Bimbingen Khotbah Nutup Tahun 31 Desember 2015

BIMBINGEN KHOTBAH NUTUP TAHUN 
31 DESEMBER 2015

Pdt. Larena br. Sinuhadji (Nd. Reynard Tarigan)

Invocatio : “Pujilah Tuhan tep-tep wari, Ia si maba babanta si mberat. Dibatanta kap Tuhan si ngkelini, ipulahiNa kita i bas kematen nari” (Masmur 68:20-21)

Ogen : Johanes 8:12-19 (Tunggal)

Khotbah : 1 Raja-raja 8:54-61 (Tunggal)

Tema : TUHAN SAJA SI MAN PUJIN

Penjelasen Bahan Pustaka Si Badia

Bahan khotbahta merupaken pertoton pendungi si iangkatken Raja Salomo ras bangsa Israel kenca enggo pajek Rumah Pertoton. Tuhu-tuhu igejapken Salomo maka banci pajek Rumah Pertoton enda erkiteken perkuah ate Tuhan. Janah i jenda pe tetap denga ipindoken Salomo pemasu-masun Tuhan Dibata nandangi kerina bangsa Israel, gelah Tuhan tetap nemani bangsa Israel, la nadingken bangsaNa bagi Tuhan nai nandangi nini-nini bangsa Israel. Mekuah ate Tuhan rusur man bangsaNa ras man rajana, janah icukupi Dibata kai si iperluken bangsa e i bas kegeluhenna. Arah kai si enggo ibahan Tuhan, maka patut bangsa enda muji Tuhan (pujin man Tuhan si enggo mereken dame man bangsaNa). Dingen alu bulat ukur tetap erkemalangen man Tuhan ras ngikutken undang-undang Tuhan. La patut bangsa enda “pindah ke lain hati” entah pe menduaken Tuhan. Janah kesetian guna ersembah man Tuhan dingen ndalanken undang-undang Tuhan banci tetap idalanken bangsa enda erkiteken pengendesen bangsa e total man Tuhan. Perkuah ate Tuhan mpengasup bangsa e taat man Tuhan (ay. 58, “Ia lah sierbahanca maka kita erkemalangen man baNa”).

I bas bahan pengogen ipetandaken Yesus kerna diriNa man jelma si nterem maka Ia me terang doni, ise si ngikutken Yesus, ialokenna me terang si mereken kegeluhen ras la nari erdalan i bas kegelapen. KhotbahNa enda ipesehNa i Rumah Pertoton Tuhan tupung wari raya Pondok Daun. Wari raya Pondok Daun e me kap peringeten kerna keselamaten si enggo ibahan Tuhan nandangi bangsa Israel i bas perdalanen 40 tahun i gurun pasir. Terang Tuhan, sicidahkenNa alu binangun Api ras embun si tetap ngarak-ngarak bangsa Israel. Janah biasana, i bas perayaan wari raya Pondok Daun, ipasang lilin entah pe obor si ngingetken maka Tuhan e me kap terang keselamaten. Janah perkataan Yesus e pe berkaiten ras nubuaten kerna Dibata i bas Padan si Ndekah, maka Tuhan me terang doni (Masmur 27:1; Yesaya 60:19). E maka sesuai kel ras konteksna adi i bas paksa si e ipetandaken Yesus diriNa sebage terang doni si maba keselamaten man doni enda. Tapi kepeken la teraloken kalak Farisi, sabab ihakimina Yesus rikutken pengakapna jine si menolak ke-Mesias-an Yesus. Padahal tanda-tanda Yesus me si maba keselamaten enggo piga-piga kali icidahken ope perikop enda, si la banci ilakoken manusia biasa. Tanda-tanda e banci siidah:

1. Ngubah lau jadi anggur (Joh. 2:1-11)
2. Ipepalem Yesus anak menteri raja (Joh. 4:46-54)
3. Ipepalem Yesus kalak si penakiten i kolam Betesda (Joh. 5:1-18)
4. Ibere Yesus man 5.000 kalak (Joh. 6:1-15)
5. Yesus erdalan i babo lau (Joh. 6:16-21)

Tapi kalak Farisi tetap la banci ngaloken Yesus Kristus, bahkan ersura-sura guna nangkap ras munuh Yesus (ay. 20).

Aplikasi

Tading piga-piga jam nari sitadingken tahun 2015 enda janah bengket kita ku tahun si mbaru 2016. Setiap detik, menit, jam, wari, minggu, bulan si enggo sibentasi kita erkiteken perkuah ateNa. Erbage-bage hal enggo sialami, sehat-sakit, keberuntungen-kegagalan, meriah ukur-ceda ate. Sada hal siaminken kita, banci seh ku ujung tahun enda erkiteken perkuah ateNa. E maka tetaplah Tuhan sipuji kita, Ia saja sisembah i bas geluhta. Erlajar kita arah Raja Salomo rikutken perikop, la lupa ia ertoto ras muji Tuhan, dingen ipindokenna perkuah ate Tuhan gelah tetap ia ras bangsaNa geluh erkemalangen man Tuhan. Enggo melala pasu-pasu, pemere Tuhan banta i bas wari-wari sibentasi kita, tapi terkadang kurang denga siakap kuasaNa erdahin i bas geluhta piah dungna kurang tutus kita ersembah man Tuhan, si-“duaken” Tuhan, bahkan lit deba bagi kalak Farisi i bas bahan ogen, enggo pe icidahken Tuhan erbage-bage kuasaNa tetap denga itulakna Tuhan. Firman Tuhan ngatakenca, la banci kita ersembah man dua tuan, mamon ras Tuhan.

Puji-pujianta man Tuhan sicidaken arah semangat kita rende muji Tuhan, tutus i bas dahiken kerina dahin-dahin gerejaNa, makeken talenta si lit i bas kita guna kemulian gelar Tuhan, misalna: ngiah-ngiahken perpulungen guna reh ku bas kegiaten-kegiaten gereja, jadi singers, jadi pemain musik, jadi operator sound system, si ngalo-ngalo, melayani kalak si membutuhken i bas pelayanen diakoni, rsd. Bahkan arah dahinta ras jabunta pe banci kita melayani Tuhan. Rikutken tahun gereja GBKP 2016, “Peningkaten komitmen warga GBKP yang misioner untuk berpartisipasi dalam pelayanan”, siarapken reh teremna perpulungenta si terbeban guna ikut muat bagin i bas kerina pelayanen rikutken pemere si enggo ibereken Dibata bana.