Bimbingen Khotbah Minggu 20 Desember 2015

BIMBINGEN KHOTBAH MINGGU 20 DESEMBER 2015

MINGGU ADVENT VI

Pdt. Larena br. Sinuhadji (Nd. Reynard Tarigan)

Invocatio : “Arah si enda icidahken Dibata maka Ia bujur kap” (Roma 3:25b)

Ogen : Sakaria 2:10-13 (Athiponal)

Khotbah : Heber 10:5-10 (Tunggal)

Tema : YESUS PERSEMBAHEN SI NGGELUH

Penjelasen Bahan Pustaka Si Badia

I bas bahan khotbah icidahken surat Heber man banta kerna keunggulen kurban Yesus ibandingken ras kurban-kurban tutungen si ipersembahken i Rumah Pertoton. Hal enda, labo perkara entah pe perbahanen si mesukah guna idalanken kalak Yahudi Kristen, erkiteken enggo cukup ndekah bahkan banci kataken berurat berakar i bas kalak enda nehken persembahen-persembahen bagi si enggo iaturken i bas undang-undangna. Desken kalak pedalaman i piga-piga daerah i bas negaranta enda si enggo mendarah daging ngelakoken MCK i sungai-sungai, janah tiba-tiba reh bas pemerintah pusat nari mbangun sarana MCK i rumah-rumah entah pe MCK Umum, la banci lang arus iulih-ulihi mereken penjelasen rikut ras cara pemakenna. Enggo pe bage banci jadi melala denga si tetap MCK i sungai-sungai, sabab la iakapna pas MCK i rumah. Bage me kira-kira si terjadi asum penulis surat Heber enda nehken pengelayasi, mpetetap ukur maka Yesus Kristus si enggo mpersembahken diriNa sendiri sebage persembahen si nggeluh gelah manusia banci terkelin. Enggo pasti cukup metahat mereken penjelasen kerna si e, erkiteken kalak Yahudi menaken kitik-kitik nari enggo ilatih, ididik ras ipebelin-belin guna tek uga pentingna nehken persembahen kurban man Tuhan Dibata. Persembahen-persembahen e arus ilakoken alu cermat, teliti dingen la banci meros, la banci mpersembahken kurban si lit cacatna. Intina arus sempurna. Tapi kenca kalak enda jadi pengikut Yesus, tiba-tiba kebiasaan si e la nari perlu ilakoken. Ay. 9. “Erkiteken si e la nai ipakeken Dibata persembahen si ndekah, janah isambariNa alu persembahen Kristus”. Enggo pasti pengajaren si mbaru enda erbahanca lit hal-hal si bene si biasa idalanken kalak enda. E maka, i jenda banci siidah penting iakap bas surat Heber enda menegasken mulihi maka Yesus Kristus lebih unggul, lebih hebat, lebih superior ibandingken kurban-kurban si biasa ipersembahken kalak enda seh makana lit turah keyakinen la pe lit kurban-kurban si biasa ipersembahkenna, asal tek man Yesus Kristus ras nggeluh sentudu bagi si ngena ateNa, si e kerina melebihi persembahen-persembahen si biasa ilakoken

Benaken ay. 5-8 jelas itekanken surat Heber maka si isuraken Tuhan labo semata kurban-kurban bakaren tapi lebih kepada kesetian ras ketaaten man Tuhan. Piga-piga kali i bas bagin Pustaka si Badia menegasken maka ibadah si ikehendaki Tuhan labo hanya soal rende, dingen maba persembahen: kambing, domba ras mengikuti kerina ritual-ritual ibadah, tapi kesetian ras ketaatan man Tuhan (bdk. Mikha 6:6-8, “Kai ndia kubaba man TUHAN, Dibata nu langit, adi reh aku nembah man baNa? Kubaba ndia lembu si mejilena jadi persembahen tutungen. Meriah nge ndia ukur TUHAN adi kupersembahken man baNa meribu-ribu biri-biri tah pe minak saitun si maler la erpeltep-peltep desken sepuluh ribu lau belin? Entahsa kupersembahken ndia anakku sintua dilaki jadi penebus dosa-dosangku? Lang! TUHAN enggo nuriken man banta kai si mehuli. Si ipindo Dibata i bas kita nari e me kap, ngelakoken kai si bujur, encidahken kekelengen si tetap, dingen nggeluh alu ukur meteruk rembak ras Dibatanta”. Bage pe i bas Amos 5:21-24, “Nina TUHAN, "Ciga ateKu perayan-perayan agamandu; mutah Aku ngidahsa! Adi ibahanndu persembahen tutungen ras persembahen gandum, la Kualoken. Asuh-asuhen si enggo ipeburburndu janah ipersembahkenndu bangKu pe la Kualoken. Ende-endenndu pe gejek Kuakap; pengadilah e. La ateKu bage megiken sora kulcapindu. Tapi bahanlah maka kebujuren erburak-burak desken lau sumbul, dingen kebujuren desken lau belin si la pernah kerah”). Ertina, i bas Rumah Pertoton e, tuhu-tuhu badia kel, nehken persembahen, rende muji Tuhan alu sora si erbolo-bolo tapi i darat Rumah Pertoton kita ka si megegehna ndalanken si la mehuli. Tuhan Dibatanta la banci isogok alu erbage-bage bentuk persembahenta, tapi si lebih ipindokenna bas kita nari e me kap ketaatan ras kesetiaan er-Dibata dingen icidahken i bas pengkebet geluhta si tetap-tep wari arah kita nehken kekelengen, kebujuren i bas kegeluhenta. Erkiteken persembahen si enggo ibahan Yesus Kristus, i ja Yesus Kristus sendiri enggo mpersembahken kulaNa gelah banci kita terkelin i bas dosa-dosanta nari, janah si e sekali enda ibahanNa. Dareh lembu ras kambing domba dingen pe la banci nasapken dosa, ras persembahen si e kerina idalanken tep-tep tahun ngingetken kalak kerna dosa-dosanta.

