Pdt. Larena Sinuhadji
Liturgi Pekan Penatalayanan GBKP 2026 silahkan klik :
Hari I - Minggu 18 Januari 2026
Invocatio : “Marilah sicubaken nandai Tuhan. Bagi matawari la banci la pultak arah kenjulu, dingen udan si pemena la banci la ndabuh mernaki taneh, bage me IA pe la banci la reh ndahi kita” (Hosea 6:3)
Ogen : Yeremia 9:23-24
Khotbah : Yohanes 17:1-5
Tema : NANDAI DIBATA SI TUHU-TUHU
Lit 4 tahap (level) i bas kita menjalin relasi ras kalak si deban: tahap kenalan, teman biasa, teman dekat, ras tahap sahabat, entah pe pasangan intim. Adi enggo seh kita ku bas tahap sahabat (pasangan intim), ertina kita enggo lit i bas level si meganjangna i bas kita berelasi ras kalak si deban. Enggo lit je pemahaman, pengertian, kepercayaan, keterbukaan, komitmen entah pe keterikatan, si mbages sada ras si debanna. Tapi guna kita seh ku level tertinggi ndai, lit proses si gedang i bas saling mengenal sada ras di debanna.
Geluh erkiniteken man Dibata akap kami banci igambarken alu 4 level relasi ndai. Pengarapenta tentuna seh kita ku level tertinggi. Tuhu-tuhu itandai kita alu mbages Dibata si isembah kita. Pekan Penatalayanen wari si sendah ngajuk kita kerina guna merenungkan, enggo seh i ja penandaita nandangi Dibata si isembah kita i bas Yesus Kristus?
Mpebagesi Kata Dibata
Bahan khotbahta nuriken kerna pertoton Yesus guna ajar-ajarNa sope IA bengket ku bas kiniseran ras kematenNa i kayu persilang. I jenda lit piga-piga hal si akap kami penting guna sirenungken, si pemena, teridah maka Yesus e me pendoa syafaat, IA ertoto guna kiniulin kalak si deban, khususna ajar-ajarNa, ras kerina kalak si tek di masa depan. Si peduaken, i bas pertotonNa enda teridah relasi ras kiniersadan si mbages antara Yesus ras Dibata BapaNa. Ipermuliaken Yesus BapaNa, janah ipermuliaken BapaNa Yesus (ay. 1 & 5). Si peteluken, i bas pertoton enda teridah maka enggo ilakoken Yesus misiNa i tengah-tengah doni enda e me encidahken kemulian Dibata janah mereken kegeluhen si tuhu-tuhu si la erkeri-kerin man kalak si iendesken Bapa man baNa (ay. 2 & 4). Si peempatken, si jadi fokus i bas kebaktinta sendah, itandai kalak maka Bapa ngenca Dibata si tuhu-tuhu, dingen itandai kalak maka Yesus Kristus si isuruh Dibata guna nehken berita keselamaten, e me kegeluhen si tuhu-tuhu si la erkeri-kerin (ay. 3).
Ay. 3 i bas terj. Bhs. Ind., nina, “Inilah hidup sejati dan kekal; supaya orang mengenal Bapa, satu-satunya Allah yang benar, dan mengenal Yesus Kristus yang diutus oleh Bapa.” Mengenal Bapa i jenda seri ertina ras mengenal Yesus Kristus. Kata “mengenal” (ginÅskein) i jenda ertina lit pemeteh si sifatna relasional, eksistensial, ras transformatif. Relasional maksudna hubungan dua arah si saling merespon. Amin pe Dibata la teridah, tapi IA merespon kita alu caraNa. Alu bage lit kedekatan secara emosional antara kita ras Dibata. Eksistensial ertina tuhu-tuhu menjiwai kerina si jadi peraten Dibata i bas kegeluhenta selaku anak-anakNa. Alu bage ersuruh ukurta guna ikut muat bagin nehken misi Dibata ku tengah-tengah doni enda. Transformatif ertina, bukti nyata maka enggo mbages ras tuhu-tuhu penandaita man Dibata i bas Yesus Kristus, lit perobahen si nyata ku si mehuli i bas kegeluhenta.
