Pekan Penatalayanan GBKP 2019

PEKAN PENATALAYANAN GBKP

TGL. 20 - 27 JANUARI 2019

Tema Umum :

“MBARU DINGEN MEHULI”

(Kej. 1; Perng. 3:23; Joh. 5:17)

Prioritas Program Pelayanan GBKP 2019 :

“MENINGKATKAN JIWA KEWIRAUSAHAAN (ENTERPRENEURSHIP) WARGA GBKP DALAM BIDANG EKONOMI SERTA KEPEDULIAN TERHADAP KESEHATAN DAN LINGKUNGAN”

WARI SI PEMENA, MINGGU 20 JANUARI 2019

Pdt. Larena br. Sinuhadji (Nd. Rey Tarigan)

Invocatio : “Tapi nina Jesus man kalak Jahudi e, “BapangKu erdahin kap lalap; Emaka Aku pe arus erdahin” (Johanes 5:17)

Ogen : Perngandungen 3:22-24

Khotbah : Kejadin 1:1-31

Tema : “Dibata njadiken mbaru dingen mehuli”

Penjelasen Bahan Pustaka Ras Pengkenaina

Bahan khotbahta ngerana kerna Dibata nepa doni enda ras kerina isina. Dibata nepa i bas si la lit nari jadi lit (lat. : creatio ex nihilo). Ikataken maka doni lume denga dingen la lit tempas. Tapi kenca enggo dung itepa Dibata doni enda maka doni enda enggo terisi alu erbage si mehuli ras kerina enggo lit tempasna. Piga-piga hal si penting jadi cataten i bas Dibata nepa doni enda :

1) Itepa Dibata doni enda ras kerina isina alu KataNa si erkuasa. Ay. 3 nina Dibata, “Jadilah terang!” Emaka jadi me terang (ay. 6, 9, 11, 14, 20, rst).

2) I bas Dibata nepa doni enda ras kerina isina tuhu-tuhu irancangNa alu mehuli, sebab labo manusia itepa Dibata i bas wari pemena, tapi manusia itepaNa i bas wari peenemken. Ertina, icukupi Dibata lebe kerina kebutuhen manusia maka kedungenna itepa Dibata manusia.

3) I bas Dibata nepa manusia, berbeda ras tinepa Dibata si deban, sebab manusia itepa Dibata sentudu ras tempas Dibata, menam seri ras Dibata gelah manusia (dilaki ras diberu) banci jadi mandataris Dibata (perpanjangen tan Dibata) e me “ngkuasai” kerina nurung, perik-perik ras kerina asuh-asuhen ras rubia-rubia si meliar. Janah, erkiteken lit tempas Dibata i bas manusia maka iarapken manusia ncidahken biak Dibata i bas kegeluhenna.

4) I bas Dibata nepa doni enda ras kerina isina tuhu-tuhu mehuli, la gelah enggo entah pe meros (asal-asalan). TB-LAI ay. 4, “Allah melihat bahwa terang itu baik”. Ay. 10, “Allah melihat bahwa semuanya itu baik”. Ay. 12, 18, 21, 25. “Dan yang terakhir Allah melihat semua yang telah diciptakannya sungguh amat baik”. Sekali nari labo asal-asalan tapi mehuli, perfect.

Pengogenta nuriken kerna pengarapen si tetap arus lit bas kalak si tek man Tuhan. Konteks nats (Perngandungen 3:22-24) e me kerna kiniseran ras kecedan ate si ialami bangsa Israel erkiteken keruntuhen Jerusalem. Erkiteken suina, igambarken Esekiel maka enggo lupa ia nanam mejuah-juah, uga dame, uga malem ate? Kedungenna turah pengarapenna, asum ingetna kekelengen Tuhan si la erkeri-kerin. “Lenga bo keri keleng ate Tuhan, perkuah ateNa tetap nge lit. Keleng ateNa mbincar tep-tep erpagi-bagi, bali tetapna ras matawari si pultak arah kenjulu”. Enda me biak kalak si tek man Tuhan, anem gia sekali erbage-bage kiniseran nderpa tetaplah kita erpengarapen man Dibata. Kalak si ibassa jiwa kewirausahaan (jiwa enterpreneur) tetap lit pengarapenna, optimis, la murah putus asa. Dalam setiap persoalen pasti ada solusi, si penting tetap positif i bas ngenehen persoalen si jadi.

I bas bahan invocationta nuriken kerna penyembuhen si ilakoken Tuhan Jesus asum wari Sabat nandangi kalak si enggo 38 tahun sakit. Kai si ilakoken Tuhan Jesus tentu saja ngelanggar aturen si lit dingen mendobrak patron si sedekah enda enggo lit. Si paling penting, kesahna terselamatken denga.  Jesus mereken pengangkan si mbaru ras payo i bas nehken kekelengen; katawari paksa pe arus ilakoken, ras patuhen IA man Dibata si enggo ngutus IA asangken man manusia (Torat).

