Bimbingen Pekan Keluarga GBKP 2015

SUPLEMEN BIMBINGEN PEKAN KELUARGA GBKP 2015

Pdt. Larena br. Sinuhadji (Nd. Rey Tarigan)

Tema Umum :

“Nggeluh bagi Kula Ni Kristus” (1 Kor. 12:27)

“Ersada ras Tuhan ras saling melengkapi sada ras si debanna”

Pekan Keluarga Wari I (Tgl. 15 November 2015)

Invocatio : “Angkatlah pintu gerbang si nuria, maka bengket Raja mulia. Ise kin Raja mulia e? E me TUHAN si mbisa, TUHAN si permenang i bas perang” (Masmur 24:7-8)

Ogen : Jesaya 40:3-8

Renungen : Matius 1:18-25

Tema : ALOKENLAH KETUBUHEN YESUS

Penjelasen Bahan Pustaka Si Badia

Bahan renungenta ngerana kerna ketubuhen Yesus Kristus. I bas Injil Matius secara khusus Malekat Tuhan reh man Jusuf guna mpetetap ukurna si bakal nirangken Maria alu sinik-sinik kenca enggo ietehna tunangenna ndai mehuli kulana (bdk. I bas Injil Lukas Malekat Tuhan reh man Maria). Kitab Injil Matius menegasken, maka walaupe enggo mehuli kula Maria ope ia erjabu si e jadi erkiteken Kesah si Badia, labo erkitken perbahanen si la mehuli.

Perban Jusuf kalak si bujur (tulus hati, murah hati), la lit sura-surana ngaduken Maria gelah ola mela akapna. I bas paksa si e, pertunangen secara hukum bali ras kalak si erjabu, maka i bas Alkitab bahasa Indonesia ikataken “Yusuf suaminya”, “Maria sebagai istrimu” ay. 19-20. Pertunangen banci isirangken alu surat resmi, janah adi terdat maka si diberu berzinah ras kalak si deban, maka ia arus iukum mate (Ul. 22:23-24). E maka guna nelamatken Maria ras gelah ula mela Maria (gelarna icemarken i bas jelma si nterem), ersura-sura ia nirangken Maria alu sinik-sinik (mbereken surat perceraian man Maria). I je me reh Malekat Tuhan, asum ia rukur-rukur mpertimbangken baik burukna keputusen si bakal ibahanna guna mpetetap ukur Jusuf gelah ola itadingkenna Maria, sabab anak si lit bas bertin Maria jadi erkiteken kuasa Kesah Dibata. Janah Anak Dilaki e pagi si nebusi bangsaNa i bas dosa-dosa nari. E maka arus ibahan Jusuf gelarna Yesus (bhs. Ibr. : “Joshua” ertina Juruselamat, si sejajar ras penggelaren Imanuel - Dibata ras kita). I je me peranan Jusuf sebage bapa, menjamin maka anak si bakal tubuh e, secara sah iakui sebage kesusuren Daud (Mat. 1:16). Jadi kai si enggo jadi enda merupaken penggenapen i bas nubuaten nabi-nabi arah Tuhan nari i bas paksa si nai (Jes. 7:14, “Mehuli me pagi kula sekalak si nguda-nguda je nari ipupusna me sekalak anak dilaki janah ibahanna gelarna Imanuel”). Jusuf patuh, la surung isirangkenna Maria, ialokenna Maria jadi ndeharana.

Bahan ogenta, kitab Jesaya bagin si peduaken ngerana kerna keselamaten man bangsa Israel i bas pembuangen nari. Kai si iseruken i bas nats enda merupaken nubuaten sekaligus penggenapen arah kehadiren Johanes Peridiken si erkotbah i taneh mesawang sebage pelopor (perintis) entah pe si mbuka dalan i bas kerehen Yesus Kristus ku doni enda (Mat. 3:3; Mrk. 1:3; Luk. 3:4; Joh. 1:23). Kata-kata si ibelasken Jesaya merupaken kata-kata pengarapen maka keleng denga ate Tuhan nandangi bangsaNa ras ipulahiNa bangsaNa. Respon si arus icidahken bangsaNa e me nggeluh i bas pertobaten, jera i bas dosa-dosana nari. Deleng-deleng ipekendit, kelbung-kelbung itambusi, taneh si bongkak bangkit iperata. Ertina, pusuh si dem alu kesombongen, egois, elem-elem, kinirawan arus ibersihken. Nggit kita ngubah pusuh peratenta bagi si ngena ate Dibata. Manusia rusur arus ipersingeti maka geluh enda singkat, bagi rudang-rudang i mbal-mbal kiniulinna kentisik ngenca, bage pe bagi dukut-dukut si pedas melus. Tapi Firman Tuhan tahan rasa lalap seh rasa lalap. Payo, maka keselamaten perkuah ate Tuhan, tapi i bas manusia nari arus merespon alu tek man Tuhan ras nggeluh bagi si ngena ateNa.

