Bimbingen Khotbah Minggu 30 November 2014

BIMBINGEN KHOTBAH MINGGU 30 NOVEMBER 2014

ADVENT I

(Pdt. Larena br. Sinuhadji)

Introitus :

“Tapi kam kap Bapa kami, o Tuhan; kami taneh dah, janah desken sekalak pande kudin, itepaNdu kami” (Jesaya 64:8)

Ogen :

Markus 13:24-37 (Tunggal)

Khotbah :

Jesaya 64:1-9 (Anthiponal)

Tema :

KAM KAP BAPA KAMI, O TUHAN 

1. Jesaya 64 itulisken man kalak Israel si enggo mulih bas pembuangen nari. Aminna pe enggo mulih ku Jerusalem, tapi rumah pertoton tetap denga lenga ibangun mulihi. Musuh-mush bangsa Israel e me kap bangsa-bangsa i sekelewetna tetap denga nokohi bangsa Israel, si tuhu-tuhu menyakitken man bangsa enda, sebab lenga ka malem kiniseran tupung iambeken ku Babel ndube. E maka i jenda ipindokenna Tuhan bertindak, bagi nai Tuhan enggo membela ras nampati bangsa Israel alu perbahanen-perbahanen si luar biasa si la pernah ibegi ras iidah manusia (Bdk. I bas Tuhan membebasken Israel i bas Mesir nari). Permohonen e banci siidah alu kata-kata, “Caingken min langit, nusurlah Kam Tuhan, petangkaslah kuasaNdu man imbangNdu.”
2. Pengakun bangsa Israel, maka Dibata e mehuli man kalak si tetap ngarap man baNa. Ialo-alo Tuhan kalak si meriah iakapna erbahan si bujur, si tetap ngginget uga nggeluh bagi si ngena ate Tuhan. Tapi pengakun e la ibarengi alu perbahanen, malah kebalikenna si nidalanken bangsa enda e me kap kejahaten, si ngeliami gelar Tuhan. Aminna pe enggo merawa Tuhan, tetap denga iusur-usur bangsa enda erbahan dosa. Ay. 7, la lit kami si ertoto, la lit si nggit njemak tanNdu. Erkiteken si e, Tuhan sendiri enggo mpediat bangsa enda ikuasai dosa.
3. Tapi si luar biasa, lit kesadaren i bas bangsa enda. Ngaku bangsa enda kerna dosa-dosa si enggo ilakokenna, nina, “Kerina kami kalak perdosa, kiniulin kami pe melket kerina” (bhs. Ind., “Kesalehan kami seperti kain kotor,” banci iartiken kiniulin si sedekah enda ilakoken i je pe lit nge cacatna. La lit nari si sempurna i bas manusia). Bangsa enda pe mindo pengalemi dosa i bas Dibata nari. Pemindon bangsa enda, ula nari min iinget Tuhan dosa-dosa bangsa e. Iinget Tuhan min, maka bangsa Israel (manusia) bekas Tuhan si nepasa. “Kam kap Bapa kami o Tuhan, kami taneh dah, janah desken sekalak pande kudin itepaNdu kami.”  Lit sada hubungen si la banci putus, antara bapa ras anak, sabab la lit manta Bapa entah pe anak. Uga jahatna pe anak e, tetap alu erkeleng ate, orang tua, Bapa ngalo-ngalo anak e (Bdk. Turin-turin kerna anak si bene ibas Lukas 15:11-).
4. Ibas Ogen, mulihi ipersingeti kerehen Tuhan si peduakaliken, si la ise pe metehsa dingan waktuna. Tapi si arus tetap silakoken kita e me kap ersikap, metengetlah dingen erjaga-jagalah. Tetap si cikep kiniteken seh ku ujungna, gelah alu bage rempet pe Ia reh la idapetiNa kita tertunduh.
5. Sikataken bujur man Tuhan, bengket kita kubas Minggu Advent si pemena. Walau pe situhuna, setiap wari, setiap jam, setiap detik tetap kita arus ersikap. Tapi secara khusus i bas masa Advent enda, ibabaina mulihi kita mengevaluasi, mengkoreksi dirinta, jujur kita ngaku kita i lebe-lebe Tuhan. Bagi si enggo ilakoken bangsa Israel, ras terealisasi i bas kerehen Jesus Kristus sebage Juruslamat kalak si tek man baNa (Joh. 3:16), labo hanya bangsa Israel. Kai si enggo ibahan Jesus, i bas IA enggo jadi Juruselamatta, arus sirespon, i bas tetap kita nggeluh bagi si ngena ateNa.  Amin sekali erkiteken buena perbeben dingen e erbahanca kita ndabuh ku bas dosa, minterlah kita mindo pengalemi dosa ibas IA nari. Kesadaren guna ngaku salah ras bertobat, nggeluh nggeluh si ngena ateNa, e me si arus sidalanken ibas kegeluhenta.
6. Mekatep si terjadi ibas geluhta, ngaku kita ibas kesalahenta, sedar kita, tapi tetap kita nggeluh i bas kejahatenta, keberdosaanta. La kita pang, dengan tegas mengambil sikap meninggalkan dosa/kejahaten si enggo sedekah enda silakoken. Adi bage silakoken, pengakun dosa e terjeng formalitas ngenca. Upah dosa tetap maut, tapi beliden perkuah ate Dibata si enggo iberekenNa man banta ibas kita reh alu kiniteruken ukur ras nggeluh i bas kegeluhen si mbaru. Bagi nina Dietrich Bonhoefer, “Kasih Karunia Tuhan gratis, tapi bukan murahan.” E maka ula si sia-siaken keleng ateNa e.