Pdt. Larena Sinuhadji : SUPLEMEN KEBAKTIN PEKAN DOA GBKP 2025

SUPLEMEN RENUNGEN KEBAKTIN PEKAN DOA GBKP 2025

Pdt. Larena Sinuhadji (Nd. ReyRapha Tarigan)

Liturgi Kebaktin Pekan Doa GBKP 2025 silahkan klik : https://drive.google.com/file/d/17eBBapiQsz-uL3hINwEb-nt3TVTvkd5p/view?usp=sharing

WARI I - Minggu 1 Juni 2025

ERTOTO KERNA PERSADAN (Pilemon 1:4-7)

Penaruh

Ngataken bujur kita man Dibata erkiteken iatankenNa denga kita guna ngikuti Kebaktin Pekan Doa GBKP i bas tahun 2025 enda. La tergejap enggo bengket kita ku pertengahen tahun enda. Si e kerina erkiteken perkuah ate Dibata man banta, emaka katakenlah bujur man baNa.

Akap kami lit dua tujun si ateta sicapai i bas Kebaktin Pekan Doa tahun enda. Si pemena lebe e me kiniersadan sapih-sapih kita. Kiniersadan si lit i tengah-tengah perpulungen kalak si tek palasna e me Yesus Kristus, sebab IA nge si mpersadaken kita ras Dibata. Arah telu wari pra-Kebaktin Pekan Doa tahun enda iarapken gelah kiniersadan e leben enggo sigejapken i bas jabuta masing-masing. Adi enggo sigejapken i bas jabuta masing-masing, iarapken gelah siterusken ku persadanta i bas perpulungen kalak si tek i Gerejanta. Adi enggo paguh kiniersadanta selaku kalak si enggo ngaloken keselamaten i bas Yesus Kristus, iarapken gelah geluhta pe jadi pasu-pasu man sekelewetta, janah gelar Dibata semakin termulia arah kehadirenta i japa pe kita ringan.

Si peduaken, kiniersadan e harus jadi topik penting i bas pertotonta. Engkai maka bage? Sebab ulu kiniersadan e me Dibata i bas Yesus Kristus, janah selaku manusia labo ngasup kita erbahan kiniersadan si paguh i bas Kritus. Harus lit peran Kesah Si Badia i bas perpulungen. Kesah Si Badia si mpengasup kita nggeluh sikeleng-kelengen, sisampat-sampaten, saling menghargai, saling menerima perbedaan, rsd.-na.

Mpebagesi Bahan Renungen

Pilemon sekali ngenca isebutken gelarna i bas Padan Si Mbaru, e me i bas surat Paulus man Pilemon. Pilemon ertina “penuh kasih,” ia sekalak si banci ikataken berpengaruh i tengah-tengah perpulungen kalak si tek i Kolose, sebab i bas rumahna ibahan kerina kegiaten-kegiaten perpulungen. Selain berpengaruh, Pilemon pe banci ikataken sekalak si bayak secara materi, emaka enterem si erdahinna, salah sadana si tergelar Onesimus (Erguna). Inti i bas surat si sada pasal ngenca enda e me, pengajuk Rasul Paulus man Pilemon gelah nggit memaafken kesalahen Onesimus si erdahinna, janah nggit Pilemon ngaloken Onesimus erkiteken lit jaminen arah Paulus nari maka si Onesimus enda enggo ngakuken dosa-dosana ras bertobat.

Rasul Paulus ngatakenca maka Pilemon enda “teman sada dahin” (ay. 1). I bas terj. Alkitab TB - LAI Ed. 2, “teman sekerja” entah pe i bas BIMK nina “kawan dan rekan kami.” Ertina lit hubungen si mehuli antara Paulus ras Pilemon. Ituriken Paulus maka Pilemon enda sekalak si dem alu kekelengen nandangi perpulungen kalak si tek (ay. 5). Sebage teman sada dahin, enggo icidahken Pilemon jiwa persaudaraan si tulus amin pe la sada suku (ay. 6). Janah pengkebet geluhna erbahanca meriah ukur perpulungen (ay. 7). Erkiteken buah-buah kiniteken si icidahken Pilemon e erbahanca Paulus terkesan, seh makana iinget Paulus rusur Pilemon i bas pertotonna. Ngataken bujur Paulus man Dibata i bas pertotonna erkiteken kiniulin si enggo ilakoken Pilemon (ay. 4).

Pengkenaina

Si jadi fokus i bas renungenta sendah e me ay. 6. I bas ayat enda erlajar kita maka si pemena, persadan kalak si erkiniteken palasna e me persadan ras Kristus. Adi enggo tuhu-tuhu mehuli kiniersadanta ras Kristus, enggo pasti kiniersadanta i bas perpulungen kalak si tek pe mehuli. Sekali nari ikataken kami, hal si krusial i bas kiniersadan kalak si tek e me relasinta si mehuli ras Kristus. Emaka penungkunen evaluatif man banta, uga relasinta ras Dibata i bas Yesus Kristus? Arah ngoge Pustaka, ngendeken ende-enden pujin, erlajar nggeluh erkiniteken alu mengaplikasiken kerina Kata Dibata si enggo sioge ras sibegi, rikut arah pertotonta si konsisten ras intensif, mabai kita reh ndeherna ras Dibata.

