Pdt. Larena Sinuhadji (Nd. ReyRapha Tarigan)
Adven - Natal
Ogen : Yesaya 35:1-10
Tema : REH ME DIBATA
Tujun : Gelah Mamre :
1) Meteh erti Adven
2) Ersikap guna ngalo-ngalo Natal
Metode : Aksi
Penaruh
La tergejap PA-nta sendah eme PA si terakhir ibas tahun 2026. Kentisik nari radu ras kita bengket ku bas Minggu-minggu Adven. Adven ertina kedatangan. Emaka i bas Minggu-minggu Adven biasana radu ras kita ersikap guna ngalo-ngalo kerehen Mesias, Yesus Kristus Juruselamat, si tubuh i Betlehem. Tapi Minggu-minggu Adven labo terjeng mengenang masa lalu, i ja radu ras kita ersikap guna mperingeti wari ketubuhen Yesus. Minggu-minggu Adven pe mengacu ku masa depan, i ja radu ras kita ersikap guna ngalo-ngalo kerehen Tuhan Yesus si peduakaliken. PA-nta si terakhir enda mbera-mbera banci nampati kita ersikap guna bengket ku bas masa Adven ras Natal.
Mpebagesi Ogen
Ogenta sendah lit i teruh judul perikop “Dalan Si Badia” ibas terj. Bhs. Ind., nina, “Keselamatan bagi umat TUHAN,” nuriken kerna janji keselamaten Dibata nari nandangi bangsa si ikelengiNa erkelangken Nabi Yesaya. Situasi ras kondisi bangsa Israel paksa si e lit ibas kebiaren erkiteken ancamen kerajaan Asyur nari. Janah i tengah-tengah kegeluhen bangsa Israel pe melala terjadi kinilaadilen, penindasen, geluh erkiniteken pe enggo ceda erkiteken kinilapatuhenna nandangi Dibata. Ibas kondisi si bage rupana reh Dibata erkelangken Yesaya mpegegehi bangsa si ikelengiNa, gelah terjadi pemulihan relasi ras Dibata, mulihken bangsa e ersembah man Dibata alu payo.
Si menarik akap kami ibas ogenta sendah, keselamaten, entah pe pemulihan e, labo terjeng man manusia ngenca, tapi pe man kerina tinepa Dibata. Adi siperdiateken lit 4 hal si encidahken keselamaten si konkrit. Si pemena, ay. 1-2 encidahken pemulihan ciptaan, gurun pasir si la lit je tanda-tanda kegeluhen jadi erbunga, erkiteken mejile ras mehumur tanehna. Si peduaken, ibas ay. 3-4 ituriken nina, tan si enggo latih ipegegehi, tiwen si enggo nggirgir ipeteguhi, ukurna jadi piher, rsd.-na. Si e kerina encidahkenca maka bentuk konkrit keselamaten eme ibereken Dibata gegeh ras pengarapen man kalak si sangana lit ibas kiniseran ras kebiaren. Si peteluken, ibas ay. 5-7 teridah pemulihan kondisi geluh manusia bage pe alam sekelewet: si cempang banci erdalan, si bisu jadi beluh ngerana, turah lau si erburak-burak ibas taneh si kerah nari, rsd.-na. Keselamaten si konkrit teridah arah pemulihan kondisi geluh manusia bage pe alam sekelewetna. Si peempatken, ay. 8-10 ituriken maka ipulahi Dibata bangsaNa ibas pembuangen nari i bas paksana, seh banci mulih ku Jerusalem dem alu keriahen ukur.
Ogenta sendah encidahkenca bentuk-bentuk keselamaten si konkrit ibas Dibata nari nandangi bangsa Israel si ikelengiNa. Janah ibas Pustaka pe isaksiken maka janji Dibata enda tuhu-tuhu terbukti terjadi i tengah-tengah bangsa Israel. Tapi ibas kinitekenta, nubuaten janji keselamaten Dibata enda enggo igenepi ibas kerehen Yesus Kristus. Empat bentuk konkrit keselamaten bagi si enggo ijelasken i datas, tuhu-tuhu ikuhi Yesus Kristus sanga IA reh ku tengah-tengah doni enda, berkarya i tengah-tengah bangsa Israel, ngenanami kiniseran, mate, keke ibas si mate nari, ras nangkih ku surga. Ay. 5-6 ogenta sendah lit rujukenna ku Injil Mat. 11:5 ras Luk. 7:22, ertina kai si inubuatken Nabi Yesaya tuhu-tuhu ilakoken Yesus Kristus.
 |
| Versi Audio silahkan klik : https://youtu.be/PbhqKWSkhNY |
Pengkenaina
PA-nta sendah ngajuk kita kerina, khususna kam kerina Mamre kami, gelah tuhu-tuhu ersikap ibas mengketi Minggu-minggu Adven bage pe Natal ibas tahun 2026 enda. Dibata reh ku tengah-tengah geluhta mabai keselamaten si konkrit, si nyata, si banci sigejapken diri sendiri bage pe kerina kalak si tek man baNa. Emaka marilah ngataken bujur man baNa, janah marilah kita jadi alatNa guna mabai keselamaten si konkrit i japa pe kita ringan: i tengah-tengah keluarga, pendahin, masyarakat ras Gereja. Tujun si peduaken PA-nta sendah, ngajuk kita kerina gelah ersikap ngalo-ngalo Natal tahun 2026 enda alu aksi-aksi si nyata, si banci ilakoken kita i japa pe kita ringan, khususna i tengah-tengah Gerejanta. Dibata si mpegegehi ras mpengasup kam kerina Mamre GBKP.
Bujur ikataken kami ibas kerehenndu ku bas blogspot enda sedekah tahun 2026. Mindo maaf adi sedekah enda kurang ngasup kami melayani secara maksimal ibas blogspot enda. Pengarapen kami semoga kerina si enggo isehken kami i bas blogspot enda banci nampati pelayanen ibas Gerejanta masing-masing. Adi lit kritik saran, alu meriah ukur ialoken kami ibas kam nari. Selamat memasuki masa-masa Adven, Natal 2026, ras Tahun Baru 2027. Dibata si masu-masu kita kerina.
Tidak ada komentar:
Posting Komentar