Bimbingen Khotbah Minggu 8 November 2015

BIMBINGEN KHOTBAH MINGGU 8 NOVEMBER 2015

Minggu Kesehaten

Pdt. Larena br. Sinuhadji (Nd. Reynard Tarigan)

Invocatio :

“Nina Daniel man penjaga e, “Pepayolah kami i bas sepuluh wari enda. Bereken gule-gulen saja pangan kami dingen lau saja inemen kami” (Daniel 1:12)

Ogen :

2 Raja-raja 20:1-11 (Tunggal)

Khotbah :

Daniel 1:11-21 (Tunggal)

Tema :

JAGA RAS KELENGILAH KULANDU

Penjelasen Bahan Pustaka Si Badia

Bangsa Israel itaban bangsa Babel erkiteken memang kejahaten bangsa Israel sendiri nandangi Dibata. E maka ipelepas Dibata bangsa Babel naluken ras ngerampas sebagin perkakas Rumah Pertoton ras ibabana ku Babel. Si e nuduhkenca maka bangsa Babel enggo naluken Dibata si isembah bangsa Israel. Tapi adi siidah keseluruhen kitab Daniel, maka Dibata si isembah bangsa Israel Dibata si mada kuasa ras si mbisa, si tetap menang i bas kerina perkara (Ps. 2:47, 3:29, 4:34-37, 6:26-27).

Isuruh raja Nebukadnesar, Aspenas, e me pengulu juak-juakna guna milih piga anak perana i bas kalak Israel si ibuang ku Babel, e me kap kesusuren raja ras si bayak. Labo e saja, tapi kalak si ipilih e arus mejile rupana, pentar kel, mbages pemetehna, pedas nangkap pelajaren, janah la lit sitik pe pandangen i bas kulana, gelah banci ia erdahin i bas istana raja. Iperentahken raja pe maka tep-tep wari kalak pilihen e arus ibereken pangan ras anggur, seri ras si ibereken man kalak si ringan i bas istana raja. Kenca telu tahun ndalani masa karantina, maka kalak ndai kerina arus ngadap i lebe-lebe raja. I bas kalak si terpilih e ikut me Daniel, Hananya, Misael ras Asaria (kalak enda empatna i bas suku Juda nari). E maka enggo itetapken Daniel i bas ukurna maka la ia nggit ngelanggar aturen agamana aminna pe enggo isikapken pangan-pangan si ntabeh ras lau anggur (bhs. Ind. : “Untuk tidak menajiskan dirinya”). Hal enda nuduhkenca, aminna pe bangsa Israel iukum Tuhan erkiteken kejahatenna, lit denga kaum bangswan (kesusuren raja) si tetap denga setia erkemalangen man Tuhan dingen ncikep perpadanenna ras Tuhan. Ipindoken Daniel penampat man Aspenas maka ia ras teman-temanna man gule-gulen saja man panganna ras lau saja inemenna, alu masa percobaan 10 wari. Kepeken kenca enggo sepuluh wari berlalu, teridah ulin rupana dingen mbestangen dagingna kerina asangken kerina anak perana si man pangan bas istana nari. E maka mulai i bas paksa e enggo ibere penjaga ndai kalak enda terus man gule-gulen saja ras lau inemen. Dingen la pernah ipanna pangan raja ras lau anggur si enggo isikapken bas istana nari.

Engkai maka itulak Daniel pangan-pangan rikut ras anggur si enggo isikapken bas istana raja? Berkaiten ras Hukum Taurat, kerna rubia-rubia si ipantangken (Im. 11), la banci man tabeh-tabeh ras dareh (Im. 3:17), ras banci jadi pangan-pangan e enggo ipersembahken man berhala. I ja kebiasan paksa si e, pangan-pangan ras lau inemen enggo leben ipersembahken man dibata-dibata Babel. Ertina i jenda, Daniel ras teman-teman mpermuliaken Dibata termasuk arah pangan-pangan si ikonsumsina.

Man anak perana si empat e, Dibata mereken pemeteh ras kebeluhen kerna erbage-bage surat rikut ras kepentaren si deban. Tambah si e man Daniel ibereken Dibata pe kebeluhen lako ngertiken pengenehenen ras nipi. Janah kenca telu tahun masa karantina, ibahanna me evaluasi, empatna kalak enda ialoken jadi pegawai istana janah persoalen ras penungkunen kai pe si ibereken raja, beluhen njabapsa sepuluh kali lipat asangken kerina guru-guru si beluh ngoge nasip entah pe guru-guru permangmang si lit i bas kerajan e. Si e kerina la terlepas i bas campur tangan Tuhan si tetap njujuri ras masu-masu Daniel ras teman-temanna (ay. 9,17).