Si peduaken, kiniersadan i bas perpulungen harus sitotoken gelah kiniersadan e tuhu-tuhu maba kiniulin, saling membangun sada ras si debanna, labo terjeng bage-bage saja bagi persadan-persadan si deban. Kiniersadan i bas kalak si tek mabai perobahen ku si mehuli, sebab siajar-ajaren sada ras si debanna i teruh kepentaren ras pemeteh i bas Dibata nari. Tema si seh man banta i bas Kebaktin Pekan Doa wari si pemena e me “Ertoto kerna persadan.” Enda si jadi tema umum i bas Kebaktin Pekan Doa tahun enda. Si jadi penungkunen evaluatif man banta, enggo kin sitotoken kiniersadanta i tengah-tengah perpulungenta? Adi enggo puji Tuhan! Mbera kiniersadanta e tuhu-tuhu mabai kita ku si mehuli sue ras peraten Dibata. Kiniersadan si terjalin tuhu-tuhu mabai kita ku kedewasaan i bas erkiniteken. Adi lenga, banlah tekad, gundari nari sibaba ku bas topik doanta kerna kiniersadan perpulungen kalak si tek, baik i tengah-tengah runggunta bage pe i bas cakupen si lebih luas, kiniersadan kalak si tek i tengah-tengah negaranta ras doni enda, gelah gelar Dibata i bas Yesus Kristus semakin termulia i tengah-tengah bangsa ras negaranta, bage pe i tengah-tengah doni enda.

WARI II - Senin 2 Juni 2025

ERSADA GUNA KEMENANGEN (Keluaren 17:8-16)

Penaruh

Kitab Kuan-kuanen 4:12 ngatakenca, “Dua kalak erdalan banci ia ras-ras ngelawan adi lit si nerang ia, tapi adi sekalak ngenca menukah nalukenca. Tinali si ipiuh telu mesera ngeretapkenca.” Enda akap kami maksudna tangkas, kiniersadan mpengasup kita ngalaken erbage-bage tantangen, termasuk datken kemenangen i bas perbeben si ialami kita. I bas renungenta sendah, radu ras kita isingetken maka kiniersadan banci mabai kita ku kemenangen.

Mpebagesi Ogen

Bahan renungenta sendah lit i teruh judul perikop “Perang ras bangsa Amalek” i bas Alkitab TB-LAI nina, “Kemenangan orang Israel melawan orang Amalek.” I bas terj. TB-LAI enggo ipebetehken kemenangen bangsa Israel naluken bangsa Amalek. Turi-turin enda akap kami enggo rusur sibegiken entah pe sioge. Ituriken maka isuruh Musa Josua minpin piga-piga kalak dilaki guna erperang ngelawan bangsa Amalek. Ilakoken Josua bagi si iperentahken Musa man bana. Tapi labo terjeng Josua ras tenterana ngenca si berjuang naluken bangsa Amalek. Musa, Harun, ras Hur pe ikut erperang tapi alu cara si deban. Datas uruk nari, adi iangkat Musa tanna ku datas, menang bangsa Israel. Tapi adi ipesusurna Musa tanna erkiteken latih, talu me bangsa Israel. Emaka isampati Harun ras Hur, uga carana gelah iangkat Musa tanna terus seh ngadi-ngadi ben. Ibahan Harun ras Hur ingan kundul Musa, janah tedis ia duana sebelah kawes ras kemuhen guna ngangkat tan Musa. Alu bage keri kel italuken Josua bangsa Amalek.

Pengkenaina

Kai pelajaren kiniteken si banci sipelajari arah turi-turin Josua ndai? Si pemena lebe, kai si ilakoken Musa akap kami simbol kinitekenta man Dibata. Tan si ipesusur e me tandana la kita erpengendes man Dibata i bas kai pe si ialami kita. Sebalikna, tan si iangkat e me simbol pengendesenta si tuhu-tuhu man Dibata. I bas kita erpengendes man Dibata, e pe kepeken lit peran teman-temanta si deban. Antusenna, adi sitatang-tatangen kita ertoto erpengendes man Dibata, megegeh kita ngalaken perbeben si mberat sekali pe. Penungkunen evaluatif man banta, enggo nge kita sitatang-tatangen i bas pertotonta? Siinget ras sitotoken teman-temanta sada perpulungen si sangana lit i bas perbeben, entah lang? Adi enggo, puji Tuhan! Adi lenga, marilah sibenaken i bas jabuta masing-masing, saling menopang di dalam doa, guna keluarganta, guna teman-teman sada perpulungen, guna jiranta, bage pe guna negara ras bangsata.