Tema i bas wari pemena, “Dibata njadiken mbaru dingen mehuli”. Jelas Dibatanta si mada kuasa i bas IA si enggo nepa doni enda ras kerina isiNa, IA njadiken si la lit jadi lit dingen mehuli kerinana, labo menggo, entah pe asal-asalan. Beda manusia ras Dibata, maka manusia njadiken si enggo lit jadi reh ulina, dem kreativitas. Adi nai bentuk kursi biasa saja si penting fungsional, genduari enggo mbue kel erbagena model kursi. Labo hanya soal fungsina, tapi lit nilai estetikana bahkan lit kenyamanan ras prestise.

Tahun 2019 i bas GBKP e me intandai alu tahun “Meningkatkan jiwa kewirausahaan (enterpreneurship) warga GBKP dalam bidang ekonomi serta kepedulian terhadap kesehatan dan lingkungan”. Erlajar arah bahan enda maka tema enda labo hanya mabai anggota jemaat mbuka usaha  si mbaru, tapi jiwa enterpreneur arus lit bas kita : mampu melihat peluang ras ikelola alu mehuli ras ermanfaat. Kreatif, inovatif, la mudah putus asa tetap erpengarapen, i bas perbeben si lit pasti lit solusina, si penting ula mudah putus asa. Adi nina Pdt. Yahya Widjaya, “Enterpreneurship adalah soal perubahan, melihat celah-celah kesempatan, mendobrak kebuntuan”. Janah Gereja arus tetap menanamkan karakter enterpreuner man anggota jemaat si kedungenna erpengaruh positif i bas kegeluhen ekonomi termasuk Gereja.

Tema wari pemena, “Dibata njadiken mbaru dingen mehuli”. Lit i je kreatif ras inovatif, la gel-gel, lit lalap si mbaru i bas Dibata. Biak kreatif dingen inovatif enda me si tetap arus lit bas kita manusia gelah i bas kegeluhenta pe ras pendahinta la gel-gel tapi lit rusur perubahen si terulin. Sabab manusia memang berubah, tentuna ku arah si mehuli. Si la nggit berubah enggo pasti ketinggalan jaman dingen la nari ibutuhken kehadirenna.

WARI SI PEDUAKEN, SENIN 21 JANUARI 2019

Pdt. Larena br. Sinuhadji (Nd. Rey Tarigan)

Invocatio : “O temanku si kukelengi, ertoto aku gelah kai si mehuli jadilah man bandu, janah mejuah-juahlah bagi kueteh maka kegeluhen pertendinndu pe mehuli” (3 Johanes 1:2)

Ogen : Epesus 5:29-30

Khotbah : Kuan-kuanen 23:19-35

Tema : “Mpekena-kena kula”

Penjelasen Bahan Pustaka Ras Pengkenaina

Bahan khotbahta e me kap perkataan penuh hikmat si mpersingeti kalak pentar gelah metenget kerna kai si arus ilakoken ras si la banci ilakoken.

Si pemena lebe, arus pentar, jadilah pentar. Kuan-kuan 1:7 ngatakenca bena-benana kepentaren e me kap erkemalangen man Dibata. Kalak si erkemalangen man Dibata nggit ia ngaloken pengajaren si mehuli bas ise pe, si penting ermanfaat guna dirina. Megermet nandangi perdalanen kegeluhenna. Apai si mehuli ipakekenna, si la mehuli isilahkenna. Kepentaren, kebenaren, pengertin, pengajaren la reh bage-bage saja (jatuh dari langit), tapi arus iusahken, iperjuangen, lit i bas proses si gedang (belilah, tukur). Subuk i bas kita erkemalangen man Tuhan, megiken ajar orang tua, megermet nandangi perdalanen kegeluhenta, ertina, i bas kerina dampar geluhta subuk senang ras susah, sehat ras sakit, pasti kerina lit pengajaren si positif i bas geluhta. Tapi ola sempat idayaken. Ola erkiteken pangkat, jabaten, kinibayaken silacurken prinsip, kinitekenta, si erbahanca la lit nari ergana pemeteh, pengertinta ndai.

Si peduaken, pentar milih teman i bas pergaulenta. 1 Kor. 15:33, “Ola kam papak, pergaulen si la mehuli ncedaken biak si mehuli”. I jenda, ipersingeti gelah ola petemani kalak pemabuk. Engkai? Enggo pasti bene kita ibabaina (ay. 20, 29-35). Lit akibat buruk si itimbulken adi kita mabuk minumen keras? Enggo pasti terkena pinakit. Asam lambung, sakit kepala, lemak dalam lever, stroke, anemia, hilang kesadaren diri. Untuk jangka panjang banci erbahanca kehilangen produktivitas kerja, masalah i bas keluarga, masalah keuangen, kecelakaan i bas perdalanen entah pe bas ingan erdahin. Kurang semangat hidup guna ngukurken masa depan si mehuli, sabab mabuk-mabuk ngenca dahinna ras la sadar (ay. 29-35).

