Bimbingen Khotbah Minggu 3 Mei 2015

BIMBINGEN KHOTBAH MINGGU 3 MEI 2015

Minggu Kantate

(Pdt. Larena Sinuhadji)

Invocatio :

“Kata Kristus si dem alu kinibayaken nggeluh min i bas pusuh peratenndu. Siajar-ajarenlah kam alu kepentaren. Endekenlah masmur, ende-enden pujin ras ende-enden pertendin. Rendelah muji Dibata dingen ngataken bujur i bas ukurndu.” (Kolose 3:16)

Ogen :

Ketangkasen 15:1-4 (Tunggal)

Kotbah :

Masmur 47:1-10 (Responsoria)

Tema :

PUJILAH TUHAN ERKITEKEN PERBAHANENNA

Bena Kata

Minggu Kantate si ertina “rendelah” e me kap sada bagin i bas minggu-minggu gerejanta si ngajuk kita guna banci ngendeken ende-enden si ncidahken kinitekenta man Dibata. Rende sabab Tuhan enggo mereken kemenangen banta. Kekeken Tuhan Jesus i bas si mate nari jadi jaminen keselamatenta, e me si erbahanca kita ngataken bujur. Janah memang adi siperdiateken i bas kebaktinta, mbuen unsur rende asangken unsur-unsur si deban:  ertoto, pengakuan dosa,  megiken Kata Dibata.  Arah rende kita banci mengekspresiken kai si lit bas pusuhta, khususna lagu rohani mabai kinitekenta reh teguhna man Tuhan segaligus penembahenta man baNa.

E maka penting kel i je, i bas kita mengekspresiken kai si lit bas ukurta arah rende, endekenlah alu bulat ukur, total, ola asa menggo, asal buka babah sabab labo lit kari kuasaNa. Jelas, maka Tuhan erkuasa i bas puji-pujin si ipenangkih kita (bdk. Tembok Jeriko hancur alu puji-pujin ras tiupan sangkakala perpulungen. Petrus ras Silas ilepasken i bas tembok penjara, tupung ia rende ras).

Penjelasen Bahan Alkitab

Bani Korah[1] sebage pemimpin puji-pujin ngelumbaken man perpulungen gelah muji-muji gelar Tuhan. Pujian siangkatken man Tuhan pe arus alu semangat ras dem keriahen ukur (Ay. 2, “Ertepuklah alu meriah, pujilah Dibata alu ersurak-surak si meriah.” Ay. 7, “Endekenlah ende-enden pujin man Dibata”). Engkai makana sipuji Tuhan? Icidahken Pemasmur kerna kebesaren Tuhan si nisembahNa. Enggo tangkas maka Ia me Tuhan si merentah kerina doni enda. Doni enda ras kerina isina Tuhan si ngaturkenca. Pergantian musim, pergantian siang ras malam, perdalanen benda-benda penerang, ras kerina si terjadi i bas kegeluhenta, subuk suka ras duka, Tuhan si ngaturkenca. Tuhan si meganjang ras tuhu-tuhu rejin. Tuhan si mereken kemenangen naluken bangsa-bangsa. I bas pengalamen kegeluhen bangsa Israel, maka Tuhan nge si erperang ras naluken bangsa-bangsa si jadi musuh bangsa Israel. Janah iberekenNa taneh Kanaan jadi ingan tading bangsa pilihenNa, taneh si dem alu susu ras tengguli. I bas pengakun Pemasmur, maka Dibata e Raja Mulia, gegehen IA asangken kerina tentera. Alu alasen si e kerina, maka patutlah Tuhan ipuji ras isembah.

