SUPLEMEN PJJ GBKP TGL. 12 - 18 APRIL 2026

Pdt. Larena Sinuhadji (Nd. ReyRapha Tarigan)

ERTA-ERTA PERTENDIN - 2 Korinti 4:7-12

(Rangkaian Paskah 2026)

Penaruh

Puji Tuhan ninta man Dibata erkiteken rangkaian Paskah tahun enda enggo banci silaksanaken alu mehuli. Amin pe i bas medsos iteh kita maka lit Gereja si mengalami persekusi i tengah-tengah peringeten rangkaian Paskah tahun enda. I bas si e tentu kita pe harus mediate ras terus notoken gelah Gereja-gereja si mengalami persekusi tetap megegeh, janah negara pe pang guna mereken pembelaan man kalangan si tertindas.

PJJ sekali enda labo terjeng erbahan renungen kerna kegiaten-kegiaten si enggo ilakoken i bas rangkaian Paskah tahun enda, tapi sekaligus radu ras kita mengevaluasi, lit entah lang maknana rangkaian Paskah tahun enda man banta?

Mpebagesi Ogen

Ogenta sendah lit i teruh judul perikop “Erta-erta pertendin i bas kudin taneh.” I bas terj. TB-LAI nina, “Harta rohani dalam bejana tanah.” Judul enda seri ras tema PJJ-ta sendah, janah adi sioge i bas ogenta sendah, tema PJJ ras judul perikop enda lit i bas ay. 7. Ertina ay. 7 enda akap kami si jadi fokus i bas PJJ-ta sendah. Sope bengket kita ku bas ay. 7, leben siorati latar belakang engkai makana lit pernyataan Paulus kerna erta-erta pertendin i bas kudin taneh enda.

Adi sioge bindu 11:5 lit ikataken Paulus kerna “rasul-rasulndu si mbelin la teralang e,” terj. BIMK nina, “rasul-rasul yang luar biasa itu” (super-apostles) Enda akap kami salah sada perbeben Paulus si mbelin i bas Surat 2 Korinti enda. Lit pembedaan-pembedaan si ibahan perpulungen nandangi Paulus ras rasul-rasul si deban. Rasul-rasul si deban ianggap luar biasa, sedangken Paulus ianggap biasa-biasa saja. Rasul-rasul si deban ianggap lebih beluh ngerana, lebih meyakinkan secara kharismatis, janah lebih berhasil secara lahiriah. Sementara Paulus ianggap kurang beluh ngerana, geluhna dem alu kiniseran, janah la memenuhi syarat sebage pemimpin si sukses secara ukuren doni.

Persoalenna situhuna labo soal pembedaan perlakukan ras perbandingan antara Paulus ras rasul-rasul si deban. Lit persoalen si lebih mekelek, e me persoalen pemahamen teologis perpulungen si la lengkap. Lit pemahamen teologis si berkembang i tengah-tengah perpulungen kerna teologi kemuliaan (glory theology), e me: Allah hadir dalam kekuatan, Allah hadir dalam keberhasilan, Allah hadir dalam hal-hal yang spektakuler. Lit kin si salah i bas teologi kemuliaan enda? Lang! Si salah adi e ngenca si ipahami ras ijemak perpulungen. Sebab i bas kiniteken Kristen, Dibata labo terjeng hadir i bas keberhasilen entah pe hal-hal si spektakuler. Dibata reh i bas kerina keadaan. Dibata pe reh i bas kiniseran ras kematen, bagi si enggo inanami Kristus sope IA keke i bas si mate nari ras nangkih ku surga. Ertina glory theology harus diimbangi dengan cross theology (teologi salib). Tidak ada kemuliaan tanpa salib Kristus.

Adi teologi kemuliaan ngenca si ijemak perpulungen, enggo pasti la lit sada pe perpulungen si nggit ngenanami kiniseran. Denial (menyangkali) terhadap kerina bentuk perbeben ras kiniseran. Adi ngenanami kiniseran, mis “pura-pura bahagia” gelah ula sempat teridah kiniseran e. Adi umpamana lit perpulungen si ngenanami kiniseran, mis ihakimi sebage kurang iman. Apai ka adi lit pemimpin rohani si ngenanami kiniseran janah ipenjara bagi Paulus, enggo pasti la teraloken perpulungen sebab la encidahken pemimpin si luar biasa secara doni.

I bas dampar si deban, adi sipakeken teologi kemuliaan, enggo pasti la lit diakonia, erkiteken diasumsikan la lit sada pe perpulungen si butuh penampat. Adi la lit diakonia enggo pasti la lit mediate (empati) sada ras si debanna. Adi la lit mediate enggo pasti keleng ate Kristus la banci sidalanken i tengah-tengah perpulungen. Kerina perpulungen saling bersaing encidahken kesuksesenna, alu sibuk saling menilai kondisi geluh kalak si deban. Kondisi si bagenda rupana tentu la sue ras peraten Dibata i bas Yesus Kristus.

