Bimbingen Khotbah Minggu 2 Agustus 2015

BIMBINGEN KHOTBAH MINGGU 2 AGUSTUS 2015

Minggu Perawatan Inventaris Gereja

(Pdt. Larena Sinuhadji)

Invocatio :

“Nina TUHAN man Musa, "Mari ku datas deleng njumpai Aku; reh kam ras Harun, Nadap, Abihu ras pitu puluh kalak peminpin-peminpin bangsa Israel; janah erjimpuh kam nembah man bangKu tupung kam ndauh-ndauh denga.” (Masmur 24:1)

Ogen :

Sakaria 14:20-21 (Tunggal)

Khotbah :

Esra 8:15-20 (Tunggal)

Tema :

NGKELENGI DINGEN PEKENA-KENA RUMAH PERTOTON

PENJELASEN BAHAN PUSTAKA SI BADIA

Perikop enda ngerana kerna persiapen bangsa Israel mulih bas pembuangen Babel nari si nipimpin Esra, i bas masa pemerintahan raja Persia, Artahsasta.

Ise kin Esra? I bas Esra 7:6 ituriken, Esra sekalak si meganjang dingen mbages kel pemetehna kerna Undang-undang si enggo ibereken TUHAN Dibata Israel man Musa. Banci kataken lit telu tugas si berbeda si nidalankenna. Si pemena, sebage Imam. Sejarah si cukup gedang kerna keluargana ngatakenca maka Esra e me kap keturunen Imam, sabab ia termasuk kesusuren Zadok. Esra pe sebage Ahli Taurat. Ope pembuangen, tugas kalak enda e me kap sekretaris si ertanggung jawab guna nulis ras mbeligai sen (2 Raja 12:10-12). Sedekah ras kenca pembuangen, tugas kalak enda e me kap erlajar, menyalin ras ngajari Kitab Suci. Selain si e, Esra pe pejabat tinggi i bas Istana Artahsasta (7:11-26), janah ia me si mimpin 1500 kalak Israel ras 258 kalak Lewi (8:1-20) mulih ku Jeruslem.

Secara khusus i bas ps. 8 si jadi perikopta e me kap persikapen i bas perdalanen mulih ku Jerusalem. Ipepulung Esra rombongen si bakal mulih ku Jerusalem i tepi lau anak si malerna ku kuta Ahawa (sada kuta i Babel). Kenca iperdiateken Esra, lit memang keluarga Imam-imam tapi la lit kalak Lewi (Bhs. Ind. : “Ada orang-orang Israel awam dan Imam, tetapi tidak didapati orang-orang dari bani Lewi”). Erkiteken si e ipepulung Esra pengulu kalak Israel si 9 kalak guna njumpai Iddo, e me pengulu perpulungen si lit i Kasipia (tepi sungai Tigris, ndeher Bagdad) lako mindo man bana ras teman-temanna e me kesusuren kalak si erdahin bas Rumah Pertoton gelah ikirimkenna kalak si erdhin guna Dibata i Rumah Pertoton. Tuhu-tuhu igejapi Esra arah perkuah ate Tuhan maka isuruhna si Serebia, sekalak si ngasup i bas kai-kai pe, ia sekalak Lewi i bas terpuk Mahli nari, janah 18 kalak anakna ras senina-senina reh ras ia. Bage pe Hasalia ras Jesaia i bas terpuk Merari nari rikut ras 20 kalak kade-kadena. Tambah si lit ka pe 220 kalak si erdahin bas Rumah Pertoton. Mulai kin nini-ninina marenda enggo itetapken raja Daud ras pegawai-pegawaina guna nampati kalak Lewi, i bas Rumah Pertoton.

I bas pengogen pemena e me kap kerna nubuaten kemenangen man Jerusalem (Bhs. Ind. : “Kemenangan terakhir :  Tuhan menjadi raja di Yerusalem”), maka i ja ikataken giring-giring si lit i bas pasangen kuda pe isurati alu kata-kata, “Ipersembahken guna Tuhan”. Kudin penanggeren si lit bas Rumah Pertoton bali badiana ras mangkuk si lit i lebe-lebe batar-batar. Ertina, perkakas-perkakas si lit bas Rumah Pertoton enggo badia sabab ipake dalam rangka ersembah man Tuhan.

PENGKENAINA

Adi siperdiateken kai si nilakoken Esra jelas tuhu-tuhu enggo ndauh Esra rukur, mpersiapken diri dalam rangka mulih ku Jerusalem. Secara khusus guna mpegegehi kiniteken perpulungen e. Kenca seh i Jerusalem dahin utama si arus ilakoken e me kap membangun Rumah Pertoton si enggo iradasken Babel ndube (mulai ipajekken 536 SM). Sabab Rumah Pertoton e me kap lambang kehadiren Tuhan man bangsa Israel. E maka arus lit i je kalak si erdahin guna Dibata i Rumah Pertoton. Selain banci mengatur ras mpesikap perdalinen ibadah si biasa ilakoken, kehadiren Imam pe membangun kiniteken perpulungen paksa si e.  Jelas kerina Imam-imam kalak Lewi e lit tugasna masing-masing: Sekretaris si ncatat kerina barang-barang i bas Rumah Pertoton (Esra 1:8-10), pemain musik, pengawal Rumah Pertoton, si erdahin bas Rumah Pertoton (Ps 2:70), ngajari Kitab Suci, rsd. Alu pengarapen kerina kegiaten dalam rangka majekken Rumah Pertoton erdalan alu mehuli, bage pe kenca enggo dung Rumah Pertoton e, pelaksanaan kerina ibadah, alat-alat si nipake i bas ibadah rikut pembinaan man perpulungen banci idalanken ka alu mehuli, erkiteken lit Imam-imam si melayani alu tutus.

Minggu enda e me kap Minggu Perawaten Inventaris Gereja. Memang kehadiren Dibata labo hanya bas RumahNa si Badia, sabab Dibata Maha Hadir (Omni Present). Pengangkan si e jemba kita guna tetap njagai kebadian ras kebersihen gerejanta, sabab Dibata hadir i japa pe, termasuk i RumahNa si Badia. Umumna bas gerejanta beluh kita membangun gereja seh ratusen juta tapi kurang i bas perawatenna. Ngasup kita nukur erbage-bage barang guna keperlun gerejanta (Pustaka si Badia, Alat Lakon Persadan si Badia, Alat Peraga KAKR, rsd.), tapi banci kurang terawat entah sada-sadai bene. Memang i bas piga-piga gereja enggo lit Koster tapi kerina jemaat Tuhan pe arus ikut muat bagin i bas makesa alu mehuli. Kipas angin entah pe AC si ipake ula lupa untuk matekenca. Kursi, meja gereja ula sicoret-coret. Umumna, mulih kita gereja nari, sampah ras bekas botol aqua i japa pe berseraken. Si e me si perlu ijaga kebersihenna ras-ras. Adi mehamat kita man Tuhan sicidahken pe arah kita ngkelengi gerejaNa ras mpekena-kena gerejaNa, termasuk kerina perkakas (alat-alat) bas gerejanta. Je nari, tetap sitotoken ras sidukung kerina si erdahin i bas gereja (Pelayan Tuhan): Pdt., Pt./Dk., Guru KAKR, Koster, Panitia Pembangunen, rsd., gelah tetap setia ras tutus i bas pelayanen si enggo iampeken Tuhan man bana kerina.