Bimbingen Khotbah Minggu 1 Februari 2015

BIMBINGEN KHOTBAH MINGGU 1 FEBRUARI 2015

(Septuagesima)

Pdt. Larena br. Sinuhadji

Introitus :

“Janah erkiteken Kesah Si Badia tangkas maka Ia Anak Dibata si erkuasa. Enda teridah arah kekekenNa i bas si mate nari” (Roma 1:4)

Ogen :

Masmur 111:1-10 (Responsoria)

Khotbah :

Markus 1:21-28 (Tunggal)

Tema :

PUJI TUHAN, MBELIN KUASA-NA

Bena Kata

Dibatanta i bas Jesus Kristus mbelin kuasaNa. Jelas ope IA nangkih ku surga pe ikatakenNa, maka enggo ibereken Dibata man baNa kuasa i surga ras i doni. Ras melala hal-hal kongkrit si ikataken bas Pustaka si Badia kerna kuasa si lit i bas Jesus. I bas IA mengajar dem alu kuasa, la bali ras ahli-ahli Taurat, erkuasa mpelawes setan ras mpepalem erbage-bage pinakit, erkuasa erbahan tanda-tanda sengget, erkuasa mpekeke kalak si enggo mate, bahkan erkuasa i bas ngalemi salah dosa manusia. Adi enggo jelas bage penandaita kerna Jesus, uga responta? Enggo pasti man baNa ngenca kita ernalem, la nari kita ernalem man gegehta ras pemetehta si terbatas, bahkan la kita ernalem man kuasa-kuasa si deban, sabab sieteh ndauh beliden kuasa Yesus ibading kerinana.

Pembahasen Bahan Khotbah

I bas perikopta ituriken maka Jesus ras ajar-ajar si mbaru ipilihNa (Mark. 1:14, 4 kalak denga), lit i Kota Kapernaum. Rembang paksa si e wari Sabat kalak Jahudi minter Jesus ku Rumah Pertoton (Sinagoge) ras ibenakenNa ngajar. La ikataken kai isi pengajarenNa. Tapi inti pengajaren Jesus e me Kinirajan Dibata enggo seh, jeralah, janah teklah nandangi Berita si Meriah! (Mark. 1:15). Dingen si terpenting Jesus mengajar alu dem kuasa, la bali ras guru-guru agama. E maka kemamangen ate kalak si megi pengajarenNa. Ras wujud nyata i bas Kinirajan Dibata e me mulai tertalukenna kuasa-kuasa kejahaten/ilat.

La ndekahsa reh sekalak setanen ku bas Rumah Pertoton e janahna serko (i bas bahasa Ind. : “Pada waktu itu di dalam Rumah Ibadat itu ada seorang yang kerasukan roh jahat. Orang itu berteriak”).  Lit perbedaan, antara bahasa Indonesia ras bahasa karo. Tapi si banci siidah kuasa kegelapen e la banci nggolangi pengajaren Jesus. Justru arah peristiwa e, ncidahken kuasa ilahi i bas pelayanen Jesus. Adi awalna, kuasa Jesus e teridah i bas pengajarenNa, gundari enggo banci idah langsung kuasaNa si mpelawes setan.

Roh Jahat/kalak si iseluki setan e, serko alu telu kali kalimat si keras. Si pertama, “Man kadendu kin kami o Jesus kalak Nasaret?” Setan e merasa terganggu i bas kehadiren Jesus, merasa ‘zona amanna’ enggo terganggu i bas kehadiren Jesus. Si peduaken, tuhu-tuhu merasa terancam, “Reh ateNdu munuh kami kin?” Ras si peteluken, Iblis menggertak seolah-olah tandaina Jesus, “Kam me si Badia i bas Dibata nari?” Biasana, adi enggo tandai kalak kita, erbahanca kita grogi, seolah-olah si sedekah enda jadi rahasianta enggo ieteh kalak. Bahkan banci mengecohkan kita, maka Iblis pe tandaina Jesus. Arus jelas man banta, Setan memang tandaina Jesus tapi la ia nggit ersembah man baNa, mbiar dingen nggir-nggir ia (bdk. Jakub 2:19). Tapi tanpa mbue cakap, minter isergangi Jesus setan ndai, alu dem kuasa, otoritas penuh isuruhna setan e ndarat i bas kalak e ndai, “Ndaratlah bas ia nari.” E maka, idampes-dampesken setan e sisetanen ndai, e maka ndarat setan e i bas ia nari, janahna serko.

