SUPLEMEN PA MORIA GBKP TGL. 31 AGT. - 6 SEP. 2025

Pdt. Larena Sinuhadji (Nd. ReyRapha Tarigan)

Hari Ulang Tahun PERMATA GBKP

Si Man Ogen : Kuan-kuanen 4:1-9

Tema : NJADIKEN ANAK PENTAR

Tujun : Gelah Moria :

- Nuriken erti kepentaren

- Meteh maka anak si nguda ngasup engkelengi ras ngergaken kepentaren alu ngajarken ras mereken tanggung jawab

Penaruh

Kepentaren seh kel perluna i bas kegeluhenta, nampati kita i bas berelasi ras kalak si deban, bahkan mpengasup kita naluken erbage-bage perbeben. Kepentaren i bas Kitab Kuan-kuanen labo terjeng teori, tapi cara nggeluh. Arah kepentaren si lit nampati kita ndalanken kegeluhenta tep-tep wari, uga kita rukur bage pe muat keputusen si erpalas ku erkemalangen man Dibata (relasi si mehuli ras Dibata). 

Mpebagesi Si Man Ogen

Kitab Kuan-kuanen berisi kerna nasehat, pedah gelah manusia banci nggeluh alu mehuli. Bentukna ajaren praktis man segala umur, mulai anak-anak nari seh orang tua, si ipeseh kalak si berhikmat. Secara khusus i bas perikopta, ngerana kerna pengajaren orang tua man anak, janah uga ketutusen anak e i bas megiken ajar orang tua. Banci jadi enda pengalamen Raja Salomo.

Rikutken perikop, si harus idalanken sekalak anak e me kap megiken ajaren orang tua dingen megermet, gelah banci tambah-tambah pengertianna. Pengajaren orang tua ula hanya sambil lalu ibegiken (masuk kuping kanan keluar kuping kiri), tapi lit ketutusen megikennca, gelah banci siinget janah sipakeken guna jadi gelementa i bas kegeluhen. Sebab ajaren orang tua mehuli nandangi anakna. Walaupe lit nge orang tua si la ndalanken tanggung jawabna alu mehuli (contoh, kasus orang tua si menelantarken anakna bahkan tega membunuh anakna). Kai si enggo iajarken orang tua (bapangku), arus iinget ras ipakeken gelah banci nggeluh alu pentar.

Janah i jenda pe ituriken uga pentingna kepentaren ras pengertin (ay. 5-7). Si pentingna kel iajarken man anak e me kepentaren. Kepentaren nge si banci ngkawali ras njagai kita. Ertina, arah kepentaren si lit i bas kita, mpengasup kita ndalani geluh enda alu bijaksana ras megegeh walau pe melala tantangen. Sebab bena-benana kepentaren e me kap erkemalangen man Dibata ras nggit erlajar. Alu nggitna kita terus erlajar, ras tetap malang man Dibata, maka ibabaina kita gelah lebih bijaksana i bas rukur, ngerana ras erbahan tindaken. Mbages siukurken baik-burukna resiko si bakal sialami entah relasinta ras kalak si deban ope kita ngelakoken sada-sada hal. E maka jelas kepentaren nge si banci ngkawali ras njagai kita. Kebalikenna adi kurang bijaksana entah erbahanca tondel ukur kalak, arah pengerana entah pe perbahanenta, banci jadi lit sura-surana si la mehuli guna ncelakai kita erkiteken segat atena. Enggo pasti kegeluhenta terancam. Kita sendiri si rugi akibat perbahanenta si kurang, entah pe la bijaksana.

Penting i jenda guna ndatken kepentaren ras pengertin. Ulihna man banta i bas kita tuhu-tuhu makeken kepentaren i bas kegeluhenta maka kegeluhenta iangkatna ras ipehagana, iberekenna man banta rudang-rudang si mejile janah itamakenna mahkota si mehaga.

Adi banci sisimpulken i bas perikop Kuan-kuanen bindu 4, kepentaren igambarken labo bagi “buku teks” si harus ipelajari, tapi desken sekalak teman (kandu-kandu) si harus ikelengi, iergai (terj. Bhs. Ind.,: kasihi, junjung dan peluk). Dengan kata lain, hikmat adalah relasi kasih, dan di dalam relasi itulah manusia sungguh-sungguh hidup.

Pengkenaina

Kalak si pentar beluh ertimbang kerna kai si bakal ikatakenna ras ilakokenna. Iukurkenna lebe alu mbages kai dampakna, positif entah negatif. Adi memang mbuen si la mehuli la idalankenna, sebab banci encedai ia ras kalak si deban. Kepentaren si lit i bas ia labo saja secara kecerdasen otak (inteligensia), tapi pe secara pusuh perukuren (kecerdasen emosi) ras kecerdasen spiritual. Kepentaren e idatken arah kita nggit erlajar ras erkemalangen man Tuhan. Melala kalak ndabuh ku bas perbahanen si la payo erkiteken kurangna pengertian i bas ia dingen kurang pengendesen geluhna man Tuhan. Tapi kalak pentar ngasup njagai kegeluhenna erkiteken iusahakenna tetap erdalan i bas si ngena ate Dibata.

Tanggung jawab sebage orang tua, e me mereken pengajaren si mehuli man anak-anak, benaken kitik-kitik nari bahkan benaken bas bertin nari. I bas Ul. 6:4-9 i je ilumbakenna banta, sebage orang tua, gelah katawari paksa pe mereken pengajaren alu la ermedu-medu. “Persingeti rusur subuk sangana i rumah, i bas perdalanen, sangana ngadi-ngadi entah pe sangana erdahin.” Setiap saat ras i japa pe banci kita mereken pengajaren man anakta alu cara si tepat rikutken kategori umur. Enggo pasti adi anakta enggo remaja, kita orang tuana sekaligus sahabat (lit kedekaten), seh makana adi lit pergumulenna nggit ia terbuka man banta. Janah labo hanya kata-kata pedah sibereken man anakta, sekaligus kita mereken contoh (teladan) si mehuli nandangi anakta. Melala anak-anakta kenca enggo remaja lebih dekat ia ras teman-temanna asangken kita, perban memang benaken kitik-kitik nari pe kurang perhatian ras kekelengenta orang tua man bana. Piah dungna kenca enggo remaja pe, merasa ia kurang dekat ras kita. Tapi adi enggo sibiasaken, benaken kitik-kitik nari kita dekat ras anakta, kekelengenta irasakenna, simamahi Kata Dibata bage pe siban kebaktin keluarga, pasti mabai anak-anakta ngergai kekelengenta man bana alu ia tetap erbahan si ngena ate Dibata. Walaupe tetap lit kemungkinen pengaruh lingkungen banci mabai anakta ndabuh ka.

Bahan PA-ta erkawiten ras HUT PERMATA 77 tahun. Alu toto ras pengarepenta anak-anakta PERMATA menjadi PERMATA si pentar. Jaman terus berubah, tekhnologi semakin canggih, tapi sada hal si la banci berubah, anak-anak tetap butuh kasih sayang, sentuhan, role model (usihen) i bas kita nari orang tuana. Mari tetap sibabai anak-anakta nggeluh tetap erkemalangen man Tuhan, babai anak-anakta, bahkan terus persingeti, aktif i bas pelayanen PERMATA bahkan terlibat aktif i bas pelayanen Gereja. Mencintai Tuhan, mencintai Gereja. Alu bage kegeluhen anak-anakta (PERMATA), maba kemalemen ate labo hanya man dirina tapi pe man banta orang tuana bage pe kemuliaan man Tuhan.