Si peteluken, ula petemani kalak si merangap (Bhs. Ind. : pelahap daging). Ertina, la ngasup ia ngkuasai dirina i bas man daging. Adi enggo mbuesa ipan la mejile tapi enggo banci jadi sumber penyakit (stroke, jantung, tensi tinggi). Bahkan i bas kitab Kej. 1:29 (bahan renungenta nderbih), maka Tuhan mereken sinuan-sinuan si erbuah ras kerina batang kayu si erbuah jadi panganta (buah dan sayur lebih baik dikonsumsi).

Si peempatken, ula petemani diberu perdenggal si pencariana erlua-lua. Kebiasan la setia man sada pasangen banci erbahanca turang pinakit HIV-AIDS. Emaka arus tetap sijaga kesetianta man pasangenta dingen sijaga kebadian perjabunta masing-masing.

I bas bahan ogen, konteks kerna tanggung jawab perbulangen ras ndehara. Janah secara khusus i jenda tanggung jawab perbulangen nandangi ndehara guna ngkelengisa bagi ia ngkelengi dirina jine. Sabab Paulus ngatakenca kalak si keleng atena dirina, pasti irawat ras ipekena-kenana dirina. Ertina, tanggung jawab pekena-kena dirita, la banci siendesken man kalak si deban, kecuali la nari banci lang.

Invocationta ngerana kerna pertoton sekalak pertua man pemimpin jemaat, Gayus gelarna gelah mejuah-juah, sehat subuk fisik, psikis, mental ras spiritual. Arah kesehaten si serta maka banci kita ndalani kegiatennta alu serta.

Mens sana in corpore sano (bhs. Latin) si ertina, dalam tubuh yang sehat terdapat jiwa yang kuat. Penting man banta kesehaten secara holistik : fisik, psikis ras spiritual, sabab adi salah sada terganggu pasti mpengaruhi si debanna. Secara khusus i bas wari peduaken enda ngerana kita kerna kesehaten kula.

Mpekena-kena kesehaten kula banci ilakoken alu erbage-bage hal, subuk pola makan si sehat ras teratur, pola berpikir si positif, istirahat si cukup, olah raga, diet si sehat rsd. Tanggung jawabta guna mpekena-kena kesehehatenta. Payo banci sipindoken kesehaten man Tuhan (arah kita ertoto), tapi tetap si langsung ertanggung jawab e me kap dirinta sendiri. Adi sehat kita maka banci semangat kita beraktivitas, dingen banci geluhta jadi pasu-pasu (berkat). Labo berarti adi enggo sakit la nari banci jadi pasu-pasu, tetap banci tapi enggo pasti la nari maksimal.

WARI SI PETELUKEN, SELASA 22 JANUARI 2019

Pdt. Larena br. Sinuhadji (Nd. Rey Tarigan)

Invocatio : “Batang-batang kayu i kerangen ersurak meriahlah i adep-adepen TUHAN sanga TUHAN reh merentah doni enda” (1 Kronika 16:33)

Ogen : Kolose 1:15-23

Khotbah : Masmur 104:10-15

Tema : “Doni enda dem alu pasu-pasu Tuhan”

Penjelasen Pustaka Ras Pengkenaina

Bahan khotbahta nuriken kerna kebesaren Tuhan si mada tinepa, si biasa ipake asum wari raya mpepulung ulih peranin ras kedungenna ipaken i bas wari raya Pondok Daun. Masmur enda ipake guna nginget kerna perbahanen Tuhan si luar biasa arah kerina tinepa si enggo itepa Dibata. Emaka TB-LAI mereken judul “Kebesaran Tuhan dalam segala ciptaanNya”. Janah teridah maka si enggo itepa Dibata tetap bergantung man baNa.

Secara khusus i bas ay. 10 ituriken kerna karya Tuhan si banci memenuhi kebutuhen tinepa Dibata si deban. Sumbul lau si maler arah baluren-baluren nari ras i bas kelang uruk-uruk nari maleren lau anak. Si tujunna e me kap mereken kegeluhen man rubia-rubia subuk si meliar bage pe si la meliar. Bage pe i bas batang-batang kayu, ndeher i bas lau anak nari ibahan perik-perik asarna, dingen rende ia datas dahan-dahan e.

Iuseken Tuhan lau udan ku doni enda si merupaken gambaren pasu-pasu Dibata. Udan e kedungenna mpeturah dukut-dukut si ipentingken man rubia-rubia, bage pe sinuan-sinuan si iperluken man manusia. Bahkan arah nusurna lau udan, kerina sinuan-sinuan si enggo isuanken banci turah alu mehuli. Subuk anggur ras saitun (si merupaken tanaman pokok bangsa Israel), banci turah alu mejile si erbahanca sehat ras megegeh manusia dingen nampati perekonomian bangsa e. Alu bage teridah i jenda maka Dibata tuhu-tuhu mperdiateken kegeluhen tinepaNa bas doni enda.