Ogenta e me pengajuk Yeremia nandangi bangsa Israel si lit i bas krisis politik (ancamen Babil), krisis moral (ketidakadilen, korupsi, penindasen), ras krisis religius (ibadah formal tanpa kesetiaan). Situasi si bagenda rupana la isedari bangsa Israel, akapna kerinana baik-baik saja. Yakin kel bangsa e maka pentar ia, yakin kel maka megegeh ia sebab bayak ia iakapna. Padahal i bas kinatana terjadi krisis moral ras krisis religius si mekelek, si mabai bangsa e ku bas kehancuren. E maka iajuk Yeremia bangsa e gelah sedar ras mengevaluasi mulihi pendandaina man Dibata. Kata “mengenal” i jenda mengandung konsekuensi etis ras sosial, labo terjeng ritual ibadah. Nandai Dibata alu tuhu-tuhu ertina ngelakoken si bujur ras benar sue ras peraten Dibata.
Pengkenaina
Sendah e me wari pemena kita ngelakoken Kebaktin Pekan Penatalayanan. I bas Pekan Penatalayanan tahun 2026 enda lit hal si baru. I bas tahun-tahun si lepas radu ras kita ngelakoken sasaran pelayanan sedekah sada tahun. Tapi benaken tahun 2026 enda, sasaran pelayanan ilakoken sedekah lima tahun. Sue ras Garis Besar Pelayanan (GBP) GBKP 2026-2030 sasaran pelayanenta sedekah lima tahun e me “Penguatan Fondasi Spiritualitas Personal Berbasis Keluarga.” Guna mewujudken sasaran enda lit piga-piga fokus pelayanan si harus ilakoken setiap tahunna. Tahun 2026 fokusna e me “Relasi dengan Tuhan.” Tahun 2027 fokusna e me “Relasi dengan diri sendiri.” Tahun 2028 fokusna e me “Relasi dengan keluarga.” Tahun 2029 fokusna e me “Relasi dengan orang lain.” Tahun 2030 fokusna e me “Relasi dengan ciptaan.”
I jenda itulisken kami kerna piga-piga hal si harus ilakoken sedekah tahun 2026 sue ras GBP GBKP 2026-2030. Si pemena e me hidup dalam hubungan yang mendalam antara pribadi jemaat dengan Tuhan. Si peduaken, menghidupi corak spiritualitas GBKP di tengah kerumitan perubahan zaman. Si peteluken, mengembangkan pembinaan (pelayanan) berdasarkan corak spiritualitas GBKP. Si peempatken, pembinaan pemuridan kepada generasi muda (meletakkan dasar iman yang kokoh) dan kedekatan yang mendalam dengan Kristus.
Secara khusus i bas kebaktinta sendah, iajuk kita gelah reh mbagesna penandaita (pengenalan) nandangi Dibata si isembah kita i bas Yesus Kristus. Injil Yohanes ngajuk kita gelah nandai Dibata alu mengevaluasi aspek relasional, eksistensial, ras transformatif. Apakah lit kedekatan emosional antara aku ras Dibata? Apakah relasiku ras Dibata sedekah enda erbahanca ersuruh ukurku guna ikut muat bagin i bas ngelakoken misi Dibata i tengah-tengah doni enda? Apakah relasiku ras Dibata sedekah enda erbahanca reh mehulina karakterku? Ogenta sendah ngingetken kita mulihi maka nandai Dibata labo terjeng bersifat ritual, tapi mengandung konsekuensi sosial ras etis, ertina kerina pengkebet geluhta seharusna mencerminkan keleng ate Dibata i bas Yesus Kristus. Invocatio pe ngajuk kita gelah nandai Dibata alu tutus. E maka mari radu ras kita ertekad gelah reh tutusna kita nandai Dibata si isembah kita. Mari sibaba i bas pertotonta gelah ipegegehiNa ras ipengasupNa kita nandai Dibata si tuhu-tuhu.