Aplikasi

Kita enggo mengketi minggu Advent si pemena i bas bulan November minggu si terakhir. Advent (bhs. Latin “Adventus” - kerehen). Advent berarti masa persikapen i bas kerehen Tuhan Yesus si peduakaliken bage pe memperingati Ia si enggo reh ndube ku doni enda, si tubuh i karang asuh-asuhen. Masa Advent e me masa persikapen secara pertendin, persikapen pusuh peratenta (labo terjeng fisik, baju baru, kue-kue, perayaan seremonial, rsd.), i bas kita mperingeti ketubuhen Tuhanta Yesus Kristus ku doni enda, sekaligus persikapen kerehenNa si peduakaliken. Kai si perlu sipekena, sipesikap i bas geluhta, maka metunggung kita ngalo-ngalo kerehenNa? Adi kin sedekah enda nggeluh denga alu kesombongen, egois, erelem-elem, rsd., enggo perlu ipelimbarui ras ula tertaren-taren. Sue ras temanta, “Alokenlah Ketubuhen Yesus”, ertina, mengakui keberadaan Yesus Kristus i bas dirinta seh makana geluhta iplimbaruiNa. Mengakui keberadaan Yesus Kristus i bas keluarganta seh makana Ia ngenca si jadi Tuhan i bas keluarganta. Mengakui keberadaan Yesus Kristus i bas geluhta, seh makana kita ipengasupNa mplimbarui lingkungen sekitarta.

Enggo pasti i bas masa persikapen mbue tantangen si man alanken, tapi arus siimani maka Yesus Kristus e me kap Juruselamat ras Imanuel. Melala jalan-jalan keselamaten si itawarken doni enda, tapi Yesus Kristus ngenca Tuhan ras Juruselamatta. Janah Ia Imanuel, Dibata si tetap ras kita, amin kai pe si terjadi, la pernah kita itadingkenNa, adi tetap Ia sijadiken penalementa. Bagi pengalamen Jusuf ngasup ngalaken tantangen erkiteken ketaatenNa man Tuhan.

Pekan Keluarga Wari II (Tgl. 16 November 2015)

Invocatio : “Sabap kam pe tangkas ietehndu maka wari Tuhan e reh bagi penangko si reh asum berngi” (1 Tesalonika 5:2)

Ogen : Matius 25:1-13

Renungen : 1 Petrus 1:13-16

Tema : ERSIKAP RAS METENGETLAH

Penjelasen Bahan Pustaka Si Badia

I bas bahan renungenta, rasul Petrus mereken pergegeh man perpulungen si sangana ngenanami kiniseran erkiteken sebage pengikut Kristus, gelah tetap banci setia seh ku ujungna, maka lit piga-piga hal si arus idalanken:

1. Ersikap katawari paksa pe seh kerehen Tuhan peduakaliken. I bas masa persikapen e kita arus tetap aktif labo pasif.
2. Metengget (waspada).
3. Tetap erpengarapen man Tuhan seh kerehenNa si peduaken. Adi enggo bene pengarapenta man Tuhan e me si erbahanca murah kita putus asa, patah semangat i bas ndalani geluh enda. Arus lit pengarapenta, maka wari sendah terulin asa si nderbih, wari pepagi terulin asa si genduari. Pertolongen Tuhan selalu tepat i bas waktuna nandangi anak-anakNa si tetap erkemalangen man baNa.
4. Patuh man Dibata. Lit pengendalian diri (penguasaan diri) gelah ula sipelepas geluhta ibabai sura-suranta si ndekah i bas kita lenga tek man Tuhan.
5. Tetap njagai kebadian e i bas kerina perbahanen, sabab Dibata si ndilo kita pe badia. Konteks paksa si e erkiteken kiniseran si ialami perpulungen erbahanca perpulungen la nari nggeluh bagi si ngena ate Tuhan. Geluh bagi sura-surana saja, sebage kalak si tading bas kegelapen. E maka ilumbaken rasul Petrus gelah perpulungen e tetap nggeluh badia. Maksudna i bas kelemahenta (kinilangasupenta) siendesken tetap geluhta gelah Tuhan si nampati kita guna nggeluh bagi si ngena ateNa, e me nggeluh badia.

I bas pengogen si pemena, e me kerna perumpamaan sepuluh kalak si nguda-nguda, lima kalak si pentar ras lima kalak nari si lenge, si ngambarken kerna Kinirajan Surga. Arah ogen enda ngajari kita guna tetap ersikap katawari paksa pe, sabab la sieteh ndigan Anak Manusia e reh. Kita arus pentar makeken ras ndalani wari-wari kegeluhenta (Mas. 90:12) sabab kerehen Tuhan Yesus peduakaliken la ise pe metehsa.

