Bimbingen Khotbah Minggu 28 Desember 2014

BIMBINGEN KHOTBAH MINGGU 28 DESEMBER 2014

Pdt. Larena br. Sinuhadji (Nd. Reynard Tarigan)

Introitus :

“Petetap min ukurku alu keleng ateNdu si tetap, sue ras ipadankenNdu man bangku, suruh-suruhenNdu” (Masmur 119:76)

Ogen :

Jesaya 62:1-3 (Responsoria)

Khotbah :

Lukas 2:36-40 (Tunggal)

Tema :

NGGELUH I BAS PERKUAH ATE DIBATA

INTROITUS

Kadang, ukurta banci bimbang, ragu, dingen adi la kita tuhu-tuhu erpengendes man Tuhan, banci enggo papak dalanta. E maka i jenda Pemasmur ertoto gelah ipetetap Tuhan ukurna alu keleng ate Tuhan si la pernah erkeri-kerin. Gelah alu bage tetap banci ipelajarina ras ipakena Undang-Undang Tuhan i bas kegeluhenna.

OGEN

Si ilumbaken Jesaya e me kap kerna berita pembebasen man bangsa Israel. Pembebasen si enggo ibahan Tuhan nandangi bangsa pilihenna i bas tabanan Babel. Jesaya arus berbicara gelah enggo jelas man bangsa Israel uga perbahanen Tuhan si luar biasa man bana, i ja enggo isalihken Tuhan status bangsa enda menjadi bangsa si bebas, merdeka. La tertahanca la ngerana, dingen la atena sinik saja kerna kebenaren si arus ilumbaken, gelah enggo jelas man bangsa e, maka Tuhan enggo mereken kemenangen. Kuta si marenda kuta mati, gelap, mesuni, melungun isalihken Tuhan. Keselamaten enggo jadi sikerajangen bangsa e, kuta e ersinalsa terang bagi matawari ras kemenangenna bagi obor si gara sanga berngi. Ibereken Tuhan gelar si mbaru e me si ngena ate Dibata (ay. 4). I bas tan Tuhan bangsa Israel bali ras sada mahkota si mejile si kerajangen Dibata. Perbahanen Tuhan si luar biasa man bangsaNa labo erkiteken lit si ‘istimewa’ bas bangsa Israel tapi erkiteken perkuah ate Tuhan kerina.

KHOTBAH

Hana sue ras gelarna e me kap grace/anugerah e me sekalak diberu si tuhu-tuhu ndatken perkuah ate Tuhan. I ja ibereken Tuhan kesempaten jumpa ras Mesias ras ilumbakenna ka berita perkuah ate Tuhan e man kalak Jahudi si nima-nimai warina Jerusalem ibebasken.

I bas Alkitab, 5 kalak ngenca Nabi Diberu. Miryam (turang Musa, Kel.15:20), Debora (Hak. 4:4), Hulda (Nabiah i bas jaman Yosia 2 Raj. 22:14), Noaja (Nabiah si tergoda ikut ras Tobia ras Sanbalat seh akhirna jadi provokator guna menentang Nehemia), ras Hana. Pitu tahun ngenca ia berumah tangga, selebihna ia melayani i Rumah Pertoton. Banci siidah, aminna, ia mbalu ras enggo berumur lanjut tapi labo e erbahanca sada halangan/hambaten man bana guna melayani Tuhan. Iendeskenna dirina guna banci alu setia ras full time/penuh waktu melayani Tuhan. La pernah ia nadingken Rumah Tuhan, suari berngi ia ertoto ras erpuasa. Erkiteken kinigenggengena, kesetianna man Tuhan,  perkuah ate Tuhan seh man bana, banci sempat iidahna Mesias si enggo tubuh i Betlehem, si tupung paksa si e Yesus ibaba orang tuana guna ipersembahken. Ras alu dem sukacita pe iberitakenna berita kerna perkuah ate Tuhan e me kap, kerna Anak si mbaru tubuh e man kerina kalak si nima-mimai Jerusalem ibebasken Tuhan. Tugas sebage nabi tetap idalanken Hana, amin sekali ia mbalu ras enggo metua. Bahkan kesempaten emas, jumpa ras Mesias pe iberitakenna man kalak si deban.

PENGKENAINA

Minggu enda, minggu terakhir i bas tahun enda. Adi sigejapken luar biasa perkuah ate Tuhan si enggo ialami kita ras keluarganta rikut gereja ras bangsanta. Perkuah atena si la nari ngasup kita mbeligaisa ras ngantakenca sada persada. Bujur ninta man Tuhan. Adi enggo sialoken perkuah ateNa, nggeluhlah kita i bas perkuah ateNa. Ertina, setiap saat, setiap waktu, dan di segala tempat, sitempatken dirinta selaku kalak si enggo ngaloken perkuah ateNa. Ertina, hidup yang selalu bersyukur dalam segala keadaan, rendah hati, ras geluhta asa bancina menyenangken ukur Tuhan.

Siusih teladan Pemasmur, Jesaya ras Hana : 1) Pemasmur selalu, membangun kerembaken ras Tuhan, gelah banci tetap idalankenna Firman Tuhan. Jesaya, bersaksi, ngelumbaken Firman Kebenaren. Hana, aminna pe enggo metua ras mbalu tetap jadi berkat man kalak si deban, muji Tuhan, ertoto ras erpuasa guna kebebasen Israel.

Kai nari si banci silakoken kita, dingen sitingkatken kita sebage tanda pengataken bujurta man Tuhan si enggo mereken perkuah ate si luar biasa man banta, rikutken talenta, gegeh sibereken Tuhan banta. Sekarang bukan waktuna untuk menuntut, menerima dan dilayani tetapi waktu kita untuk memberi, melayani, mengasihi, memotivasi, mpetetap ukur kalak, geluhta jadi berkat ras kemulian man Tuhan.