Hari III - Selasa 20 Januari 2026
Invocatio : “Dibata enggo mereken kesempaten man bandu guna erdahin man Kristus. labo saja gelah kam tek man Kristus, tapi pe gelah kam ngenanami kiniseran guna IA” (Filipi 1:29)
Ogen : 1 Korintus 10:11-13
Khotbah : Mazmur 121:1-8
Tema : TUHAN KAP SEKAWALKU
Penaruh
Dibata si isembah kita i bas Yesus Kristus e me Dibata si erjaga ngkawali kita setiap saat, amin pe la teridah, tapi kuasaNa tuhu-tuhu sigejapken njaga ras ngkawali kerina kalak si tek man baNa. Em lah si jadi kinitekenta sedekah enda. I bas kesempaten enda mulihi kita iyakinken maka Tuhan kap sekawalta nai-nai nari, gundari, seh rasa lalap.
Mpebagesi Kata Dibata
Bahan khotbahta e me ende-enden ziarah. Ziarah secara umum ertina, salah sada praktek keagamaan i bas piga-piga agama ku ingan-ingan si ianggap penting, alu tujun nginget mulihi, mpeteguhi kiniteken, ras mbersihken diri. I bas kiniteken kalak Yahudi pe lit praktek ziarah. Ziarah i bas bahasa Ibrani ertina “nangkih.” Maksudna, ende-enden ziarah enda iendeken kalak Israel sanga erdalan nangkih (mendaki) ku Yerusalem, entah pe deleng Sion, i bas ngerayaken 3 perayaan keagamaan kalak Yahudi (Pondok Daun, Paskah entah pe Hari Raya Roti Tidak Beragi, ras Pentakosta). Ende-enden e iendeken alu tujun nginget-nginget mulihi kuasa Dibata si mbelin i bas kegeluhen kalak Yahudi.
Alu latar belakang enda jelas maka bahan khotbahta isina e me peringet-ingeten kerna kuasa Dibata si mbelin i bas kegeluhen Pemasmur si nuliskenca Masmur bindu 121 enda. I bas ay. 1 teridah gambaren sekalak si sanga erdalan nangkih ku deleng Sion alu natap-natap deleng-deleng si lit isekelewetna. Sanga natap-natap e, nungkun Pemasmur i bas pusuhna, “i ja nari kin reh penampatku?” Ijabab alu pengakun kiniteken Pemasmur i bas ay. 2 nina, “Penampat man bangku reh i bas TUHAN nari, si enggo njadiken langit ras doni”. Ayat-ayat berikutna teridah maka i bas kidekah geluh Pemasmur, Dibata si isembahna e me Dibata si tetap njaga kawali kegeluhenna. Ay. 7 ikataken, “Dibata si njagai geluhna.” I bas Alkitab terj. BIMK nina, “IA menjaga engkau supaya hidupmu selamat,” rsd. Ertina kesaksin geluh erkiniteken Pemasmur tuhu-tuhu igejapkenna maka Dibata si tetap njaga ngkawali, marenda nari, genduari seh rasa lalap.
I bas ogen si pemena, Paulus mereken kata pertenget man perpulungen gelah tetap nggeluh bagi si ngena ate Dibata ula usih kebiasaan si nilakoken nini-nini bangsa Israel ndube. Aminna kegeluhen pertendin bangsa Israel ndube iperdiateken Musa (ay. 3, “Makan makanan rohani yang sama, dan minum minuman rohani yang sama yaitu dari gunung batu Rohani yang menyertai mereka; gunung batu itu ialah Kristus sendiri”) tapi tetap denga ndabuh ku bas dosa erkiteken kurang metenget (waspada, ula sepele, ay. 12, “Orang yang menyangka dirinya berdiri teguh, hendaklah berhati-hati; jangan sampai ia jatuh”). La ngasup bangsa Israel paksa si e nimbak peraten dagingna: nembah berhala, erlua-lua, ncubai Tuhan Dibata, jungut-jungut, rsd. Kai si enggo ialami nini-nini bangsa Israel ndube jadi pelajaren rikut pertenget man kalak Kristen i Korinti. Gelah ula min sempat ndabuh ku bas dosa si enggo pernah ilakoken nini-ninina ndube, khususna penembahen berhala. Banci jadi erkiteken mbuena kiniseran si man hadapen perpulungen la nari iandalkenna kuasa Tuhan, tapi enggo pindona penampat man dibata-dibata si deban. E maka nina Paulus, “Kerina percuban si reh man bandu e bali nge biakna ras percuban si biasa seh man manusia si deban. Tapi Dibata setia nge i bas padanNa. Labo ipelepasNa kam icubai lebih asa gegehndu. Asum kam ngenanami percuban, iberekenNa nge gegeh man bandu gelah ngasup kam nggengkenca, janah radu ras si e iberekenNa pe dalan pulah.”
