SUPLEMEN PA MAMRE & MORIA GBKP TGL. 29 JUNI - 5 JULI 2025

Pdt. Larena Sinuhadji (Nd. ReyRapha Tarigan)

HARGANAS

Teks : Keluaren 4:27-31

Tema : ERSADA I BAS KEPATUHEN MAN TUHAN

Tujun : Gelah Mamre & Moria :

1) Nuriken uga kiniersadan Harun ras Musa guna ndalanken Kata Tuhan

2) Ngakui keleng ate Dibata man seisi jabu dingen ersada arah patuh nandangi Kata Dibata

Metode : Diskusi

Penaruh

PA Kategorial Mamre ras Moria i bas minggu enda seri ogen, tema ras tujunna, i bas rangka menyambut Hari Keluarga Nasional si iperingeti i bas tanggal 29 Juni setiap tahunna. Rikutken informasi i bas AI nari, “Hari Keluarga Nasional, disingkat HARGANAS, adalah peringatan tahunan yang dirayakan setiap tanggal 29 Juni di Indonesia. Peringatan ini bertujuan untuk meningkatkan kesadaran masyarakat akan pentingnya keluarga sebagai fondasi utama dalam membangun bangsa yang kuat dan sejahtera.” I bas tahun enda siperingeti Harganas si pe-32 tahun-ken. I bas kesempaten enda radu ras kita erlajar mulihi kerna kiniersadan i bas jabu erpalasken si man ogenta sendah.

Mpebagesi Si Man Ogen

Turi-turin kerna Musa akap kami enggo rusur sibegi entah pe sioge. Musa e me anak pe-3-ken i bas jabu Amram ras Yokhebed. Lit turangna sintua gelarna Miryam ras senina datasenna si tergelar Harun. Sanga Musa tubuh i Mesir, jabu Amram ras kerina jabu kalak Israel lit i bas keadaan itindas bangsa Mesir. Singkat cerita, Musa enda si iutus Dibata guna mulahi bangsa Israel i bas perbudaken bangsa Mesir nari. I bas bindu 3 ras 4 ituriken maka isuruh Dibata Musa guna ndahi Raja Mesir, gelah ibabaina bangsa Israel ndarat i bas Mesir nari. Amin pe piga-piga kali itulak Musa, akhirna ilakoken Musa kai si isuruh Dibata man bana.

Si man ogenta sendah nuriken kerna Harun si reh nemani Musa lawes ku Mesir. Sue ras si enggo ikataken Tuhan man Harun, maka jumpalah kalak enda duana i deleng si badia, iemana Musa seninana, janah ibegikenna kai si ituriken Musa kerna tugas si enggo ibereken Dibata. Kenca enggo kalak enda duana seh i Mesir, ipepulungna kerina pemimpin-pemimpin bangsa Israel, ituriken Harun kerna si enggo ikataken Musa. Kenca enggo ibahan Musa kerina tanda kuasa i lebe-lebe bangsa e, tek bangsa e kerina janah minter mungkuk ersembah man Dibata. I bas turi-turin selanjutna, teridah maka Musa ras Harun ndahiken kerina si enggo iperentahken Dibata man bana.

Pengkenaina

Tema i bas PA-ta sendah ngajuk kita kerina Moria ras Mamre, pernanden ras perbapan, gelah nggit ersada i bas kepatuhen man Tuhan. Si man ogenta sendah mereken teladan man banta kerna uga carana ersada i bas kepatuhen man Dibata. Amin pe situhuna lit turi-turin si deban si i bas Pustaka si encidahken kiniersadan arih perbapan ras pernanden i bas ngelakoken si jadi peraten Dibata. Si pemena lebe sinen arah pihak Musa nari, nggit Musa ngaloken pendilo Dibata guna mulahi bangsa Israel, janah nggit ka ia isampati seninana Harun. Lang situhuna banci saja Musa erpenulak itemani Harun seninana, apai ka enggo ibereken Tuhan man Musa kuasa guna ngelakoken tanda-tanda sengget. Tapi nggit Musa bekerjasama ras Harun guna ndalanken misi Dibata. Si peduaken, marilah sinen arah pihak Harun nari. Bedana ras Musa, kenca enggo ikataken Tuhan man bana, mis Harun berkat tanpa mbue nungkun bagi Musa. Kenca enggo ibegikenna kerina si ituriken seninana Musa, mis ilakokenna kai si jadi tugasna alu mehuli, e me jadi jurubicara. Ertina, nggit ka Harun bekejasama ras Musa guna ndalanken misi Dibata.

Emaka arah turi-turin Musa ras Harun enda, iajuk kita Moria ras Mamre, pernanden ras perbapan, gelah nggit ngaloken pendilo Dibata guna ndalanken misiNa i tengah-tengah doni enda. I bas si e, nggit ka kita bekerja sama selaku perbapan ras pernanden i tengah-tengah keluarga. Rikutken tujun si peduaken i bas PA-ta sendah, si pemena, leben kita iajuk guna ngakui keleng ate Dibata i bas kegeluhenta. I bas si e tentu si jadi penungkunen, uga kin hubungenta ras Dibata secara pribadi? Adi enggo terjalin relasi si ndeher ras Dibata tentu lanai mesera guna ngakui keleng ate Dibata si luar biasa i bas kegeluhenta. Si peduaken, iajuk kita gelah nggit ersada i bas kepatuhen man Kata Dibata. Adi enggo sigejapken keleng ate Dibata tentu labo mesera guna ersada i bas kepatuhen man Kata Dibata. Tapi guna si e tentu labo hal si murah. Lit denga keegoisen i bas dirinta masing-masing. Maun-maun perbapan lenga ngasup mabai isi jabuna guna ertoto, ngoge Pustaka, erbahan mezbah keluarga, rsd. Maun-maun ka pernanden nimai perbapan si menakenca. Piah dungna la sada pe berinisiatif guna mabai jabu nggeluh erkemalangen man Dibata. Emaka i bas si e, marilah sipindo gegeh i bas Dibata nari gelah ipengasupNa kita mabai jabuta ersada i bas kepatuhen man Dibata.