Si peduaken, lit kiniersadan ras kerja sama si mehuli antara Josua, Musa, Harun, Hur, ras bangsa Israel. Adi la lit kiniersadan enggo pasti ise pe la ngasup naluken bangsa Amalek. Bicara ngasup pe tentu peluangna kitik. Ertina, kiniersadan bage pe kerja sama si mehuli erbahanca kita ngasup ngalaken erbage-bage tantangen i bas kegeluhenta. Dibata pe tentu senang adi iidahNa kalak si tek ersada, ngasup guna saling bekerja sama, sisampat-sampaten, sitatang-tatangen sada ras si debanna. I bas si e kemenangen pe banci ibereken Dibata ku tengah-tengah kiniersadan kalak si tek man baNa. Penungkunen evaluatif man banta, enggo nge terjalin kiniersadan ras kerja sama si mehuli i bas Runggunta masing-masing? Adi enggo, puji Tuhan! Adi lenga, marilah sitotoken ras siperjuangken gelah tuhu-tuhu terjalin kiniersadan bage pe kerja sama si mehuli i tengah-tengah perpulungenta.

WARI III - Selasa 3 Juni 2025

TUTUS RAS-RAS ERTOTO (Perb. Rasul 1:12-14)

Penaruh

I bas kiniteken kalak Kristen, ertoto labo terjeng bersifat personal, tapi pe bersifat komunal. Emaka Pertoton Tuhan si iajarken Yesus bersifat komunal, rusur radu ras sibelasken i bas kebaktin-kebaktin. Pertoton si sifatna komunal i bas Gerejanta labo terjeng silakoken i bas kebaktin-kebaktin, PJJ, ras PA-PA Kategorial saja, enggo lit sibentuk tim-tim doa si khusus ras-ras ertoto guna kiniulin pelayanen i bas Runggun masing-masing. I bas kesempaten enda radu ras mulihi kita erlajar kerna ertoto si ilakoken ras-ras alu tutus rikutken ogenta sendah.

Mpebagesi Ogen

Sope nangkin ku surga, enggo iperentahken Tuhan Yesus Rasul-rasul gelah ola lebe nadingken kota Jerusalem, tapi nimai lebe pemere si enggo ipadanken Bapa, e me Kesah Si Badia. Kesah Si Badia si jadi gegeh man Rasul-rasul guna naksiken kerna Tuhan Yesus man kalak si deban mulai kin i Jerusalem, Judea, Samaria seh ku belang-belang doni enda (bdk. Perb. Rasul 1:4, 8). Ras ajar-ajar Tuhan Yesus taat kerna perentah enda. Padahal situhuna, situasi si ihadapi Rasul-rasul i kota Jerusalem sendiri labo aman, sebab i bas kota e enterem denga kalak si la senang nandangi Yesus ras pengikutNa. Ras kenca Yesus keke i bas si mate nari pe semakin mendalam kebencian kalak enda, maka melala berita palsu si ngatakenca ajar-ajar Yesus sendiri nge si nangko mayat Yesus. Amin bage gia, Rasul-rasul tetap encidahken ketaatan alu mulihken ku Jerusalem bagi si enggo iperentahken Tuhan Yesus ras alu saber nimai nusurna Kesah Si Badia bagi si nipadanken Tuhan Yesus.

Rikutken teks, kenca enggo Rasul-rasul e naksiken kenangkihen Tuhan Yesus ku surga i Uruk Zaitun nari, maka mulih kalak enda ku Jerusalem. Uruk e dauhna kira-kira sada setengah kilo meter i Jerusalem nari. Kenca seh i Jerusalem, minter lawes ia ku loteng rumah inganna numpang, e me Rasul-rasul Tuhan si sepuluh sada kalak. Tutus atena kerina ras-ras ertoto, ikut pe diberu, bage pe Maria nande Yesus ras senina-senina Yesus (bhs. Ind., “Mereka semua bertekun dengan sehati dalam doa bersama-sama”). Ras enda ilakoken kalak enda sepuluh wari dekahna sope nusurna Kesah Si Badia (wari pe-limapuluh-ken). Ertina, i bas perbeben si ialami Rasul-rasul ras pengikut Yesus turah me persadan ras ketedehen ate guna bersekutu. Ketutusen ertoto jadi sada ekspresi iman rasul-rasul ras kerina kalak si tek paksa si e, maka tuhu-tuhu kalak enda ernalem man Tuhan. Kesehatian ajar-ajar Tuhan Yesus ras diberu-diberu si mulai kin Galilea nari enggo setia ikut Yesus i bas penangkih pertoton jadi sada pergegeh maka ajar-ajar Tuhan Yesus e la berjuang sendiri i bas nerusi pelayanen i tengah-tengah doni tapi tetap penalemenna Yesus. Bahkan janji Tuhan Yesus sope IA nangkih ku surga, tetap IA ras pengikut-pengikutNa seh ku kedungen jaman.

Pengkenaina

I bas renungen Kebaktin Pekan Doa wari si pe-3-ken enda, radu ras kita mulihi isingetken maka jemaat mula-mula adalah jemaat yang bertekun dengan sehati dalam doa bersama-sama. Semangat enda tentu harus tetap sipelihara i bas Gerejanta jaman gundari enda. Ula sempat kita terbaba arus egoisme, si hanya mementingken diri sendiri, la mediate nandangi kalak si deban. Kerina pertoton si ibahan kita secara bersama-sama dengan bertekun dan sehati, banci mpepaguhi kinitekenta secara pribadi, membangun kepedulian guna mpeteguhi kiniersadanta, janah banci memotivasi, mpegegehi, menyemangati sada ras si debanna i bas ngalaken erbage-bage perbeben.