Pengkenaina
Tema si seh man banta i bas wari peduaken Pekan Penatalayanen enda e me “Tuhan kap sekawalku.” Mungkin banci ikataken tema-nta sendah e me pengakun kinitekenta maka Dibata si njaga ngkawali kita marenda nari, gundari, seh rasa lalap. Pemasmur i bas ende-enden ziarahna ngajuk kita gelah nginget mulihi kerina perbahanen Dibata sedekah geluhta. Alu bage teridah maka Dibata la pernah nadingken kita, ijaga kawaliNa kita la erngadi-ngadi suari ras berngi. Dibata erdahin i bas pengalamen geluhta guna mabai kita ku kerina si mehuli. Ay. 7 bahan khotbahta ikataken Pemasmur i bas terj. BIMK, “TUHAN akan melindungi engkau dari mara bahaya, IA menjaga engkau supaya hidupmu selamat.” Dibata mabai kita ku keselamaten. Ogenta sendah pe ngajuk kita gelah nginget Dibata si setia i bas padanNa. E maka alu bage invocationta sendah ngajuk kita gelah memanfaatken waktu si lit guna ngelakoken kerina si jadi peraten Dibata, sebab Dibata enggo njaga kawali kita janah Dibata setia i bas padanNa.
I bas kegeluhenta nginget enda penting kel sebab sada pinakitta manusia, e me murah kita lupa. Usur kita manusia enda geluh erpaksa-paksa, i bas paksa senang, sukses, berhasil, mis kita lupa nandangi Dibata si enggo ngarak-ngarak geluhta seh ku bas kesuksesen, keberhasilen, kesenangen, rsd. I bas paksa biasa-biasa saja, ertina i bas rutinitasta pe usur kita lupa man Dibata erkiteken geluhta ikuasai kesibuken i bas pendahinta, rsd. I bas paksa susah, memang iinget kita Dibata, mis kita ertoto man baNa, mindo man teman-temanta perpulungen gelah ikut notoken kita. Tapi i bas pertotonta e pe secara tanpa isedari, ipaksa kita Dibata gelah ngikutken sura-suranta, jawaben si instan ateta, serba cepat. Adi la cepat ijabab Dibata maka mis kita lawes ku dukun, orang pintar, guru si baso, rsd. Em kita manusia bagi kalak Israel si murah lupa kerna perbahanen Dibata i bas geluhta. E maka i bas Pekan Penatalayanen wari peduaken enda, iajuk kita gelah nginget rusur kuasa Dibata si la erkerin-kerin i bas geluhta, nai-nai nari, gundari, seh rasa lalap.
Hari IV - Rabu 21 Januari 2026
Invocatio : “ItuduhkenNdu bangku dalan si perlawesna kempak kegeluhen. I adep-adepenNdu dem keriahen, i bas tanNdu kap kesenangen” (Mazmur 16:11)
Ogen : Yesaya 12:4-6
Khotbah : Lukas 7:11-17
Tema : DIBATA MULAHI BANGSA-NA
Penaruh
I bas kita sangana mengalami kepiciten, kesusahen, butuh kel kita, lit si banci mulahi kita, mbebasken kita, nampati kita. Ras terkadang logikanta la nari banci berjalan dengan baik, asum lit keluarga (teman) si menawarkan jalan keluar si aneh-aneh: minum air kembang 7 rupa, berguru ku Gunung Selamet, entah mengandalkan teman (keluarganta) si melala hartana (jabatenna). Enggo pasti adi gelarna, solusi i bas doni denga, terbatas, alu istilah “ mengatasi masalah, dengan memunculkan masalah yang lain.” Tapi lit sada pribadi, si kuasaNa la ersibar, si banci mulahi kita i bas erbage-bage kepiciten ukurta, e me Tuhan Yesus Kristus.