Bage pe i bas invocatio, rasul Paulus mpersingeti perpulungen Tesalonika gelah tetap ersikap, sabab wari Tuhan e reh bagi penangko si reh asum berngi. Sabab lit pemahamen kalak Tesalonika, ndekah denga Tuhan e reh e maka banci denga santai-santai, terlebih perbahanenna pe la ncidahken kalak si enggo nggeluh i bas terang. Pengaruh i bas pemahamen kalak Tesalonika lit ka i bas perpulungen, i ja nina, “Kenca enggo metua saja maka i je bertobat”, kepeken lenga seh metua pe, enggo leben ia idilo Tuhan.

Aplikasi

Tema Pekan Keluarga wari peduaken, mabai kita gelah tetap ersikap ras metengget. Ertina arus kita tetap aktif, entah pe tetap kita ngelakoken hal-hal si positif dalam rangka nimai kerehen Tuhan Yesus si peduakaliken. Persikapen i jenda, labo hanya menunggu tapi mbue hal si banci silakoken kita, subuk i bas bersekutu, bersaksi, melayani, ndalanken tanggungjawabta rikutken peran si enggo ibereken Tuhan man banta (perbulangen, ndehara, anak i tengah-tengah keluarga,  masyarakat, rsd.). Pentar kita makeken wari-wari kegeluhenta.

Metenget (wasapada), erkiteken i bas masa penantian e, tentu mbue tantangen subuk berupa perbeben bage pe keriahen doni si banci beneken kinitekenta adi la tetap kita ernalem man Tuhan. Ula sempat ndabuh ku bas godaan okultisme, termasuk berhala modern, kerangapen materi, kekuasaan, si erbahanca kita menghalalkan segala cara, alu alasen kepepet entah pe keadaan si erbahanca enggo terbawa arus. Nggeluhlah tetap sebage anak-anak terang sabab penebusen i bas dosa si enggo sialoken i bas Dibata nari arah Jesus Kristus.

Pekan Keluarga Wari III (Tgl. 17 November 2015)

Invocatio : “Kalak si erkeleng ate ngasup nggengken kai-kai pe, tek maka lit si mehuli i bas kerinana, tetap erpengarapen dingen saber i bas kai-kai pe” (1 Korinti 13:7)

Ogen : Masmur 133:1-3

Renungen : 1 Tesalonika 4:9-12

Tema : NGKELENGI LEBIH ASA SI ENGGONA

Penjelasen Bahan Pustaka Si Badia

I bas bahan renungenta, rasul Paulus mpersingeti perpulungen Tesalonika gelah tetap nggeluh bagi si ngena ate Dibata. Secara khusus i bas renungen enda, si isoroti rasul Paulus e me kap kerna keleng ate nandangi sada ras si debanna, perlebe man si sada kiniteken. Ipujiken Paulus maka sedekah enda pe enggo icidahken perpulungen Tesalonika i bas nehken kekelengen man kalak Makedonia. Tapi i jenda Paulus mindo gelah kekelengen si icidahken perpulungen lebih asa si enggona. Ertina, ula merasa puas entah cukup i bas kita enggo ngkelengi temanta, tapi arus lit peningkaten subuk secara kuantitas bage pe kualitas i bas kita ngkelengi. Ola iantan-antan i bas ngkelengi e.

Inasehatken rasul Paulus maka perpulungen arus nggeluh alu tenang, janah ola tergoda guna ncampuri urusen kalak si deban, i bas bahasa Indonesia, “mengurus persoalan-persoalan sendiri”. Bage pe kita arus mandiri, la bergantung man kalak entah pe jadi “benalu” man kalak si deban. Kalak Kristen arus tetap mampu nggeluh mpermuliaken Tuhan terlebih man kalak si la sada kiniteken ras kita. Sabab kegeluhenta e me kap kesaksian man kalak si deban.

I bas pengogen si pemena, Pemasmur ngerana kerna keleng ate man ersenina. Sada kesangapen (kebahagian), adi kalak si ersenina sada perarih. Ipebali ras minak wangi si meherga si icucurken ku takal Harun. Minak e me kap simbol pengurapen man imam entah pe raja (lambang kehormaten, pengharagaan). Bage pe bali ras embun i deleng Hermon si nusur ku deleng-deleng Sion. Deleng Hermon e me deleng si meganjangna, janah biasana lit rusur embun entah pe salju sepanjang masa. E maka rusur embun e iterbangken angin ras embun e nusur ku deleng-deleng Sion, ngelitapi pertanian i Israel. Ertina, arah dua gambaren enda, icidahken maka kehamaten, pasu-pasu si tetap ibereken Tuhan sepanjang masa asum kita banci nggeluh sikeleng-kelengen, ersada arih sada ras si debanna. Umpamana, sada keluarga si ersada perarih dingen nggeluh sikeleng-keleng erbanca si natap-natap pe senang, bangga, salut, bahkan keluarga e tuhu-tuhu jadi usihen entah pe ihamati.