WARI IV - Rabu 4 Juni 2025

JADI I BAS PAKSA-NA (Pengerana 3:1-8)

Penaruh

I bas Pustaka Si Badianta, umumna lit dua kata bhs. Yunani nari si ertina “waktu,” e me “kronos” ras “kairos.” Kai bedana “kairos” ras “kronos?” Rikutken penjelasen AI nari, “Perbedaan antara Kairos dan Kronos adalah perbedaan antara waktu kualitatif dan kuantitatif. Kronos mengacu pada waktu yang terukur secara kuantitatif, seperti jam, hari, minggu, bulan, dan tahun. Sementara itu, Kairos merujuk pada waktu kualitatif, momen yang tepat, kesempatan, atau waktu yang tepat untuk melakukan sesuatu.” Emaka banci ikataken adi “kairos” e labo rusur terjadi, bahkan la banci siulihi, sebab kesempaten e hanya terjadi sekali i bas kegeluhenta. I bas keyakinen kalak Kristen, kerina lit waktuna entah pe lit paksana, janah tek kita maka Dibata enggo ngaturkenca waktu si terbaik man banta. I bas kesempaten enda radu ras kita mulihi erlajar kerna waktu Tuhan pasti yang terbaik.

Mpebagesi Ogen

Kitab Pengerana entah pe Pengkhotbah, termasuk ku bas kumpulen kitab-kitab hikmat ras puisi. Rusur ikaitken ras Raja Salomo. Kitab endah itulis i bas konteks historis Kerajan Israel abad pe-10-ken SM. Raja Salomo e me sekalak raja si labo terjeng bayak saja, tapi tuhu-tuhu idaramina kepentaren ras pemeteh i bas Dibata nari.

Kitab Pengerana bindu 3, ngajarkenca man si ngogesa maka lit paksa-paksana i bas kegeluhen manusia. Penulis kitab enda, entah pe Salomo, erkiniteken maka Dibata si netapken ras ngaturken kerina paksa i bas paksa-paksa e. Lit paksana tubuh, lit paksana mate. Lit paksana ngambur benih, lit paksana ngeruahi. Lit paksana munuh, lit paksana mpepalem. Lit paksana ngerontasi, lit paksana majekken. Lit paksana erceda ate, lit paksana meriah. Lit paksana ndele ate, lit paksana landek meriah. Lit paksana mibit, lit paksana la banci mibit. Lit paksana ngema, lit paksana la banci ngema. Lit paksana kebenen, lit paksana ndatkenca. Lit paksana pepulung, lit paksana ngamburken. Lit paksana ngerigatken, lit paksana njemuri. Lit paksana sinik, lit paksana ngerana. Lit paksana encidahken keleng ate, lit paksana encidahken nembeh ate. Lit paksana perang, lit paksana dame.

I bas kerina paksa enda banci siidah maka, si pemena, la lit sada paksa pe di luar kendali Dibata. Tek Salomo maka la lit kuasa kai pe si ganjangen asangken kuasa Dibata. Si peduaken, la lit paksa si la kuh, kerina lit pasangenna si erbahanca lit keseimbangen. Adi lit ceda ate, labo seterusna ceda ate, enggo pasti lit paksana ermeriah ukur. Si peteluken, iteh Dibata si terbaik man manusia si ikelengiNa, amin pe rusur la iangkai manusia rencana Dibata si mehuli i bas kegeluhenna. Emaka i bas ay. 11 ikataken, “IA nge si mereken kai pe i bas paksa si payo. IA nge si mereken man banta kerincuhen lako meteh warinta si pepagi, tapi la pernah iberekenNa man banta kepuasen lako ngertiken perbahanenNa.” I bas terj. TB-LAI nina, “IA membuat segala sesuatu indah pada waktunya, bahkan IA memberikan kekekalan dalam hati mereka. Tetapi manusia tidak dapat menyelami pekerjaan yang dilakukan Allah dari awal sampai akhir.” I bas la iangkai manusia rencana Dibata ndai, enda situhuna si erbahanca manusia erkiniteken, erpengendes man Dibata, i bas kai pe si irencanakenna.

Pengkenaina

Tema i bas Kebaktin Pekan Doa wari si pe-4-ken enda mulihi ngingetken kita maka Dibata enggo netapkenca paksa-paksa i bas kegeluhenta masing-masing. La lit paksa-paksa si seri i bas kegeluhenta. Kerinana iaturken Dibata sue ras kengasupenta guna ngalokenca. Alu cataten, adi umpamana mesera kita, kiniseran e labo kita si erbahanca. Umpamana iukum kita erkiteken ndayaken narkoba. Igudami kalak kita erkiteken nangko. Sakit kita erkiteken la sijaga kesehaten, rsd.-na. Tapi justru kiniseran e ialami kita erkiteken si mehuli si ilakoken kita sue ras peraten Dibata. I bas si e harus lit i bas dirinta perukuren si positif, ndauh i bas prasangka buruk nari, si erbahanca kita jungut-jungut man Dibata, bahkan nyalahken Dibata.

