SUPLEMEN PA MAMRE GBKP TGL. 12 - 18 APRIL 2026

Pdt. Larena Sinuhadji (Nd. ReyRapha Tarigan)

(Rangkaian Paskah & HUT Saitun)

Ogen : Keluaren 20:1-12

Tema : NGKELENGI TUHAN RAS MEHAMAT MAN BAPA NANDE

Tujun : Gelah Mamre :

1) Meteh uga cara engkelengi Tuhan ras mehamat man bapa nande rikutken teks

2) Ngelakoken Paskah arah erbahan aksi man Saitun

Metode : Diskusi & Aksi

Penaruh

Kerina agama ras budaya akap kami ngajarkenca kerna mehamat man orang tua. I bas budaya Yahudi, mehamat man orang tua masuk ku bas perentah si pe-5-ken i bas 10 Pedah Dibata (Kel. 20; Ul. 5). I bas kiniteken Kristen pe lit perentah guna mehamat man orang tua, banci sioge i bas Matius 15:4 rikut ayat-ayat paralelna i bas Kitab Injil, bage pe i bas Epesus 6:2. I bas kesempaten enda radu ras kita mulihi isingetken kerna mehamat man bapa nande rikutken teks ogenta sendah.

Mpebagesi Ogen

Ogenta sendah akap kami enggo semal, e me kap kerna 10 Pedah Dibata (10 Perintah Tuhan) si ibereken Tuhan man Musa i deleng Sinai guna jadi gelemen bangsa Israel kenca enggo ibebasken Tuhan i bas perbudaken Mesir nari. Ipeteguhi Tuhan mulihi perpadanenNa ras bangsaNa si enggo pernah ibelasken Tuhan man Abraham (bdk. Kej. 15:16,18; 17:7), maka Dibata ersura-sura njadiken Israel sada bangsa si nggeluh guna Tuhan (bdk. Kel. 19:5,6). Bangsa enda harus merespon kekelengen Tuhan si enggo mbebasken bangsa e i bas perbudaken nari alu nggeluh setia, dem pengataken bujur ras nggeluh rikutken peratenNa saja.

Ay. 1-2, jelas ipetandaken Dibata ise IA man bangsaNa, e me Dibata si dem alu  kuasa, si enggo mbebasken bangsaNa i bas perbudaken Mesir nari. Si e kerina ilakokenNa erkiteken keleng ateNa si mbelin man umatNa. 10 Pedah Dibata enda ibagi jadi dua bagin, ay. 3-11 (perentah I-IV)  ngerana kerna hubungen ras Dibata. Dibata si mindo bangsaNa gelah nembah man baNa saja, ula sembah dibata-dibata si deban. Kebiasaan nini-nini bangsa enda ras bangsa sekelewet banci jadi mempengaruhi kebulaten ukur bangsa enda ersembah man Tuhan. Kesetian nembah man Dibata icidahken alu la nembah man gana-gana, sebab Dibatanta, e me Dibata si percimburu. Gelar Tuhan e badia, e maka ula sia-siaken entah salah gunaken guna tujun si la mehuli. Inget ras pebadiaken wari Sabat. Enam wari enggo ibereken Tuhan kesempaten guna erdahin, janah wari pepituken e me wari pengadi-ngadin si man persembahenken man Tuhan saja. Maknana labo hanya membangun hubungen ras Tuhan, tapi pe pekesahken kenca enggo latih erdahin sekaligus membangun relasi ras keluarga.

Ay. 12-17 (perentah V-X) ngerana kerna hubungen manusia ras manusia. Ibenaken alu ngehamati orang tua, ngkelengi ras ngergai kegeluhen sesama manusia alu meneken kesah kalak si deban, la erlua-lua, la mbuat sikerajangen kalak, la erkata guak ras la mengga ateta si kerajangen kalak.

Si jadi fokus i bas ogenta sendah e me perentah si pelimaken, nina, “Mehamatlah man bapandu ras nandendu, gelah banci kam ndekah nggeluh i bas negeri si Kubereken man bandu pagi.” Sebage perbandingen, si tertulis i bas Ul. 5:16 nina, “Hamati nandendu ras bapandu; enda me perentahKu, TUHAN Dibatandu, gelah mejuah-juah, janah cawir metua kam i bas negeri si Kubereken man bandu e.” Mehamat man orang tua labo erkiteken uga perbahanen orang tuanta man banta, tapi erkiteken perentah Dibata. Ertina si jadi palas i bas kita ngehamati orang tuanta e me Dibata, labo orang tuanta. E maka i bas perentah e labo lit je ikataken “orang tuandu si mehuli ...” rsd. Sifat entah pe karakteristik mehamat man orang tua mengandung konsekuensi janji pasu-pasu (berkat) i bas Dibata nari e me: panjang umur (ndekah nggeluh), mejuah-juah, ras cawir metua.