Reh mamangna ate kalak si nterem (kerina kalak kemamangen, dingen sisungkun-sungkunen sapih-sapih ia) “Kai kin enda ndia? Pengajaren si mbaru? I bas Ia lit kuasa. IpelawesNa Setan-setan, janah Setan-setan ngikutken kataNa!” Banci jadi sedekah enda, pengajaren si isehken Ahli-ahli Taurat, terjeng teori ngenca, janah sieteh pe maka mbuen Ahli Taurat e munafik, mejile pengajarenna, tapi ia sendiri la dalankenna, maka jelas sama sekali la lit kuasana (bdk. Mark. 12:38-40, Mat. 23:13-). Alu bage banci kataken, Guru-guru Agama e, pengikut Setan, sabab Setan/Iblis bapa kerina perguak (Joh. 8:44, “Bapandu si Iblis nge janah kam tuhu-tuhu anakna”).

Pembahasen Bahan Ogen

Ogen e me seruan Pemasmur guna muji Tuhan. Penggejapen Pemasmur mbelinna perkara-perkara si ibahan Tuhan: iberekenNa rejeki, icidahkenNa kuasaNa, ipulahiNa bangsaNa, Dibata si bujur, si adil. Kerina si ilakokenNa mulia dingen terpuji. Selain Pemasmur muji dingen ngataken bujur man Tuhan arah kai si enggo ibahan Tuhan, ia pe ngelumbaken maka perpulungen arus tetap muji Tuhan i bas kerina perbahen si enggo ilakoken Tuhan.

Pengkenaina

Tema : “Pujilah Tuhan, mbelin kuasaNa.” Arah Firman Tuhan si enggo seh man banta, kai relevansina man banta?

Si pemena lebe, lit pengakuan i bas kita, maka la lit kuasa si deban si terbeliden seyakatan kuasa Tuhan saja. Kuasa Tuhan si enggo sialami arus irespon. Ula terjeng terkesima, kemamangen bagi kalak si nterem tupung Jesus i Sinagoge Kapernaum. Sabab lit ka model si bage bas kita kalak Kristen e. Enggo melala sialami perbahen Tuhan, kuasa Tuhan, terkagum-kagum, mamang ia. Tapi terjeng je ngenca. Labo ka ngubah ia semakin setia ernalem man Tuhan, reh rembakna man Tuhan. Kuasa Tuhan si enggo sialami njemba kita untuk tetap ernalem man baNa. Nai, gundari, seh rasa lalap, kuasa Tuhan tetap erdahin i bas kegeluhenta. Kai pe kiniseran sialami kita, kuasa Tuhan tetap erdahin guna nampati kita. E maka ula nari ragu-ragu ernalem dingen mindo perkuah ateNa.

Si peduaken, kuasa Tuhan si enggo sialami, njemba kita tetap memuji ras ngataken bujur man Tuhan. Ngasup kita ngalaken erbage-bage hal erkiteken kuasaNa. E maka tetaplah Tuhan si terpuji, ola lit bas kita si mencuri kemulian Tuhan.

Si peteluken, sebage kalak si tek, kuasa e pe enggo ibereken Tuhan man banta (Mark. 16:17). Kuasa si enggo ibereken Tuhan man banta arus sipakeken guna kemulian Tuhan dingen jadi berkat man kalak si deban. Kuasa Tuhan si lit bas kita nampati kita mbebasken kalak si lit i bas kuasa kegelapen, mbebasken kalak si tetap terikat i bas kuasa-kuasa doni (materialistis, kekerasan, penggunaan obat-obatan terlarang, perjudian, rsd). Ula sempat kuasa si lit bas kita sipakeken guna erbahanca menderita kalak.