Umumna kita teraloken kita paksa si mehuli, labo lit masalah, amin rusur ka kita lupa ngataken bujur man Dibata. Si rusur la teraloken kita, adi reh paksa kiniseran nderpa kegeluhenta. Melala kalak si la ngasup ngalaken kiniseran entah pe perbeben si mberat. Lenga pe dung paksa kiniseran ndai enggo sitadingken Dibata. Padahal situhuna kentisik ngenca kiniseran e, tapi erkiteken la kita sabar, enggo mis sitadingken Dibata, sidarami kuasa-kuasa si deban gelah pedas kita pulah i bas kiniseran nari. Tema i bas Kebaktin Pekan Doa wari si pe-4-ken enda ngajuk kita gelah reh sabarna i bas paksa kesusahen. Bage pe sebalikna, la lupa kita ngataken bujur man Dibata adi lit kita i bas paksa senang. Tek kita maka sura-sura Dibata nandangi kita e me gelah kita senang (Jer. 29:11). Bicara lit pe kita i bas perbeben si mberat, labo ipelepas Dibata kita icubai lebih asa gegehta, ibereken Dibata gegeh bage pe dalan pulah (1 Kor. 10:13). Bahkan Jakup ngatakenca, sangap min siakap adi reh erbage-bage percuban ngkenai kita. Sebab sieteh adi kinitekenta tetap tahan ngalaken percuban-percuban e, jadi kalak si dewasa kita i bas kai-kai pe.

Emaka i bas si kugana pe, tetaplah berpikir positif, ras ngataken bujur man Dibata. Mari simanfaatken waktu si lit guna erbahan si mehuli sue ras peraten Dibata. Kehadirenta jadi pasu-pasu i japa pe kita ringan, i tengah-tengah jabunta masing-masing, i tengah-tengah pendahinta, i tengah-tengah masyarakat, bage pe i tengah-tengah Gerejanta. Mari radu ras sitotoken gelah ipengasup Dibata kita makeken waktu si lit guna kemulian gelar Dibata.

WARI V - Kamis 5 Juni 2025

METERUK UKUR DINGEN NGASUP ENGKUASAI DIRI

(Galati 5:16-26)

Penaruh

Lit sekalak si ngatakenca i bas wawancara Medsos nina, “Kalau di Medan itu rata-rata orangnya bersumbu pendek. Tapi kalau di Makassar itu rata-rata orangnya tidak ada sumbunya.” Ertina, lit siakap jelma si enggo mekelek, la ia ngasup engkuasai dirina, murah emosi, murah merawa untuk hal-hal si sifatna kitik. Tapi kepeken lit ka si terparahen asangken si mekelek ndai, enggo lanai merawa-rawa, adi la senang akapna, enggo mis pakena sajam guna melukai entah pe munuh. I bas kesempaten enda radu ras mulihi kita erlajar kerna meteruk ukur dingen ngasup engkuasai diri erpalasken si man ogenta sendah.

Mpebagesi Ogen

Ogenta sendah e me sada bagin i bas surat Rasul Paulus man perpulungen kalak si tek i kota Galati. Sada kota si terletak i bagin tengah Asia Kitik entah pe wilayah Turki i bas jaman gundari. I bas perdalanenna er-Berita Si Meriah, Rasul Paulus enggo pernah singgah i kota Galati (Perb. Rasul 16:6; 18:23). Secara umum surat enda ertujun gelah, si pemena, Perp. Galati tek maka Paulus e me tuhu-tuhu Rasul Kristus. Si peduaken, Rasul Paulus negaskenca maka berita kerna Yesus Kristus si enggo pernah iberitakenna e me berita si benar ras si utamana. Hal enda penting itegasken sebab paksa si e melala guru-guru palsu si meritakenca maka si utamana kel i bas kiniteken man Yesus Kristus e me ndalanken Hukum Taurat. Si peteluken, pedah-pedah si sifatna etis kristiani, uga seharusna kegeluhen kalak si enggo ngaloken keselamaten i bas Yesus Kristus nari.

Adi sioge bindu 5, lit dua perikop, ay. 1-15 ibere judul “Jagalah kebebasenndu,” ras ay. 16-26 ibere judul “Kesah Si Badia ras manusia.” I jenda Rasul Paulus nehken pedah-pedah si sifatna etis kristiani man dua kelompok perpulungen. Si pemena man kelompok kalak Yahudi si enggo tek man Yesus Kristus. Ras si peduaken man kelompok i bas bangsa-bangsa si deban nari: kalak Galati (suku Gaul, entah pe suku Keltik), kalak Yunani ras kalak si deban si labo kalak Yahudi. Latar belakang kalak Yahudi terikat ku bas aturen-aturen Taurat, emaka murah ipengaruhi guru-guru palsu si ngatakenca harus ngelakoken aturen-aturen Taurat. Sementara kalak si labo kalak Yahudi enggo biasa ersembah man Kaisar entah pe man dewa-dewa si lit paksa si e, emaka murah ipengaruhi ajaren-ajaren okultisme.

