SUPLEMEN PJJ GBKP TGL. 18 - 24 MEI 2025

Pdt. Larena Sinuhadji (Nd. ReyRapha Tarigan)

KERINA HARUS METINGGEL - Jakup 1:19-25 (Keluarga I)

Penaruh

Mungkin pernah sioge entah pe sibegi pernyataan “distorsi dalam komunikasi.” Rikutken informasi arah AI nari, “Distorsi komunikasi adalah perubahan atau penyimpangan makna pesan yang terjadi selama proses komunikasi, yang mengakibatkan pesan yang diterima oleh penerima berbeda dengan pesan yang dimaksudkan oleh pengirim. Perubahan ini dapat terjadi karena berbagai faktor, seperti kesalahan bahasa, persepsi berbeda, atau gangguan dalam saluran komunikasi.” I bas bahasa sehari-hari, distorsi i bas komunikasi, mungkin seri ras “salah paham” entah pe “gagal paham.” Kesalahpahamen enggo pasti erbahanca komunikasi terganggu, si kedungenna banci encedai relasi si enggo mehuli.

I bas PJJ sendah, radu ras kita erlajar kerna komunikasi si mehuli i bas keluarga erpalasken bahan ogenta sendah.

Mpebagesi Ogen

Kitab Jakup itulisken Jakup, entah pe Yakobus. Melala si ngatakenca maka Jakup enda e me kade-kade Yesus, janah jadi pemimpin Gereja Mula-mula i Jerusalem. Kitab enda itulisken guna mereken motivasi, pergegeh, bage pe pedah-pedah man perpulungen-perpulungen kalak si tek si sangana ngenanami erbage-bage tantangen ras kiniseran erkiteken kinitekenna man Yesus Kristus. Kitab enda secara khusus itujuken man perpulungen kalak si tek si berlatar belakang Yahudi, emaka melala i bas kitab enda ajaren-ajaren moral Yahudi. I bas kitab enda, Jakup ngingetkenca kerna pentingna nggeluh erkiniteken bage pe perbahanen-perbahanen si mehuli erpalasken kiniteken man Yesus Kristus. E maka ayat si terkenal i bas kitab enda nari, “Adi kiniteken sue labo rikut ras perbahanen, kiniteken si bage mate kap.” Kitab endah pe encidahken pentingna mengendaliken dilah bage pe keadilen sosial.

I bas bindu pemena si jadi ogenta sendah, lit erbage-bage pedah. I bas ay. 2-8, Jakup ngajarkenca kerna pentingna kinigenggengen i bas ngalaken erbage-bage pencobaan entah pe ujian iman. Jakup ngingetkenca maka kinigenggengen (ketabahan) erbahanca kalak si tek serta ras dewasa. Jakup pe ngingetkenca gelah mindo kepentaren i bas Dibata nari. Kalak si monce-once la idatkenna kai pe i bas Dibata nari. I bas ay. 9-18, Jakup ngajarkenca kerna pentingna meteruk ukur janah ula sempat ikuasai kinibayaken doni enda. Kinibayaken doni enda kernep nge, tapi kalak si megenggeng ialokenna kegeluhen si rasa lalap. I bas ay 19-27, Jakup ngajarkenca kerna pentingna njagai dilah bage pe pentingna ngelakoken kerina si iajarken Kata Dibata, e me mpekena-kena anak melumang ras kalak si enggo mbalu si lit i bas kiniseran, janah njagai diri gelah ula icedaken doni enda.

Secara khusus si jadi fokus i bas PJJ-ta sendah e me ay. 19-25, si lit i teruh judup perikop “Megi dingen ndalankenca.” I bas terj. TB-LAI nina “Pendengar atau pelaku firman.” Lit dua hal si penting i jenda. Si pemena ay. 19-20, teridah konteks kegeluhen perpulungen paksa si e si masih denga ikuasai kinirawan. Kalak si ikuasai kinirawan la lit i bas ia perukuren si mehuli erpalasken Kata Dibata. Si lit i bas pusuh perukurenna e me egoisme, kiniganjangen ukur, emosi si sifatna merusak entah pe destruktif. E maka i bas ay. 21 Jakup mereken pedah gelah kebiasaan-kebiasaan si melket ras lagu langkah si jahat e ipedauh i bas pusuh perukuren perpulungen nari. Janah iajuk Jakup pe perpulungen gelah mindo kuasa i bas Dibata nari, gelah ipengasup Dibata perpulungen e meteruk ukur i bas ngaloken Kata Dibata. Sebab Kata Dibata ngenca si ngasup mabai ku si mehuli janah mereken keselamaten.

