SUPLEMEN PA MORIA GBKP TGL. 12 - 18 APRIL 2026

Pdt. Larena Sinuhadji (Nd. ReyRapha Tarigan)

Pengalaman Pribadi

Ogen : Job 42:1-6

Tema : TUHAN NGASUP NGELAKOKEN KAI PE

Tujun : Gelah Moria :

- Meteh penandai Job kerna Tuhan

- Nuriken pengalamenna si mpebagesi penandaina kerna Tuhan

Metode PA : Diskusi & Sharing

Penaruh

Megi ras meteh kerna Dibata tuhu berbeda ras nandai ras mengalami Dibata sendiri. Adi megi-megi kerna Dibata banci arah pengalamen (kesaksin) kalak (penuri-nuri kalak) entah pe asum sibegi kerna Kata Dibata arah khotbah si isehken Pdt. entah Pt./Dk. Entah meteh kerna Dibata banci sidatken kita arah buku-buku teologi si banci panjang lebar penjelasenna iturikenna banta. Tapi adi la kita secara pribadi (personal) nandai Dibata, labo banci erbahanca kita bertumbuh i bas Tuhan. Arah relasinta ras Tuhan, subuk saat teduh, bage pe tetap Tuhan siandalken i bas situasi-situasi si la bagi ukurta jadi, arah si e, maka reh mbagesna penandaita kerna Dibata. Ras e pe harus siakui, tetap nge kita terbatas. Ertina, labo banci kuh penandaita kerna Dibata, sebab IA pencipta, Alpha & Omega, si la terbatas, sedangken kita tinepaNa si terbatas.

Emaka, arah bahan PA-nta sekali enda, ipersingeti man banta, kai pe si terjadi i bas geluhta, kerina i bas kedaulatan Tuhan (sura-sura Tuhan).

Mpebagesi Pengangkan Kerna Ogen

Perikopta merupakan pendungi kisah Job, si banci ikataken labo hanya berakhir “happy ending” tapi Job mengalami transformasi i bas ia nandai Dibata. Job 42:1-6 e me klimaks (puncak) perjalanan iman Job, labo erkiteken kerina penungkunen banci terjawab, tapi erkiteken relasina ras Dibata si berubah secara radikal. Perikop enda bas Pustaka Si Badia, la ibere judul, tapi TB-LAI mere judul “Ayub mencabut perkataannya dan menyesalkan diri.” I bas TB-LAI Ed. 2, “Ayub menarik kembali perkataannya dan menyesal.” Piga-piga poin penting si banci sidat kita arah perikop enda:

Si pemena ay. 2, Dibata si mada kuasa, Dibata si berdaulat penuh i bas geluhta. Radu ras sieteh uga kiniseran si ialami Job. Ertana bene, anak-anakna mate, termasuk dirina sendiri mengalami sakit ugahen mulai i bas tapak-tapak nahena nari terus ku piserenna. Sedangken ia kalak mehuli, setia erkemalangen man Dibata. Teologi si berkembang paksa si e, kalak si mehuli dingen erkemalangen man Tuhan, la pernah mengalami penderitaan. Tapi kepeken jadi bas Job. I je, teridah kemahakuasan Tuhan, kai pe ngasup Dibata ngelakokenca. IA berdaulat penuh i bas geluh manusia.

Si peduaken ay. 3, ketebatasen manusia ngantusi sura-sura Dibata. Nina Job, “Enggo kucakapken si la ku erti, perkara-perkara si mejin si la kuantusi.” Terj. TB-LAI, “Tanpa pengertian aku telah bercerita tentang hal-hal yang sangat ajaib bagiku.” Sedari Job maka ia, pedassa ngerana, berusaha menyelami pikiren Dibata alu logikana si terbatas. Padahal Tuhan jauh melebihi pikiren manusia, sebab kita tinepa, sedangken IA si nepa kita.