I bas perikop si jadi ogenta sendah, iajuk Rasul Paulus perpulungen gelah Kesah Si Badia si negu-negu kegeluhenna. Alu bage, enggo lanai perukuren entah pe sura-sura manusia si dominan ngerajai i bas diri kalak si tek. Ijelasken Paulus kerna ciri-ciri kalak si lenga nggeluh i bas kegeluhen si mbaru i bas Kristus, e me: erlua-lua, si nggesuh, la meteh mela, nembah man berhala, erbahan ilmu sihir, simusuhen, rubati, mecimberu, perampus, kepentingenna ngenca si iukurina, erbahan perpecahen, erpihak-pihak, sicianen, mabuk, sitokohen, meganjang ukur, rsd. Sebalikna, kalak si enggo ngaloken keselamaten i bas Yesus Kristus nari, geluhna tuhu-tuhu ikuasai ras itegu-tegu Kesah Si Badia. Ciri-cirina e me: lit kekelengen, lit keriahen, lit kemalemen ate, lit kesabaren, perbahanenna mehuli, mehuli ia, setia, meteruk ukurna, dingen ngasup engkuasai dirina.

Emaka i bas ay. 24 - 25 mulihi isingetken Paulus maka, si pemena, kalak si enggo jadi sikerajangen Kristus, perukurenna secara manusia rikut ras kerincuhen dagingna bage pe sura-surana, enggo inon-aktif-ken, enggo imateken, janah enggo la nari lit kuasana. Si peduaken, erkiteken Kesah Si Badia si enggo mereken kegeluhen si mbaru man kalak si tek, maka lagu langkahna pe harus ngikutken peraten Kesah.

Pengkenaina

Tema si seh man banta i bas kesempaten enda, mulihi ngingetken kita kerna “Ulih Kesah Si Badia” entah pe “Buah Roh.” Ulih Kesah Si Badia enda penting guna terus siinget ras silakoken sebab nina Paulus, “Tidak ada hukum agama yang melarang hal-hal seperti itu.” Bahkan rusur i bas pelatihen-pelatihen, entah pe training, si ilakoken lembaga-lembaga non-Kristen, ulih Kesah Si Badia enda rusur ijadiken pedoman. Si jadi fokus i bas ulih Kesah enda rikutken tema sendah e me meteruk ukur ras ngasup engkuasai diri. I bas terj. Bhs. Ind., nina, “rendah hati (kelemahlembutan), dan selalu sanggup menguasai diri.” Menarik i jenda sebab, “kelemahlembutan” iterjemahken rendah hati entah pe meteruk ukur. Rikutken informasi i bas AI nari, “Lemah lembut artinya baik hati, ramah, dan tidak mudah marah.” Enda akap kami banci nambahi pemetehta kerna meteruk ukur.

Penungkunen evaluatif man banta, apakah sedekah enda buen kita meteruk ukur bage pe ngasup engkuasai diri, asangken meganjang ukur, la ngasup engkuasai diri seh makana murah terbaba ku hal-hal si la mehuli? Karakter rendah hati entah pe kelemahlembutan secara konkrit umpamana, la murah mbenceng, mehuli i bas perukuren, selalu berpikir positif, ramah, la sombong, entah pe meganjang rukur, ngergaken kalak si deban, rsd. Ngasup engkuasai diri secara konkrit umpamana, encukupken diri, nggeluh hemat tapi labo pelit, la murah tergoda hal-hal si la mehuli, la murah merawa, la murah tersinggung, rsd.-na. Iarapken tentuna buen kita meteruk ukur ras ngasup kita engkuasai diri sue ras peraten Dibata. Adi siandalken gegeh beluhta tentu labo kita ngasup nimbak peraten daging. Emaka i bas Kebaktin Pekan Doa wari pe-5-ken enda mari radu ras kita ertekad guna mpebue meteruk ukur, bage pe engkuasai diri. Pindolah rusur i bas pertotonta, gegeh kebeluhen i bas Dibata nari gelah ipengasupNa kita nggeluh alu meteruk ukur, dingen ngasup engkuasai diri.

WARI VI - Jumat 6 Juni 2025

PERTOTON GUNA KERINA MANUSIA (1 Timotius 2:1-7)

Penaruh

Rikutken informasi i bas AI nari, pertoton syafaat ertina, “Doa yang dilakukan untuk mendoakan orang lain atau kebutuhan yang lebih luas, bukan hanya kebutuhan pribadi. Secara sederhana, doa syafaat berarti: mendoakan orang lain.” Alu ilakokenna pertoton syafaat i bas kebaktin-kebaktin Gerejanta, ertina GBKP enggo mediate nandangi kalak si deban si mungkin la sitandai. Semakin mehuli akap kami adi pertoton syafaat e ilakoken i bas masing-masing jabu setiap wari, tentu dampakna pe luar biasa. I bas kesempaten enda mulihi kita isingetken kerna mediate nandangi kalak si deban si secara konkrit silakoken arah notoken kerina manusia.