Aplikasi

Kekelengen e me kap inti i bas Pustaka si Badia nari (bdk. Luk. 10:25-27, penungkunen kalak Farisi man Tuhan Yesus, e maka nina, “Kelengilah Tuhan Dibatandu ras kelengilah temanndu manusia”). Kekelengennta man Tuhan si la siidah kita arus iwujudnyataken i bas kita ngkelengi kalak si deban ka. Ibenaken i bas keluarga inti nari, keluarga besar, jiran (tetangga), perpulungen, bage ras kalak si deban. I bas jaman genduari cukup mbue tantangen i bas kita nehken kekelengen sabab erlumba jelma ngukurken dirina masing-masing (egois, individualis).

Tapi renungenta sekali enda mpersingeti kita guna tole ngkelengi lebih asa si enggona. Subuk i bas jabu, antara suami - istri, banci erkiteken kesibuken enggo urak (luntur) kekelengen e. Orang tua ras anak entah pe sebalikna; kerina anggota jabu sibuk dengan urusenna masing-masing, piah dungna mbue anak-anak si lebih senang curhat man temanna asangken man orang tuana. Bage pe kekelengen man kalak si deban. Mekatep si terjadi i bas kita diskusi entah pe ncakapken kerna kekelengen banci ndekah ras gedang tapi seh ku bas praktek agak mesera guna ndalankenca. I bas kita nehken kekelengen, nampati kalak si deban arus ibenai alu langkah iman, ula mbiar, ula ragu-ragu, sabab kehadirenta selaku kalak si enggo ngaloken kekelengen i bas Dibata nari rutang guna nehken kekelengen man kalak si deban (Roma 13:8). Geluhta arus ernanam man kalak si deban. Asa gegeh ras ukurta bahkan arus sitingkatken i bas nehken kekelengen e asa si enggona.

Pekan Keluarga Wari IV (Tgl. 18 November 2015)

Invocatio : “Jabu ipanteki erpalasken kepentaren ras pengertin. I ja lit pemeteh, i je lit bilik-bilik kuh ras barang-barang si meherga ras mehuli” (Kuan-kuanen 24:3-4)

Ogen : Epesus 5:21-23

Renungen : Kejadin 2:18-24

Tema : KINIERSADAN JABU E ME SURA-SURA DIBATA

Penjelasen Bahan Pustaka Si Badia

I bas bahan renungenta, perjabun e me kap inisiatif Dibata. La mehuli iakap Dibata adi manusia nggeluh sisada-sisada, e maka ibahan Tuhan teman si cocok guna banci nampati manusia. Walupe lit nge manusia si nggeluh sisada (melajang, la erjabu, selibat) erkiteken erbage-bage hal (bdk. Mat. 19:12, lit erkiteken pertubuhna nari, kalak si deban erbahanca la ia erjabu, entah pe igejapkenna maka ia idilo guna dahin i bas Kinirajan Surga).

Ibahan Tuhan arah sitik abu taneh rubia-rubia ras perik-perik ras ibahan manusia gelar-gelar rubia ras perik ndai, tapi sada pe la lit jadi teman si cocok guna nampati ia. E maka ibahan Tuhan Dibata ntabeh pertunduh manusia, je nari ijadikenna sekalak diberu i bas tulan rang-rang e nari, kenca bage itaruhken Tuhan man manusia ndai. Je nari maka erpengue manusia, maka diberu ndai enggo cocok ras ia. Tulanna ibuat i bas tulanku nari, janah jukutna i bas jukutku nari.  Gelah tetap cocok guna banci saling menolong arus terus-menerus ipelihara. I je me iperluken erbage-bage hal gelah tetap harmonis kegeluhen i bas perjabun, subuk nginget padan perjabun, komunikasi si mehuli, kesetian, meminta maaf i bas kesalahen si ilakoken, rsd. Aurelius Augustinus (Bapa Gereja) ngatakenca, ibahan Dibata manusia i bas tulang rang-rang dilaki nari, labo arah takalna guna jadi atasan, labo ka arah nahena guna jadi bawahenna, tapi dari sisinya untuk menjadi mitra sederajat, dekat pada lengannya untuk dilindungi dan dekat di hatinya untuk dicintai.

