SUPLEMEN PA MAMRE GBKP TGL. 4 - 10 MEI 2025

Pdt. Larena Sinuhadji (Nd. ReyRapha Tarigan)

Teks : Heber 6:7-12

Tema : KELENG ATE NAMPATI TEMAN

Tujun : Gelah Mamre :

1) Meteh maka Dibata erkeleng ate man kalak si ncidahken penampat man temanna

2) Tetap ergiah-giah i bas nampati temanna gelah ilakokenndu kai si ipadanken Dibata

Penaruh

I bas lingkungen inganta tading mungkin enggo semal lit persadan STM entah pe Serikat Tolong Menolong. Rikutken informasi AI nari nina, “Serikat Tolong Menolong (STM) adalah organisasi atau perkumpulan yang bertujuan untuk saling membantu antar anggota, terutama dalam hal sosial seperti upacara, pesta, sunat, atau saat ada anggota yang meninggal. STM didasari oleh rasa persaudaraan dan bertujuan untuk mempererat hubungan antar anggota masyarakat.” Anggota STM biasana lintas suku ras agama, ertina kerina suku ras agama lit i bas STM. Enda encidahkenca maka i darat Gereja saja enggo lit kesadaren guna saling tolong-menolong, apai ka i Gereja, enggo pasti kerina anggotana saling peduli ras sisampat-sampaten sada ras si debanna.

Versi Audio Silahkan Klik : https://youtu.be/hSeBeO5YL0c

Mpebagesi Teks

Surat Heber ikirimken man perpulungen-perpulungen kalak si tek si berlatar belakang Yahudi i bas perantauan. La nari tersinget ise gelar penulis surat enda, lit si ngatakenca Paulus, Apolos, Filipus, tapi si pasti si nuliskenca i bas kalangen per-Berita Si Meriah nari entah pe pemimpin-pemimpin Kristen paksa si e. 

Adi sioge bindu 5 ras 6, sope si jadi ogenta sendah, banci sioge maka penulis surat Heber enda mpersingeti perpulungen alu tegas. Engkai maka bage? Sebab pengarapen man Kristus enggo mulai bene janah lit perukuren i bas perpulungen guna nadingken kiniteken man Yesus Kristus (murtad, ay. 6). Kiniteken perpulungen paksa si e banci ikataken jalan di tempat, entah pe la bertumbuh alu mehuli. Situasi si bage rupana terjadi erkiteken penganiayaan si mberat. Tapi amin bagi danak-danak denga kiniteken perpulungen e (bdk. Heb. 5:11-12), penulis surat Heber ngidah lit denga hal si mehuli i bas perpulungen kalak si tek paksa si e. 

I bas ay. 9-10 teridah hal si positif si lit i tengah-tengah perpulungen. Ikataken nina, “Tapi o senina-senina si ikelengi kami, amin bage gia ikataken kami, kerna kam tek nge kami maka lit i bas kam si terulin si lit pertalinna ras keselamatenndu. Dibata bujur nge. Labo pagi ilupakenNa dahin si enggo idahikenndu e. IingetNa nge keleng atendu nandangi IA, si icidahkenndu arah nampati teman-temanndu kalak Kristen, subuk si enggo idalankenndu bage pe si paksana idalankenndu.” Jelas teridah maka amin pe melala tantangen si ialaken perpulungen paksa si e, tapi lit denga si setia nehken keleng ate alu penampat (dukungan dana) si isehken man perpulungen-perpulungen i bas ingan si deban. Kai si ilakoken perpulungen e tuhu-tuhu ipujiken penulis surat Heber janah isingetken maka la ilupaken Dibata kerina si mehuli si enggo ilakoken perpulungen paksa si e. E maka penulis surat Heber ngajuk gelah si mehuli e tetap ilanjutken. 