Mpebagesi Ogen

I bas ogenta sendah tangkas maka iajarken Paulus Timotius anak rohanina, kerna pertoton i bas perpulungen. Nina Paulus, “Perlebe kukataken gelah isehkenndu sapaat, pemindon, pertoton ras pengataken bujur man Dibata guna kerina manusia.” I bas terj. BIMK nina, “Pertama-tama, saya minta dengan sangat supaya permohonan, sembahyang, dan doa syafaat serta ucapan terima kasih disampaikan untuk semua orang.” Ise saja kerina manusia si imaksudken Paulus? I bas ay. 2 ikataken, “Guna raja-raja ras kerina si erkuasa, gelah banci kita nggeluh senang dingen dame, erkemalangen man Dibata alu lagu langkah si payo.” I bas terj. BIMK nina, “Untuk raja-raja dan untuk semua orang yang memegang kekuasaan. Mintalah supaya kita dapat hidup tenang dan tentram untuk Allah dengan kelakuan yang patut.”

Tangkas je ikataken Paulus maka si nimaksudken kerina manusia e me raja-raja ras kerina si erkuasa, entah pe banci ikataken pemerentah si sangana memegang kendali kekuasaan i tengah-tengah masyarakat. Tujunna, adi pemerentah sikap, maka rakyatna pe nggeluh senang dingen dame, erkemalangen man Dibata alu lagu langkah si payo. Tapi adi sioge ay. 4 ras seterusna, kerina manusia e labo terjeng pemerintah ngenca, tapi kerina suku bangsa si lenga nandai Yesus Kristus. Tujunna jelas gelah kerina manusia ngaloken keselamaten i bas Yesus Kristus. Guna tujun enda nge Paulus er-Berita Si Meriah man bangsa-bangsa si deban si labo Yahudi. Arah pengajaren Paulus enda, tangkas maka pertoton syafaat e tujunna memang guna notoken kalak si deban, khususna kalak si la sitandai, bage pe lenga itehna berita keselamaten i bas Yesus Kristus.

Pengkenaina

Pekan Doa wari si pe-6-ken enda mulihi mpersingeti kita maka pertoton syafaat e harus tetap silakoken janah topik doa kerna kerina manusia, termasuk je bangsa, negara, pemerentah Indonesia, harus lit. Secara khusus kerna notoken pemerentah e enggo masuk ku bas Konfesi GBKP. Pokok-pokok Pengakuan Iman (Konfesi) GBKP i bas Bab VII ngerana kerna pemerentah ngatakenca: “Kami percaya bahwa : Pemerintah adalah hamba Allah untuk menyejahterakan bangsa dan negara (Roma 13:4-5). Dalam pemahaman itu, orang Kristen bermitra, mendoakan dan taat pada pemerintah (Yer. 29:7, Mat. 22:21; 1 Tim. 2:1-2). Di samping itu, orang Kristen harus berdialog dan menyuarakan suara kenabian terhadap pemerintah dalam melaksanakan kewajibannya untuk menegakkan kebenaran dan keadilan (Maz. 72:1-4).” Emaka marilah tetap sitotoken pemerentah bage pe kerina kalak si la sitandai sekali pe gelah datken keselamaten i bas Yesus Kristus.

WARI VII - Sabtu 7 Juni 2025

TUTUS NDAHIKEN DAHIN SI MEHULI (Titus 3:1-8)

Penaruh

Tutus i bas Kamus Bahasa Karo Indonesia ertina: sungguh-sungguh, dengan sepenuh hati, tulus, tidak main-main atau setengah hati. I bas erti enda tangkas maka tutus e labo terjeng i bas cakap ngenca, tapi nyata i bas perbahanen, alu palas si mehuli, e me ketulusan. I bas kesempaten enda radu ras kita mulihi erlajar kerna ketutusen i bas ndahiken dahin-dahin si mehuli sue ras peraten Dibata erpalasken ogenta sendah.

Mpebagesi Ogen

Titus e me sekalak Yunani anak rohani Rasul Paulus (Titus 1:4). Titus rusur iutus Paulus guna er-Berita Si Meriah, janah peranna i bas perkembangen Perp. Korinti banci ikataken mbelin (bdk. 2 Kor. 2:13; Gal. 2:1-3). Surat Titus enda Rasul Paulus si nuliskenca alu tujun memotivasi gelah reh semangatna Titus pembarken Berita Si Meriah, janah tetap setia ngajari ras membimbing perpulungen gelah nggeluh sue ras peraten Dibata. I bas bindu 1:5 ituriken maka Titus melayani perpulungen kalak si tek i Pulau Kreta. Perp. Kreta banci ikataken perpulungen si lenga tuhu-tuhu dewasa i bas erkiniteken. Enda banci sioge i bas ay. 12 ras 13 bindu 1. Tapi amin bage gia, Titus tetap setia melayani.