Dilaki ras diberu ndai nandingken keluargana, gelah banci ersada i bas jabuna, maka duana enggo jadi sada. Empersadaken dua pribadi si berbeda (karakter, latar belakang pendidiken, ekonomi, status sosial, rsd.) labo hal si mesukah, e maka tetap iperluken kiniteruken ukur guna saling melengkapi sada ras si debanna. Ersada guna nehi sura-sura Dibata i bas jabu, janah la lit kai pe si banci nirangkenca pala kematen ngenca.

I bas suratna man perpulungen Epesus, si jadi pengogenta, rasul Paulus mpersingeti maka i bas kegeluhen jabu, perbulangen ras ndehara arus mehamat/erkemalangen/mbiar man Kristus. Mbiar man Kristus si mabai perbulangen ras ndehara patuh nandangi sada ras si debanna. Terjemahan harafiahna e me kap, “Hendaklah kalian rendah hati dan bersedia untuk saling menghormati antara satu dengan yang lain. Lakukanlah itu karena kamu menghormati Kristus”. Ndehara patuh man perbulangenna erkiteken mehamat man Kristus, bage pe sebalikna, perbulangen ngkelengi ndeharana erkiteken mehamat man Kristus. Jadi tanggung jawab si idalanken labo erkiteken mbiar man pasangen (istri-istri takut suami atau suami-suami takut istri) tapi erkiteken erkemalangen man Kristus.

Aplikasi

Jabu lit erkiteken inisiatif Dibata ras sura-sura Dibata, arah jabunta banci kita mpermuliaken Dibata. E maka penting uga tetap ersada jabunta, persadan si nteguh, si la banci ise pe entah kai pe si ngugursa. Sabab melala kasus, erkiteken mbuena persoalen, kemajuan jaman si erbanca jabu e kedungenna iambang kehancuren, bahkan kedungenna sirang, alu alasen la nari cocok. E maka cocok e arus terus ipelihara, irawat. Melala faktor si erbahanca banci jabunta sehat, utuh. Pdt. Dr. Daniel Goh mereken piga-piga kiat :

1. Nginget rusur padan perjabun.
2. Lit pengampunan (menurut Pdt. Billy Graham, adi la lit pengampunen, keluarga banci sirang. E maka perlu meteruk ukur, la lit ise pe kita si sempurna, adi enggo iakuina salahna, jera pasangenta, alokenlah ia alu pusuh si lapang).
3. Komunikasi si mehuli.
4. Menjaga kesetian.
5. Hindari pengaruh orang tua entah pe mertua si terlalu kuat mencampuri rumah tangga.
6. Terampil i bas ngatasi konflik (sijiwai pasangenta).
7. Hargai seksualitas (ula abaiken seksualitas).
8. Proaktif memberikan pujian entah pe pengharagaan.
9. Saling melayani, saling ngkelengi (ula menuntut guna ilayani entah pe ikelengi saja).

Pekan Keluarga Wari V (Tgl. 19 November 2015)

Invocatio : “Kubaba ateku baNdu persembahen pengataken bujurku, janahku ertoto man banNdu” (Masmur 116:17)

Ogen : Perbahanen Rasul 5:1-11

Renungen : 1 Samuel 1:1-5

Tema : JABU SI NEHKEN PERSEMBAHEN ALU PAYO

Penjelasen Bahan Pustaka Si Badia

Ituriken bas bahan renungenta kerna selakak dilaki si gelarna Elkana si tading i Rama, i taneh deleng-deleng Efraim (Ramataim), e me kap i bas suku Efraim nari (anak Jusuf, Manasye ras Efraim), i ja dua ndeharana e me kap Hana ras Penina (paksa si e, i bas kebudayaan Timur Dekat kuno, poligami ianggap wajar - Alkitab Edisi Studi, hlm. 432). Hana la lit anakna, sedangken kiduana lit anakna. Tep-tep tahun Elkana ras jabuna lawes ersembah ras mereken persembahen man Tuhan si mada kuasa i Silo. Enggo sada kearusen dilaki Israel lawes ku pusat peribadaten lako ersembah man Tuhan, telu kali i bas tiap tahunna (Kel. 23:14-19; 34:23). Kurban si nipersembahken man Dibata banci rubia-rubia si enggo itentuken, gandum, buah-buahen ras rempah-rempah. Persembahen si ipersembahken dalam rangka ngataken bujur man Tuhan rikut mindo pengalemi dosa i bas kesalahen si enggo ilakoken. Sebagin besar kurban itutung seh keri i bas mesbah persembahen, sebagin ibereken man imam ras sebagin nari ibagiken ras ipan man si mpesembahkenca sebage “pangan si badia” (Im. 3:7-17; 7:11-18). Si banci siidah i bas perikop enda, uga Elkana sebage bapa i tengah-tengah jabu ngasup ia mabai jabuna erkemalangen man Tuhan secara khusus alu nehken persembahen pengataken bujur. Ertina i je Elkana ngajari jabuna bage pe anak-anakna benaken kitik-kitik nari lako ersembah man Tuhan. Janah tep-tep tahun ia nehken persembahen e man Tuhan. Ertina, secara konsisten ras ratur ia nehken persembahen man Tuhan. Lit i je karakter disiplin. Labo tupung mood maka nehken persembahen, tapi ratur keluarga enda nehken persembahen man Tuhan. Keluarga Elkana enggo nggejapken maka kerina si lit bas ia ras jabuna erkiteken Tuhan, maka Tuhan si mada kuasa ngenca si layak man sembahen.