Arah renungenta teridah, maka tinepa Dibata erkawiten sada ras si debanna. Manusia sebage tinepa Dibata si istimewa perlu rubia ras sinuan-sinuan. Emaka tetap perlu si jadi kelestarian lingkungenta. Payo, manusia sebage mandataris Dibata ibereken kuasa demi ras naluken doni enda dingen ngkuasai rubia-rubia. La banci ate-ateta i bas ngusahaisa alu palas kerangapen ras pebayak dirinta. Enggo pasti akibatna manusia sendiri si menderita alu litna kebanjiren ras taneh longsor. Invocationta ngatakenca, “Batang-batang kayu i kerangen ersurak meriahlah i adep-adepen TUHAN sanga TUHAN reh merentah doni enda” (1 Kron. 16:33). Siusahaken maka radu meriah ukur kerina tinepa Dibata, subuk manusia, rubia-rubia ras sinuan-sinuan. Meriah ukurta asum sibegi perik rende asum matawari pultak, entah pe sibegi jangkrik, entah pe katak, ersora asum reh udan. Sinuan-sinuan bermanfaat man manusia asum tetap terjaga kelestarianna tanpa itabahi sembarangen (ilegal loging), dingen alu sorana si erdeso sinuan-sinuan pe rende muji Tuhan.

Kematen Jesus Kristus ndameken labo hanya manusia ras Dibata tapi pe manusia ras tinepa Dibata si deban (ogen). Kerina sinasa lit ijadiken Dibata arah Kristus guna Kristus. Emaka, manusia selaku tinepa Dibata i ja lit tempas Dibata i bas ia, bahkan enggo alokenna penebusen i bas Dibata nari, biak si mehulilah si arus icidahkenna dalam rangka ncukupi kebutuhen geluhna.

WARI SI PEEMPATKEN, RABU 23 JANUARI 2019

Pdt. Larena br. Sinuhadji (Nd. Rey Tarigan)

Invocatio : “Enda me keputusen i bas kerina malekat penjaga e. Dage ieteh manusia min i japa pe, maka Dibata si Meganjangna erkuasa nandangi kerajan-kerajan manusia janah banci iberekenna man ise atena ngena, subuk man kalak si musilna pe” (Daniel 4:17b)

Ogen : Matius 4:8-11

Khotbah : Ulangen 17:14-20

Tema : “Pilih si ngena ate Tuhan”

Penjelasen Bahan Pustaka Ras Pengkenaina

I bas tahun enda tepatna tgl. 17 April alu serempak ilakoken pemilihen presiden ras wakilna termasuk legislatif. Dua calon si radu ras sieteh kita e me kap petahana Joko Widodo - Ma’ruf Amin ras nomor urut dua Prabowo - Sandiaga Uno. Ise ateta sipilih, enggo pasti LUBER dan JURDIL (Langsung, Umum, Bebas dan Rahasia, Jujur dan Adil). Janah benaken tahun si nderbih Gerejanta GBKP enggo mencanangkan tahun politik (menjadi berkat dalam politik). Ertina, labo kita anti politik tapi kebijaken sidalanken kita tetap dalam rangka memuliaken Tuhan ras jadi pasu-pasu man masyarakat si nterem.

Bahan khotbahta mpersingeti kerna kata pedah entah persinget i bas memilih raja. Memang awalna pemerintahen bangsa Israel e me kap teokrasi (Dibata sendiri si memerintah), tapi kedungenna seri ka atena ras bangsa si deban i ja lit raja si memerintah i bas bangsana, ras enda ibenaken i bas pemerintahen Saul. Musa mereken persinget man bangsa Israel kerna kriteria sekalak raja :

1) Raja bekas pilihen Tuhan dingen i bas kumpulen bangsa Israel.

2) Cinta perdamaian labo peperangen (ipake simbol kuda).

3) Mampu membangun keluarga si mehuli (la mungkin ipimpinna rakyat si nterem, adi keluargana pe la harmonis). La banci nterem ndeharana, sabab banci erbahanca ia nundalken Tuhan (contoh : Salomo).

4) La ipebayakna bana tapi lebih ia ngukurken kesejahteraan si nterem.

5) Jadi pemimpin si erkemalangen man Tuhan, alu setia ngoge ras ndalanken Firman Tuhan.

6) Meteruk rukur.