Mpebagesi Kata Dibata
Pengogenta i bere Judul “Sekalak anak diberu balu-balu.” Ras teks enda ibenai alu peristiwa si sangat menyedihkan. Yesus ras ajar-ajarNa reh ku Kota Nain ras pe iarakken jelma si enterem. Banci kataken enda arak-arakan kehidupan. I bas dampar si deban, simbel rombongen Yesus ras sada rombongen si ngelanja kalak mate, ndarat bas kuta e nari. Si mate e, sekalak anak perana, e me anak sada sada diberu balu-balu (anak tunggal, dari seorang ibu yang sudah janda). Enterem kel anak kuta si ikut naruhkenca. Sebab memang situasina sangat memiluken. Janda, sada ngenca anakna, ras enggo ka anak perana. Enggo banci sibayangken, ertindih-tindih kiniseran si ialami diberu si mbalu e. Ras dengan sengaja, Injil Lukas mpejumpaken dua rombongen enda. Kegeluhen ras kematen jumpa i pintu gerbang kota. Ras si jadi poin penting (ayat kunci) bas perikop enda e me ay. 13, “Megogo dingen mekuah ate Tuhan Yesus ngidah nande si kepate e.
Banci si idah, la lit pemindon gelah mujizat Tuhan terjadi. Tapi siidah i jenda, ibenaken bas Jesus nari, “megogo dingen mekuah ate Tuhan Jesus ngidah nande si kepaten e” (“Dan ketika Tuhan melihat janda itu, tergeraklah hatinya oleh belaskasihan”). Hal ini penting: bahwa Tuhan Jesus tidak menunggu iman yang sempurna untuk bertindak. Terkadang belaskasihan Tuhan mendahului iman kita.
Emaka nina Tuhan Jesus, “Ola kam tangis.” Kai maksudna perkataan Tuhan Jesus enda? (Kalimat kejam, tidak punya perasaan?) Me la mungkin la kita ngadung, anakta sada-sadai, janah anak perana ka, si sedekah enda nemani nandenta, mate. La mungkin sekalak nande la ngandung asum anakna idilo Dibata.
Mekatep bas acara si mate-mate pe, sibegi lit kalak ngerana man keluarga si itadingken kalak si nikelengina, “Ola nari kam ngadung, periah-riahken ukur.” Itu adalah kata-kata yang tidak berempati. Menangis adalah sangat wajar, terlebih orang yang meninggal sangat baik hati dan selalu membantu kita. Pasti kita akan sangat kehilangan. Alu bage, asum Jesus ngatakenca “Ola kam tangis” labo larangen guna ngandung, tapi lit janji si tersembunyi. Jesus labo hanya mereken pengapul. Bahkan ideheri dingen ijemak Jesus peti mait e, si secara Hukum Taurat erbahanca kalak najis (bdk. Bil. 19:11-16). Tapi Jesus ndeherisa. Alu kata-kataNa si dem kuasa, ipekekeNa anak perana ndai. Keke si mate ndai, janah ngerana ia. Jenari ibereken Jesus ia man nandena. Enggo pasti nandena berubah. Si tangtangna ndai berduka cita kel, enggo pasti gendari dem alu keriahen ukur. Ras kedungenna, respon kalak si enterem sangat menarik, “Enggo reh Dibata mulahi bangsaNa” (Allah telah melawat umatNya).
Pengkenaina
Kai pesan firman Tuhan man banta wari enda?
- Dibata kuasaNa la ersibar, nai-nai nari, genduari seh rasa lalap. Maka IA ngenca Dibata si ngasup mulahi kita i bas erbage-bage kiniseran si nderpa. Ula nari setengah ukur i bas ernalem man Tuhan.