Perentah si pelimaken enda termasuk i bas rencana Dibata erbahan sada bangsa si orientasi geluhna berobah total, baik i bas relasina ras Dibata (perentah I - IV) bage pe i bas relasina ras sesama manusia (perentah V - X). Rantai kesalahan-kesalahan yang terjadi pada masa lalu harus diputuskan untuk memulai suatu generasi yang baru. Ertina adi i bas bangsa e enggo pernah terjadi mehamat man orang tua erpalasken uga perbahanen orang tuana man bana harus siperobahi palasna, gelah tuhu-tuhu terjadi mehamat man orang tua erpalasken peraten Dibata. I bas sada sisi enda merupaken pengajaren man generasi muda. Tapi i bas sisi si deban, enda merupaken pengajaren man orang tua gelah tuhu-tuhu menyadari posisina si penting i bas mendidik anak-anakna entah pe generasi muda, e me mereken contoh entah pe teladan si mehuli, janah tuhu-tuhu jadi orang tua si erkemalangen man Dibata.

Versi Audio silahkan klik : https://youtu.be/HyHvWZNeQ-U

Pengkenaina

PA-ta sendah mulihi ngingetken kita kerna tugas tanggung jawabta selaku anak, e me mehamat man bapa ras nandenta. Penungkunen man banta, enggo nge sisehken tanggung jawabta man orang tuanta? Melala bentuk konkrit si banci isehken kita sebage tanda mehamat. Selain dukungan finansial, tentu perhatianta nandangi orang tuanta seh kel pentingna, sicukupken kerina si jadi kebutuhenna, baik kebutuhen fisik, psikis, ras mentalna. I bas si e tentu keleng ate Kristus harus leben nggeluh i bas dirinta, gelah ipengasupNa kita engkelengi orang tua tanpa syarat. Perban mehuli nge bapa ras nande ndube man bangku, maka kuhamati ia asa gundari. Mungkin lit ka kita si ngatakenca, “Man kai kuperdiateken bapa ras nande, ndube pe la iperdiatekenna kami anak-anakna? Adi lit denga kita si bage perukurenta, pindolah gegeh i bas Dibata nari gelah ipengasup Dibata kita ngalemi salah orang tuanta, janah ipengasup Dibata kita engkelengi orang tuanta alu palas keleng ate Kristus. Keleng ateta man orang tuanta e me wujud nyata keleng ateta man Dibata Bapa i bas Yesus Kristus.

I bas dampar si deban, kita pe iajuk gelah tuhu-tuhu menyadari posisinta si penting i bas mendidik anak-anakta entah pe generasi muda, e me mereken teladan si mehuli, janah tuhu-tuhu jadi orang tua si erkemalangen man Dibata. Gelah anak-anakta pe banci ngusih kita orang tuana, jadi anak-anak si erkemalangen man Dibata.

PA-ta sendah i bas rangka Rangkaian Paskah ras HUT Saitun GBKP. Ngataken bujur kita man Dibata erkiteken rangkaian Paskah tahun enda banci erdalan alu mehuli. Mbera rangkaian Paskah tahun enda mabai kita ku si mehuli. Lit maknana man banta, labo terjeng berlalu bage-bage saja. I bas si e tentu harus lit tekad, tandana maka Paskah tahun enda tuhu-tuhu bermakna man banta. Bahanlah tekadta si konkrit, si banci siukur ketercapaianna. I bas PA-ta sendah iajuk kita gelah erbahan aksi konkrit nandangi Kategorial Saitun, tandana kita pe ikut ngerayaken HUT Saitun GBKP. Kai saja aksi konkritna? Tentu kam ngenca si metehsa, sebab kebutuhen setiap Runggun enggo pasti berbeda. Sisungkun saja kai si perlu sidukung i bas Kategorial Saitun nari. Umpamana, masalah dana, program-program kerja sama, rsd.-na. Dibata si mpengasup kam kerina Mamre guna mehamat man nande bapa, bage pe ikut muat bagin i bas mendukung pelayanan Saitun GBKP.