Aminna lit raja si memerintah i bas kegeluhen bangsa, Dibata tetap nge situhuna Dibata ulu kerina si erkuasa. Ertina, aminna lit raja i tengah bangsa Israel, raja e arus tunduk man Dibata. Rikutken invocationta : “Dage, ieteh manusia min i japa pe, maka Dibata si meganjangna erkuasa nandangi kerajan-kerajan manusia janah banci iberekenNa man ise ateNa, subuk man kalak musil pe”. Konteks Daniel 4:17b enda e me kap runtuhna pemerintahen Nebukadnesar raja si sombong si la mengakui kemahakuasaan Tuhan Dibata, je nari ipedarat Dibata ia i bas tengah-tengah manusia nari, ringan ras rubia-rubia si meliar.

Bahan ogenta merupaken bagin peteluken i bas godaan Iblis man Jesus Kristus, maka banci iberekenna kerina kerajan doni enda ras kinibayakenna man Jesus asal nggit Jesus nembah mungkuk man Iblis. Tapi tegas Jesus ngatakenca, “Sembahlah Tuhan Dibatandu, janah IA saja ngenca patut man sembahen!” Terkadang enda si rusur terjadi, manusia guna nehi sura-surana ndatken jabaten (kekuasaan, kedudukan) la akapna peduli ndayaken kinitekenna entah pe erguru ia man kuasa kegelapen. Ertina, kuasa Iblis banci mereken kekuasaan entah pe kedudukan e man manusia bagi si ikatakenna, tapi kedungenna labo maba dame sejahtera man banta. Sabab enggo pasti Iblis mindo tumbalna.

I bas tanggal si enggo itentuken, mari sipergunaken hak pilihta alu mehuli. Pilihlah pemimpin si ngena ate Tuhan. labo arus sada kiniteken tapi kebijaken, program-programna, tuhu-tuhu banci membangun ras mensejahteraken rakyat. Ula erkiteken sen si sitik (money politic) tapi banci erbahanca bene kiniulin, kesejahteranta selama 5 tahun ku lebe. Pergunaken hak pilihta alu mehuli, ula golput. Terkadang kita pesimis alu ngataken, “ise pe kari i datas, tetap denga nge kita latih cari makan e”. Memang payo, ise pe kari i datas, tetap kita nge si memenuhi kebutuhen geluhta, tapi pasti berbeda kebijaken-kebijaken si ibahanna dekah ia memerintah si banci mensejahteraken rakyak si nipimpinna. Je nari sitotoken, ise pe kari si terpilih tetap ia amanah, jadi pemimpin si mehuli, tetap berintegritas selaku pemimpin.

WARI SI PELIMAKEN, KAMIS 24 JANUARI 2019

Nrs. Pdt. L. br. Sinuhadji (Bp. Rey Tarigan)

Invocatio : “Ngaloi Maria, "Kuendesken diringku man Tuhan. Janah jadilah i bas aku bagi si enggo ikatakenndu e!" Kenca bage itadingken malekat ndai ia” (Lukas 1:38)

Ogen : Johanes 10:7-21

Khotbah : Esekiel 2:1-10

Tema : “Idilo ras isuruh Tuhan”

Penjelasen Bahan Pustaka & Aplikasi

Bahan khotbahta sendah ngerana kerna pendilo Dibata man Esekiel. Ise Esekiel enda? Esekiel ertina “Dibata mpegegehi” (Allah menguatkan). Ia tubuh ras mbelin i bas lingkungen keluarga imam si tading i Jerusalem (Ese. 1:3). Sanga i bas pendidiken denga guna jadi imam reh me bangsa Babil menjajah bangsa Israel, ibaba bangsa Babil Esekiel ras melala kalak Israel si deban ku tanah Babil. I bas usiana si pe-30-ken ialokenna pendilo guna jadi nabi (Ese. 1:2-3). Amin pe ertugas sebage sekalak nabi, Esekiel nggeluh bagi masyarakat biasa si tading i tengah-tengah kalak buangen i tepi lau Kebar (Ese. 1:1; 3:15,24) janah lit jabuna (Ese. 24:18).

Adi sinen latar belakang kegeluhen Esekiel si tubuh ras mbelin i tengah-tengah keluarga imam, maka pendilo ras penugasen Dibata akap kami sada hal si biasa man bana. Si luar biasa rikutken bahan khotbahta sendah e me kerna ingan ras kondisi i ja ia arus melayani. Esekiel idilo ras isuruh melayani ku tengah-tengah bangsa si kerinana mberontak, mekeng, ras la mehamat man Dibata (ay. 3,4). Tapi amin mberat tantangen si arus ialaken Esekiel, ipegegehi Dibata ia gelah tetap ngasup melayani ras meritaken kerina si jadi peraten Dibata i tengah-tengah bangsaNa (ay. 6). Esekiel melayani ras meritaken Kata Dibata alu tutus ras setia, kurang lebih 22 tahun ndekahna ia melayani i tengah-tengah bangsa Israel.

