Pdt. Larena Sinuhadji (Nd. ReyRapha Tarigan)
Teks Si Man Ogen : Perb. Rasul 2:43-47
Tema : INGAN JUMPA MEREKEN KERIAHEN
Tujun : Gelah Kerina Kategorial :
1) Ngasup nuriken cara geluh perpulungen mula-mula si erbanca kerina kalak rate ngena
2) Ngasup naksiken kuga pentingna ingan jumpa i bas kegeluhen si tep-tep wari
Metode : Sharing & Erbahan Aksi
Penaruh
Mungkin lit sada ingan si jadi ingan favoritta. Rusur jadi inget-ingetenta, janah ku je lalap ateta. Umpamana, Mall man pernanden. Meriah akap pernanden adi gawah-gawah ku Mall. Kede kopi man perbapan. Meriah akap perbapan adi enggo kundul-kundul bas kede kopi. Tentu melala alasen si erbahanca kita meriah i bas ingan e. Banci jadi erkiteken fasilitas si lengkap, nyaman inganna, mejile pelayanenna, ramah ras full senyum kerina si erdahin je, rsd.-na. Ertina, pasti lit alasen si erbahanca kita meriah reh ku ingan e. Mungkin bage ka si igejapken enterem kalak si reh ku perpulungen kalak si tek si pemenana, entah pe Jemaat Mula-mula. I bas kesempaten enda radu ras kita erlajar kerna gaya hidup jemaat mula-mula si erbahanca kerina kalak erate ngena.
Mpebagesi Teks Si Man Ogen
Teks si man ogenta sendah lit i teruh judul perikop “Kalak si tek man Yesus nggeluh sikeleng-kelengen.” Sope perikop si jadi ogenta sendah, ituriken maka lit kira-kira 3 ribu kalak si tek man Yesus Kristus janah mindo iperidiken. Adi sioge terdauhen, bindu 4:4, lit peningkaten jumlah anggota perpulungen kalak si tek jadi 5 ribu kalak. Adi terus sioge bindu 5:14; 6:7; 9:31; 16:1, reh buena jumlah anggota perpulungen kalak si tek man Yesus Kristus. Banci ikataken terjadi pelipatgandaan si luar biasa i tengah-tengah komunitas kalak si tek. Tentu jadi pengungkunen man kalak paksa si e, kai si menyebabken jumlah perpulungen kalak si tek semakin bertambah?
Si pemena, adi sioge bindu 2, benaken ay. 1, tek kita maka lit peran Kesah Si Badia si nuanken kiniteken man Yesus Kristus ku bas pusuh perukuren kalak si megiken Kata Dibata. Pengakun kerna pendahin Kesah Si Badia enda seh kel penting erkiteken bas kita kalak si tek masih denga lit potensi kiniganjangen ukur si erbahanca kita “merasa sangat berjasa” i bas mantekki sada perpulungen entah pe gereja, padahal situhuna la lit gegeh beluhta selain erkiteken kuasa Kesah Si Badia. Kita hanya alat ngenca guna ngelakoken kerina si mehuli sue ras peratenNa.
Si peduaken, lit kiniteruken ukur, kininggiten ras ketutusen i bas erlajar kerna Kata Dibata. I bas ay. 42 ikataken nina, “Perpulungen e tutus megiken pengajaren i bas rasul-rasul nari. Nggeluh ia sikeleng-kelengen bagi si ersenina. Ras-ras ia ncepik-ncepik roti dingen ras-ras pe ia ertoto man Dibata.” Karakter meteruk ukur, ketutusen ras nggit iajari enda si erbahanca perpulungen e nggeluh sikeleng-kelengen sada ras si debanna.
