Renungan Minggu Advent

MINGGU-MINGGU ADVENT[1]

(Pdt. Dr. Jadiaman Peranginangin)

Enggo ka me kita bengket ku bas Minggu-minggu Adven i bas Kalender Gerejawinta. Lit empat minggu dekahna. Ibenaken i bas tgl. 29 November, tgl. 6 Desember, 13 ras 20. E maka tgl. 24 malam Natal (Christmas Eve) ras 25 Desember wari Natal. Je nari tgl. 26 sitambahi ka alu Natal si peduaken. Si jadi penungkunen man banta, lit dengalah ndia ertina ibahan Minggu-minggu Adven enda adi tgl. 1 Desember nari pe kita enggo erwari Natal?

I bas kita erwari Natal tentu berita keselamatan i bas ketubuhen Yesus i karang asuh-asuhen kuta Betlehem si jadi pusat berita. “Kam o Betlehem i Efrata, aminna gia kam kuta si kitikna i urung Yudea, tapi i bas kam nari reh Kristus Tuhan e si ngerajai Israel” (Mikha 5:1).

Tentu labo maksudna politis nubuaten enda. Labo maka arah nubuaten enda ipadanken man kalak Israel bagi isingetken i bas Pustaka si Badia maka Yesus reh sebagai pembebas i bas jajahen bangsa si deban nari. Lit kin pengertin si bagenda turah i bas pusuh ajar-ajar Yesus? Seh ngayak Yesus nandangi nangkih ku Surga si bagenda denga nge arapenna, “O Tuhan, la kin genduari atendu manteki kinirajan Israel mulihi?” (Perb. 1:6).

Ngkai maka banci bage? Tentu kurang persiapen. Sura-sura ukurna saja si ipelebena. E maka ajar-ajar Yesus pe termasuk si kurang ersikap ngalo-ngalo Yesus. Kinirajan Dibata nge si ibangun Yesus tangtangna nari, tapi i bas pusuh ajar-ajarNa lalap nge kerajan Israel.

Enggo me rusur ipersingeti Yesus kerna si enda sanga Ia nggeluh denga. Yohanes Peridiken pe tersinget nge ia maka Yesus bagi biri-biri Dibata si siap ibababa ku penggelehen lako nebusi dosa manusia (Yoh. 1:36). I bas Markus 8:34 tersinget Yesus maka “Ise atena jadi ajar-ajarKu, ia arus nimbak peraten dagingna, mersan kayu persilangna janah iikutna Aku”. Janah piga-piga kali iturikenaNa kerna kematenNa (Mar. 8:31-33; 9:30-32; 13:3-13), tapi la iangka ajar-ajar. Sanga i taman Getsemane iajukNa ajar-ajar gelah melala ertoto, tapi la iangka ajar-ajar, “Sura-sura manusia megegeh tapi daging lemah”, nina Tuhan (Mar. 14:38).

I bas persikapenta ngalo-ngalo Yesus enda iperluken kiniteruken rukur, sikap siap ngaloken kai si iperentahkenNa, janah nggit ngikutken kataNa. Adi labo bage sikapta, maka sekedar numpang lewat saja ngenca Ia i bas bulan Desember enda. Seh Januari pe pagi kita tetap nge si gel-gel e, la lit perubahen.