Sue ras temata sendah, iajuk kita gelah : 1) sadar maka kerina kalak si tek man Dibata i bas Jesus Kristus, idilo ras isuruh guna ngelakoken kerina si jadi peratenNa. 2) Setia i bas ngelakoken kerina si isuruh Dibata man banta. Bahan khotbahta ngajuk kita gelah kita ngusih Esekiel si sadar ras setia ia i bas tugasna amin pe melala tantangen si mberat si arus iadapina. Tapi si terjadi i bas kegeluhenta jaman gundari enda melala pengaruh negatif si ngajuk kita gelah lupa kita man tugas tanggung jawabta selaku anak-anak Dibata. I bas dampar si deban, melala ka pengaruh la mehuli si ngajuk kita gelah mudah menyerah, cari yang instan, tidak perlu berjuang, tidak perlu bekerja keras, melarikan diri dari tanggung jawab alu erbage-bage alasen, rsd. Tapi Kata Dibata sendah tegas ngajuk kita gelah tetap sadar kita i bas pendilo ras persuruhen Dibata guna ngelakoken kerina si jadi peratenNa i bas kerina kondisi ras situasi.

Invocationta sendah pe mereken teladan man banta i ja Maria alu sadar ngatakenca, “Kuendesken diringku man Tuhan. Janah jadilah i bas aku bagi si enggo ikatakenndu e!” Tuhu-tuhu mberat kai si arus idalanken Maria, tapi indeskenna dirina man Dibata maka ipengasup Dibata ia ndalanken peranna alu mehuli. I bas ogenta si pemena, Jesus nggambarken diriNa sebage permakan si tuhu-tuhu alu tutus ngelakoken peranNa seh mate i kayu persilang guna nelamatken kerina kalak si tek man baNa. Emaka i bas Pekan Penatalayanen wari sendah mulihi kita isingetken kerna tugas panggilennta selaku kalak si enggo ngaloken keselamaten i bas Jesus Kristus. Kita enggo idilo Dibata bengket kubas keselamaten janah iutus Dibata ka kita guna meritaken kabar keselamaten e ku sekelewetta.

WARI SI PEENEMKEN, JUMAT 25 JANUARI 2019

Nrs. Pdt. L. br. Sinuhadji (Bp. Rey Tarigan)

Invocatio : “Totoken maka icidahken TUHAN Dibatandu min man kami dalan si man dalanen bage pe kai si arus ibahan kami” (Jeremia 42:3)

Ogen : 1 Samuel 8:19-9:2

Khotbah : 1 Korinti 12:27-31

Tema : “Dibata si mereken kengasupen si lit i bas perpulungen”

Penjelasen Bahan Pustaka & Aplikasi

Perpulungen i kota Korinti termasuk perpulungen si beruntung sebab ibere Dibata man bana pemere-pemere Kesah (karunia-karunia Roh Kudus) si luar biasa. Tapi persoalenna, la ietehna man kai pemere-pemere Kesah e janah orientasina masih guna dirina entah pe kelompokna saja. Maka turah persoalen i tengah-tengah perpulungen Korinti, erkiteken kelompok sada ngatakenca pemere Kesah si lit bas ia si hebatna asangken pemere-pemere Kesah si lit bas kalak entah pe kelompok si deban. Lit kiniganjangen rukur sada ras si debanna. Kedungenna terjadi la siangkan sada ras si debanna janah terjadi kinilaraturen i tengah-tengah perpulungen.

I bas kondisi si bagenda rupana rasul Paulus ngirimken suratna man perpulungen Korinti gelah ieteh perpulungen e kai tujun pemere-pemere Kesah si lit bas perpulungen janah gelah lit kiniraturen si kedungenna tentuna semakin meningkatkan kualitas ras kuantitas pelayanen guna kemulian gelar Kristus.

I bas bahan khotbahta sendah iajuk perpulungen Korinti gelah ersada i bas Kristus. Sebab kerina perpulungen e me kula Kristus janah sekalak-sekalak perpulugen e me ring-ring si seri kedudukenna (labo lit si ganjang teruken) guna saling melengkapi sada ras si debanna. Kristus ngenca takal perpulungen janah kerina pemere-pemere Kesah si lit i bas perpulungen tujunna hanya guna membangun kula Kristus janah guna kemulian gelarNa. Dibata si netapken peran-peran si lit i bas perpulungen rikutken pemere-pemere Kesah. Ertina perpulungen labo perlu meganjang ukur entah pe merasa rendah diri erkiteken Dibata si netapkenca janah perpulungen tading mengaplikasiken kerina peran si enggo itetapken Dibata sue ras pemere-pemere Kesah si lit.