I bas ogen si pemena, siidah kerna sada jabu e me kap Ananias ras Safira si ersada arihna la jujur i bas nehken persembahen man Tuhan (bdk. Perb. Rasul 4:26-27, Jusuf - Barnabas si ndayaken tanehna, je nari iberekenna duitna man rasul, Perb. Rasul 5:1, “Tapi lit me kalak si deban gelarna Ananias ras ndeharana Safira”). Konteks paksa si e, enterem perpulungen ikut muat bagin guna membangun kula ni Kristus, arah ndayaken taneh ras erta-erta si deban (bdk. Perb. Rasul 2:46). Berbeda ras si Jusuf - Barnabas ndai, ibuniken Ananias ras Safira deba tukur taneh e, sada bagin iberekenna man rasul-rasul. Siidah i jenda kerna ketidakjujuran ras la tulus i bas nehken persembahen man Tuhan.

Aplikasi

Mulai kin i bas awal Dibata nepa manusia, maka manusia nggejapken Tuhan nge si mada doni enda ras kerina isina termasuk Tuhan si masu-masu kegeluhenna, e maka manusia ersembah man Tuhan termasuk nehken persembahen pengataken bujur (Habil, Kain, keluarga Nuh, Bapa Leluhur Israel e me Abraham, Ishak ras Jakub). Lebe arus lit penggejapen bas kita, maka kerina si lit bas kita e me rehna i bas Dibata nari, termasuk keselamatenta, maka patut kita ngataken bujur man Tuhan.

Erlajar arah keluarga Elkana, maka sebage orang tua, khususna bapa, banci mabai keluargana, rikut ras anak-anak enggo iajarina guna ersembah man Tuhan. Disiplin, ratur ras mereken si terbaik man Tuhan, la mekarus.

Nehken persembahen man Tuhan labo hanya berupa duit, tapi pe, rikut talenta si enggo ibereken Dibata man banta. E maka perlu sibabai jabunta rikut ras anak-anakta keleng atena gereja Tuhan ras ikut muat bagin i bas kerina kegiaten i tengah-tengah gereja. Sebage contoh, tupung lit perpulungen (PJJ) bas rumahta, silibatken anakta guna ikut muat bagin, baik i bas ngoge Pustaka, ertoto, entah pe mabai rende.

Pekan Keluarga Wari VI (Tgl. 20 November 2015

Invocatio : “Ola aloken uang sogok, sabab uang sogok erbahanca kalak la nai ngidah si benar, janah perkara kalak si la ersalah ibalikken” (Keluaren 23:8)

Ogen : Nehemia 2:1-22

Renungen : 1 Samuel 16:1-7

Tema : MEGERMET MILIH PEMIMPIN

Penjelasen Bahan Pustaka Si Badia

Bahan renungenta ngerana kerna pemilihen Daud jadi raja Israel nggantiken Saul. Isuruh Tuhan Samuel ku Betlehem, guna banci ia meminaki sekalak i bas anak Isai jadi raja Israel, rikutken pilihen Tuhan. Ibahan me lakon persembahen ras itenahken Samuel keluarga Isai. Janah Tuhan sendiri kari ngatakenca kai si man bahanen Samuel (ay. 3).

Pengidah ras pilihen manusia berbeda ras Dibata. Samuel lebih ngenehen fisikna. I ja idahna Eliap, banci jadi gedang ras mejile rupana. Tapi nina Tuhan, “Ola nehen kuga gedangna ras kuga jilena rupana. La ia kupilih, sabab pertimbangenKu la bali ras pertimbangen manusia. Adi manusia inehenna si teridah arah ndarat, tapi adi Aku Kupernehen pusuhna.” Kenca si Eliap, sada persada terus anak Isai icidahken man Samuel tapi sada pe lenga ipilih Tuhan, subuk Abinadap, Sammah, terus seh pituna anakna, tapi sada pe lenga ipilih Tuhan. Kepeken lit sada nari anak Isai si sangana mpermakani biri-biri bapana, e me kap Daud. Labo terjeng mejile secara fisik (mejile, sehat, janah matana pe mejile), tapi Daud pe kalak si erkemalangen man Tuhan ras berani (bdk. tupung Daud ngelawan Goliat, 1 Sam. 17:45-46). Janah kedungenna, Daudlah si ipilih Tuhan ras itangkuhken Samuel jadi raja. Mulai je nari Daud idemi Kesah Tuhan si ngajari ia i bas memimpin bangsa Israel.