Si peteluken ay. 5, terjadi perobahen (transformasi) i bas ia nandai Dibata. “Kepeken pemetehku kerna Kam, terjang si ituriken kalak ngenca, tapi genduari alu matangku jine, Kam enggo kuidah.” Terj. TB-LAI, “Hanya dari kata orang saja aku mendengar tentang Engkau, tetapi sekarang mataku sendiri memandang Engkau.” Terjadi perobahen, dari megi-megi saja, tapi genduari salu matana jine enggo idahna Tuhan. Enda me si igelari “transformasi iman.” 
- Dari iman warisan orang tua ke iman pengalaman.
- Dari teori ke relasi.
- Dari informasi (arah kalak begina) enggo terjadi perjumpaan secara pribadi.
Ertina nats enda ngajari kita maka beriman sejati terjadi asum kita jumpa ras Tuhan secara pribadi, termasuk arah erbage pergumulen si ialami kita, i je sigejapken kuasa keleng ate Tuhan. Beriman man Tuhan labo hanya secara konsep, melala sioge buku-buku rohani (buku teologi), rusur sioge Pustaka Si Badia, tapi harus lit perjumpanta ras Tuhan arah erbage kerembakenta termasuk pengendesen geluhta secara total i bas kerina dampar geluhta. Bahasa si rusur sipake, uga kita mengalami Tuhan.

Si peempatken ay. 6, pertobaten sebage respons i bas perjumpan ras Tuhan. “Perban si e mela kal kuakap kerna kai si enggo kubelasken, erkadiola aku, e maka kundul aku i bas abu dapur ras abu taneh.” Terj. TB-LAI, “Oleh sebab itu aku mencabut perkataanku dan dengan menyesal aku duduk dalam debu dan abu.” Icidahken Job kiniteruken ukurna i lebe-lebe Tuhan, dingen turah kesedaren dirina, maka kai si enggo ilakoken ras ibelaskenna labo mewakili kerna perukuren Tuhan. Emaka erkadiola ia. Ertina i jenda, bertobat labo hanya sekedar merasa bersalah tapi lit transformasi i bas perjumpanna ras Dibata.

Versi Audio silahkan klik : https://youtu.be/gcQfFTg0C1E

Pengkenaina

Tema i bas PA-nta, “Tuhan ngasup ngelakoken kai pe.” Arah PA-nta sekali enda, firman Tuhan mpersingeti kita, maka Tuhan e me Dibata si erdolat, Dibata si ngasup erbahan kai pe i bas geluhta. Sebab IA Dibata si mada kuasa, IA nepa doni enda ras kerina isina, termasuk manusia. Kai pe si terjadi i bas geluhta, subuk senang entah pe susah, kerina lit i bas kuasa Dibata. Termasuk kiniseran. Banci kiniseran e erkiteken kesalahenta, tapi banci ka arah kiniseran si ialami kita, teridah kuasa Dibata (bdk. Joh. 9:1), dingen arah si e reh murnina kinitekenna (bdk. 1 Pet. 1:7), adi tetap kita ernalem man baNa. Ras siimani, i bas kai pe Dibata erdahin guna kiniulin man kalak si enggo ipilih Dibata arah sura-suraNa (bdk. Roma 8:28).

Si paling penting man banta, ula terlalu pedas kita muat kesimpulen i bas kerina kejadin si ialami kita. Bagi si ialami Job. Sebab terbatas kel kita ngantusi sura-sura Dibata. Job ngajari kita labo kerina persoalen banci langsung ijawab ras iselesaiken (engkai maka kita menderita, engkai pertotonta lenga ijawab Tuhan, engkai geluh enda bagi la adil, rsd.). Labo kerina misteri i bas geluhta enda banci langsung ijawab tapi tetap ngasup kita ngalakenca arah kerembakenta ras Tuhan (perjumpaanta secara pribadi ras Tuhan). Kiniseran si ialami kita banci jadi sada kesempaten man banta guna lebih nandai Dibata, nggejapken keleng ateNa ras kuasaNa si mbelin. Rikutken pengalamen Job, maka ras kiniseran si ialamina, i je makin reh bagesna penandaina kerna Dibata. E maka man banta Moria, amin kai pe si terjadi i bas geluhta, Tuhan labo saja ngasup ngelakoken kai pe, tapi IA pe ngasup ndungi ras erbahanca mehuli kai pe si ialami kita. Si pagit e pe banci iubahken Tuhan jadi entebu.