Bimbingen Khotbah Minggu 27 Desember 2015

BIMBINGEN KHOTBAH MINGGU 27 DESEMBER 2015

Pdt. Larena br. Sinuhadji (Nd. Reynard Tarigan)

Invocatio : “Tapi man kalak si enggo ipilih Dibata, subuk kalak Jahudi bage pe kalak Junani, Kristus e kap gegeh Dibata ras kepentaren Dibata” (1 Korinti 1:24)

Ogen : Jesaya 62:6-12 (Anthiponal)

Khotbah : Lukas 2:41-52 (Tunggal)

Tema : TUTUS MEGIKEN RAS MAKEKEN KEPENTAREN

Penjelasen Bahan Pustaka Si Badia

Nats khotbahta ngerana kerna kehebaten Yesus si paksa si e umurna 12 tahun tapi banci berdiskusi ras guru-guru agama Jahudi. Ituriken, tiap tahun orang tua Yesus berkat ku Jerusalem guna ngerayaken wari Paskah. Janah kenca umur Yesus 12 tahun ibaba orang tuaNa ikut ku Jerusalem. Si enda encidahken maka secara fisik Yesus sehat ras megegeh, sabab perdalinen ku Jerusalem membutuhken waktu 4-5 wari. Kepeken kenca dung perayaan Paskah kerina kalak mulih ku kutana masing-masing termasuk orang tua Yesus, tapi Yesus tading denga i Jerusalem ras orang tuaNa la metehsa kerna si e. Iakap orang tuaNa, Yesus sangana erdalan ras si deban si mulih i Jerusalem nari. Kenca enggo sada wari perdalanen maka sadar orang tuana, kepeken Yesus la ras mulih sabab enggo pe sungkuni ku kade-kadena ras temanNa la lit ise pe metehsa i ja Yesus. Mulihken orang tuana ndaramisa ku Jerusalem. I bas wari peteluken idapeti orang tuana Yesus sangana kundul ras guru-guru agama i Rumah Pertoton. Ibegiken Yesus pengajaren guru-guru agama e janah isungkuniNa pe. Janah setiap jawaban Yesus i bas penungkunen guru-guru e erbahanca kemamangen kerina sabab ijababNa dem alu kepentaren. Janah orang tuana sendiri pe mamang ngidah Ia (Luk. 2:50, 51b).

Yesus reh belinna subuk secara fisik, mental, emosi ras spiritualitasNa. Janah perikop enda itutup alu kata “Yesus reh belinna dingen reh tambahNa pemetehNa, janah reh tambahna ngena ate Dibata ras manusia man baNa” (ay. 52). Tentu kai si ialami Yesus la terlepas i bas kininggiten, ketutusen, usaha kerja kerasNa selaku Ia manusia (Yesus 100% manusia ras 100 % Dibata) ras pendampingen i bas orang tuaNa nari. Si pemena si banci si idah, Yesus patuh man orang tuana (ay. 51). Si peduaken, Yesus nggit erlajar kerna Kata Dibata, lit ketutusen megiken pengajaren (ay. 46,47). Ras si peteluken tetap Ia ngerembaken geluhNa ras BapaNa si enggo mengutus Ia (ay. 49, “Aku arus i rumah Bapangku”). Ras piga-piga kali Pustaka si Badia mencatat maka uga Tuhan Yesus tetap menjalin komunikasi ras BapaNa si enggo mengutus Ia (Mark. 1:35, Yesus ertoto). Je nari orang tuaNa pe berusaha tetap ngkelengi, ngajarken ras mendampingi Yesus.

Aplikasi

Bena-benana kepentaren e me kap erkemalangen man Tuhan Dibata. Erkemalangen man Dibata ertina, tuhu-tuhu nggit ipimpin Tuhan ras taat kerna sura-sura Dibata i bas kegeluhenta. Ietehna si mehuli si ngena ate Dibata ras idalankenna i bas kegeluhen.

Tema : “Tutus megiken ras makeken kepentaren”. Lit sada ungkapen si ngatakenca “Tidak terlalu sulit mencari pembicara yang handal, tetapi yang sulit adalah mencari pendengar yang baik”. Era digital salah sada pendorong maka enggo reh sulitna kita mendengar alu tutus. Lebih setengah jam saja kalak ngerana banci jadi enggo la nari kita konsentrasi.

Erlajar kita arah kai si enggo iteladanken Yesus, maka Ia sendiri pe selaku Anak Dibata alu tutus nggit megiken ras makeken kepentaren e. Si e me genduari si enggo kurang siidah i bas kegeluhenta bage pe anak-anakta. Kisat erlajar, la tutus megiken pengajaren, nasehat orang tua. La nggit ndalani proses si cukup gedang guna banci ndatken kepentaren, erkiteken pengaruh budaya instan. Kepentaren banci sidatken kita, erkitken erbage-bage proses sibentasi: patuh man orang tua, kata ajar orang tua ola simbak tapi ikutken. Lit ketutusen guna erlajar (long life education) arah ise pe. La lit kata tamat guna erlajar. Nggeluh rembak ras Tuhan sabab Ia me ulu kepentaren e, “Tapi adi lit i bas kam si kurang kepentarenna, ertotolah ia man Dibata si mereken kepentaren man bandu. Sabap Dibata kap mereken kepentaren man kerina jelma alu melumbar dingen dem perkuah ate “ (Jak. 1:5). Dingen si terakhir tanggung jawab orang tua guna tetap ngkelengi, ngajarken si mehuli man anak.