- Adi Dibata i bas Jesus enggo mereken usihen, asum idahNa kalak si menderita, la banci IA kem. Tapi tergerak ukurNa alu mekuah ate ras iumputi alu tindaken mpekeke anak perana si enggo mate. Sebage kalak si tek, kehadirenta pe arus mampu berempati ras ngelakoken tindaken asa gegeh ras kengasupenta. “Senang melihat orang senang, susah melihat orang susah.” Ula hanya kita kem, sinik saja, tapi bergerak mereken penampat.
- Adi Dibata enggo mulahi kita, ula kita lupa ngataken bujur baNa. Ogen si pemena: “Kataken bujur man Tuhan, rendelah muji Tuhan erkiteken perbahanenNa si mbelin.”
Hari VII - Sabtu 24 Januari 2026
Invocatio : “Malem kel ate bangsa si ngakui TUHAN jadi Dibatana, sangap kel bangsa si terpilih jadi sikerajangenNa” (Mazmur 33:12)
Ogen : Yesaya 45:22-23
Khotbah : 1 Yohanes 3:11-18
Tema : SIKELENG-KELENGEN
Penaruh
Sikeleng-kelengen e me si niarapken kerina kalak i bas doni enda, e maka melala kutipen si terinspirasi i bas keleng ate nari, umpamana, “You can give without loving, but you can never love without giving,” ertina, “Anda bisa memberi tanpa mencintai, tetapi Anda tidak akan pernah bisa mencintai tanpa memberi.” Si deban, “Love isn’t love until you give it away,” ertina, “Kasih bukan kasih bila tidak diberikan.” Si deban, “Being deeply loved by someone gives you strength, while loving someone deeply gives you courage,” ertina, “Dicintai secara mendalam oleh seseorang memberimu kekuatan, sementara mencintai seseorang secara mendalam memberimu keberanian.” I bas Pekan Penatalayanen wari si terakhir enda radu ras kita mulihi erlajar kerna erkeleng ate si teridah ras tergejap arah pengkebet geluhta, alu palas keleng ate Kristus.
Mpebagesi Kata Dibata
Surat Johanes itulisken Rasul Johanes utamana guna ngelawan ajaren-ajaren si papak (sesat/palsu). Paksa si e melala perpulungen si nadingken Gereja (bdk. 1 Joh. 2:19). Kalak si ndarat i bas Gereja nari banci jadi erkiteken terbaba ajaren-ajaren si papak, tapi banci ka nge erkiteken Gereja enggo lanai ngasup encidahken keleng ate Kristus sebage buah kinitekenna.
Secara garis besar ajaren-ajaren sesat si iajarken Guru-guru Perguak (antikristus - guru-guru gnostik) si pemena e me Yesus labo Raja Penampat (Penyelamat - Kristus) si ipadanken Dibata (bdk. 1 Joh. 2:22). Ajaren si tuhu payo e me Yesus Raja Penampat si ipadanken Dibata, IA kap Dibata (bdk. 1 Joh. 5:1). Si peduaken, rikutken ajaren gnostik, Yesus Kristus e me roh labo manusia (bdk. 1 Joh. 4:2-3). Si payo e me Yesus Kristus tuhu-tuhu manusia seri ras kita, tapi IA pe tuhu-tuhu Dibata. Si peteluken, keselamaten labo lit konsekuensi etisna, emaka iajarken Guru-guru Perguak enda ndai gelah perpulungen ngkelengi doni enda (bdk. 1 Joh. 2:15-17) janah iajuk pe gelah ngelakoken erbage-bage dosa erpalasken egoisme ras hedonisme rikutken si ngena ate Iblis (bdk. 1 Joh. 3:7-12).