Bage pe i bas ogen I, Johanes i bas pengenehenenna, ngenehen kalak si ndarat i bas kesusahen nari, si enggo menang i bas erbage-bage godaan. Idah Johanes pitu malekat maba pitu mara si pendungi, janah e me tanda pernembeh ate Dibata si perpudinaka. Iidahna ka, kalak si enggo menang naluken rubia-rubia ras gana-gana e, bage pe menang ngelawan kalak si gelarna itandai alu numbur, sangana ngendeken nde-nden Musa ras anak biri-biri Dibata, si intina Dibata e mada kuasa, Dibata si bujur, Dibata si payo pendalankenNa, si badia. Lit dua kali penungkunen retoris: “Ise kin si la erkemalangen man Tuhan?” “Ise kin si la nggit muji gelar Tuhan?” Ertina, erkiteken kuasa ras perbahanenTuhan maka kerina manusia erkemalangen man Tuhan ras nggit muji gelar Tuhan. (Bhs. Ind. : “Besar dan ajaib segala pekerjaan-Mu, ya Tuhan, Allah, Yang Mahakuasa! Adil dan benar segala jalan-Mu, ya Raja segala bangsa! Pekerjaan Tuhan yang ajaib dan besar dan tidak terselami oleh manusia”).

Perenungan

Rikutken pengogen ras bahan khotbahta, maka Pemasmur, bani Korah bage pe kalak si enggo menang naluken erbage-bage percuban rende ersurak muji Tuhan, erkiteken igejapina, maka kai sialamina erkiteken pertolongen ras perkuah ate Tuhan. Adi sitarik ku bas kegeluhenta, maka perbahanen Tuhan seh kel mbuena man banta pribadi lepas pribadi, penampatNa mereken keterkelinen banta. Kuga penembahenta man baNa? Mulihi sievaluasi penembahenta, sabab lit ka kita kurang sungguh-sungguh i bas ersembah man Tuhan, i bas rende muji Tuhan. Lit deba asal rende (1 ayat enggo siakap cukup). Lit deba, kurang semangat, bahkan lit ka deba ku gereja tapi la pernah ia ikut rende. Pengalamen penulis, pernah pelayanen ku LP (Lembaga Pemasyarakatan), luar biasa Sn./Tr.-ta si kalak Kristen rende muji Tuhan. Padahal alu situasi si ipenjaraken.

Paulus, i bas suratna man perpulungen Kolose (Invocatio) mpersingeti perpulungen si nilayanina gelah saling mpegegehi alu ngendeken Masmur (psalmois), kidung puji-pujian (hummois) ras nde-nden pertendin (oidais). Jesus pe ngendeken nde-nden pujin guna mpegegehi pendiloNa i bas nehken keselamaten man manusia i bas Ia ngalaken kiniseran (Mark. 14:26). Sungguh luar biasa peranen rende guna mpegegehi kinitekenta i bas ndalani kegeluhenta.

Pujilah Tuhan erkiteken perbahanenNa. Memang labo hanya tupung kita ibadah i je siangkatken puji-pujiannta man Tuhan, tapi arah perbahanennta, karya seni, karya kerja, pengerananta, talenta si lit bas kita, rsd., totalitas geluhta guna muji gelar Tuhan.

---

[1] Korah bin Isar bin kohat bin Lewi (Kel. 21) si ikut memberontak ras 250 kalak guna melawan kepemimpinen Musa ras Harun i Padang Gurun erkiteken ia la ilibatken i bas jabaten imam. Kedungenna ia ras pengikutna mate nggeluh-nggeluh itelen doni (taneh erbelah dua) ras ipesusur Tuhan api si gara keri ipanganina si 250 kalak ndai (Bil. 16, Bil. 26:9-11; Ul. 11:6). Tapi anak-anak Korah la mate. Kesusuren Korah si la ikut bas pemberontaken me si kedungenna berpartisipasi i bas pelayanen Kemah Suci, si ertugas erjaga-jaga i bas pintun bengket ku Rumah Tuhan (1 Kro. 9:19), erbahan roti ( 1 Kro. 9:31), ras ngendeken nde-enden pujin i bas Rumah Pertoton.