Si peduaken, ay. 22-25, teridah konteks perpulungen paksa si e, si hanya nggit megi-megi ngenca kerna Kata Dibata, tapi la nggit ngelakokenca. E maka Jakup ngajuk perpulungen gelah ngelakoken Kata Dibata i bas kegeluhenna si tep-tep wari, bagi umpamana mpekena-kena anak melumang ras kalak si enggo mbalu si lit i bas kiniseran, janah njagai diri gelah ula icedaken doni enda.

Versi Audio Silahkan Klik : https://youtu.be/7h8cad96WS8

Pengkenaina

Tema PJJ sendah e me “Kerina harus metinggel.” Tema enda ibuat i bas ay. 19 nari nina, “O senina-seninangku, ingetlah! Kerina harus metinggel, tapi ula minter ngerana, dingen ula sukah merawa.” I bas terj. BIMK nina, “Perhatikanlah ini baik-baik, Saudara-saudara yang tercinta! Setiap orang harus cepat untuk mendengar, tetapi lambat untuk berbicara dan lambat untuk marah.” Metinggel i jenda e me terjemahen “cepat untuk mendengar.” I bas Buku PJJ-ta, kata “metinggel” ertina: cermat, seksama, sungguh-sungguh mendengar, memperhatikan, mengindahkan. I bas si e, tersinget kami, lit kuan-kuan kalak Karo si ngatakenca “Siksik lebe maka tindes,” perban lit kesesuaian ras cermat bage pe seksama i bas menilai kai pe. Akap kami enda penting ras harus liti bas kita, gelah ula sempat terjadi penilaian si salah, salah paham entah pe gagal paham. Kata Dibata i bas kesempaten enda ngingetkenca man banta gelah ula minter ngerana, apai ka sukah merawa. I bas si e iajuk kita gelah ula terjeng megi-megi saja, tapi lit karakter cermat, seksama, kritis, i bas kita ngaloken informasi i bas kalak si deban nari. Memang labo murah, sebab ibutuhken kesabaren i bas kita ngelakokenca, e maka pindolah gegeh i bas Dibata nari, gelah ipengasupNa kita ngelakokenca.

Adi sikaitken ras komunikasi entah pe relasi si mehuli i tengah-tengah keluarga, tema i bas PJJ-ta sendah akap kami tetap relevan. Emaka marilah sievaluasi poal relasi entah pe pola komunikasi si sedekah enda enggo silakoken i tengah-tengah jabuta masing-masing. Adi sedekah enda lebih dominan egoisme pribadi, si menuntut kalak si deban megiken cakapta tapi la kita nggit megiken cakapna. Lebih dominan merawa-rawa. Lebih dominan menghakimi. Menyimpan dendam, sakit hati, rsd. Pola relasi ras komunikasi si bagenda rupana harus sirobah. Emaka marilah sipekena-kena raduken ras kerina isi jabu. Saling terbuka ras saling memaafkan. Kenca bage bahanlah pola relasi ras pola komunikasi si mehuli sue ras ogenta sendah. Memang la lit relasi entah pe komunikasi si sempurna, i bas sada paksa banci ka kita ndabuh ku bas kinirawan, egoisme, kitik ukur, dendam, rsd.-na. Tapi tek kita adi Kesah Si Badia si erkuasa i bas dirinta, hal-hal si la mehuli e ndai la banci bertahan i bas dirinta, erkiteken kuasa Kesah Si Badia mpengasup kita sedar i bas kesalahenta janah mis mulihken ku dalan si benar. Emaka marilah kita ertekad metinggel i bas berkomunikasi. Dibata si mpengasup kita.