Si peteluken, nggeluh ersada sikeleng-kelengen sada ras si debanna, bage pe nggeluh erkemalangen man Dibata, mpeturah erbage-bage tanda sengget i tengah-tengah perpulungen kalak si tek (ay. 43). Tanda-tanda sengget (mujizat, keajaiban) akap kami labo terjeng erkaiten ras hal-hal si spektakuler, bagi umpamana, si cempang-cempang erdalan, si pentang erpengidah, rsd. Tanda-tanda sengget banci terjadi i bas hal-hal si i bas pengakapta sepele, entah pe remeh. I bas ay. 44-45, keajaiban banci sigejapken i tengah-tengah perpulungen arah kininggiten erpalasken keleng ate, tutus ate ras meriah ukur, guna saling berbagi kai si lit, termasuk je berbagi erta-ertana guna keperlun sekalak-sekalak. I bas ay. 46-47, mujizat banci sigejapken perpulungen arah kiniersadaan ukur i bas erbakti man Dibata, janah kerina kalak erngena ate man perpulungen e. Karakter meteruk ukur, ketutusen ras kininggiten iajari pe situhuna keajaiban si banci siidah i bas perpulungen paksa si e, sebab labo murah mperobahi kiniganjangen ukur jadi meteruk ukur, labo hal si murah mperobahi karakter kisat jadi tutus ras nggit erlajar kerna Kata Dibata.
 |
| Versi Audio Silahkan Klik : https://youtu.be/n5_qqQOPbiA |
Pengkenaina
Ogenta sendah encidahken kai saja si menyebabkan komunitas kalak Kristen jadi ingan favorit kalak si enterem paksa si e. Si pemena, erkiteken pendahin Kesah Si Badia. Emaka adi ateta Runggunta jadi ingan favorit, hal si pemena si harus ilakoken e me ertoto, mindo penampat arah Kesah Si Badia nari gelah Runggunta jadi ingan si nyaman, ingan si selalu dirindukan, ingan si maba dame sejahtera ras keriahen. Si peduaken, lit kiniteruken ukur, kininggiten ras ketutusen i bas erlajar kerna Kata Dibata. Emaka adi ateta Gerejanta jadi ingan jumpa si mereken keriahen, harus lit i bas dirinta, kiniteruken ukur, kininggiten ras ketutusen i bas erlajar kerna Kata Dibata. Gundari enggo melala Runggun si ngelitken kelompok-kelompok Baca Alkitab, kelompok-kelompok Baca Gali Alkitab (BGA), enda penting akap kami, sebab Kebaktin-kebaktin, PJJ, ras PA-PA lenga cukup i bas kita erlajar kerna Kata Dibata. Si peteluken, marilah sitingkatken kualitas nggeluh ersada sikeleng-kelengen sada ras si debanna, bage pe nggeluh erkemalangen man Dibata, gelah turah erbage-bage keajaiban i tengah-tengah perpulungen masing-masing.
PA-ta sendah ibahan secara gabungen. Adi tetap sipisah pe, seri bahanna kerina, i bas rangka mendukung rencana Kategorial Saitun ngelitken sada ingan perjumpan si igelari “Sapo Saitun” i RC Sukamakmur. Uraian lengkap kerna rencana enda banci sioge i bas BUKU PA-ta masing-masing. Arah bahan ogenta sendah, tema, bage pe tujun PA-ta sendah, iajuk kita kerina guna erbahan “keajaiban” alu ikut muat bagin i bas rencana Kategorial Saitun enda. Em tandana kita nggeluh ersada sikeleng-kelengen sada ras si debanna, bage pe nggeluh erkemalangen man Dibata. Tek kita adi kerinana muat bagin maka rencana enda banci terlaksana alu mehuli. Ertoto kita adi enggo lit kari Sapo Saitun enda, banci tuhu-tuhu sipergunaken alu mehuli guna semakin meningkatkan kininggiten ras ketutusen i bas erlajar kerna Kata Dibata, jadi ingan jumpa si maba keriahen guna kemulian gelar Dibata i tengah-tengah GBKP melalui Kategorial Saitun. Emaka mari radu ras kita muat bagin i bas rencana enda. Dibata si ncukupken kerina kebutuhenta.
Tidak ada komentar:
Posting Komentar