Allah di dalam dunia (Yoh. 4:34). Dialah penebus dosa kita (Mat. 1:21), melalui kelahiran, kematian, kebangkitan, kenaikanNya ke sorga serta kedatanganNya kembali.

5. Allah Roh Kudus adalah Pribadi Allah; Roh Allah dan Roh Kristus (Roma 8:15-17). Dialah Penolong dan Penghibur yang dikaruniakan untuk mengajar, mengingatkan orang percaya akan kehendak Allah dan ajaran Yesus Kristus, dan menanamkan serta memelihara iman sampai kedatangan Yesus Kristus kembali (Yoh. 14:26; 2 Kor. 3:17).

Janah si jadi fokusta i bas PJJ sendah e me bagin si pemena. Sedangken bagin si peduaken ras si pelimaken i bas PJJ minggu si reh ka ibahas.

I bas Pengakun Kiniteken (Konfesi) GBKP jelas kel maka Dibata e me si perlebe ras pendungi (awal dan akhir) dengan kata lain tidak bermula dan tidak berakhir, Dibata si kekal. Dibata si nepa doni enda ras kerina isina, si pekena-kena kegeluhen doni enda dingen Dibata ka si reh guna ngadili (menghakimi) kalak si nggeluh bage si mate i bas pendungi jaman. Hal enda pe teridah pe asum Tuhan arah nabi Jesaya mereken pengarapen man bangsa Israel (Jes. 41:4, “Ise dage mahanca si e kerina jadi? Ise me ngatursa kerina, kejadin-kejadin i doni tangtangna nari? Aku, Tuhan si enggo lit i bas bena-bena nari, janah tetap lit seh ku bas pendungi pe pagi”).

Arah Johanes mereken suratna man perpulungen si pitu i Asia si sangana ngenanami kiniseran erkiteken kinitekenna man Jesus Kristus terlebih enggo ipetandakenna Dibata si isembah kalak si tek, mabai perpulungen tetap setia ernalamen man Dibata. Dibata si mada kuasa ngenca si layak isembah, Kaisar labo man sembahen sebab ia pe Dibata si nepasa dingen ndauh beliden kuasa Dibata asangken kuasa Kaisar. Arah penandai perpulungen si payo kerna Dibata, maka Dibata e me si tetap simpar mereken keleng ate ras perkuah ate man perpulungen, Dibata si tuhu-tuhu mereken kekelengen man umatNa alu mereken Jesus Kristsus si enggo nebusi dosa manusia, Dibata si mada kuasa nai-nai genduari seh rasa lalap dingen Dibata si erkuasa nandangi kerina raja-raja i doni enda termasuk Kaisar Domitianus si erkuasa i Roma i bas paksa si e. Alu bage perpulungen kalak si tek asa ndigan pe la mbiar, la gentar sabab beliden kuasa Dibata si isembahna asangken kuasa doni. Walaupe maun akap la teridah kuasa Dibata asum kiniseran, perbeben i lebe-lebe mata perpulungen bahkan ialami perpulungen, tetap min megenggeng ras erpengarapen man Tuhan. Sabab Kristus sendiri pe ngenanami kiniseran i bas ngkelengi manusia perdosa.

Uga pendandaita kerna Dibata si isembah kita? PJJ-ta sendah mabai kita gelah reh payona entah pe reh jelasna penandaita kerna Dibata. Penandaita si payo kerna Dibata mabai kita tetap setia ernalem man baNa anem sekali mbue tantangen, rintangen ras godaan ngkenai geluhta. Reh tetapna ukurna ndalani wari-wari kegeluhenta i bas tahun 2020 amin sekali lenga bo jelas kai si bakal ialamai kita i bas wari-wari si reh enda. Kuasa Dibata labo hanya erdahin i bas masa si nai tapi seh ngayak genduari pe tetap erdahin i bas geluhta.

Penanam-penanamlah kuasa ras keleng ate Tuhan i bas geluhta wari lepas wari. Ogelah Kata Dibata setiap wari janah pakeken Kata Dibata e i bas geluhta gelah alu bage reh paguhna kinitekenta reh payona ka penandai kita kerna Dibata. Sebab KataNa si tersurat i bas Pustaka Si Badia e labo terjeng kata-kata saja, lit kuasa i bas KataNa si masu-masu, negu-negu, ngapuli, mpegegehi ras memimpin geluhta wari lepas wari. Terpuji gelar Tuhan. Soli Deo Gloria.