Bimbingen PJJ Tgl. 12 - 18 Juli 2015

BIMBINGEN PJJ TGL. 12 - 18 JULI 2015

(Pdt. Larena br. Sinuhadji)

Ogen:

Kuan-kuanen 6:6-11

Tema:

PENINGKATEN EKONOMI NGAWAN NI PERPULUNGEN

Tujun:

Gelah ngawan ni perpulungen:

1) Menjingkat erdahin guna ncukupken keperlun geluhna

2) Meteh maka Dibata mereken rejeki man kalak si tutus dingen erkemalangen man baNa

Penjelasen Bahan Pustaka Si Badia

Bahanta jelas, persinget keras (teguren keras) man kalak perkisat, sabab kisat e me si erbahanca jadi kemusilen man bana. Lit memang dua macam kemusilen: 1) Erkiteken sistem (penindasen). 2) Erkiteken kemalasan. Si enda me si itegur bas perikopta enda. Kalak kisat arus mperdiatken ras erlajar arah rubia-rubia si kitik e me kap perkis. La lit pemimpinna, la lit mandurna, la lit si njagasa, tapi erdahin ia pepulung nakan tupung paksa perlego guna pangan tupung paksa perudan. Si pemena, si banci siidah, perkis tutus erdahin. Ia berinisiatif guna ncukupi kebutuhen geluhna ras mampu mengantisipasi masa depan. Sabab enggo ietehna, maka tupung masa perudan la banci ia erkai pe. Gelah ula sempat kelihen i bas masa perudan, maka i bas masa perlego tuhu-tuhu alu maksimal ia erdahin ncukupken kebutuhenna. Adi sitarik ku bas kegeluhenta,  sieteh geluh enda erpaksa-paksa, maka tupung sehat, musim perlego ka, i je situtusi erdahin, sabab lit kari waktuna la nari banci erdahin erkiteken erbage-bage situasi, faktor umur, pinakit, pensiun, rsd. Si peduaken, perkis ngajari kita uga mengatur ras memimpin diri sendiri. Sabab mekatep, tutus kita erdahin erkiteken i je lit bos-ta, tapi dikenca la nari je pemimpin, ate-ateta erdahin. La pe lit si ngontrolsa, tapi dahin e tetap alu mehuli sidahinken erkiteken sigejapken maka dahin e me kap anugerah si ibereken Dibata man banta guna kita banci ncukupi kebutuhen geluhta, mengaktualisasiken dirinta, ras ngataken bujur man Tuhan arah tenaga, pemeteh, kesehaten si ibereken Tuhan man banta.

Kebiasaan kalak perkisat rusur menunda-nunda pekerjaan, piah dungna enggo menumpuk dahin e. Prinsip si ijemak kalak enda, “melala denga waktu, lit denga waktu, sempat nge, gundari santai saja lebe”. Kalak si perkisat menyia-nyiaken waktu si lit ras la pernah makeken kesempaten, piah reh kemusilen nindih ia. Sebab dekahen tunduh, bermalas-malasan, santai, asangken dahinken dahin si lit. Kemalasan mendatangkan kemiskinan, enda me si terjadi i bas konteks enda.

Pengkenaina

Pak Jokowi, i bas ia ilantik jadi Presiden, ngatakenca maka rakyat Indonesia rikut ras pemimpin-pemimpinna arus bekerja, bekerja ras bekerja. Budaya, tutus, mejingkat, ertanggung jawab dingen berintegritas arus tetap nggeluh bas kita kalak si tek. Terlebih i bas tantangen si cukup mbue i bas jaman genduari enda. Pasar bebas ASEAN (AFTA : ASEAN Free Trade Area), arus terus isikapi alu bijaksana gelah ula kita jadi “penonton” secara ekonomi bahkan banci jadi ndabuh kubas hal-hal si menghalalken segala cara gelah tetap mampu bertahan. Secara pribadi kita arus meningkatken kualitas bekerjanta. Kesempaten guna meningkatken kemampuan, ketrampilan arus sipakeken. Geluh enda erpaksa-paksa, e maka tupung sehat ras megegeh denga alu dem ketutusen sikerjaken dahin si enggo ibereken Dibata banta. Kalak si erdahin alu tutus, pasti geluhna ipasu-pasu Tuhan. Je nari, pentar ka kita i bas makeken ulih latih si enggo ibereken Tuhan banta. Ula lebih besar pasak daripada tiang. Ula lebih besar pengeluaran daripada pendapatan.

Gereja pe ikut berperan guna Peningkaten Ekonomi Jemaat. Sedekah enda, kehadiren CU ras CUM cukup berperan guna peningkaten ekonomi jemaat. Gereja (Moderamen, Klasis ras Majelis jemaat), menyiapkan narasumber si kompeten bas bidangna guna banci mereken masuken-masuken si banci mengembangken usaha jemaat. Sebage contoh, man petani ibereken edukasi ras sekaligus praktek uga cara nuan-nuan si benar ras banci menghasilken. Si berprofesi membuka rumah makan (si tengka ras la tengka, kedai kopi, rsd.), iarapken narasumber banci mereken strategi si mantap guna mampu bersaing i tengah-tengah bisnis enda, rsd. I bas Pasar Bebas ASEAN, kita labo hanya bersaing ras sesama anak negeri, tapi pe bersaing ras warga ASEAN si deban. Ula kari sempat kalak asing mbuka bisnis si seri ras kita, tapi bangsanta sendiri lebih tertarik nukur bana erkitken kualitas lebih terjamin erhaga pe lebih murah. E maka, iarapken kel peran gereja guna banci mendampingi perpulungen i bas meningkatken ekonomina.