Alu latar belakang enda, semakin tangkas kai si imaksudken Paulus i bas ay. 7, “Kami si jadi ingan nimpan erta-erta pertendin e, desken kudin taneh saja ngenca, gelah teridah maka gegeh si mbelin e i bas Dibata nari kap, labo i bas kami nari.” I bas terj. TB-LAI nina, “Tetapi harta ini kami punyai dalam bejana tanah liat, supaya nyata, bahwa kekuatan yang melimpah-limpah itu berasal dari Allah, bukan dari diri kami.” Erta-erta pertendin i jenda e me: keselamaten i bas Kristus, pemeteh kerna ajaren-ajaren Kristus, kepentaren Dibata i bas Kristus, kemulian Dibata i bas Kristus (ay. 6), rsd.-na. Kudin taneh e me simbol kerapuhan entah pe kelemahan fisik. Sedekah kita geluh i doni enda, enggo pasti melala keterbatasan, khususna kelemahan fisik, mental, psikis, rsd.-na. Kondisi si bagenda rupana harus ngasup kita ngalokenca sebab memang bage kinata kegeluhen i doni enda. Kalak si erkiniteken e me kalak si menyadari kelemahen entah kerapuhenna, i bas si e maka tuhu-tuhu ernalem ia man Dibata. La lit sitik pe i bas pusuh ukurna guna meganjang ukur mengandalkan gegeh beluhna.

Adi enggo ernalem kita man Dibata, teklah kita maka kuasa Dibata tuhu-tuhu erdahin i bas geluhta. I bas si e ersaksi Paulus i bas ay. 8-9, nina, “Arah apai pe kami itindih, tapi la kami meripuk. Bingung kami, tapi la seh putus asa. Iayak-ayak musuh kami, tapi la kami itadingken Dibata. Idampesken kalak kami, tapi la seh getem.” Ertina kuasa Dibata tuhu-tuhu tangkas i bas kiniseran si inanami Paulus. Tapi i jenda labo berarti harus sidarami lebe kiniseran gelah banci sinanami kuasa Dibata. Si benar e me, ‘di kune kiniseran entah pe perbeben nderpa kegeluhenta, hadapilah dengan berserah kepada Kristus, bagi si enggo iteladanken Paulus.

Versi Audio silahkan klik : https://youtu.be/spKmcmgb3c0

Pengkenaina

I bas PJJ-ta sendah mulihi kita isingetken kerna geluh ernalem man Dibata i bas Yesus Kristus. Mbera-mbera rangkaian Paskah tahun enda erbahanca reh ernalemna kita man Dibata. Tuhu-tuhu berserah kita man Dibata. Alu bage banci tuhu-tuhu sigejapken kuasa Dibata si luar biasa i bas geluhta. Tapi i jenda labo berarti sinik saja kita nimai kuasa Dibata. Tetap proaktif kita ertoto, ndarami jalan keluar adina lit kita i bas perbeben entah pe kiniseran. Tetap jadi “penyembuh yang terluka,” ertina tetap mediate nandangi kiniseran entah pe perbeben kalak si deban, amin pe situhuna lenga dung perbebenta. Teklah kita maka Dibata i bas Kristus enggo menang naluken kematen. Enggo leben ibentasi Kristus kerina bentuk kiniseran bahkan kematen, janah Kristus enggo menang naluken kiniseran ras kematen. Ertina Dibata pe erkuasa i bas kiniseran ras perbeben si nialami kita. Tek kita maka ibereken Dibata serpang pulah bagi si isaksiken Paulus i bas ogenta sendah.

Kerna evaluasi nandangi rangkaian Paskah tahun enda, akap kami, leben sievaluasi dirinta masing-masing. Apakah rangkaian Paskah tahun enda hanya terjeng berlalu bage-bage saja, entah lit maknana man banta? Adi lit maknana, tindaken konkrit kai si bakal ilakoken kita ku wari-wari si reh enda? Sebab si paling penting e me perobahen si konkrit pribadi lepas pribadi. Em tandana maka tuhu-tuhu sipakeken erta-erta pertendin e i bas kegeluhenta. Banlah sada tekad konkrit si banci siukur ketercapaianna. Umpamana, kenca dung Paskah tahun enda, reh tutusna aku ngoge Pustaka, 2 pasal sada wari. Kenca dung Paskah tahun enda, reh tutusna aku ku PJJ, minimal 2 kali i bas sada bulan. Kenca dung Paskah tahun enda, lebih mediate aku kerna iuren-iuren PJJ, Mamre, Moria, enggo lanai isingetken entah pe itagih setiap bulan. Kenca dung Paskah tahun enda, ikut muat bagin i bas dahin-dahin perkunjungen, minimal 2 kali i bas sada bulan. Ras tekad-tekad konkrit si deban. Erta-erta pertendin si lit i bas kita, ula terjeng isimpan saja, tapi harus sipakeken, sikonkritken, i bas kegeluhenta si tep-tep wari.

Kenca enggo ilakoken evaluasi secara pribadi, maka bengket kita ku bas evaluasi secara Runggun kerna pelaksanaan rangkaian Paskah i bas tahun enda. Kai saja si jadi kendala, piga persen si reh, rsd.-na bagi si enggo isingetken i bas Buku PJJ-ta. Dibata si mpengasup kita guna semakin bertumbuh di dalam Kristus.