SUPLEMEN PJJ GBKP TGL. 10 - 16 JULI 2022

Pdt. Larena br. Sinuhadji

Tema : METEH SURA-SURA TUHAN ARAH BENCANA ALAM (Joel 1:1-7) (Teologi Bencana Alam)

Joel ertina Tuhan e me kap Dibata. Kitab Joel termasuk bagin i bas Kitab Nabi-nabi Kecil. Joel mpeseh Kata Tuhan man bangsa Israel maka wari Tuhan enggo ndeher. Wari Tuhan si igambarkenna alu erbage ukumen, salah sadana e me labang. Labang tanda Tuhan sangana menghukum bangsa Israel erkiteken dosa-dosa si ilakokenna ras ngingetkenca maka pasukan (ukumen) si sesungguhna reh me (akan segera menyerang). Tapi ipersingeti nabi Joel maka lenga bo terlambat man bangsa enda guna jera ras mindo pengalemi dosa i bas Dibata nari, ras ndalanken si ngena ate Dibata, e maka pemulihen entah pe ipasu-pasu Tuhan mulihken bangsa enda (Joel 3:16-21).

Judul perikop enda “Ceda ate bangsa e perban labang ncedai negeri” (Tulah belalang sebagai hukuman Tuhan). Lit piga-piga penafsir si ngatakenca maka tulah belalang e nyata, janah lit ka si ngatakenca maka labang e merupaken pasuken-pasuken asing si mpereh malapetaka asum wari Tuhan (bindu 2:20). Tapi umumna penafsir ngatakenca maka serangen labang e tuhu-tuhu lit. Aminna banci kataken lenga bo pernah terjadi i bas sejarah kalak Jehuda i ja labang e ncedaken kerina sinuan-sinuan bangsa Israel (ay. 2b, “lit kin pernah jadi bagenda i bas jamandu entah i bas jaman nini-ninindu nai?” Bhs. Ind. : “pernahkah terjadi seperti ini dalam jamanmu, atau dalam jaman nenek moyangmu?”).

Lit piga-piga jenis labang si ncedaken sinuan-sinuan bangsa enda, i bas Alkitab Bhs. Ind. ay. 4, belalang pengerip, belalang pindahan, belalang pelompat, dan belalang pelahap. Si itekanken i jenda labo kerna erbage jenis labang, tapi kehancuren total erkiteken tulah labang enda. Keri ipanganina sinuan-sinuan si lit denga tading. I bas ay. 7 jelas ikataken enggo ikernepken buah anggurta, enggo ingat-ngatina batang ara, kulit batang kayu e pe keri ipanganina. Bahkan tulah e jadi labo hanya sada tahun tapi lebih i bas sada tahun (bindu 2:25, “i bas tahun-tahun tupung labang e mangani gandumndu”).

Kai penyebabna? Merawa Tuhan erkiteken dosa si ilakoken umatNa. Memang i bas ay. 5 ngenca je itulisken kerna perbahanen si la mehuli siilakoken bangsa enda  e me pemabuk (peminem-minem). Banci jadi arah mabuk mabai bangsa enda la nari peka nandangi Kata Tuhan si ncemarken kekudusen Tuhan. Jadi labo hanya mabuk secara harafiah, tapi ketidaksadaran akan dosa si enggo ilakokekenna. Merasa diri benar, padahal enggo ndauh nadingken sura-sura Tuhan. Tapi si pasti lit kesalahen si ilakoken bangsa enda maka nina Tuhan i bas bindu 2:12, “jeralah kam kempak Tuhan”).

Bencana si jadi mabai bangsa enda reh deherna man Tuhan, gelah mulihi jera ras bertobat. Bencana si reh merupaken panggilen bas Tuhan nari guna bangsa enda lebih megermet, dengkehken (ay. 1, mendengar), nuriken man anak-anakndu (ay. 3), guna keke (ay. 5, bangun) ras tangis/ceda ate (ay. 8, menangis, meratap). Gambaren si e ncidahken sada pertanda guna mulihken man Tuhan ras ula nai ulihi si la mehuli, termasuk pe man generasi si reh (fokus i bas ay. 3, salah sada pesan e me nuriken bencana si enggo jadi e man anak-anak/angkatan selanjutnya, gelah ula nari ngelakoken hal si seri). Ras memang terbukti ipulihken Tuhan umatNa. Alu kuasaNa iperehNa labang, alu kuasaNa ka ipelawesNa ka bala tentera labang ndai. Ipekena Tuhan negeri e maka mehumur ka jadina (bdk. Bindu 2:18-27).

Bencana mpersingeti kita kerna otoritas Tuhan i bas alam semesta, termasuk geluhta manusia. Pengajaren utama i bas kitab enda, maka Tuhan pengendali sepenuhna i bas alam semesta. Tuhan si perehken labang, dingen Tuhan ka si banci mpelawessa. Labo lit kuasa si deban si mengendaliken alam enda (bdk. asum deleng Sinabung meletus, maka melala ritual-ritual si ilakoken guna ula nari merawa nini si mada deleng). Secara kekristenan, memang hal enda si arus ilakoken, reh ku Tuhan, ertoto, ceda ate, tanggis, meratap, menyesali dosa ras minta ampun erkiteken dosa-dosa si enggo ilakoken ras mulihken ndalanken si mehuli. Ula ka arah kejadin enda, nambahi dosa ka, menyembah man kuasa-kuasa si deban selain Tuhan si mada kuasa.

Ertina, bencana banci terjadi erkiteken dosa ras kejahaten manusia, e maka iperehken Tuhan erbage-bage penderitaan. Entah akibat ulah manusia sendiri, si banci mbue siidah, i ja erkiteken ilegal logging, membuang sampah sembarangen, si erbahanca banjir, tanah longsong, kekeringan, entah pe praktek prostitusi, narkoba si erbahnca turah pinakit HIV - AIDS dan kematian. Bencana pe banci terjadi erkiteken fenomena alam sendiri, seperti gunung meletus. Artinya, alam sendiri mempunyai hukumnya dalam memperbarui dirinya. Allah membiarkan hal itu terjadi, walau untuk sementara itu menimbulkan penderitaan tapi dalam jangka panjang akan terjadi kebaikan bagi manusia dan seluruh ciptaan (Buku Keputusan Konven yang sudah diputuskan dalam persidangan gereja, Teologi Bencana GBKP).

Alu bage, asum terjadi bencana ula langsung kita menghakimi enda erkiteken dosa (kesalahen) si ilakoken, sabab memang banci jadi Tuhan erdahin ncidahken kuasaNa. Adi memang erkiteken dosanta, minta ampun kita man Tuhan (meratap mindo pengelami dosa man Tuhan, ras nandingken perbahanen si la mehuli). Dingen si paling penting uga kita cepat tanggap mengatasi akibat bencana, saling tolong-menolong gelah senina turangta si paksana kepiciten erkiteken bencana, megegeh ia (buka seperti ACT yang menikmati kekayaan di atas penderitaan orang lain). Banci jadi bencana e pe terjadi merupaken persinget nandangi tanda-tanda akhir jaman, i ja arah bencana alam enda nuduhken maka kerinana lit tampukna termasuk kegeluhen enda (Mat. 24:7; Mrk. 13:8). Alu bage megermet kita, asum bencana reh ku bas kegeluhenta, gelah ngasup kita ngidah sura-sura Tuhan.