I bas ogen si pemena, ituriken kerna ipepalem ras ipegedangken Tuhan umur raja Hiskia 15 tahun nari i bas pinakit si mekelek si ialamina. Padahal jelas enggo reh perkataan Tuhan arah nabi Jesaya, guna ersikap kerna kematenna, sabab lanai ia malem. Bahkan isuruhna guna ia mereken kata pedah si perpudina mana jabuna. Ertoto Hiskia, ras mekuah ate Dibata maka ibereken Dibata kesempaten man bana nggeluh 15 tahun nari. Sehat mulihken Hiskia. Jelas, maka kesehaten rehna labo hanya arah kita njagai asupen pangan si ikonsumsi kita, entah pe vitamin rikut ras suplemen tapi bekas penjujuri Dibata ka.

Aplikasi

I bas paksa gundari mbue kalak, terutama i negara Eropa ras Amerika si vegetarian. Vegetarian e me kap kalak si hanya mengkonsumsi gulen-gulen ras la mengkonsumsi pangan si berasal i bas rubia-rubia nari, kecuali nurung entah pe produk olahan i bas hewan nari (susu, telur, keju). Penganut vegatarian pe, lit erbage-bage macamna, tapi kelompok si ekstrimna kel, e me kap kelompok vegan. Kelompok enda sama sekali hanya mengkonsumsi gule-gulen, bahkan tengguli i bas wani nari pe ihindari. Bahkan kelompok enda pe menentang produk olahan hewan, bagi paken, sepatu, entah pe kosmetik. Alasen utama kelompok enda e me kap guna kesehaten daging kula, ras piga-piga make alasen keagamaan. Janah lit ka, kelompok i bas kekristenan si mantangken man dareh entah pe piga-piga rubia tertentu (bdk. Kej. 9:4, Im. 11,17, Ul. 12:23, rsd). Uga sikapta?

Adi rikutken perkataan Tuhan Jesus i bas Mat. 15:11 Labo si bengket arah babah erbahanca kalak keliamen, tapi si ndarat arah babahna nari nge erbahanca ia keliamen. Jelas, labo lit pangan inemen si ilarang guna ikonsumsi. Tapi bagi si ikataken rasul Paulus i bas 1 Kor. 6:12, “Labo kerina si halal e erguna”. Ertina ibereken Dibata man banta hikmat guna memilih kai si terbaik guna kesehaten daging kulanta, labo hanya sekedar ikut-ikuten budaya nai-nai nari entah pe trend si berkembang gundari soal pangan inemen tapi secara kritis kita memilih alu ndarami informasi-informasi si berkaiten ras kualitas gizi bage pe dampak-dampak pangan inemen si ikonsumsi man daging kulanta. Daniel ras teman-temanna banci ipastiken enggo ietehna manfaat gulen-gulen ras lau si ikonsumsina makana pang ia erbahan perbandingen alu percobaan selama 10 wari. Jadi persoalen man dareh entah lang, mari siukurken secara kritis, kai gunana dareh si ikonsumsinta man daging kulanta?

Persoalen si ialami Daniel ras teman-temanna e me kap labo hanya persoalen gaya hidup sehat tapi pe arah pangan inemen si ikonsumsi tetap ia mpermuliaken Tuhan. Sangat luar biasa penguasaan diri Daniel ras teman-temanna, maka tetap banci ia tahan selera la terpengaruh kalak si deban i bas masa karantina. Njagai ras ngkelengi kulanta banci silakoken arah erbage-bage cara, subuk i bas menjaga pola makan sehat, olah raga teratur, tetap berpikir positf, istirahat si cukup. Rusur ibelasken, “Pangan labo ate keleng, si penting kesehatenlah sijaga”. Janah i bas si e tetap kita ertoto maka Dibata si mereken kesehaten si prima man banta. Ertina, baginta guna njagai kesehaten arus silakoken, selebihna Dibata si menyempurnaken kesehatenta. Kondisi fisik si sehat mbelin pengaruhna ku bas aktivitas kegeluhenta tep-tep wari. Adi labo sehat kita, labo banci terdahiken kita dahi-dahin si enggo iampekken Dibata banta. Memang si rusur terjadi, asum megegeh denga kita labo siakap penting kel kesehaten e, tapi dikenca enggo sakit, tuhu-tuhu meherga kel kesehaten e. Erdaya erta pe labo siakap dalin si penting gelah kita sehat. Ingetlah, maka kulanta enda ringan Kesah si Badia; e maka arus si menyehatkan subuk asupen rohani ras jasmani si bengket ku daging kulanta, gelah sipancarken ku sekelewetta, sibereken kita pe si mehuli, si membangun man dirinta bage pe man kalak si deban.