Ogenta sendah lit i teruh judul “Lagu langkah kalak Kristen.” I bas terj. TB-LAI nina, “Pesan-pesan penutup.” Arah dua judul enda nari teridah maka terj. Bhs. Karo ras BIMK lebih spesifik mengacu ku tingkah laku kalak Kristen si seharuna jadi usihen si mehuli. Si jadi fokus sue ras tema i bas Kebaktin Pekan Doa-nta sendah e me ay. 8b nina, “Kalak si enggo tek man Dibata tutus ndahiken dahin si mehuli, si metunggung dingen erguna man manusia.” I bas terj. BIMK nina, “supaya orang-orang yang percaya kepada Allah sungguh-sungguh berusaha untuk melakukan pekerjaan-pekerjaan yang baik dan berguna untuk semua orang.” Si jadi palas i bas kalak si tek ndahiken dahin si mehuli, si metunggung dingen erguna ijelasken Paulus i bas ay. 3-7, si intina, kalak si tek e me kalak si enggo ngaloken keselamaten i bas Yesus Kristus. Kalak si enggo ngaloken keselamaten i bas Yesus Kristus labo terjeng ngaloken kegeluhen si tuhu-tuhu si la erkeri-kerin i surga, tapi geluhna i doni pe enggo ipelimbarui Kesah Si Badia.

Tandana maka geluhna enggo ipelimbarui Kesah Si Badia, kalak si tek harus tutus ndahiken dahin si mehuli, si metunggung dingen erguna man sekelewetna. Kata “tutus” i bas ay. 8, i bas Alkitab terj. TB-LAI ras BIMK nina “sungguh-sungguh berusaha.” Ertina harus lit upaya si serius i bas ndahiken dahin si sue ras peraten Dibata. Engkai maka bage? Erkiteken melala tantangen i bas ndahiken dahin-dahin si sue ras peraten Dibata. Si pemena lebe tantangen arah bas nari e me kerincuhen kula ras erbage-bage sura-sura si la mehuli (ay. 3). Kalak si enggo ipelimbarui Kesah Si Badia labo berarti bebas i bas godaan nari. Godaan si mbelinna rehna i bas kerincuhen kula nari.

Si peduaken tantangen arah ndarat nari, e me pergaulen si la membangun kiniteken (ay. 9-11). I bas ay. 11 alu tegas Paulus ngatakenca “sirangi ia!” Kai si ikataken Paulus enda seri ras si ikatakenna i bas 1 Kor. 15:33, “Ula kal kam papak! Pergaulen si la mehuli, encedaken biak si mehuli.” Memang kalak si tek iutus guna er-Berita Si Meriah ku tengah doni enda, tapi i bas dampar si deban, kalak si tek pe harus beluh njagai dirina gelah ula terbaba arus pergaulen si la mehuli. Kesah Si Badia si mpengasup kalak si tek ngelawan kerincuhen kula ras pergaulen si la mehuli.

Pengkenaina

I bas Kebaktin Pekan Doa wari si terakhir enda iajuk kita kerina gelah tutus ndahiken dahin-dahin si mehuli sue ras peraten Dibata. I bas ketutusenta e harus lit upaya si serius i bas ndahikenca, sebab melala tantangen i bas dirinta nari bage pe i bas ndarat nari si ngambati ketutusenta ndai. Salah sada hambaten i bas ndarat nari si mbera akap kami e me “prokrastinasi.” Rikutken informasi i bas AI nari, “Prokrastinasi adalah kebiasaan menunda-nunda pekerjaan atau tugas yang seharusnya dilakukan, seringkali tanpa alasan yang jelas. Kebiasaan ini dapat menghambat produktivitas, meningkatkan stress, dan menyebabkan hasil pekerjaan yang tidak optimal.”

Kebiasaan menunda-nunda niat baik entah pe dahin-dahin si mehuli biasana ipake Iblis guna ngambati karya Dibata i tengah-tengah doni enda. Mungkin rusur melintas i bas benakta, “Tenang, masih banyak waktu.” “Ah nanti saja, masih ada kesempatan.” “Masih muda, jalan masing panjang.” “Orang lain pasti mengerti.” Rsd. Seh niat baik entah pe dahin-dahin si mehuli ndai piah dungna la sahun ilakoken. I bas gereja pe rusur terjadi, erkiteken lalap situnda-tunda, tertaren-taren, guna aktif ikut muat bagin i bas dahin-dahin pelayanen, piah dungna enggo lanai lit waktu ras kesempaten guna si e erkiteken sakit mekelek. Adi malem i bas pinakitta nari, puji Tuhan! Ibereken Tuhan denga kesempaten guna robah. Tapi adi mate kita, tentu enggo terlambat, enggo lanai lit kesempaten guna berobah ku si mehuli sue ras peraten Dibata.

Emaka i bas kesempaten enda mari radu ras sitanamken i bas pusuh perukurenta, “Waktu yang tepat untuk mewujudkan niat baik, dan menyelesaikan pekerjaan-pekerjaan yang berguna adalah saat ini!” Simanfaatkan waktu si lit guna tutus ndahiken dahin-dahin si mehuli sue ras peraten Dibata i japa pe kita ringan, i tengah-tengah keluarga, i tengah-tengah pendahinta, i tengah-tengah masyarakat, khususna i tengah-tengah Gerejanta. Dibata si mpengasup kita guna ngelakokenca.