Penulis surat Heber makeken si mehuli ndai jadi motivasi man perpulungen gelah ula bene pengarapen ras kinitekenna. Adina dahin pelayanen erpalasken keleng ate man Kristus ngasup denga ilakokenna, enggo pasti i bas erpengarapen man Kristus pe ngasup ilakoken perpulungen. Emaka penulis Heber ngatakenca i bas ay. 11 nina, “Ngarap kami gelah kerina kam tetap ergiah-giah ukurndu, gelah kai si iarap-arapkenndu e ialokenndu pagi dungna.” I bas terj. TB-LAI nina, “Tetap kami ingin supaya kamu masing-masing menunjukkan kesungguhan yang sama untuk menjadikan pengharapanmu suatu milik yang pasti sampai pada akhirnya.” Janah gelah banci melangkah ku tahap berikutna i bas erkiniteken, penulis kitab Heber ngajuk perpulungen i bas ay. 12 gelah ngusih kerina kalak si enggo leben erkiniteken, i ja kerina kalak ndai saber i bas nimai janji si enggo ipadanken Dibata. Hal si deban si penting, iajuk perpulungen gelah ula mekisat i bas terus erlajar kerna erkiniteken.

Pengkenaina

Kai bedana persadan kalak si tek man Yesus Kristus ras persadan STM ndai? Palas i bas persadan STM biasana e me keleng ate erpalasken adat istiadat, budaya, entah pe kesemalen si umum. Keleng ate doni enda labo berarti la mehuli, saja keleng ate doni enda biasana mengharapkan balasan, entah pe pamrih. Tapi adi persadan kalak si tek palasna e me keleng ate Kristus, kasih agape, keleng ate si nggit erkorban guna kiniulin kalak si deban. Labo terjeng tanpa pamrih, entah pe la iarapken kita balasan i bas kalak si deban nari, tapi si utamana, keleng ate si ilakoken kita e me wujud nyata pengataken bujurta man Dibata. Janah gelah i bas bentuk kai pe keleng ate si isehken kita man kalak si deban, gelar Dibata termulia.

I bas PA-ta sendah iajuk kam kerina Mamre gelah semakin meningkatkan kualitas ras kuantitas keleng atendu si secara konkrit iwujudken alu erbage-bage hal. E maka hal si penting si harus tetap silakoken Mamre e me ngataken bujur man Tuhan. Sebab geluhta, rikut kai pe si lit bas kita labo erkiteken gegeh beluhta semata tapi erkiteken perkuah ate Tuhan. Pengataken bujurta man Tuhan harus sicidahken alu Mamre tetap erdiate ras erpemere. Motto "Mamre Erpemere Mamre Erdiate" harus terus ikonkritken alu erbage perbahanen si mehuli subuk secara pribadi bage pe secara institusi kelembagaan Mamre. Secara kelembagaan, enggo mbue perbahanen si nyata ilakoken Mamre. Umpamana, nampati beasiswa man siswa ras mahasiswa anak GBKP si berprestasi tapi secara finansial kurang. Beasiswa man kalak si kurang mampu. Mereken modal usaha man anggota Mamre si secara ekonomi kurang mampu, mereken seminar-seminar si berkaitan ras kiat membangun usaha era digital, rsd. Bage pe secara pribadi mbue hal konkrit si enggo ilakoken janah harus terus ilakoken, umpamana, mereken infomasi lowongan pekerjaan man si membutuhken, mereken senyum - sapa - salam, mereken motivasi, bahkan mereken pinjamen man senina turang si terteki. Sebab lit ka kalak minjam labo guna membangun usaha tapi guna hal-hal si sifatna konsumtif, entah pe guna judi online.

Dahin nehken kekelengen labo pernah lit kata finish (selesai), tapi harus terus-menerus sitingkatken kualitas ras cakupenna. Sebab jelas firman Tuhan ndai mpersingeti kita, ugapa pe keadaanta, entah pe situasi ekonominta, asa gegeh kengasupen, rikutken keriahen ukurta, sisampati kekelengenta si sangana butuh pertolongen i bas kita nari. Mekatep si terjadi, mbue kita kari diskusi, panjang lebar, seh ku tantangen, rintangen. Lit ka si ngerana, “Enggo sisampati, labo ka ngataken bujur, malah icikurakina ka kita.” Piah dungna tantangen e erbahanca kita mundur guna nampati, entah pe guna erbahan si mehuli. Ula sempat terjadi, dekahen diskusi, saling mereken pendapat ras berdebat, tapi la lit bukti konkrit guna erdiate ras erpemere. Mari sibenaken dari diri sendiri, mulai dari hal kecil, mulailah guna peduli, empati man kalak i sekelewetta si membutuhken penampat i bas kita nari. Dibata si mpengasup kam kerina Mamre GBKP.