Kai si enggo ibahan Tuhan Yesus ngingetken kita maka enggo imasapken Tuhan dosa-dosa janah dosa la nari berkuasa i bas diri kalak si tek. Ertina, adi lit kalak Kristen senang denga nggeluh i bas dosa dingen la banci tadingkenna dosa e, berarti la ia tek man Yesus Kristus si enggo naluken kuasa dosa. Alu bage tetap arus lit pengendesenta man Tuhan setiap saat gelah ipengasupNa kita guna ngelawan kuasa dosa. Kuasa Kesah si Badia ras perkuah ate Tuhan ngenca si mpengasup kita nggeluhken geluhta bagi si ngena ateNa, jadi geluhta e merupaken persembahen si nggeluh man Tuhan si enggo leben mereken diriNa man banta kerina.

Aplikasi

I bas minggu Advent si terakhir enda, enggo reh tangkasna kerina berita Advent benaken Advent si pemena seh si peempatken, maka si ipindoken Tuhan banta i bas kita mpersiapken kerehenNa subuk arah perayaan Natal bage pe kerehen Tuhan peduakaliken e me kap pusuh perukurenta si bersih, geluhta si ertedeh ate guna mereken si terbaik man Tuhan. Labo terjeng perayaan Natal si meriah, acara-acara Natal si luar biasa tapi banci jadi makna Natal sendiri la nari nggeluh bas kita erkiteken sibukna ngukuri kegiaten Natal. Makna Natal sendiri e me kap Yesus enggo reh ku doni enda mereken diriNa jadi persembahen si nggeluh man banta. Yesus si mulia ringan i surga tapi la ipertahankenNa kemulianNa ringan Ia i tengah-tengahta (ogen), e me makna kiniteruken ukur.

Siperingeti wari ketubuhenNa ras sipersiapken kerehenNa peduakaliken alu tetap kita erbahan si ngena ateNa. Asum ibereken Tuhan kesempaten man banta nggeluh, berarti sada kesempaten guna tetap kita erbahan si mehuli, geluhta ernanam man kalak si deban, arah solidaritas, kekelengen, perhatian, doa si tetap banci sibereken. Geluhta jadi pasu-pasu (berkat) man kalak si deban ras tinepa Dibata si deban. Roma 12:1, “O senina-seninangku, nginget perkuah ate Dibata si mbelin si isehkenNa man banta, kupindo man bandu: Endeskenlah kulandu man Dibata saja selaku persembahen si nggeluh rikutken si ngena ateNa. Sabap bage me arusna kam ersembah man Dibata sue ras biakndu selaku mahluk si rukur”. Berpatisipasi kerina ngawan ni perpulungen, benaken KAKR nari, PERMATA, Mamre, Moria, Serayan Tuhan makeken talenta si enggo ibereken Tuhan guna membangun tubuh Kristus. Sebage singer (song leader), pemain musik, operator LCD, operator sound system, si ngalo-ngalo, guru KAKR, panitia-panitia, pengurus gereja, muat bagin i bas ertoto, nehken puji-pujian, ngiah-ngiahken, rsd. Jadi si e kerina silakoken alu tulus, ikhlas, ras guna kemulian Tuhan saja. Ula sempat sitangko kemulian Tuhan. Bage pe arah kita ngelakoken kekelengen, kebujuren man kalak si deban, si e kerina wujud persembahenta si nggeluh man Tuhan.