Dibata mereken kerina si jadi kebutuhen Gereja i bas kerina jaman rikutken konteksna. Tujunna seri e me guna pembangunen kula Kristus janah gelar Dibata semakin ipermuliaken arah litna Gereja i tengah-tengah doni enda. Genduari enggo melala hal si labo seri ras Gereja si pemena. Umpamana i bas jaman si serba maju i bas bidang teknologi digital, akap kami infokus ras operatorna enggo jadi kebutuhen bas Gereja. Kendaraan bermotor ibutuhken guna pelayanen. Media sosial enggo jadi kebutuhen i bas nehken informasi pelayanen. Penggunaan cetaken si berbasis kertas akap kami enggo waktuna sikurangi entah pe sialihken ku cetakan berbasis digital. Engkai maka bage? Erkiteken kertas bahan dasarna e me kayu, adi sikurangi penggunaana seri ertina ras menjaga lingkungan hidup. Gereja sahabat alam. Ras melala hal si deban. Bagi temata sendah, “Dibata si mereken kengasupen si lit i bas perpulungen”, ertina Dibata labo saja mereken kai si jadi kebutuhen Gereja guna semakin meningkatken kualitas ras kuantitas pelayanen, tapi Dibata pe mpengasup perpulungen guna ngelitkenca ras makekenca alu mehuli kerina si jadi kebutuhen GerejaNa. Kuncina tading bas kita, nggit entah lang kita jadi alat Dibata guna terus-menerus berinovasi guna pembangunen kulaNa?

Invocationta nuriken kerna kalak Israel si sangana lit i bas kebiaren erkiteken Gedalya peminpinna mate ibunuh, mindo man Jeremia ertoto man Dibata gelah “icidahken TUHAN Dibatandu min man kami dalan si man dalanen bage pe kai si arus ibahan kami”. Tentu jadi penungkunen engkai maka ikataken “Dibatandu?” Berarti kalak Israel si sangana lit i bas kebiaren e la nari tek man Dibata. Tapi si penting i jenda, kalak e tetap mindo petunjuk i bas Dibata nari kerna kai si arus ilakokenna amin pe mungkin la nari isembahna Dibata si isembah Jeremia. Ogen si pemena nuriken kerna bangsa Israel si mindo sekalak raja man Dibata erkelengken Samuel. Ituriken maka ibahan Dibata bagi sura-sura bangsa e janah Saul ipilih guna jadi Raja Israel.

Dua hal si penting i jenda e me : 1) invocationta ngajuk kita gelah mindo petunjuk i bas Dibata nari arah pertotonta guna kemajun ras perkembangen pelayanen i tengah-tengah Gerejanta. Enda sedalanen ras bahan khotbahta khususna ay. 31a, nina, “Emaka ersura-suralah kam guna ndatken pemere-pemere Kesah si terulin.” Enda akap kami maksudna gelah Gereja-gereja ula mengalami kemandegan (stagnan) i bas pelayanen, lalap lit hal si mbaru guna kemajun pembangunan kula Kristus. 2) Tek kita maka Dibata pasti mereken kai si jadi kebutuhen pelayanan i bas Gerejanta bagi IA mereken kai si jadi sura-sura bangsa Israel. Genduari tading kininggitenta guna maju ras berkembang, mau terbuka terhadap hal-hal si mbaru guna kemajun pelayanen i bas Gerejanta.

WARI SI PEPITUKEN, SABTU 26 JANUARI 2019

Nrs. Pdt. L. br. Sinuhadji (Bp. Rey Tarigan)

Invocatio : “Erjabap Jesus, “Kelengilah Tuhan Dibatandu asa ukurndu, asa tendindu, dingen asa gegehndu lit” (Matius 22:37)

Ogen : Ulangen 10:12-15

Khotbah : Kolose 3:22-25

Tema : “Erdahinlah guna Tuhan”

Penjelasen Bahan Pustaka & Aplikasi

Bahan khotbahta lit si ngatakenca e me pengajaren rasul Paulus kerna etika kerja kristiani. I bas etika kerja kristiani, man kerina bawahan arus lit bas ia karakter taat (patuh), tulus (bulat ukur la ngarapken pujin i bas manusia nari), ras kesungguhan (tutus, ay. 22-23). Etika kerja kristiani orientasina labo tuan, atasan, entah pe bos, tapi Dibata (ay. 23). Adi orientasina tuan, atasan, entah pe bos banci sanga la reh bos ate-atena saja erdahin, pura-pura baik, menjilat, rsd. Tapi adi Dibata si jadi orientasina erdahin, maka lit entah la lit bos i adepena, mehuli entah jahat bosna, tetap ia erdahin alu tutus erkiteken Dibata Mahahadir (omnipresent) janah iarapkenna upah i bas Dibata nari (ay. 24) bage pe ihindarina ukumen i bas Dibata nari (ay. 25).

