SUPLEMEN PA MORIA GBKP TGL. 8 - 14 NOV. 2026

Pdt. Larena Sinuhadji (Nd. ReyRapha Tarigan)

Merawat Diri: Fisik, Penampilen, ras Kesehatan

Si Man Ogen : Ester 2:8-14

Tema : NGGIT MPEKENA-KENA DIRI

Tujun : Gelah Moria :

- Meteh aturen mpekena-kena diberu gelah mejile

- Mpekena-kena diri secara fisik, penampilen, ras kesehaten

Metode : Merias Diri

Penaruh

PA-nta sendah lit kaitenna ras merawat diri, mpekena-kena diri, baik secara fisik, penampilan ras kesehaten. Mpekena-kena diri i jenda tentu labo ibas rangka “narsis” (ertina: rasa cinta, kagum, atau peduli yang berlebihan terhadap diri sendiri), entah pe guna “validasi” (pengakuan) ibas kalak si deban nari arah media sosial si lit ibas kita. Merawat diri i jenda maksudna bentuk konkrit tanggung jawabta nandangi diri sendiri (fisik, penampilan ras kesehatan) si enggo ipercayaken Tuhan man banta. 

Mpebagesi Si Man Ogen

Kitab Ester nuriken kerna perdalanen bangsa Israel i bas jaman pemerintahen Persia, kenca enggo italukenna Babel. Rajana paksa si e tergelar Ahasweros i ja kerajaanna meliputi 127 propinsi, mulai India nari seh ku Etiopia. Pusat pemerintahenna lit ibas Kota Susan. Ilatarbelakangi alu kinilapatuhen kemberahen raja si tergelar Wasti, maka kedudukenna selaku kemberahen ibereken man diberu si deban si ulin asangken ia (bdk. Ester 1:5-22). Kenca si e, iusulken penasehat raja, gelah ndarami piga-piga singuda-nguda guna ipekena-kena, janah apai pagi akap raja si mejilena, e ipilihna jadi kemberahenna. Kenca dung masa seleksi, terpilih me Ester. Si jadi fokus ibas ogenta sendah eme proses seleksi si idalani Ester sope ia terpilih jadi ratu nggantiken Ratu Wasti.

Adi siperdiateken ay. 9 teridah maka sope datken proses perawaten fisik sue ras aturen si lit ibas istana raja, Ester enggo mejile bas nari (inner beauty, cantik dari dalam). Ituriken maka ngena ate Hagai ngenen Ester. Padahal je denga Hagai ngenen Ester tapi enggo mis ngena atena ngenen Ester. Lit karisma ibas diri Ester. Karisma ertina keadaan, daya tarik, atau bakat luar biasa yang ada pada diri seseorang sehingga mampu membangkitkan rasa kagum, hormat, dan pemujaan dari orang banyak. Tek kita maka karisma si lit ibas diri Ester rehna ibas Dibata nari. Alu bage Hagai pe selaku pengawas rumah gundik raja, la nari mesera guna mpekena-kena Ester alu minak si mejilena, ngaturken pangan si mehulina man bana, rsd.
Janah ibas sisi si deban pe, nggit Ester alu tutus ngikutken kerina proses perawaten si enggo iaturken i bas istana raja. Lang banci saja Ester enda murah bosan jelemana, la ia nggit ngikutken aturen si ketat ibas istana raja.

Ay. 12-14 nurikenca maka kerina peserta seleksi ipekena-kena lebe dagingna sada tahun dekahna gelah mejile. Enem bulan harus make minak wangi campur kumenen, janah enem bulan nari alu make minak si merim-merim si debanna. Sope berkat ngadap raja harus lebe ipakena uis si mehulina kel. Ras mungkin melala denga aturen-aturen si deban si harus ilakoken kerina peserta seleksi ratu ndai. Tapi si pentingna akap kami i jenda, la ipake Ester kinijilen si lit ibas dirina guna kepentingen dirina jine. Nggit Ester jadi alat Dibata guna nyelamatken bangsana.

Versi Audio silahkan klik : https://youtu.be/__lxyASUb38

Pengkenaina

PA-nta sendah ngajuk kita gelah mediate nandangi diri sendiri baik secara fisik, penampilen ras kesehaten, arah kita merawat diri. Maun-maun erkiteken melala kesibukenta selaku nande i tengah jabu, enggo lupa kita mpekena-kena diri sendiri. Enggo lanai lit waktu guna “me time.” Emaka ibas si e marilah kita mediate nandangi diri sendiri. Bahanlah waktu khusus guna kita mpekena-kena diri. Adi lit sitik senta, banci kita reh ku salon, spa, rsd.-na. Adi la lit pe melala gundari panduan merawat diri si murah meriah ibas media sosial. Tapi rikutken ogenta sendah si pentingna eme inner beauty, kecantikan dari dalam. Uga enda cara merawatsa? Si pemena akap kami harus lit relasi si mehuli ras Dibata. Relasi si mehuli ras Dibata erbahanca kita dem alu dame sejahtera, sukacita, ngasup kita bersyukur, penuh dengan pikiran positif ras optimis, rsd. Si peduaken, nggit kita bagi Ester, jadi alat Dibata guna kiniulin sue ras peraten Dibata. Alu bage tek kita maka ise pe si ndeher ras kita, ngena atena man banta. Sebab labo terjeng teridah mejile secara fisik, tapi lit karisma Dibata ibas dirinta.

Bujur ikataken kami i bas kerehenndu ku bas blogspot enda sedekah tahun 2026. Mindo maaf adi sedekah enda kurang ngasup kami melayani secara maksimal i bas blogspot enda. Pengarapen kami semoga kerina si enggo isehken kami i bas blogspot enda banci nampati pelayanen i bas Gerejanta masing-masing. Adi lit kritik saran, alu meriah ukur ialoken kami i bas kam nari. Selamat memasuki masa-masa Advent, Natal 2026, ras Tahun Baru 2027. Dibata si masu-masu kita kerina.