I bas ogen si pemena siidah, kerna raja Persia, Artaserses si tuhu-tuhu erdiate nandangi pegawaina Nehemia. Siidah kinulin raja arah erbage-bage hal. Tupung serbut ayo Nehemia i bas ngidangken inemen man Raja, maka i je itegur raja Nehemia, engkai maka serbut ayona. Labo terjeng je saja, kenca enggo ituriken Nehemia si erbahanca ia susah, maka raja pe terus nungkuni, kai sura-sura Nehemia berikutna, gelah banci isampati raja. Ras kedungenna raja mengabulken pemindon Nehemia, berikut fasilitas surat man pengawas kerajaan, material si nibutuhken guna pembangunen tembok Jerusalem, ras isuruh raja piga-piga kalak perwira ras sada pasukan tentera si erkuda nemani Nehemia i bas perdalanenna ku Jerusalem. Je nari hal si peduaken si banci siidah i bas ogen si pemena, kerna Nehemia sekalak bangsa Israel si itaban i Persia janah situhuna kegeluhenna enggo sikap selaku juru inemen raja tetap erdiate guna kiniulin bangsana, i ja paksa si e tembok Jerusalem lenga lalap ibangun kenca iciluk Babel.

Aplikasi

I bas Tgl. 9 Desember 2015 bangsa Indonesia secara serentak ngelakoken PILKADA. Si rusur terjadi i bas negaranta tupung pelaksanaan pemilihen pemimpin e me erdalanna praktek politik transaksional, ingan pedalan duit gelah ndatken sora. E maka Moderamen GBKP i bas piga-piga waktu si lepas enggo mereken surat pengelayasi gelah gereja banci tetap mampu menyuarakan sora kenabianna nandangi pemimpin-pemimpin bangsa.

Piga-piga hal si penting :

1. Gunaken hak pilihta ula golput.
2. Pemimpin si ipilih kita e me  kalak si banci nehken sura-sura Dibata, guna kiniulin geluhta ras daerahta.
3. Pemimpin si ipilih kita e me lit min bas ia jiwa ngelai janah erpihak ku masyarakat janah si la nggit ndalanken politik uang. Rp. 300.000,- umpamana per-kalak, banci jadi senang siakap hanya 1 wari (sabab enggo langsung keri), tapi banci sengsara kita ibahanna selama ia menjabat sebage pemimpin daerahta.
4. Perpulungen ola ipengaruhi peraten entah perbahanen si la mehuli (bdk. Invocatio : “Ula ngaloken uang sogok”).
5. Secara institusi, i bas PILKADA gerejanta ncidahken sikap netral, e maka gerejanta GBKP la banci ipake jadi ingan sarana kampanye. Adi lit serayan Tuhan si jadi juru kampanye entah pe tim sukses salah sada pasangen, harus non-aktif selama masa kampanye.
6. Man banta perpulungen, serayan, ras panitia-panita ula min tambahi baban calon kepala daerah alu mereken proposal mindo dana entah bantuan.
7. Perdiateken latar belakang (rekam jejak) calon si bakal sipilih kita. E maka sipindo pimpinen Tuhan arah terus-menerus kita ertoto ras sora pusuh erpalasken visi misina.

Pekan Keluarga Wari VII (Tgl. 21 November 2015)

Invocatio : “Janah ingetlah aku tetap ras kam seh ku kedungen jaman” (Matius 28:20b)