Arah sitik latar belakang si jadi ogenta sendah, teridah maka nggeluh sikeleng-kelengen erpalasken keleng ate Kristus merupaken sada pergumulen si mberat i tengah-tengah perpulungen kalak si tek paksa si e. Keleng ate Kristus jelas berbeda 180 derajat ras keleng ate doni enda. Sada ciri keleng ate Kristus si berbeda ras keleng ate doni enda, e me nggit berkorban guna kalak si deban, bagi si enggo iteladanken Yesus. Sedangken keleng ate doni enda palasna egoisme pribadi guna kesenangen diri sendiri. Tapi amin bage gia, Rasul Johanes tetap ngajuk perpulungen gelah nggeluh sikeleng-kelengen erpalasken keleng ate Kristus. Secara konkrit keleng ate e harus teridah arah perbahanen. Emaka i bas ay. 17 ikatakenna, “Adi lit sekalak bayak idahna seninana kekurangen, tapi la atena mekuah man seninana e, uga banci kalak si bage ngatakenca maka keleng atena Dibata?” Adi sekalak bayak ndai idemi alu keleng ate Kristus tentu enggo mis isampatina seninana si kekurangen, sebab tek ia maka geluhna labo kekurangen sebab pasu-pasu Dibata maler man kalak si bujur.
Ay. 18 si akap kami jadi fokus i bas renungenta sendah, ikataken bagenda nina, “O anak-anakku, kekelengenta ula terjeng biber saja entah pe i bas cakap saja ngenca. Harus maka tuhu-tuhu kekelengen e, si teridah arah perbahanenta.” Terj. Alkitab TB Edisi II, nina, “Anak-anakku, marilah kita mengasihi bukan dengan perkataan atau dengan lidah, tetapi dengan perbuatan dan dalam kebenaran.” I bas terj. TB Edisi II enda kekelengen labo terjeng harus iwujudken alu perbahanen, tapi pe alu palas ras cara si benar. Ayat enda akap kami sada kritik tajam man Guru-guru Perguak si hanya beluh ngerana soal kekelengen tapi la beluh ngelakokenca.
Pengkenaina
Tema i bas Kebaktin Pekan Doa wari si peteluken enda mulihi ngingetken kita kerna keleng ate Kristus si terwujud nyata alu kiniseran, kematen, kekeken, ras kenangkihenNa ku surga. Arah kiniseranNa teridah maka keleng ate e harus nggit berkorban. Arah kematenNa teridah maka egoisme i bas dirinta harus simateken gelah ula ngambati keleng ate Kristus. Arah kekekenNa teridah maka belinen kuasa kekelengen asangken kejahaten doni enda. Arah kenangkihenNa ku surga teridah maka keleng ate si rehna i bas Dibata nari, kenca enggo siwujudnyataken mulihna ku Dibata ka, ertina, guna kemulian gelar Dibata.
Rasul Johanes pe ngajuk kita kerina gelah tetap nggeluh sikeleng-kelengen erpalasken keleng ate Dibata i bas Yesus Kristus. Sebab seh asa gundari doni enda tetap denga menawarkan keleng ate si semu si orientasina guna egoisme, kesenangen diri sendiri, haus pengakuan kalak si deban nari, entah pe validasi. Keleng ate Kristus labo terbatas hanya untuk komunitas Kristen, tapi terbuka guna kalak si deban bahkan guna kerina isi doni enda. Emaka marilah siwujudnyataken keleng ate Kristus alu perbahanen si banci iidah ras igejapken doni enda. Keleng ate Kristus harus berdampak mehuli man sekelewetta, gelah doni enda banci tuhu-tuhu nggejapken keleng ate Kristus alu kehadirenta i japa pe kita ringan.
Emaka invocatio bage pe ogenta sendah mulihi ngingetken ras ngajuk kita gelah reh rembakna ras Dibata. Sebab kerembakkenta ras Dibata mpengasup kita engkelengi Dibata ras engkelengi kalak si deban, bagi kita engkelengi dirinta. Em tandana maka kita enda sikerajangen Dibata. Sipindolah gegeh i bas Dibata nari i bas pertotonta, gelah ipengasupNa kita ngelakoken kerina si enggo idatken kita sedekah Pekan Penatalayanen tahun 2026 enda. Sekali nari iulihi kami, sasaran pelayanenta sedekah lima tahun e me “Penguatan Fondasi Spiritualitas Personal Berbasis Keluarga” alu fokus pelayanen i bas tahun 2026 e me “Relasi dengan Tuhan.” Mari simanfaatken tahun 2026 enda guna mpelimbarui relasinta ras Dibata.
Tidak ada komentar:
Posting Komentar