I bas etika kerja kristiani, erdahin labo saja ertujun guna datken sen tapi guna berkarya menghasilkan si terbaik, berinovasi, berkreasi, mengaktualisasiken dirinta, rsd., si mabai labo sekelewetta saja si senang tapi kita si ndahikenca pe tuhu-tuhu sukacita. Pendahinta tuhu-tuhu jadi pasu-pasu labo saja man dirinta tapi pe man kerina kalak si lit i sekelewetta. Point menarik berikutna, adi guna manusia kita erdahin (ay. 23) pasti erbahanca kita tebang pilih entah pe erayo-ayo. Adi kalak bayak, erpangkat man hadapen pasti luar biasa sikapta, tapi sebalikna adi kalak si biasa-biasa si nihadapi kita, banci jadi perbahanenta pe biasa-biasa saja kurang mehuli ka deba. Tapi adi guna Dibata kita erdahin, entah pe Dibata tolok ukurna, bayak entah pe kalak mesera seri kerina siban, erkiteken kai si nidahiken kita guna kemulian man Dibata.

Adi sibandingken ras Epesus 6:5-9, rasul Paulus labo saja ngerana ras budak-budak tapi pe ras tuan-tuan, nina, “O kam tuan-tuan! Kam pe bage ka lah perbahanenndu nandangi budak-budakndu. Olanai ia ipesega-segandu. Ingetlah! Subuk kam, bage pe budak-budakndu sada kap Tuanndu i Surga. Janah labo erndobahen kam i lebe-lebeNa” (Alkitab BIS - BIMK : “Saudara-saudara yang menjadi tuan! Hendaklah kalian bersikap begitu juga terhadap hamba-hambamu. Jangan lagi memakai ancaman-ancaman. Ingat bahwa kalian dan hamba-hambamu itu, sama-sama mempunyai satu majikan, yaitu Tuhan yang di surga. IA tidak memandang muka”. Etika kerja kristiani labo saja berhubungen ras budak entah pe bawahan tapi pe man kerina tuan, atasan, entah pe bos, labo saja i bas hal membangun relasi si mehuli ras bawahanna tapi i bas nehken perhatin si tuhu-tuhu i bas kesejahteran, kenyamanan, keamanan, ras kiniulin si debanna man pegawai-pegawaina.

Etika kerja kristiani enda enggo mabai keberhasilen man kalak Kristen sepanjang sejarah. Melala tokoh-tokoh Kristen si jadi pasu-pasu man sekelewetna. Sanga musil denga ia tutus erdahin, kenca enggo jadi bos, mehuli ia man sekelewetna. Tuhu-tuhu jadi pasu-pasu labo saja man dirina, keluargana, sekelewetna tapi pe jadi pasu-pasu i bas perkembangen kekristenan sepanjang sejarah. Bahan khotbahta sendah ngajuk kita gelah : 1) lit bas kita karakter taat, tulus, ras kesungguhan. Adi enggo lit gelah semakin ipeteguhi. 2) Njadiken Dibata sebage orientasi geluhta khususna sue ras tema i bas pendahinta. Enda seri ertina ras ngkelengi Dibata bagi invocationta bage pe peraten Dibata man banta gelah patuh kita man baNa bagi ogenta si pemena. 3) Berkarya guna menghasilken si mehuli bagi Dibata enggo nepa doni enda ras kerina isina, perfect! Jadi pasu-pasu man diri sendiri, kalak si deban, ras GerejaNa.

Temata i bas wari terakhir Pekan Penatalayanenta tahun 2019 enda e me, “Erdahinlah guna Tuhan”, enda me si jadi palasta i bas Prioritas Program Pelayanan GBKP 2019 : “Meningkatkan jiwa kewirausahaan (enterpreneurship) warga GBKP dalam bidang ekonomi serta kepedulian terhadap kesehatan dan lingkungan”. Mari radu ras kita saling menopang i bas hal peningkaten kualitas ras kuantitas ekonomita. Jadikenlah Gerejanta ingan berbagi ide entah pe gagasan guna semakin meningkatken kualitas ras kuantitas ekonominta. Man banta si lenga lit CU entah pe CUM enggo paksana ilitken i bas Gerejanta alu pengelolaan si transparan ras mehuli. Ceramah-ceramah entah pe pelatihan-pelatihan kerna ekonomi kreatif banci ilakoken i bas Gerejanta. Mari sigali ras sikembangken talenta-talenta si lit bas anak-anakta kitik-kitik nari, sebab talenta-talenta e ndai banci jadi salah sada alternatif i bas peningkaten ekonomi keluarga. Enggo melala contoh artis, musisi, seniman, rsd., si awalna aktif melayani i bas Gereja.

Hal si deban si penting e me, mari radu ras sijaga kesehatenta, janah mari radu ras sijaga alam sekelewetta. Gereja sehat ras Gereja sahabat alam akap kami arus terus-menerus idengung-dengungken sedekah tahun enda, gelah tuhu-tuhu banci denga ternikmati keberhasilenta i bas bidang ekonomi. Dibata si masu-masu kita i bas tahun si mbaru enda.