Ogen : 2 Korinti 4:7-10

Renungen : Jesaya 54:1-10

Tema : GELEM PADAN TUHAN ALU NTEGUH

Penjelasen Bahan Pustaka Si Badia

Kenca bangsa Israel itaban bangsa Babel, maka kiniseran tuhu-tuhu nderpa bangsa enda, subuk secar fisik bage psikis, tempa Dibata enggo tuhu-tuhu nadingken kegeluhen bangsa Israel. Rikutken bahan renungenta, kiniseran e igambarken bagi diberu si la mupus (bagi lit kemelan, kurang keriahen ukur erkiteken megombang kalak man bana, ay. 4). Tapi kepeken situasi enda labo rasa lalap, sabab kekelengen Tuhan si luar biasa man bangsaNa. Ay. 8, “Labo rasa lalap pernembeh ate Dibata, kenca bage icidahken Tuhan kekelengen Tuhan rasa lalap.” Tentuna situasi enda erbahanca bangsa Israel ermeriah ukur, la nari ikataken la mupus tapi “enterem me anakndu” (ay. 1). Pembebasen ilakoken Tuhan nandangi bangsaNa. Negeri si sedekah enda iingani bangsa si deban, i bas waktuna ibahan Dibata jadi sikerajangen bangsaNa mulihken. Dingen iketen perpadan si sedekah enda ceda, bangsaNa si ngelandih (nadingken Tuhan - gambaren perbulangen ras ndehara), kedungenna erkiteken kekekelengen Tuhan ipelimbaruiNa mulihi padan si sedekah enda enggo ilanggar umatNa. Ilegi ras iulihi Dibata bangsaNa jadi sikerajangenNa. Nina Tuhan, “Kentisik ngenca kam Kutadingken, Kulegi me kam mulihi alu kekelengen si mbelin.” Kai si enggo jadi nandangi bangsaNa i bas paksa enda, ngingetken kerna perpadanenNa si ipelimbarui tupung jaman Nuah, i ja la nari ate Tuhan erbahan kelenglengen i doni enda bagi si terjadi i bas jaman Nuah, arah benteha. E maka genduari pe Tuhan erpadan, ndigan pe la nari bangsaNa itembehi, iukum, irawai. Kekelengen ras padan Dibata igambarken ras kecibal doni si man kebiarenken e me kap gempa, bicara deleng-deleng miser, uruk-uruk pe mundu-undu tapi kekelengen Tuhan la pernah miser i bas umatNa nari. Padan dame si ibahan Tuhan lalap paguh la mundu-undu.

I bas ogen si pemena Rasul Paulus, ngejapken maka ia sebage si nehken Berita si Meriah, alat Tuhan, desken kudin taneh ngenca, ertina murah pecah. E maka ia ras teman-temanna pe igejapina labo lit gegehna seyakatan kuasa Tuhan si erdahin i bas ia, si mpegasup ia ngalaken perbeben seh maka tetap mejuah-juah. Arah apai pe Paulus ndatken kiniseran, itindih, tapi la meripuk. Bingung kami, tapi la seh putus asa. Iayak-ayak musuh kami, tapi la kami itadingken Dibata. Idampesken kalak kami, tapi la seh getem. Kiniseran Jesus si jadi gegeh man Paulus ras teman-teman guna tetap setia ras ermeriah ukur i bas ia ngalaken erbage-bage kiniseran.

Aplikasi

Kadang banci jadi muncul penungkunen bas kita, asum kiniseran nderpa kita, “Entah enggo itadingken Dibata aku, engkai maka ipediat Dibata kami sada jabu mengalami kiniseran?” Firman Tuhan nampati kita i bas proses pergumulen ras perenungen e, maka kiniseran cara Dibata guna menegur, mendidik, ras mematangken (memproses) kinitekenta gelah reh murnina (bdk. 1 Pet. 1:7; Heber 12:5,6).

I bas bahan renungenta ndai, maka hubungen Dibata ras umatNa desken hubungen perbulangen ras ndehara, si ipalasi i bas kekelengen ras padan si nteguh si la ise pe banci nirangkenca pala kematen. Aminna pe i bas kinatana lit rusur si melanggar perpadanen, subuk perbulangen entah ndehara si erbahaca kurang harmonis hubungen e. Bage pe hungungenta ras Dibata, i ja terkadang la kita setia man Tuhan, la kita erdalan i bas dalan si enggo iperentahkenNa, “berselingkuh” kita i ja sisembah dibata-dibata si deban. Tapi i bas kekelengenNa labo rasa lalap Ia ernembeh ate. Beliden kekelengen Tuhan asangken kinirawanNa banta, asum kita jera ras mindo pengalemi dosa bas Ia nari.

Bahkan rikutken ogen, maka arah kiniseran si nderpa kita, i je me banci sigejapken gegeh kuasa Tuhan si erdahin sempurna i bas kegeluhenta. E maka rikutken tema i bas Pekan Keluarga wari terakhir enda gelah ngasup tetap kita nggelem padan Tuhan alu nteguh. Ia tetap setia man banta, Tuhan tetap ngekelengi kita. E maka ula nari ragu-ragu, bimbang, kurang-kurang kesetianta man Tuhan. Babai jabunta guna ertetapna erkemalagen man Tuhan.

Mari radu ras ersikap kita guna ngikuti Lakon Persadan si Badia i bas wari Minggu Tgl. 22 Nov. 2015. Tuhan si masu-masu kita i bas kerina dampar kegeluhenta.