I bas Gerejanta enggo berkembang maka mulai 1 Desember mulai perayaan Natal. Ateta gelah kerina dampar kegeluhenta pe ikut erwari Natal. E maka ibahan me perayaan Natal mulai kin lingkup PJJ Sektor, Persekutuan Kategorial KAKR, PERMATA, Moria, Mamre ras Lansia; iumputi ka lingkup pemukimenta arah tingkat RT, RW, Kuta, Kecamaten, Kabupaten; lingkup ingan erdahin; lingkup STM arah teman semerga, asal sada kuta, rsdna. Lenga ka si sifatna ekumenis ras lokal gerewinta. Banci sibayanngken kuga adi PJJ Sektor saja lit lebih 25, ma la bias sada bulan ngerayakenca. E maka banci i bas sada wari lit piga-piga perayaan Natal si banci iikuti. Tentu Pendeta cukup sibuk i bas bulan Desember enda. Terlebih Pendeta favorit banci sada wari lit telu entah empat perayaan Natalna. Banci la sempat nangtang toga pe. Secara kuantitatif tentu mejile nge sura-suranta e, tapi banci jadi secara kualitatif kurang bermutu. Sekedar meriah-meriah saja. Ateta min gelah lit ka min maknana perayaan Natal e mereken penekanen pesan-pesan pokok i bas Minggu-minggu Adven nari. Sebage pengkhotbah tetaplah ersikap gelah pesan-pesan Minggu Advent tetap bernas ia.

Banci kin dua kepentingen enda idatken secara serentak? Kuantitas ras kualitas? Adi penekanen si pemena aspek kuantitas keterlibaten i bas Natal e si penting, si penting kerina jelma muat bagin, janah dampar kegeluhen pe isoroti. Si pokok i bas Natal enda ndarami pembicara si la membosanken. Penyampaian pesan pe menarik, la mberat-mberat man ukurenken. Adi banci min banci ka tawa-tawa janah meriah. Kai kekhasen berita Natal la jadi soal. Pesan Natal pe enggo labo nari si terpenting. Si penting kerina kita erwari Natal.

Adi soal kualitas? Kai ka arus ibahan? Tentu pesan Natal pe perlu ka nge iorati kai situhuna berita Natal si perlu ibutuhken jiwanta? Lit jemaken erkiniteken ndalani wari-warinta si dem perbeben enda. Jumpa kita ras Kristus. Sialoken Ia jadi Juruselamatta. Ia nemani kita ndalani tahun si mbaru si lenga sibenaken. Alu bage maka lit Pengawalta ndalani wari-warinta.

Adi bagelah situasina tentu melala pe dana si ipedarat meriah nge ukurta. Lit perpulungen i bas wari Natal la nari ipepulung dana i bas anggota, e maka kerina kas sada tahun itungtungken mbiayai Natalta e. Tentu labo kerina wari Natal banci bage. I bas Natal Sektor cukup kasna. Tapi i bas Natal si deban ikutip ka nge i bas anggota nari. Sada jabu banci empat lima kali ngadang biaya Natal. Lenga ka ningen nukur baju baru, seragam baru, sepatu baru, rsdna. E maka kas rumah tangga pe ibebani biaya ka me si cukup lumayan. Adi tama keriahen ukurlah labo masalah. Tapi kuga adi ekonomi keluarga pe sedekah enda pas-pasen. I jenda me kesempatenta ncidahken solidaritas nandangi temanta, gelah ola jadi perbeben si mberat man bana. Lit ka me min sikap solidaritas i bas warga jemaat. Janah ncidahken rasa solidaritas enda pe ula menyinggung perasaan kemanusianna. Tapi banci idarami cara terhomat kuga nehken kekelengen enda alu meriah ukur pekepar, la maba ketersinggungan man bana.

Jadi masa Adven e me masa ersikap: pusuh peratenta ersikap alu meteruk rukur ngaloken Yesus selaku Juruselamatta; bage ka pe i bas ngaloken teman kita pe perlu ersikap ncidahken solidaritas nandangi temanta si sada kiniteken bage pe solidaritas nandangi tetangganta si membutuhken keleng ate Tuhan i bas geluhna. Sitawarkenlah Yesus si mereken kegeluhen si rasa lalap janah sitawarken geluhta jadi teman si solider man bana. Amin.

---

[1] Pernah dimuat di Warta Maranatha GBKP tahun 2012, dan masih layak untuk direnungkan. Selamat menantikan kelahiran Juruselamat kita.